གསུང་མགུར 8 - Tibetan Old Testament 2011

དཀོན་མཆོག་གི་གཟི་བརྗིད་དང་མིའི་དབུ་འཕང།

¹ ཀྱེ་གཙོ་བོ་དཀོན་མཆོག་ང་ཚོའི་གཙོ་བོོ། ཁྱེད་ཉིད་ཀྱི་མངའ་ཐང་ནི། འཇིག་རྟེན་ས་ཕྱོགས་ཀུན་ཏུ་མཐོང་བ་དང་། ཁྱེད་ལ་བསྟོད་པའི་བསྔགས་བརྗོད་མཐོ་རིས་སླེབས།

² ཕྲུ་གུ་ཚོ་དང་ཕྲུ་གུ་འོ་འཐུང་གིས་ནི་ཁྱེད་ལ་བསྟོད། ཁྱེད་ནི་དགྲ་བོའི་ཉེན་ལས་བཙན་སར་གནས། ཁྱེད་ལ་རྒོལ་སེམས་ཞུ་མཁན་ཐམས་ཅད་ལ། ཁྱེད་ཀྱིས་ཡོངས་སུ་བཀག་འགོག་མཛད་པ་གནང་།

³ ཁྱེད་ཀྱིས་བཀོད་གནང་མཛད་པའི་ནམ་མཁའ་དང་། ཁྱེད་ཀྱིས་རང་སར་བཙུགས་པའི་ཟླ་བ་དང་། སྒྱུ་སྐར་ལ་སོགས་ང་ཡི་བལྟ་བའི་དུས།

⁴ མི་གང་ཡིན་ནམ། ཁྱེད་ཀྱིས་དེའི་སྐོར་ལ་དེ་ཙམ་ཞིག། དགོངས་བཞེས་ཐུགས་འཁུར་བཞེས་པ་ཅི་ཡིན་ནམ། ཕལ་པའི་མི་ལ་ཅིའི་ཕྱིར་སྐུ་ཉིད་ཀྱིས། དེ་ཙམ་འཛིན་སྐྱོངས་གནང་དགོས་སམ།

⁵ ཡིན་ཀྱང་ཁྱེད་ཀྱིས་དེ་ཚོར་སྐུ་ཉིད་རང་ལས་ཅུང་ཟད་དམའ་བར་མཛད། དེ་ཚོར་དཔལ་དང་བཀུར་བས་བརྒྱན་པར་མཛད།

⁶ ཁྱེད་ཀྱིས་བཀོད་གནང་མཛད་པའི་དངོས་པོ་ཐམས་ཅད་ཐོག། འཛིན་སྐྱོངས་བྱེད་པའི་དབང་ཆ་ཁོ་ཚོར་གནང་། མཛད་པ་ཀུན་ལས་ཁོ་ཚོར་མཐོ་སར་བཞག།

⁷ ལུག་དང་ཕྱུགས་ཟོག་ནགས་ཀྱི་སེམས་ཅན་དང་།

⁸ འདབ་ཆགས་ཉ་རིགས་རྒྱ་མཚོའི་སྲོག་ཆགས་ཐོག། དབང་འཛིན་བྱེད་པའི་ནུས་པ་ཁོ་ཚོར་གནང་།

⁹ གཙོ་བོ་དཀོན་མཆོག་ང་ཚོའི་གཙོ་བོ། ཁྱེད་ཀྱི་རླབས་ཆེན་འཇིག་རྟེན་ས་ཕྱོགས་ཀུན་ནས་མཐོང་༎