2 கொரி 5 - இலங்கை இலகு தமிழ் மொழிபெயர்ப்பு

நமது பரலோகக் குடியிருப்பு

¹ நாம் வாழ்கின்ற தற்காலிக வீடாகிய இந்த பூமிக்குரிய கூடாரம் அழிக்கப்பட்டாலும், நமக்கு இறைவன் அளிக்கின்ற கட்டடமாகிய நித்திய வீடொன்று உண்டு. அது மனித கைகளால் கட்டப்படாததும், பரலோகத்தில் உள்ளதுமாக இருக்கின்றது என்பதை அறிந்திருக்கிறோம்.

² அதேநேரம், பரலோக வீட்டை அணிந்துகொள்ளும் ஏக்கத்துடன் இந்த கூடாரத்திலிருந்து தவிக்கிறோம்.

³ அவ்விதம் அணிந்து கொண்டோமானால், ஆடையற்றவர்களாய் காணப்பட மாட்டோம்.

⁴ இந்தக் கூடாரத்தில் இருக்கும் வரையில் ஏங்கித் தவிக்கிறோம். ஏனென்றால், இந்த ஆடையை களைந்துவிட வேண்டுமென்பதற்காக அல்ல, பரலோகக் குடியிருப்புக்குரிய ஆடையை அணிந்துகொள்ளவே விரும்புகிறோம். அப்போது மரணத்துக்குரியது வாழ்வினால் உள்வாங்கப்படும்.

⁵ இந்த முக்கிய நோக்கத்திற்காகவே இறைவன் எங்களை உண்டாக்கி, ஆவியானவரை உத்தரவாதமாய் எங்களுக்குத் தந்திருக்கிறார்.

⁶ ஆகையால் நாம் எப்போதும் மனத்தைரியத்தோடு இருப்பதுடன், உடலாகிய இந்த வீட்டில் குடியிருக்கும் வரை, கர்த்தரிடமிருந்து தொலைவில் இருக்கின்றோம் என்பதையும் அறிந்திருக்கின்றோம்.

⁷ ஏனெனில், நாம் கண்டு நடவாமல் விசுவாசித்து நடக்கின்றோம்.

⁸ நாங்கள் மனத்தைரியத்துடனேயே இருக்கின்றோம். இந்த உடலைவிட்டு அகன்று, கர்த்தரோடு குடியிருக்கவே விரும்புகிறோம்.

⁹ எனவே நாங்கள் இந்த உடலில் குடியிருந்தாலும் அல்லது அகன்று போனாலும், அவருக்கு பிரியமாய் இருப்பதே எங்கள் நோக்கமாகும்.

¹⁰ ஏனெனில் நாம் ஒவ்வொருவரும் உடலில் குடியிருந்தபோது செய்த நன்மையோ தீமையோ, அதற்கு ஏற்ற பலனைப் பெற்றுக்கொள்ளும்படி, நாம் எல்லோரும் கிறிஸ்துவின் நியாயத்தீர்ப்பின் அரியணைக்கு முன்பாக நிற்க வேண்டும்.

ஒப்புரவாக்கும் ஊழியம்

¹¹ ஆகவே கர்த்தருக்குப் பயப்படுதல் என்றால் என்னவென்பதை நாங்கள் அறிந்திருப்பதால், மனிதர்கள் மனந்திரும்பும்படியான பெருமுயற்சிகளை செய்துகொண்டிருக்கிறோம். இறைவன் எங்களை நன்கு அறிவார். அது உங்களுடைய மனசாட்சிக்கும் தெரிந்திருக்கும் என்று நான் நம்புகிறேன்.

¹² நாங்கள் மறுபடியும் உங்களுக்கு முன்பாக எங்களை உயர்த்திக்கொள்ள முயற்சிக்கவில்லை. ஆனால் நீங்கள் எங்களைக் குறித்து பெருமிதம்கொள்ள சந்தர்ப்பத்தையே உருவாக்குகிறோம். அப்போது இருதயத்தைப் பாராமல் வெளித் தோற்றத்தைக் குறித்துப் பெருமைப்படுபவர்களுக்கு உங்களால் தகுந்த பதில் கொடுக்க முடியும்.

¹³ நாங்கள் புத்தி சுவாதீனமற்றவர்கள் போன்று இருந்தாலும், இறைவனுக்காகவே அப்படியிருக்கிறோம். நாங்கள் தெளிந்த மனமுடையவர்களாக இருக்கின்றோம் என்றாலும், உங்களுக்காகவே அப்படியிருக்கிறோம்.

¹⁴ நம் எல்லோருக்காகவும் ஒருவர் மரணித்தபடியால் நாம் எல்லோருமே மரணித்திருக்கின்றோம் என்ற முடிவுக்கு நாம் வந்திருக்கின்றோம். அதனால் கிறிஸ்துவின் அன்பு எங்களை கட்டுப்படுத்தி ஆட்கொள்கின்றது.

¹⁵ அத்துடன், அவர் எல்லோருக்காகவும் மரணத்தைத் தழுவியதால், வாழ்கின்றவர்கள் இனிமேல் தங்களுக்கென வாழாமல், தங்களுக்காக மரணித்து மீண்டும் உயிருடன் எழுப்பப்பட்டவருக்காகவே வாழ வேண்டும் என்ற முடிவுக்கும் வந்துள்ளோம்.

¹⁶ எனவே, இனிமேலும் ஒருவரையும் நாம் மனித கண்ணோட்டத்தில் மதிப்பிடுவதில்லை. முன்பு கிறிஸ்துவையும் மனித கண்ணோட்டத்தில் மதிப்பிட்டிருந்தாலும், இனி அவரை அவ்வாறு மதிப்பிடுவதில்லை.

¹⁷ இப்படியிருக்க, ஒருவன் கிறிஸ்துவுக்குள் இருந்தால், அவன் புதிய படைப்பாய் இருக்கின்றான். இதோ பழையவை கடந்துபோக, புதியது தோன்றிற்று.

¹⁸ இவையெல்லாம் இறைவனிடமிருந்தே வருகின்றன. அவரே கிறிஸ்துவின் மூலமாய் எங்களைத் தம்முடனே ஒப்புரவாக்கி, இந்த ஒப்புரவாக்குகின்ற ஊழியத்தையும் எங்களுக்குக் கொடுத்தார்:

¹⁹ அதாவது இறைவன் மனிதருடைய பாவங்களை அவர்களுக்கெதிராகக் கணக்கிடாமல், கிறிஸ்துவின் மூலமாக உலகத்தைத் தம்முடன் ஒப்புரவாக்கி, இந்த ஒப்புரவாக்கும் செய்தியை எங்களிடத்தில் ஒப்படைத்திருக்கிறார்.

²⁰ நாங்கள் கிறிஸ்துவின் பிரதிநிதிகளாக இருக்கின்றபடியால், இறைவன் எங்கள் மூலமாக உங்களிடம் வேண்டுகோள் விடுக்கின்றபடி, இறைவனுடன் ஒப்புரவாகுங்கள் என்று கிறிஸ்துவின் சார்பில் உங்களை மன்றாடிக் கேட்டுக்கொள்கிறோம்.

²¹ பாவமே இல்லாதவரை இறைவன் நமக்காகப் பாவமாக்கினார். நாம் அவரில் இறைவனின் நீதியாகும்படியாகவே இப்படிச் செய்தார்.