கொலோசேயர் 4 - இலங்கை இலகு தமிழ் மொழிபெயர்ப்பு

¹ எஜமான்களே, உங்கள் அடிமைகளை நியாயமாகவும் சமமாகவும் நடத்துங்கள். ஏனெனில் பரலோகத்தில் உங்களுக்கும் ஒரு எஜமான் இருக்கின்றார் என்பதை நீங்கள் அறிந்திருக்கிறீர்களே.

அறிவுறுத்தல்கள்

² விழிப்புள்ளவர்களாயும், நன்றி உள்ளவர்களாயும் தொடர்ந்து மன்றாடுங்கள்.

³ அதேசமயம், கிறிஸ்துவில் வெளிப்படுத்தப்பட்ட மறைபொருளை நாங்கள் அறிவிக்கும்படி, நற்செய்தியை அறிவிக்கும் வழிகளை இறைவன் திறக்க வேண்டும் என்று எங்களுக்காகவும் மன்றாடுங்கள். இந்தப் பணிக்காகவே நான் சிறை வைக்கப்பட்டிருக்கிறேன்.

⁴ நான் அந்த மறைபொருளைத் தகுந்தபடி தெளிவாய் வெளிப்படுத்த கடமைப்பட்டுள்ளேன். எனவே அப்படியே செய்ய வேண்டும் என்பதற்காக மன்றாடுங்கள்.

⁵ விசுவாசிகள் அல்லாத வெளியாருடன் புத்திசாலித்தனமாக நடந்துகொள்ளுங்கள். எல்லாச் சந்தர்ப்பங்களையும் நன்றாகப் பயன்படுத்திக்கொள்ளுங்கள்.

⁶ உங்களது உரையாடல் எப்போதும் கனிவானதாயும் சுவையுள்ளதாயும் இருக்கட்டும். அப்போதுதான் அனைவருக்கும் தக்க பதிலைச் சொல்ல முடியும்.

இறுதி வாழ்த்துரை

⁷ என்னைப் பற்றிய செய்தி எல்லாவற்றையும் என் அன்புச் சகோதரனாகிய தீகிக்கு உங்களுக்குச் சொல்வான். அவன் கர்த்தரின் உண்மையுள்ள ஊழியக்காரனாகவும், எனது சக வேலைக்காரனாகவும் இருக்கின்றான்.

⁸ நாங்கள் எல்லோரும் எப்படியிருக்கிறோம் என்பதை உங்களுக்கு அறியத் தந்து, உங்களை உற்சாகப்படுத்தவே அவனை உங்களிடம் அனுப்புகிறேன்.

⁹ உங்களில் ஒருவனும், எங்கள் நம்பிக்கைக்குரிய அன்புள்ள சகோதரனுமான ஒநேசிமுவும் அவனுடன் வருகின்றான். அவர்கள் இங்கு நடப்பவை எல்லாவற்றையும் உங்களுக்குச் சொல்வார்கள்.

¹⁰ என்னுடன் சிறையில் இருக்கும் அரிஸ்தர்க்கு உங்களுக்கு வாழ்த்துதல்களை அனுப்புகிறான். அப்படியே பர்னபாவின் ஒன்றுவிட்ட சகோதரனான மாற்குவும் வாழ்த்துதல்களை அனுப்புகிறான். (அவனைக் குறித்து ஏற்கெனவே நீங்கள் அறிவுறுத்தல் பெற்றிருக்கிறீர்கள். அவன் உங்களிடம் வந்தால், அவனை ஏற்றுக்கொள்ளுங்கள்.)

¹¹ யுஸ்து என அழைக்கப்படும் யேசுவும் உங்களுக்கு வாழ்த்துதல்களை அனுப்புகிறான். யூதர்களில் இவர்கள் மட்டுமே இறைவனுடைய அரசின் வேலையில் எனது சக ஊழியர்களாக இருக்கின்றார்கள்; இவர்கள் எனக்கு ஆறுதலாகவும் இருந்து வருகின்றார்கள்.

¹² உங்களில் ஒருவனாகவும், கிறிஸ்து இயேசுவினுடைய ஊழியனாகவும் இருக்கின்ற எப்பாப்பிராத்து உங்களுக்கு வாழ்த்துதல் அனுப்புகிறான். நீங்கள் இறைவனுடைய சித்தம் முழுவதிலும் முதிர்ச்சியடைந்தவர்களும், முழு நிச்சயம் உடையவர்களுமாய் உறுதியாய் நிற்க வேண்டும் என்பதற்காக அவன் உங்களுக்காக எப்போதும் வருந்தி மன்றாடுகிறான்.

¹³ உங்களுக்காகவும் லவோதிக்கேயா மற்றும் எராப்போலியில் இருக்கின்றவர்களுக்காகவும் அவன் ஊக்கமாய் வேலை செய்கின்றான் என்பதற்கு நானே சாட்சி.

¹⁴ எங்கள் அன்புக்குரிய வைத்தியன் லூக்காவும், தேமாவும் உங்களுக்கு வாழ்த்துதல்களை அனுப்புகிறார்கள்.

¹⁵ லவோதிக்கேயாவிலிருக்கின்ற சகோதரர்களுக்கும் நிம்பாவுக்கும் அவளுடைய வீட்டில் ஒன்றுகூடுகின்ற சபையினருக்கும் என் வாழ்த்துதல்களைத் தெரிவியுங்கள்.

¹⁶ இந்தக் கடிதம் உங்களிடையே வாசிக்கப்பட்ட பின், லவோதிக்கேயாவிலிருக்கின்ற திருச்சபையிலும் இதை வாசிக்க ஏற்பாடு செய்யுங்கள். அதேபோல, லவோதிக்கேயாவில் இருந்து வருகின்ற கடிதத்தை நீங்களும் வாசியுங்கள்.

¹⁷ “கர்த்தரிடம் நீ பெற்றுக்கொண்ட பணியை நிறைவேற்றும்படி பார்த்துக்கொள்” என்று அர்க்கிப்புவிடம் சொல்லுங்கள்.

¹⁸ பவுலாகிய நான் இந்த வாழ்த்துதலை என் கைப்பட எழுதுகிறேன். நான் சிறை வைக்கப்பட்டிருப்பதை நினைவில் வைத்துக்கொள்ளுங்கள். கிருபை உங்களுடனே இருப்பதாக. ஆமென்.