གསུང་མགུར 4 - Tibetan Old Testament 2011

དགོང་དྲོའི་སྐྱབས་གྲོགས་ཞུའི་སྨོན་ལམ།

¹ ཀྱེ་ང་ཡི་སྲུངསྐྱོབ་དཀོན་མཆོག་ལགས། ང་ཡིས་སྨོན་ལམ་འདེབས་སྐབས་ང་ལ་བཀའ་ལན་གནང་། ང་ནི་དཀའ་ངལ་ནང་དུ་ཡོད་སྐབས་ཁྱེད་ཀྱིས་ང་ལ་སྐྱབས་གྲོགས་མཛད་གནང་ངོ། ད་ནས་ཐུགས་རྗེས་གཟིགས་ཏེ་སྨོན་ལམ་གསན་པར་མཛོད།

² ག་དུས་བར་དུ་ཁྱོད་ཚོས་ང་ལ་འཕྱ། ག་དུས་བར་དུ་དངོས་པོ་མཁོ་མེད་དང་། རྫུན་གྱི་རྗེས་སུ་ཁྱོད་ཚོ་འབྲངས།

³ དྲང་བདེན་ཅན་ལ་གཙོ་བོ་དཀོན་མཆོག་གིས། རང་གི་ཆེད་དུ་འདམས་ཀ་མཛད་པར་སེམས་ལ་དྲན་པར་གྱིས། ང་ཡིས་ཞུ་འབོད་བྱེད་སྐབས་ཁོང་གིས་གསན།

⁴ བག་སེམས་ཆེན་པོས་ལུས་པོ་འདར་ཞིང། སྡིག་སྤྱོད་བྱེད་པར་མཚམས་འཇོག་གིས། ཁ་ཁུ་སིམ་པོར་ཉལ་ཁྲིར་ངལ་གསོའི་སྐབས། དེའི་སྐོར་ཁྱོད་ཀྱི་བསམ་བློ་ཞིབ་པར་གཏོང་།

⁵ གཙོ་བོ་དཀོན་མཆོག་ལ་འོས་པའི་དམར་མཆོད་འབུལ་ཞིག་དང། ཁོང་ལ་བློ་བཅོལ་ཞུས།

⁶ སྐྱེ་བོ་མང་པོས་གཙོ་བོ་དཀོན་མཆོག་ལ་སྨོན་ལམ་ནང་། ང་ཚོར་ཐུགས་རྗེས་གཟིགས་སྐྱོངས་མཛད་གནང་སྟེ། བྱིན་བརླབ་རྒྱས་པར་གནང་ཞེས་ཞུ་འབུལ་བྱ།

⁷ འོན་ཀྱང་དེ་ཚོར་འབྲུ་དང་རྒུན་ཆང་སོགས། ཐོབ་ནས་བྱུང་བའི་བདེ་ལས་ཀྱང་། ཁྱེད་ཀྱིས་ང་ལ་གནང་བའི་བདེ་བ་ཆེ།

⁸ ང་ནི་ཞེ་བདེའི་ངང་དུ་གཉིད་ཉལ་སྐབས། ཀྱེ་གཙོ་བོ་དཀོན་མཆོག་ཁྱེད་ཉིད་གཅིག་པུ་ཡིས། ང་ལ་ཕུན་སུམ་ཚོགས་པའི་སྲུང་སྐྱོབ་གནང་༎