གསུང་མགུར 24 - Tibetan Old Testament 2011

མངའ་ཐང་དང་ལྡན་པའི་རྒྱལ་པོ།

¹ འཛམ་བུ་གླིང་དང་དེའི་ནང་ཇི་ཡོད་ཀུན། གཙོ་བོ་དཀོན་མཆོག་རང་གི་ཡིན་པ་དང་། ས་གཞི་འདི་དང་དེའི་ནང་གནས་པ་ཀུན། གཙོ་བོ་དཀོན་མཆོག་རང་ཉིད་གི་ཡོན་ནོ།

² ས་གཞིའི་འོག་གི་ཆུ་བོ་གཏིང་རིང་ཁར། ཁོང་གིས་འཇིག་རྟེན་བཀོད་གནང་མཛད་པ་གནང་། རྒྱ་མཚོའི་གཏིང་དུ་དེ་ཡི་རྨང་གཞི་འཛུགས།

³ གཙོ་བོ་དཀོན་མཆོག་ཉིད་ཀྱི་རི་བོའི་ཁར། འཛེག་པར་ནུས་པའི་དབང་ཆ་སུ་ལ་ཡོད། ཁོང་གི་མཆོད་ཁང་དམ་པའི་ནང་། སྐྱེ་བོ་སུ་འདྲ་ཞིག་ནི་འཛུལ་ཐུབ་བམ།

⁴ དེ་འདྲ་ནུས་པའི་སྐྱེ་བོ་དམ་པ་ནི། ལས་དང་བསམ་ཚུལ་གཙང་ཞིང་རྣམ་པར་དག། དེ་ཚོས་ལྷ་དང་སྐུ་འདྲར་མི་མཆོད་ཅིང་། དམ་བཅའ་རྫུན་མ་གཏན་ནས་མི་བྱའོ།

⁵ གཙོ་བོ་དཀོན་མཆོག་གིས་ནི་དེ་ཚོ་ལ། བྱིན་གྱིས་རླབས་ཤིང་སྲུང་སྐྱོབ་མཛད་པ་དང་། དཀོན་མཆོག་རང་གིས་དེ་ཚོར་ཉེས་མེད་གསལ་བསྒྲགས་མཛད།

⁶ དཀོན་མཆོག་དྲུང་དུ་བཅར་བར་འོས་པ་ནི། ཡ་ཀོབ་ཀྱི་ནི་དཀོན་མཆོག་དྲུང་དུ་བཅར་མཁན་སྐྱེ་བོ་རྣམས་དེ་འདྲ་ཡིན།

⁷ རྒྱལ་སྒོ་སོགས་དང་གནའ་བོའི་སྒོ་རྙིང་རྣམས། གུ་ཡངས་རྒྱ་ཆེར་ཡོངས་སུ་ཕྱེ་བར་གྱིས། མངའ་ཆེན་རྒྱལ་པོ་དེའི་ནང་ཕེབས་རྒྱུ་ཡིན།

⁸ མངའ་ཆེན་རྒྱལ་པོ་དེ་ནི་སུ་ཡིན་ནམ། ཁོང་ནི་གཙོ་བོ་དཀོན་མཆོག་ལགས། སྟོབས་དང་ནུས་ཤུགས་ལྡན་པ་དང། གཡུལ་ལས་རྣམ་པར་རྒྱལ་བའི་གཙོ་བོ་དཀོན་མཆོག་ལགས།

⁹ རྒྱལ་སྒོ་སོགས་དང་གནའ་བོའི་སྒོ་རྙིང་རྣམས། གུ་ཡངས་རྒྱ་ཆེར་ཡོངས་སུ་ཕྱེ་བར་གྱིས། མངའ་ཆེན་རྒྱལ་པོ་དེའི་ནང་ཕེབས་རྒྱུ་ཡིན།

¹⁰ མངའ་ཆེན་རྒྱལ་པོ་དེ་ནི་སུ་ཡིན་ནམ། མངའ་ཐང་ཆེ་བའི་རྒྱལ་པོ་དེ་ཉིད་ནི། རྣམ་པར་རྒྱལ་བའི་གཙོ་བོ་དཀོན་མཆོག་ཡིན༎