எபிரெயர் 13 - இலங்கை இலகு தமிழ் மொழிபெயர்ப்பு

கடைசி அறிவுறுத்தல்கள்

¹ ஒருவர் மீது ஒருவர், சகோதர அன்பில் தொடர்ந்து நிலைத்திருங்கள்.

² அந்நியரை உபசரிக்க மறந்து விடாதீர்கள். ஏனெனில் அவ்விதம் செய்ததனால் சிலர் அறியாமல் இறைதூதர்களையும் உபசரித்திருக்கிறார்கள்.

³ சிறையில் இருப்பவர்களை நீங்களும் அவர்களோடு சிறையில் இருப்பது போலவும், துன்பப்படுகின்றவர்களை நீங்களும் அவர்களோடு துன்பப்படுவதைப் போலவும் எண்ணிக்கொண்டு ஞாபகத்தில் வைத்துக்கொள்ளுங்கள்.

⁴ திருமணம் எல்லோராலும் மதிக்கப்பட வேண்டும். திருமணப் படுக்கை தூய்மையாக காக்கப்பட வேண்டும். தகாத உறவிலும், பாலியல் ஒழுக்கக்கேட்டிலும் ஈடுபடுகின்றவர்களை இறைவன் நியாயம் தீர்ப்பார்.

⁵ பண ஆசையிலிருந்து விலகி, உங்களிடம் இருப்பதைக்கொண்டு மனத்திருப்தியுடன் வாழுங்கள். ஏனெனில் இறைவன், “நான் உன்னைவிட்டு ஒருபோதும் விலக மாட்டேன்; நான் உன்னை ஒருபோதும் கைவிட மாட்டேன்” என்று சொல்லியிருக்கின்றாரே.

⁶ எனவே நாமும் மனத் தைரியத்துடன், “கர்த்தர் எனக்கு உதவியாளர்; நான் பயப்பட மாட்டேன். மனிதன் எனக்கு என்ன செய்ய முடியும்” என்று சொல்வோம்.

⁷ உங்களுக்கு இறைவனுடைய வார்த்தையைக் கற்றுக் கொடுத்த தலைவர்களை ஞாபகத்தில் வைத்துக்கொள்ளுங்கள். அவர்களுடைய வாழ்க்கை முறையின் பிரதிபலனை யோசித்துப் பார்த்து அவர்களுடைய விசுவாசத்தையே நீங்களும் பின்பற்றுங்கள்.

⁸ இயேசு கிறிஸ்து நேற்றும், இன்றும், என்றும் மாறாதவராகவே இருக்கின்றார்.

⁹ பல்வேறுபட்ட விசித்திரமான போதனைகளினால் வழிவிலகிப் போகாதிருங்கள். உண்பவர்களுக்கு எந்தப் பயனும் இல்லாத சடங்கு முறை உணவு வகைகளினால் அன்றி, கிருபையினால் நம்முடைய இருதயம் பலப்படுவதே நல்லது.

¹⁰ இறைபிரசன்னக் கூடாரத்தில் பணிபுரிகின்றவர்கள் அதிலிருந்து உண்பதற்கு உரிமையில்லாத ஒரு பலிபீடம் நமக்கு உண்டு.

¹¹ தலைமை மதகுரு மிருகங்களின் இரத்தத்தை மகா பரிசுத்த இடத்திற்கு பாவநிவாரண காணிக்கையாகக் கொண்டுபோகின்றான். ஆனால் மிருகங்களின் உடல்களோ முகாமுக்கு வெளியே எரிக்கப்படுகின்றன.

¹² இவ்விதமே இயேசுவும்கூட நகர வாசலுக்கு வெளியே வேதனைகளை அனுபவித்து, தமது சொந்த இரத்தத்தின் மூலமாக மக்களைப் பரிசுத்தமாக்கினார்.

¹³ ஆகையால், அவர் சுமந்த அவமானத்தை நாமும் சுமந்து முகாமுக்கு வெளியே அவரிடம் போவோம்.

¹⁴ ஏனெனில் நித்தியமான நகரம் நமக்கு இங்கு இல்லை. வரப் போகின்ற ஒரு நகரத்திற்காகவே நாம் எதிர்பார்த்துக் காத்திருக்கிறோம்.

¹⁵ ஆகவே இயேசுவின் மூலமாய் இறைவனுடைய பெயரை ஏற்று ஒப்புக்கொள்கின்ற உதடுகளின் கனியை துதியின் காணிக்கையாக இறைவனுக்கு இடைவிடாது செலுத்துவோமாக.

¹⁶ நன்மை செய்ய மறக்க வேண்டாம், உங்களிடம் இருப்பதை மற்றவர்களுடன் பகிர்ந்துகொள்ளவும் மறந்துவிட வேண்டாம். இப்படியான பலிகளிலேயே இறைவன் பிரியப்படுகிறார்.

¹⁷ உங்கள் தலைவர்களுக்குக் கீழ்ப்படிந்து, அவர்களுடைய அதிகாரத்திற்குப் பணிந்து நடவுங்கள். ஏனெனில், அவர்கள் கணக்குக் கொடுக்க வேண்டியவர்களாக, உங்கள் மீது கண்காணிப்பு செய்கின்றார்கள். உங்களைக் கண்காணிப்பது அவர்களுக்கு சுமையாக இல்லாது மனமகிழ்ச்சியாக இருக்கும்விதத்தில் நடந்துகொள்ளுங்கள். அவர்களுக்குச் சுமையாக இருப்பது உங்களுக்கு நன்மை தராது.

¹⁸ எங்களுக்காக மன்றாடுங்கள். எங்களுக்கு நல்ல மனசாட்சி உண்டு என்பதில் நாங்கள் நிச்சயமுடையவர்களாய் இருக்கின்றோம். எல்லா வழியிலும் நன்மதிப்புக்குரியவர்களாக வாழவே ஆசைப்படுகிறோம்.

¹⁹ நான் விரைவாக உங்களிடம் வந்து சேருமாறு நீங்கள் மன்றாட வேண்டும் என உங்களிடம் விசேடமாக வேண்டிக்கொள்கிறேன்.

முடிவுரையும் இறுதி வாழ்த்துரையும்

²⁰ நித்திய உடன்படிக்கையின் இரத்தத்தின் மூலமாக செம்மறியாடுகளின் பெரிய மேய்ப்பரான நம்முடைய ஆண்டவர் இயேசுவை மரணித்தோரிலிருந்து எழுப்பிய சமாதானத்தின் இறைவன்,

²¹ தனது விருப்பத்தை நிறைவேற்றுவதற்கு அவசியமான எல்லா நன்மையாலும் உங்களைப் பூரணப்படுத்தி, இயேசு கிறிஸ்துவின் வழியாகத் தமது பார்வையில் பிரியமானதை நம்மில் நிறைவேற்றுவாராக. கிறிஸ்துவுக்கே என்றென்றும் மகிமை உண்டாவதாக. ஆமென்.

²² சகோதரர்களே! நான் உங்களை எச்சரித்தும் ஊக்கப்படுத்தியும் எழுதியிருக்கின்ற இந்த வார்த்தைகளைச் சற்று பொறுமையாய் கேளுங்கள். ஏனெனில் சுருக்கமான ஒரு செய்தியையே நான் உங்களுக்கு எழுதியிருக்கிறேன்.

²³ நமது சகோதரன் தீமோத்தேயு சிறையிலிருந்து விடுவிக்கப்பட்டு இருக்கின்றான் என்பதை நீங்கள் அறிய வேண்டும் என்று நான் விரும்புகிறேன். அவன் விரைவில் வந்தால் நான் உங்களைப் பார்ப்பதற்கு அவனுடனேயே வருவேன்.

²⁴ உங்கள் தலைவர்கள் அனைவருக்கும், இறைவனின் மக்கள் எல்லோருக்கும் எங்கள் வாழ்த்துதல்களைத் தெரிவியுங்கள். இத்தாலியில் உள்ளவர்களும், உங்களுக்குத் தங்கள் வாழ்த்துதல்களைக் கூறுகிறார்கள்.

²⁵ கிருபை உங்கள் எல்லோருடனும் இருப்பதாக! ஆமென்.