གསུང་མགུར 21 - Tibetan Old Testament 2011

རྒྱལ་ཁའི་ཆེད་དུ་བསྟོད་བསྔགས་འབུལ་བ།

¹ གཙོ་བོ་དཀོན་མཆོག་ཁྱེད་ཀྱིས་རྒྱལ་པོ་ལ། ནུས་སྟོབས་གནང་བས་ཁོང་ནི་དགའ་ཞིང་མགུ། ཁྱེད་ཀྱིས་ཁོང་ལ་རྒྱལ་ཁ་གནང་བར་བརྟེན། ཁོང་གི་སེམས་ལ་དགའ་ཚོར་ཆེན་པོ་སྐྱེད།

² ཁྱེད་ཀྱིས་ཁོང་གི་རེ་འདོད་སྐོང་གནང་ཞིང་། ཁོང་གི་ཞུ་བར་ཁྱེད་ཀྱིས་བཀའ་ལན་གནང་།

³ བྱིན་རླབས་དཔག་མེད་བཞེས་གནང་སྟེ། ཁྱེད་ནི་ཁོའི་རྩར་ཕེབས་གནང་གིས། མགོ་བོར་གསེར་གྱི་ཅོད་པཎ་བསྐོན་པར་མཛད།

⁴ ཁོང་ནི་སྲོག་གི་གནང་སྦྱིན་ཞུས་པ་ལྟར། ཁྱེད་ཀྱིས་ཁོང་ལ་དེ་བཞིན་གནང་བར་མཛད། ཡུན་རིང་འཚོ་ཞིང་གནས་པའི་མི་ཚེ་གནང་།

⁵ ཁྱེད་ཀྱིས་ཁོང་ལ་སྐྱབས་གྲོགས་གནང་བར་རྟེན། ཁོང་གི་གཟི་བརྗིད་རྒྱས་ཤིང་འཕེལ། ཁྱེད་ཀྱིས་ཁོང་ལ་སྙན་གྲགས་དང་དཔལ་གྱིས་བརྒྱན།

⁶ ཁྱེད་ཀྱི་བྱིན་རླབས་ཁོ་དང་མཉམ་དུ་དུས་ཀུན་གནས་ལགས་སོ། སྐུ་ཉིད་ཁོ་དང་མཉམ་དུ་འགྲོགས་པའི་རྐྱེན། ཁོ་ཡི་སེམས་ནི་དགའ་བ་ཆེན་པོའི་ཁྱབ།

⁷ ཀུན་དབང་ལྡན་པའི་གཙོ་བོ་དཀོན་མཆོག་ལ། རྒྱལ་པོས་རྣམ་པ་ཀུན་ཏུ་བློ་གཏད་ཞུས། གཙོ་བོའི་རྒྱུན་ལྡན་ཐུགས་བརྩེ་གནང་བའི་རྐྱེན། ཁོ་ནི་རྒྱུན་དུ་བརྟན་པོར་གནས་ལགས་སོ།

⁸ རྒྱལ་པོས་རང་གི་དགྲ་ཚང་མར་འཛིན་བཟུང་བྱེད་པར་འགྱུར། རང་ལ་སྡང་དགྲ་བྱེད་པའི་སྐྱེ་བོ་ཀུན་ཁོས་ནི་འཛིན་བཟུང་བྱེད་པར་འགྱུར།

⁹ ཁོང་ཉིད་མེ་སྤུང་འབར་བཞིན་མངོན་པའི་དུས། ཁོང་གིས་དེ་ཚོར་ཚར་གཅོད་གནང་བར་འགྱུར། གཙོ་བོ་དཀོན་མཆོག་ཉིད་ཀྱི་ཐུགས་ཁྲོའི་ནང་། དེ་ཚོར་ཡོངས་སུ་ཚར་བཅད་གནང་། མེ་ཡིས་དེ་ཚོར་ཡོངས་སུ་འཇིགས་པར་བྱས།

¹⁰ དེ་ཚོའི་མི་བརྒྱུད་གཅིག་ཀྱང་མ་གསོན་པར། རྒྱལ་པོས་དེ་ཚོ་ཡོངས་སུ་ཚར་བཅད་མཛད།

¹¹ དེ་ཚོས་ཁོང་ལ་རྒོལ་བའི་བྱུས་ངན་བརྩམ། འོན་ཀྱང་དེ་ཚོའི་བསམ་དོན་སྒྲུབ་མི་འགྱུར།

¹² ཁོང་གིས་དེ་ཚོར་ཕྱག་མདའ་བཀྱོན་པའི་སྐབས། དེ་ཚོ་ཕྱིར་ལོག་རྒྱབ་ནས་བྲོས་པར་འགྱུར།

¹³ གཙོ་བོ་དཀོན་མཆོག་ཉིད་ཀྱི་མཐུ་སྟོབས་ལ། ང་ཚོས་མོས་ཤིང་བསྟོད་པ་འབུལ་བར་བྱ། ཁྱེད་ཀྱི་མཐུ་སྟོབས་ཆེན་པོར་བསྟོད་དབྱངས་ལེན༎