Ditiro 6 - BAEBELE e e Boitshepo

Go tlhophiwa ga bathusi ba baaposetole ba supa

¹ Jaana e rile mo metlheng eo, ka palo ya barutwa e ntsifala, ga tsoga ngongorego mo go Bajuta ba Segerika, ka ga Bahebere, ka batlholagadi ba bone ba tlhokomologwa mo mphong ya malatsi otlhe.

² Mme ba ba 12 ba bitsa bontsi jwa barutwa, ba re: “Ga go a tshwanela fa re ka tlogela lefoko la Modimo, ra ya go aba dijo.

³ Ra re: Bakaulengwe, itebalebeleng banna ba supa mo go lona, ba ba bolelwang ka molemo, ba ba tletseng Mowa le botlhale, ba re ka ba tlhomelang tiro e.

⁴ Rona re tlaa nnela ruri mo thapelong, le mo tirelong ya thuto ya lefoko.”

⁵ Lefoko le la kgatlha bontsi jotlhe, mme ba tlhaola Setefane, e le monna yo o tletseng tumelo le Mowa o o Boitshepo, a na le Filipo, le Perokoro, le Nikanore, le Timone, le Paremenase, le Nikolao, motho wa Antioke yo o ineetseng mo Sejuteng.

⁶ Ba ba baya fa pele ga baaposetole; ya re ba sena go rapela ba ba baya diatla.

⁷ Mme lefoko la Modimo la tota; le palo ya barutwa ya ntsifala mo gogolo thata mo Jerusalema; lesomo le legolo la baperesiti la ineela mo tumelong.

Go tshwarwa ga Setefane

⁸ Setefane, ka a tletse bopelontle le nonofo, a dira dikgakgamatso tse dikgolo le ditshupo mo bathong.

⁹ Mme ga tsoga bangwe ba lesomo le go tweng la Bagololwa le Bakurinia, le Baalekesanteria, le Bakilikia, le Baasia, ba ganela le Setefane.

¹⁰ Mme ba retelelwa ke go emelelana le botlhale le Mowa o o buang ka one.

¹¹ Foo ba kuketsa batho ba ba reng: “Re mo utlwile a bua mafoko a tlhapatso ka ga Moše le ka ga Modimo.”

¹² Mme ba tlhotlheletsa batho, le bagolwane, le bakwadi, mme ba tla mo go ene ba mo tshwara, ba mo isa mo lekgotleng.

¹³ Ba emisa bapateletsi ba ba reng: “Motho yo, ga a khutle go bua mafoko a tlhapatso ka ga felo fa, fa go boitshepo, le ka ga molao;

¹⁴ gonne re mo utlwile a re, Jesu yo wa Nasaretha, o tlaa senya felo fa, a ba a fetola mekgwa e Moše o e re neetseng.”

¹⁵ Mme botlhe ba ba dutseng mo lekgotleng, ka ba tsepile matlho a bone mo go ene, ba bona sefatlhogo sa gagwe e kete sefatlhogo sa moengele.