གསུང་མགུར 22 - Tibetan Old Testament 2011

སྨྲེ་ངག་དང་བསྟོད་དབྱངས།

¹ ཀྱེ་ང་ཡི་དཀོན་མཆོག། ཀྱེ་ང་ཡི་དཀོན་མཆོག་མཁྱེན། ཁྱེད་ཀྱིས་ང་ལ་ཅིའི་ཕྱིར་སྤངས་བར་མཛད། ངས་ནི་ཁྱེད་ལས་སྐྱབས་གྲོགས་ཞུ་བའི་ཕྱིར། ཐབས་ཟད་ངང་དུ་སྐད་འབོད་འདོན་མོད་ཀྱང་། ད་བར་ང་ལ་སྐྱབས་གྲོགས་འབྱོར་མ་བྱུང་།

² ང་ཡི་དཀོན་མཆོག་ཁྱེད་ལ་ཁོ་བོ་ཡིས། ཉིན་མོའི་དུས་སུ་ཞུ་འབོད་བྱས་མོད་ཀྱང་། ཁྱེད་ཀྱིས་ང་ལ་བཀའ་ལན་མཛད་མ་བྱུང་། མཚན་མོར་ཞུ་འབོད་བྱས་ནའང་། སེམས་ལ་ངལ་གསོ་ཐོབ་མ་བྱུང་།

³ འོན་ཀྱང་ཁྱེད་ནི་དམ་པ་མཆོག་གི་ངང་དུ་བཞུགས་ཁྲིར་བཞུགས། ཨིསི་རཱཨེལ་གྱིས་ནི་ཁྱེད་ལ་བསྟོད་དབྱངས་འབུལ།

⁴ ང་ཚོའི་མེས་པོ་རྣམས་ཀྱིས་ཁྱེད་ལ་བློ་བཅོལ་ཞུས། དེ་ཚོས་ཁྱེད་ལ་བློ་གཏད་ཞུས་པས་རྐྱེན། ཁྱེད་ཀྱིས་དེ་ཚོར་སྐྱབས་གྲོགས་མཛད་པ་གནང་།

⁵ དེ་ཚོས་ཁྱེད་ལ་ཞུ་འབོད་བྱས་པའི་རྐྱེན། དེ་ཚོ་ཉེན་ཁའི་འཇིགས་ལས་ཡོངས་སུ་ཐར། དེ་ཚོས་ཁྱེད་ལ་བློ་གཏད་ཇི་བྱས་བཞིན། སེམས་སྡུག་བློ་འཕམ་ནམ་ཡང་མི་བྱས་སོ།

⁶ འོན་ཀྱང་ང་ནི་འགྲོ་བ་མི་ཞིག་མ་ཡིན་པར། སྲོག་ཆགས་འབུ་སྲིན་ཞིག་དང་མཚུངས་ཤིང་གནས། དེས་ན་ཚང་མས་ང་ལ་འཕྱ་ཞིང་དམད།

⁷ ང་ལ་མཐོང་མཁན་ཚང་མས་འཕྱ་བ་དང་། ལྕེ་བཏོན་མགོ་གཡུག་བྱེད་དོོ།

⁸ ཁོ་ཚོས་སྨྲས་པ། ཁྱོད་ཀྱིས་གཙོ་བོ་དཀོན་མཆོག་ལ་བློ་བཅོལ་ཞུས་པ་བཞིན། ཁོང་གིས་ཁྱོད་ལ་ཅིའི་ཕྱིར་མི་སྐྱབས་པ་ཡིན་ནམ། གཙོ་བོ་དཀོན་མཆོག་གིས་ཁྱོད་ལ་ཐུགས་སེམས་མཉེས་ཡོད་ན། ཁྱོད་ལ་སྐྱབས་གྲོགས་ཅིའི་ཕྱིར་མི་གནང་ངམ།

⁹ ང་ནི་ཐོག་མར་མངལ་ནས་སྐྱེས་པའི་དུས། ཁྱེད་ཀྱིས་ང་ལ་ཉེན་མེད་འཁྲིད་ཕེབས་པ་དང། ང་ནི་བྱིས་པ་ཆུང་ངུའི་དུས་སྐབས་ནས། ཁྱེད་ཀྱིས་ང་ལ་བརྟེན་པོ་བཞག་གནང་ངོ།

¹⁰ དེས་ན་ང་ནི་སྐྱེས་པའི་ཉིན་མོ་ནས། ཁྱེད་ལ་ཡིད་བཅོས་བློ་གཏད་ཞུས་པ་ཡིན། ཁྱེད་ནི་རྒྱུན་དུ་ང་ཡི་དཀོན་མཆོག་ཡིན།

¹¹ སྐུ་ཉིད་ང་ལས་རྒྱང་རིང་མ་བཞུགས་ཤིག། ང་ནི་དཀའ་ངལ་ནང་དུ་ཚུད་ཉེ་བས། ང་ལ་སྐྱབས་གྲོགས་བྱེད་མཁན་སུའང་མེད།

¹² ང་ཡི་ཕྱོགས་བཞིར་གླང་གིས་བསྐོར་བ་བཞིན། དགྲ་བོ་མང་པོས་ང་ལ་མཐའ་ནས་བསྐོར། དེ་རྣམས་བྷ་ཤན་ཡུལ་ལྗོངས་ཀྱི་འཇིགས་རྔམ་ལྡན་པའི་གླང་བཞིན་མཐའ་ནས་བསྐོར།

¹³ སེང་གེ་བཞིན་དུ་ངར་ཞིང་ཁ་གདང་ནས། སྡེར་མོས་ང་ལ་རྩབ་ཧྲལ་བཟོ་བར་འདོད།

¹⁴ ང་ཡི་སྟོབས་ཤུགས་ཉམས་ནས་ཡོད། ས་ལ་ཆུ་འབོ་བ་ལྟར་ཡལ་ནས་ཕྱིན། ང་ཡི་རུས་པའི་ཚིགས་རྣམས་ལྷུ་གཞིག་ཅིང་། ང་ཡི་སེམས་ནི་སྤྲ་ཚིལ་བཞུ་བ་བཞིན་དུ་ཆགས་ནས་ཡོད།

¹⁵ ང་ཡི་མགྲིན་པ་ས་རྡུལ་བཞིན་དུ་བསྐམ། ང་ཡི་ལྕེ་ནི་རྐན་ལ་ཡར་འབྱར་ཡོད། ང་ནི་ཤི་བ་ཡིན་པར་ཆ་བཞག་ནས། ཁྱེད་ཀྱིས་ང་ལ་ས་ཁར་དོར་བར་མཛད།

¹⁶ མི་ངན་ཚོགས་ཀྱི་ང་ཡི་མཐའ་ནས་བསྐོར། ཁྱི་ཡི་ཚོགས་བཞིན་དེ་ཚོ་ངའི་རྩར་འཁོར། ང་ཡི་ལུས་ཀྱི་ཡན་ལག་ལ་སོགས་ལ། སྡེར་མོས་སྦ་ར་རྒྱབ་སྟེ་རྨས་པར་བྱས།

¹⁷ ང་ཡི་རུས་པ་ཚང་མ་མངོན་པས་ན། ང་ཡི་དགྲ་བོས་ང་ལ་མིག་ཅེ་རེའི་བལྟ་བཞིན་བསྡད་ནས་འདུག།

¹⁸ ང་ཡི་གོས་ལ་དེ་ཚོས་རྒྱན་བརྒྱབ་ནས། ཕན་ཚུན་ཆ་བགོས་རྒྱབ་ནས་འཁྱེར་བར་བྱ།

¹⁹ ཀྱེ་གཙོ་བོ་དཀོན་མཆོག་ཁྱེད་ནི་ངའི་རྩར་ནས། ཐག་རིང་རྒྱང་དུ་ཕེབས་པར་མ་གནང་ཞིག། ང་ལ་སྐྱབས་པའི་ཕྱིར་མྱུར་བར་ཕེབས་རོགས་གནང་།

²⁰ རལ་གྲིའི་འཇིགས་པར་ང་ལ་སྐྱབས་པར་མཛོད། ཁྱི་འདི་ཚོ་ལས་ངའི་སྲོག་སྐྱབས་པར་མཛོད།

²¹ སེང་གེ་ཚོགས་ལས་ང་ལ་སྐྱབས་པར་མཛོད། ནགས་ཀྱི་གླང་རྒོད་རྣམས་ཀྱི་མདུན་དུ་ང་། རེ་མེད་བྱ་ཐབས་ཀུན་ལས་བྲལ་ནས་ཡོད།

²² ཉིད་ཀྱིས་མཛད་འཕྲིན་ཇི་མཛད་དག་གི་སྐོར། ངས་ནི་རང་གི་འབངས་ལ་བཤད་པར་བྱ། དེ་ཚོའི་འདུ་ཚོགས་ཆེན་པོའི་དཀྱིལ་དུ་ང་། ཁྱེད་ལ་བསྟོད་ཅིང་བསྔགས་བརྗོད་ཞུ་བར་བྱ།

²³ གཙོ་བོ་དཀོན་མཆོག་ཁོང་གི་ཞབས་ཏོག་པ་རྣམས་ཁོང་ལ་བསྟོད། ཡ་ཀོབ་རིགས་བརྒྱུད་རྣམས་ནི་ཁོང་ལ་གུས་བཀུར་ཞུ། ཨིསི་རཱཨེལ་ཡི་མི་མང་རྣམས་ཁོང་ལ་བསྙེན་བཀུར་བྱོས་ཤིག།

²⁴ ཁོང་གིས་དབུལ་པོ་རྣམས་ལ་དཀྱུར་གནང་མི་ཡོང། དེ་ཚོའི་དཀའ་ངལ་སྣང་མེད་དུ་བཏང་མི་ཡོང་། དེ་ཚོ་ལས་རང་གི་ཞལ་མི་འགྱུར། འོན་ཀྱང་དེ་ཚོས་སྐྱབས་གྲོགས་ཞུས་པའི་སྐབས། ཁོང་གིས་དེ་ཚོར་བཀའ་ལན་གནང་ངོ།

²⁵ ཁྱེད་ཀྱིས་མཛད་པའི་མཛད་འཕྲིན་མཐའ་དག་སྐོར། མི་ཚོགས་དབུས་སུ་ངས་ནི་ཁྱེད་ལ་བསྟོད། ཁྱེད་ལ་བསྙེན་བཀུར་ཞུ་མཁན་རྣམས་ཀྱི་ཁྲོད། རང་གི་དམ་བཅའི་དམར་མཆོད་འབུལ་བར་བྱ།

²⁶ དབུལ་པོས་རང་གི་སྨས་པ་བཞིན་དུ་ཁ་ཟས་རྙེད། གཙོ་བོ་དཀོན་མཆོག་དྲུང་དུ་བཅར་མིས་ཁོང་ལ་བསྟོད། དེ་ཚོ་རྒྱུན་དུ་ཕུན་སུམ་ཚོགས་པར་ཤོག།

²⁷ མི་རིགས་ཀུན་གྱིས་གཙོ་བོ་དཀོན་མཆོག་དྲན་གསོ་བྱེད། འཇིག་རྟེན་ས་ཕྱོགས་ཀུན་གྱི་མི་རྣམས་ནི། བློ་ཁ་བསྒྱུར་ནས་ཁོང་གི་དྲུང་དུ་བཅར། མི་རིགས་ཀུན་གྱིས་ཁོང་ལ་མཆོད་པར་འགྱུར།

²⁸ གཙོ་བོ་དཀོན་མཆོག་མངའ་བདག་ཡིན་པས་ན། མི་རིགས་ཚང་མར་ཁོང་གིས་རྒྱལ་སྲིད་སྐྱོང་།

²⁹ ང་རྒྱལ་ཅན་རྣམས་ཁོང་དྲུང་སྒུར་བར་འགྱུར། འཆི་བ་མི་རྟག་ཅན་གྱི་མི་རྣམས་ནི། ཁོང་གི་དྲུང་དུ་མགོ་བོ་སྒུར་བར་འགྱུར།

³⁰ མ་འོངས་དུས་ཀྱི་མི་རབས་ཀྱིས་ཁོང་ལ་སྲི་ཞུ་ཞབས་ཏོག་ཞུ་བར་བྱ། དེ་ཚོས་གཙོ་བོའི་སྐོར་མ་འོངས་མི་རབས་རྣམས་ལ་བཤད་པར་འགྱུར།

³¹ ད་བར་མ་སྐྱེས་པ་ཡི་མི་རྣམས་ལ། གཙོ་བོ་དཀོན་མཆོག་ཁོང་གིས་མི་འབངས་ལ། སྐྱབས་སོང་ཟེར་ཞིང་དེ་ཚོས་སྨྲ་བར་འགྱུར༎