1 கொரி 16 - இலங்கை இலகு தமிழ் மொழிபெயர்ப்பு

விசுவாசிகளுக்கான காணிக்கை சேகரிப்பு

¹ இறைவனுடைய மக்களுக்காகக் காணிக்கை சேகரிப்பதைக் குறித்து கலாத்திய திருச்சபைகளுக்கு கொடுத்த அறிவுரையின்படியே நீங்களும் செய்யுங்கள்.

² நான் வரும்போது பணம் சேகரிக்காதபடி, வாரத்தின் முதல் நாளில் நீங்கள் ஒவ்வொருவரும் அவரவருடைய வருமானத்துக்கு ஏற்றபடி ஒரு குறிப்பிட்ட தொகைப் பணத்தை ஒதுக்கி சேமித்து வையுங்கள்.

³ நான் அங்கு வரும்போது நீங்கள் அங்கீகரிக்கும் மனிதர்களிடம் உங்களது நன்கொடைகளைக் கொடுத்து, அறிமுகக் கடிதங்களோடு அவர்களை எருசலேமுக்கு அனுப்புவேன்.

⁴ நான் போவது நல்லது என்று காணப்பட்டால், அவர்களும் என்னோடு வரலாம்.

தனிப்பட்ட வேண்டுகோள்

⁵ நான் மக்கெதோனியா வழியாகப் போக இருக்கின்றேன். மக்கெதோனியா நாட்டைக் கடந்து சென்ற பின் உங்களிடம் வந்து,

⁶ சிறிது காலம் உங்களுடன் தங்குவேன். அப்போது நான் தொடர்ந்து போக வேண்டிய எனது பயணத்தில் நீங்கள் எனக்கு உதவி செய்யலாம். ஏனெனில் ஒருவேளை குளிர் காலத்தை நான் உங்களுடனே கழிக்க நேரிடலாம்.

⁷ இப்பிரயாணத்தில் வெறுமனே உங்களைப் பார்த்துவிட்டு மட்டும் போவதில் எனக்கு விருப்பமில்லை. கர்த்தர் அனுமதிப்பாரென்றால் சிறிது காலம் உங்களுடன் கழிக்க வேண்டும் என்பதே என் எதிர்பார்ப்பு.

⁸ ஆனால், பெந்தெகொஸ்தே பண்டிகை வரைக்கும் நான் எபேசுவிலேயே தங்கியிருப்பேன்.

⁹ ஏனெனில், ஒரு பயனுள்ள பணிக்கான பெரிய வாசல் எனக்காகத் திறந்திருக்கின்ற அதேநேரம் என்னை எதிர்க்கின்ற அநேகரும் அங்கிருக்கிறார்கள்.

¹⁰ தீமோத்தேயு உங்களிடத்தில் வந்தால், அவன் உங்களுடன் இருக்கையில் பயமின்றி இருக்கும்படி பார்த்துக்கொள்ளுங்கள். ஏனெனில் நான் செய்கின்றது போலவே அவனும் கர்த்தருடைய ஊழியத்தைச் செய்கின்றானே.

¹¹ ஆகவே ஒருவரும் அவனை இழிவாக நடத்தக் கூடாது. அவனை நான் மற்றச் சகோதரருடன் எதிர்பார்த்துக் கொண்டிருக்கின்றபடியால் என்னிடம் திரும்பி வரும்படி அவனைச் சமாதானத்துடன் வழியனுப்பி வையுங்கள்.

¹² நம்முடைய சகோதரனான அப்பொல்லோவைக் குறித்து நான் சொல்கின்றதாவது: மற்றச் சகோதரரோடு அவனும் உங்களிடத்திற்கு வர அவனை நான் அதிகமாய் ஊக்குவித்தேன். ஆனால் இப்பொழுதோ உங்களிடத்தில் வர அவனுக்கு விருப்பமில்லை. ஆனால், தக்க வாய்ப்பு கிடைக்கும்போது அவன் உங்களிடத்தில் வருவான்.

¹³ கவனமாயிருங்கள், உங்கள் விசுவாசத்தில் உறுதியாய் நிலைத்திருங்கள். துணிவுள்ள மனிதராய் இருங்கள், பலமுள்ளவர்களாய் செயல்படுங்கள்.

¹⁴ அனைத்தும் அன்போடு செய்யப்படட்டும்.

¹⁵ ஸ்தேவானுடைய குடும்பத்தினரே அகாயா நாட்டில் முதல் முதலாய் இயேசு கிறிஸ்துவை ஏற்றுக்கொண்டவர்கள். பரிசுத்தவான்களுக்குப் பணி செய்வதற்கென அவர்கள் தங்களையே ஒப்புவித்திருக்கிறார்கள் என்பதையும் நீங்கள் அறிவீர்கள். பிரியமானவர்களே, இப்போதும் நான் உங்களை வேண்டிக்கொள்கின்றதாவது:

¹⁶ இப்படிப்பட்டவர்களுக்கும், கர்த்தருடைய ஊழியத்தில் அவர்களுடன் இணைந்து பிரயாசப்படுகின்ற ஒவ்வொருவருக்கும் கீழ்ப்படிந்து நடவுங்கள்.

¹⁷ ஸ்தேவானும் பொர்த்துனாத்தும் அகாயுவும் இங்கு வந்தபோது நான் மிகவும் மகிழ்ச்சி அடைந்தேன். ஏனெனில், நீங்கள் இல்லாத குறையை அவர்கள் தீர்த்து வைத்தார்கள்.

¹⁸ அவர்கள் உங்களுடைய ஆவியை உற்சாகப்படுத்தியது போலவே, என்னுடைய ஆவியையும் உற்சாகப்படுத்தினார்கள். இப்படிப்பட்ட மனிதர்களை உயர்வாய் மதிக்க வேண்டும்.

இறுதி வாழ்த்துரை

¹⁹ ஆசியா பகுதியிலுள்ள திருச்சபைகள், உங்களுக்கு வாழ்த்துதல்களைத் தெரிவிக்கிறார்கள். ஆக்கில்லாவும் பிரிஸ்கில்லாளும் அவர்களுடைய வீட்டில் ஒன்றுகூடுகின்ற திருச்சபையோரும் ஆண்டவருக்குள்ளான தங்கள் மனப்பூர்வமான வாழ்த்துதல்களைத் தெரிவிக்கிறார்கள்.

²⁰ இங்குள்ள எல்லாச் சகோதரரும் உங்களுக்கு வாழ்த்துதல்களைத் தெரிவிக்கிறார்கள். ஒருவருக்கொருவர் பரிசுத்தமான பரிவன்பைக் காட்டி வாழ்த்து தெரிவியுங்கள்.

²¹ பவுலாகிய நான், இந்த வாழ்த்துதலை என் சொந்தக் கையினாலேயே எழுதுகிறேன்.

²² யாராவது ஆண்டவரில் அன்பாயிருக்காவிட்டால் அவன் சபிக்கப்பட்டவன். ஆண்டவரே வாரும்!

²³ நம்முடைய ஆண்டவர் இயேசுவின் கிருபை உங்களுடன் இருப்பதாக.

²⁴ கிறிஸ்து இயேசுவில் இருக்கும் உங்கள் எல்லோருக்கும் என்னுடைய அன்பைத் தெரிவித்துக்கொள்கிறேன். ஆமென்.