ཛ་ཀར་ཡ 14 - Tibetan Old Testament 2011

ཡེ་རུ་ཤ་ལེམ་དང་རྒྱལ་ཁབ་གཞན་རྣམས།

¹ གཙོ་བོ་དཀོན་མཆོག་གིས་ཁྲིམས་གཅོད་གནང་བའི་ཉིན་མོ་དེ་ནི་ཉེ་བར་རན་ཞིང་། དེའི་སྐབས་སུ་ཡེ་རུ་ཤ་ལེམ་བཅོམ་སྟེ། དེའི་བཅོམ་ནོར་ཚང་མ་ཁྱོད་ཚོའི་མིག་གི་མཐོངས་སར་ཆ་བགོས་བྱེད་པར་འགྱུར།

² ཡང་ཡེ་རུ་ཤ་ལེམ་ལ་དམག་འདྲེན་ཕྱིར་གཙོ་བོ་དཀོན་མཆོག་གིས་རྒྱལ་ཁབ་ཚང་མ་འདུ་ཚོགས་གནང་སྟེ། གྲོང་ཁྱེར་དེ་དགྲའི་དབང་དུ་ཤོར་ཞིང་། ཁང་ཁྱིམ་རྣམས་བཅོམ་པ་དང་། བུད་མེད་རྣམས་ལ་བཙན་གཡེམ་བྱེད་རྒྱུ་ཡིན་པ་དང་། མི་འབོར་ཕྱེད་ཀ་ཙམ་བཙན་བྱོལ་དུ་འཁྲིད་རྒྱུ་ཡིན་ནོ། འོན་ཀྱང་ལྷག་འཕྲོས་རྣམས་ནི་གྲོང་ཁྱེར་ནས་འཁྲིད་པར་མི་འགྱུར་རོ།

³ དེ་རྗེས་སྔར་བཞིན་གཙོ་བོ་དཀོན་མཆོག་གིས་རྒྱལ་ཁབ་དེ་ཚོ་ལ་འཐབ་པ་གནང་རྒྱུ་ཡིན་ཞིང་།

⁴ སྐབས་དེར་གཙོ་བོ་དཀོན་མཆོག་ནི། ཡེ་རུ་ཤ་ལེམ་གྱི་ཤར་ཕྱོགས་སུ་ཡོད་པའི་ཁ་སྐྱུར་པོའི་རི་བོར་བཞེངས་རྒྱུ་ཡིན་པ་དང་། ཁ་སྐྱུར་པོའི་རི་བོ་དེ་ནི་ཤར་ཕྱོགས་ནས་ནུབ་ཕྱོགས་བར་དུ་དཀྱིལ་ནས་དུམ་བུ་གཉིས་སུ་གས་ཤིང་དེའི་བར་ན་ལུང་གཤོང་ཆེན་པོ་ཞིག་ཆགས་རྒྱུ་ཡིན་པ་དང་། རི་བོ་དེ་ཕྱེད་ཀ་བྱང་ཕྱོགས་དང་ཕྱེད་ཀ་ལྷོ་ཕྱོགས་སུ་གཤིབས་ཞིང་།

⁵ རི་བོའི་དབུས་སུ་ཆགས་པའི་ལུང་གཤོང་དེ་ནས་ཁྱོད་ཚོ་བྲོས་ཐར་རྒྱུ་ཡིན། སྔར་ཡ་ཧུ་དཱའི་རྒྱལ་པོ་ཨུ་ཛི་ཡཱའི་དུས་སུ་ས་གཡོམ་བརྒྱབ་སྐབས་ཁྱོད་ཚོའི་མེས་པོ་རྣམས་བྲོས་པ་བཞིན་ཁྱོད་ཚོའང་དེ་བཞིན་བྲོས་རྒྱུ་ཡིན་པ་དང་། དེ་ནས་ངའི་དཀོན་མཆོག་གཙོ་བོ་དཀོན་མཆོག་ནི་ཉིད་ཀྱི་ཕོ་ཉའི་ཚོགས་བཅས་པ་ཚང་མ་བསྣམས་ནས་ཕེབས་པར་འགྱུར།

⁶ དེའི་དུས་སུ་གནམ་གཤིས་གྲང་ངར་ཅན་དང་འཁྱག་རོམ་སོགས་གང་ཡང་མི་འབྱུང་ཞིང་།

⁷ དེ་བཞིན་གནས་གང་དུའང་མུན་པ་མི་འབྱུང་བ་དང་། ཉིན་མཚན་ཀུན་ཏུ་འོད་དང་ལྡན་པར་འགྱུར། ཉིན་མོ་དེ་ག་དུས་ཡོང་མིན་སྐོར་གཙོ་བོ་དཀོན་མཆོག་གཅིག་པོས་མཁྱེན་པར་འགྱུར།

⁸ དུས་དེ་ཤར་སྐབས་ཡེ་རུ་ཤ་ལེམ་ནས་ཆུ་གསོས་པ་ཞིག་ཐོན་ཏེ། ཕྱེད་ཀ་འཆི་བའི་རྒྱ་མཚོ་དང་། ཕྱེད་ཀ་མེ་ཌི་ཊ་རེ་ནི་ཡན་རྒྱ་མཚོའི་བར་དུ་དབྱར་དགུན་མེད་པར་རྒྱུག་ཅིང་།

⁹ དེ་དུས་གཙོ་བོ་དཀོན་མཆོག་ནི་ས་གཞི་ཀུན་གྱི་རྒྱལ་པོར་འགྱུར་ཏེ། ཚང་མས་ཁོང་ལ་དཀོན་མཆོག་ཡིན་པ་བསྙེན་བཀུར་ཞུ་རྒྱུ་དང་། ཁོང་ལ་མཚན་དེ་རང་གི་ངོ་ཤེས་པར་འགྱུར་རོ།

¹⁰ བྱང་ཕྱོགས་གྷེ་བཱ་ནས་ལྷོ་ཕྱོགས་རིམ་མོན་བར་གྱི་ཡུལ་ལྗོངས་ཐམས་ཅད་འཁོད་སྙོམས་པོར་བཟོས་པར་འགྱུར། ཡེ་རུ་ཤ་ལེམ་ནི་དེའི་མཐའ་འཁོར་གྱི་ཡུལ་ཀུན་ལས་མཐོ་བར་མངོན་ཞིང་། གྲོང་ཁྱེར་དེ་ནི་བེན་ཡ་མིན་གྱི་རྒྱལ་སྒོ་ནས་སྔར་རྒྱལ་སྒོ་རྙིང་པ་ཆགས་སར་ཟུར་སྒོ་ཞེས་པའི་རྒྱལ་སྒོ་བར་དང་། དེ་བཞིན་ཧ་ན་ནེལ་གྱི་མཁར་རྫོང་མཐོན་པོ་ནས་རྒྱལ་པོའི་རྒུན་ཆང་བཟོ་བའི་ས་གནས་བར་དུ་ཁྱབ་པར་འགྱུར།

¹¹ ཡུལ་མི་རྣམས་འཇིག་པའི་ཉེན་ཁ་ལས་གྲོལ་ཏེ། གནས་སྟངས་བརྟན་པོའི་ངང་དུ་འཚོ་བར་འགྱུར།

¹² ཡེ་རུ་ཤ་ལེམ་ལ་དམག་འདྲེན་མཁན་མི་རིགས་ཚང་མའི་ཐོག་ཏུ་གཙོ་བོ་དཀོན་མཆོག་གིས་ནད་ཡམས་དྲག་པོ་གཏོང་བ་གནང་ཞིང་། གསོན་པོ་ཡོད་དུས་དེ་ཚོའི་ལུས་ཀྱི་ཤ་རུལ་རྒྱུ་ཡིན་པ་དང་། དེ་ཚོའི་མིག་དང་ལྕེ་ལ་སོགས་པ་རུལ་བར་འགྱུར།

¹³ དེ་དུས་གཙོ་བོ་དཀོན་མཆོག་གིས་དེ་ཚོ་མགོ་འཐོམས་པར་མཛད་པར་འགྱུར། དངངས་སྐྲག་ཆེན་པོའི་ངང་དེ་ཚོས་རང་གི་ཉེ་འགྲམ་དུ་ཡོད་པའི་མི་ལ་འཛིན་བཟུང་གིས་འཐབ་རྒོལ་བྱེད་རྒྱུ་ཡིན་ནོ།

¹⁴ ཡ་ཧུ་དཱའི་ཡུལ་མི་ཚོས་ཡེ་རུ་ཤ་ལེམ་ལ་སྲུང་སྐྱོབ་བྱེད་ཕྱིར་འཐབ་རྒྱུ་ཡིན་པ་དང་། དེ་ཚོས་མཐའ་འཁོར་གྱི་རྒྱལ་ཁབ་ཚང་མའི་གསེར་དང་། དངུལ་དང་། གྱོན་གོས་ལ་སོགས་པ་མང་པོ་འཕྲོག་གཅོམ་བྱེད་རྒྱུ་ཡིན་ནོ།

¹⁵ དགྲ་བོའི་སྒར་སར་ཡོད་པའི་རྟ་དྲེལ་དང་། རྔ་མོང་དང་། གཞན་ཡང་བོང་བུ་ལ་སོགས་པའི་དུད་འགྲོ་ཚང་མའི་ཐོག་ཏུ་ནད་ཡམས་དྲག་པོ་ཞིག་འཕོག་རྒྱུ་ཡིན་ནོ།

¹⁶ དེ་རྗེས་ཡེ་རུ་ཤ་ལེམ་ལ་འཐབ་རྒོལ་བྱེད་མཁན་རྒྱལ་ཁབ་གསོན་པོར་ལྷག་པ་རྣམས་ལོ་ལྟར་རེ་བཞིན་ཡེ་རུ་ཤ་ལེམ་དུ་ཕྱིན་ནས། ཀུན་དབང་ལྡན་པའི་གཙོ་བོ་དཀོན་མཆོག་ལ་རྒྱལ་པོ་ཆེན་པོའི་ཚུལ་དུ་བསྙེན་བཀུར་ཞུ་ཞིང་རྩྭ་གཡབ་ཀྱི་དུས་སྟོན་དེ་རྩིས་སྲུང་བྱེད་རྒྱུ་དང་།

¹⁷ གལ་ཏེ་མི་རིགས་སུ་ཞིག་གིས་ཀུན་དབང་ལྡན་པའི་གཙོ་བོ་དཀོན་མཆོག་ལ་རྒྱལ་པོ་ཆེན་པོའི་ཚུལ་དུ་བསྙེན་བཀུར་མ་ཞུས་པ་ཡིན་ན། དེ་ཚོའི་ས་ཞིང་ཐོག་ཏུ་ཆར་ཆུ་མི་འབབ་ཅིང་།

¹⁸ དེ་བཞིན་ཨི་ཇིབ་པ་ཚོས་ཀྱང་རྩྭ་གཡབ་ཀྱི་དུས་སྟོན་དེ་སྲུང་བརྩི་མ་ཞུས་པ་ཡིན་ན། དུས་སྟོན་སྲུང་བརྩི་མ་ཞུས་མཁན་རྒྱལ་ཁབ་གཞན་དང་འདྲ་བར་དེ་ཚོའི་ཐོག་ཏུའང་ནང་ཡམས་དྲག་པོ་དེ་དག་འཕོག་ངེས་ཤིང་།

¹⁹ ནད་ཡམས་དེ་དག་ནི་ཨི་ཇིབ་དང་རྩྭ་གཡབ་ཀྱི་དུས་སྟོན་མི་སྲུང་མཁན་རྒྱལ་ཁབ་ཚང་མར་ཉེས་ཆད་ཀྱི་ཚུལ་དུ་འཕོག་རྒྱུ་ཡིན་ནོ།

²⁰ དུས་དེར་རྟ་རྣམས་ཀྱི་སྐེ་ལ་འདོགས་པའི་དྲིལ་བུ་སོགས་ལའང་གཙོ་བོ་དཀོན་མཆོག་གི་ཆེད་དུ་བསྔོ་འབུལ་བྱས་པའི་ཡི་གེ་རྣམས་རྐོས་ཡོད་དོ། མཆོད་ཁང་གི་བཙོད་སྣོད་རྣམས་ཀྱང་མཆོད་ཁྲིའི་མདུན་གྱི་ཕོར་པ་ལྟ་བུ་དམ་པར་འགྱུར་རྒྱུ་ཡིན་ནོ།

²¹ ཡེ་རུ་ཤ་ལེམ་དང་ཡ་ཧུ་དཱའི་བཙོས་སྣོད་ཚང་མ་ཀུན་དབང་ལྡན་པའི་གཙོ་བོ་དཀོན་མཆོག་ལ་བསྙེན་བཀུར་ཞུ་བར་བེད་སྤྱོད་བྱེད་ཕྱིར་ཟུར་དུ་བཞག་པར་འགྱུར། དམར་མཆོད་འབུལ་བར་ཡོང་མཁན་མི་ཚོས་དམར་མཆོད་ཀྱི་ཤ་རྣམས་སྐོལ་རྒྱུར་སྣོད་འདི་ཚོ་བེད་སྤྱོད་བྱེད་པར་འགྱུར། དུས་དེ་རན་སྐབས་ཀུན་དབང་ལྡན་པའི་གཙོ་བོ་དཀོན་མཆོག་གི་མཆོད་ཁང་ནང་དུ་ཚོང་པ་གཅིག་ཀྱང་ལུས་པར་མི་འགྱུར་རོ༎