གསུང་མགུར 2 - Tibetan Old Testament 2011

དཀོན་མཆོག་གིས་འདམས་པའི་རྒྱལ་པོ།

¹ མི་རིགས་རྣམས་ཀྱིས་ནི། ཅིའི་ཕྱིར་ངོ་ལོག་བྱེད་པར་བརྩམ། མི་ཚོས་ཅིའི་ཕྱིར་ཕན་མེད་ཀྱི་བྱུས་ངན་བརྩམས་པར་བྱ།

² དེ་ཚོའི་རྒྱལ་པོ་རྣམས་ཀྱིས་རྒོལ་ཞིང། དེ་ཚོའི་མངའ་བདག་རྣམས་ཀྱིས་བློ་མཐུན་གྱིས། གཙོ་བོ་དཀོན་མཆོག་རང་ཉིད་དང་། ཁོང་གིས་འདེམས་བསྐོས་མཛད་གནང་བའི། རྒྱལ་པོར་རྒོལ་ཞིང་བྱུས་ངན་བརྩམས།

³ ངེད་རྣམས་ཁོ་ཚོའི་མངའ་འོག་ནས། ངེས་པར་ཐར་བར་བྱེད་དགོས་ཏེ། དེ་ཚོའི་དབང་རྣམས་སྤངས་དགོས། ཅེས་སོགས་ཁོ་ཚོས་སྨྲ་བར་བྱེད།

⁴ མཐོ་རིས་གནས་ཀྱི་བཞུགས་ཁྲི་ནས། གཙོ་བོ་དཀོན་མཆོག་ཀྱིས་ནི་དེ་ཚོའི་འཆར་གཞི་ནུས་མེད་ལ། གཟིགས་ཏེ་འཕྱ་ཞིང་བཞད་མོ་བཞེས།

⁵ དེ་ནས་ཁོང་གིས་དེ་དག་ལ། ཐུགས་ཁྲོའི་ངང་དུ་བཟོན་བརྡ་མཛད། ཁོང་གི་ཐུགས་ཁྲོ་དྲག་པོ་ཡིས། དེ་ཚོར་འཇིགས་སྣང་བསྐུལ་བར་མཛད།

⁶ ཛི་ཡོན་ང་ཡི་དམ་པའི་རི་བོའི་རྩེར། ང་ཡིས་རྒྱལ་པོ་བསྐོས་ཡོད་ཅེས་ཁོང་གིས་གསུངས།

⁷ གཙོ་བོས་གསལ་བསྒྲགས་གང་མཛད་པ་ང་ཡིས། ཁྱབ་བསྒྲགས་བྱེད་ཅེས་རྒྱལ་པོས་གསུངས། ཁྱོད་ནི་ང་ཡི་བུ་ཡིན་པས། དེ་རིང་ང་ནི་ཁྱོད་ཀྱི་ཕ་རུ་འགྱུར་ཞེས་ཁོང་གིས་ང་ལ་གསུངས།

⁸ ང་ལ་ཞུས་ཤིག་ངས་ཁྱོད་ལ། མི་རིགས་ཚང་མ་སྟེར་བར་བྱ། འཇིག་རྟེན་ཡོངས་ཛོགས་ཁྱོད་ལ་བདག།

⁹ ཁྱོད་ཀྱིས་དེ་དག་ལྕགས་དབྱུགས་གིས་བཅག་པར་འགྱུར། རྫ་སྣོད་བཞིན་དུ་ཁྱོད་ཀྱིས་དེ་ཚོར་སིལ་བུར་ལྕག།

¹⁰ ད་རྒྱལ་པོ་ཁྱོད་རྣམས་ཟོན་བརྡ་འདིར་ཉོན་ཞིག། ས་གཞིའི་སྲིད་སྐྱོང་པ་རྣམས་སློབ་ཚན་འདི་སྦྱོང་ཞིག།

¹¹ གཙོ་བོ་དཀོན་མཆོག་ལ་བག་སེམས་ཆེན་པོའི་ངང་ཞབས་ཏོག་ཞུས།

¹² འདར་ཞིང་ཁོང་ལ་གུས་ཕྱག་འཚོལ། དེ་མིན་ཁོང་གི་ཐུགས་ཁྲོ་དེ། མྱུར་དུ་འབེར་བར་འགྱུར་བའི་རྐྱེན། ཁྱོད་ནི་བློ་བུར་འཆི་བར་འགྱུར། དེས་ན་ཁོང་གི་ཞབས་དྲུང་དུ། སྐྱབས་ཞུ་བྱ་མཁན་རྣམས་ནི་བདེའོ༎