གསུང་མགུར 9 - Tibetan Old Testament 2011

དཀོན་མཆོག་གི་བཀའ་ཁྲིམས་དྲང་པོའི་ཆེད་དུ་ལེགས་གསོལ་ཞུ་བ།

¹ གཙོ་བོ་དཀོན་མཆོག་ང་ནི་ཁྱེད་ཉིད་ལ། བློ་སེམས་རྩེ་གཅིག་སྒོ་ནས་གཏང་རག་འབུལ། ཁྱེད་ཀྱི་མཛད་འཕྲིན་ངོ་མཚར་ཆེ་བའི་སྐོར་ངས་བཤད་རྒྱུ་ཡིན།

² ཁྱེད་ཀྱིས་རྐྱེན་གྱིས་ང་ནི་དགའ་ཞིང་གླུ་དབྱངས་ལེན། ཀུན་དབང་ལྡན་པའི་དཀོན་མཆོག་ཁྱེད་ཉིད་ལ། ངས་ནི་བསྟོད་དབྱངས་ལེན་ཞིང་བསྔགས་བརྗོད་ཞུ།

³ སྐུ་ཉིད་མདུན་དུ་མངོན་པར་མཛད་པའི་སྐབས། ང་ཡི་དགྲ་རྣམས་སྟབས་ལོག་རྒྱབ་ནས་བྲོས། དེ་ཚོ་ས་ཁར་འགྱེལ་ཞིང་འཆི།

⁴ ཁྱེད་ཀྱིས་ཁྲིམས་གཅོད་དྲང་པོ་གནང་བས་ན། ང་ཡི་ཕྱོགས་གཏོགས་མཛད་དེ་ཁྲིམས་གཅོད་གནང་།

⁵ ཆོས་མིན་རྣམས་ལ་ཁྱེད་ཀྱིས་སྐྱོན་བརྗོད་གནང་། མི་ངན་རྣམས་ལ་ཁྱེད་ཀྱི་ཚར་བཅད་མཛད། སུས་ཀྱང་དེ་ཚོར་དྲན་གསོ་མི་བྱེད་དོ།

⁶ ང་ཚོའི་དགྲ་རྣམས་གཏན་དུ་འཇིག་པ་ཡིན། དེ་ཚོའི་གྲོང་རྣམས་ཁྱེད་ཀྱིས་མེད་པར་མཛད། ཚང་མས་དེ་དག་ཡོངས་སུ་རྗེད་པར་བྱེད།

⁷ འོན་ཀྱང་གཙོ་བོ་དཀོན་མཆོག་དུས་རྒྱུན་གྱི་ཆེད་དུ་རྒྱལ་པོ་ཡིན། ཞལ་ཆད་གཅོད་ཕྱིར་བཞུགས་ཁྲི་འཛུག་བསྐྲུན་མཛད།

⁸ ཉིད་ཀྱི་དྲང་བདེན་སྒོ་ནས་འཇིག་རྟེན་དུ་སྲིད་སྐྱོངས་མཛད། ཁྲིམས་དྲང་སྒོ་ནས་ཁོང་གིས་མི་རིགས་རྣམས་ལ་ཞལ་ཆེ་གཅོད་གནང་ངོ་།

⁹ མནར་གཅོད་ནང་དུ་ཚུད་པའི་མི་རྣམས་ལ། གཙོ་བོ་དཀོན་མཆོག་སྐྱབས་གནས་མཆོག་ཏུ་འགྱུར། དཀའ་ངལ་དུས་སུ་སྐྱབས་ཡུལ་བཙན་པོ་ལགས།

¹⁰ གཙོ་བོ་དཀོན་མཆོག་ཁྱེད་ལ་ཤེས་པའི་མི་རྣམས་ཀྱི། ཁྱེད་ལ་བློ་གདེང་བཅོལ་བར་བྱ། སྐྱབས་བཅོལ་ཞུ་བར་ཁྱེད་རྩར་བཅར་མཁན་ལ། ཁྱེད་ཀྱིས་ནམ་ཡང་སྤངས་བར་མི་མཛད་དོ།

¹¹ ཛི་ཡོན་སྲིད་སྐྱོངས་མཛད་པོ་གཙོ་བོ་དཀོན་མཆོག་ལ། བསྟོད་དབྱངས་ལེན་ཞིང་བསྔགས་བརྗོད་ཞུ་བཞིན་དུ། ཁོང་གི་མཛད་འཕྲིན་བཟང་པོ་རྣམས་ཀྱི་སྐོར། མི་རིགས་སོ་སོའི་ཁྲོད་དུ་ཁྱབ་བསྒྲགས་བྱོས།

¹² དཀའ་ངལ་ངང་དུ་ཚུད་པའི་མི་རྣམས་ལ། དཀོན་མཆོག་གིས་རྒྱུན་དུ་ཐུགས་དྲན་གསོ་བར་མཛད། དེ་ཚོའི་སྨྲེ་སྔགས་ཐུགས་ནས་བསྙེལ་མི་ཡོང་། དེ་ཚོར་ནོར་འཁྲུལ་བྱེད་མཁན་ཚོར་ཉེས་ཆད་གནང།

¹³ གཙོ་བོ་དཀོན་མཆོག་ང་ལ་སྙིང་རྗེས་གནང་རོགས་གནང། དགྲ་བོས་ང་ལ་གནོད་འཚེ་གཏོང་བར་གཟིགས། ཀྱེ་གཙོ་བོ་དཀོན་མཆོག་ཉིད་ཀྱི་ང་ལ་ནི། འཆི་བ་ལས་སྐྱོབ་པར་མཛད་དུ་གསོལ།

¹⁴ ང་ནི་གྲོང་ཁྱེར་ཡེ་རུ་ཤ་ལེམ་གྱི། ཡུལ་མི་རྣམས་ཀྱི་མདུན་དུ་ཡར་ལངས་ནས། ཁྱེད་ལ་བསྟོད་བསྔགས་འབུལ་བའི་དོན་གནད་སྐོར། ངས་ནི་དེ་ཚོར་ཡོངསསྐོར་བཤད་པར་བྱ། ཁྱེད་ཀྱིས་ང་ལ་སྐྱབས་གྲོགས་མཛད་པའི་རྐྱེན། ང་ནི་བློ་སེམས་དགའ་ཞིང་མགུ་བར་བྱེད།

¹⁵ ཆོས་མིན་རྣམས་ཀྱིས་བྲུས་པའི་ས་དོང་དུ། དེ་ཚོ་རང་ཉིད་དེའི་ནང་ཚུད། རང་གིས་བཙུགས་པའི་རྙི་ནང་དེ་ཚོ་ཚུད།

¹⁶ གཙོ་བོ་དཀོན་མཆོག་ཁོང་གི་ཁྲིམས་གཅོད་དྲང་བདེན་སྒོ་ནས་རང་ཉིད་མངོན་པར་མཛད་པ་དང། མི་ངན་རྣམས་ནི་རང་གི་ལས་ཀྱི་རྙི་ནང་དུ་ཚུད་དོ།

¹⁷ དཀོན་མཆོག་ཁས་བླངས་མི་བྱེད་མཁན་རྣམས་དང་། མི་ངན་ཀུན་གྱི་མཐའ་མ་འཆི་བ་ཡིན།

¹⁸ དགོས་མཁོ་ཅན་ཚོ་རྒྱུན་དུ་སྣང་མེད་ལུས་མི་ཡོང་། དབུལ་པོའི་རེ་འདོད་རྒྱུན་དུ་ཟད་མི་ཡོང་།

¹⁹ གཙོ་བོ་དཀོན་མཆོག་རང་ཉིད་ཕེབས་པར་མཛོད། མི་ཚོས་ཁྱེད་ལ་རྒོལ་མི་བཅུག། ཆོས་མིན་དེ་ཚོར་ཁྱེད་མདུན་འཁྱེར་ཡོང་ནས། དེ་ཚོའི་ཐག་ཏུ་ཁྲིམས་གཅོད་གནང་བར་མཛད།

²⁰ ཀྱེ་གཙོ་བོ་དཀོན་མཆོག་དེ་ཚོའི་སེམས་ནང་འཇིགས་སྣང་སྐྱེས་བཅུག་ཅིག། དེ་ཚོ་རང་ཉིད་སྐྱེ་བ་མི་རྟག་པའི་མི་གཅིག་པོ་ཡིན་པ་ཤེས་བཅུག་ཅིག།