གསུང་མགུར 19 - Tibetan Old Testament 2011

བཀོད་པའི་ནང་དཀོན་མཆོག་གི་གཟི་བརྗིད་མངོན་པ།

¹ དཀོན་མཆོག་ཁོང་གི་དཔལ་དང་གཟི་བརྗིད་སྐོར། ཀུན་ཁྱབ་ནམ་མཁའི་གསལ་པོར་མངོན་པར་བྱས། ཁོང་གི་མཛད་འཕྲིན་མཐའ་དག་རྣམས་ཀྱི་སྐོར། ཞིབ་གསལ་ངང་དུ་ནམ་མཁས་མངོན་པར་བྱས།

² ཉིན་མོ་རེ་རེར་སང་ཉིན་གྱི་ཆེད་དུ། ཁོང་གི་མཛད་འཕྲིན་སྐོར་ལ་ཁྱབ་བསྒྲགས་བྱེད། མཚན་མོ་རེ་རེར་རྗེས་མའི་མཚན་དེ་ལ། ཁོང་གི་མཛད་པའི་སྐོར་ལ་སྐྱར་བཤད་བྱེད།

³ སྐད་དང་ཚིག་བརྗོད་བེད་སྤྱོད་མ་བྱས་པར། དེ་བཞིན་སྐད་སྒྲ་གང་ཡང་མ་འདོན་མོད།

⁴ འོན་ཀྱང་དེ་ཚོས་འབོད་པའི་སྐད་སྒྲ་དེ། འཇིག་རྟེན་ཀུན་ཏུ་སླེབས་པར་བྱས་པ་དང་། དེ་ནི་ས་གཞིའི་མཐའ་བར་ཀུན་གྱིས་ཐོས། དཀོན་མཆོག་ཁོང་གིས་གནམ་གྱི་ནང་དུ་ཡང་། ཉི་མའི་དོན་དུ་གནས་ཤིག་བཀོད་གནང་མཛད།

⁵ དེ་ནི་དགའ་བའི་བག་མའི་མག་པ་བཞིན། སྔ་དྲོའི་དུས་སུ་ཐོན་ཏེ་ཡར་ལ་ཡོང་། འདོད་ལྡན་པའི་བང་རྒྱུག་མཁན་དང་འདྲ་བར་འོང་།

⁶ གནམ་གྱི་མུ་འཁྱུག་གཅིག་ནས་གཞན་བར་སླེབས། དེ་ཡི་དྲོད་ལས་སུ་ཡང་གབ་མི་ནུས༎

གཙོ་བོ་དཀོན་མཆོག་གི་བཀའ་ཁྲིམས།

⁷ གཙོ་བོ་དཀོན་མཆོག་གི་བཀའ་ཁྲིམས་རྣམ་པར་དག་པ་ཡིན། དེ་ཡི་ནུས་སྟོབས་གསར་པ་སྦྱིན་པར་ནུས། གཙོ་བོ་དཀོན་མཆོག་གི་བཀའ་རྒྱར་བློ་བཅོལ་འོས་ལགས་ཤིང་། ཤེས་རབ་མེད་པར་ཤེས་རབ་སྦྱིན་ནུས་སོ།

⁸ གཙོ་བོ་དཀོན་མཆོག་གི་བཀའ་ཁྲིམས་དྲང་ཞིང་བདེན་ལགས་པས། དེ་དག་སྲུང་བའི་མི་རྣམས་དགའ་ཞིང་བདེ། གཙོ་བོ་དཀོན་མཆོག་གི་བཀའ་ཁྲིམས་དྲང་ཞིང་ཚུལ་མཐུན་ལགས། དེས་ནི་མི་ཡི་བསམ་ཤེས་རྒྱས་པར་སྦྱིན།

⁹ གཙོ་བོ་དཀོན་མཆོག་ཁོང་ལ་གུས་ཞབས་ད་ནི་ལེགས་པ་ཡིན། དུས་རྒྱུན་ཆེད་དུ་དེ་ནི་བརྟན་པོར་གནས། གཙོ་བོ་དཀོན་མཆོག་གི་ཁྲིམས་རྣམས་དྲང་ཞིང་བདེན་ལགས་པས། དེ་ནི་ཕྱོགས་ཞེན་ཉེ་རིང་ཀུན་ལས་བྲལ།

¹⁰ རིན་ཆེན་གསེར་ནི་བཙོ་མ་ལས་ཀྱང་ལྷག། དེ་ལ་ཀུན་གྱིས་མོས་ཤིང་བདག་འདོད་བྱེད། དེ་ནི་སྦྲང་རྩི་བཟང་ཤོས་ལས་ཀྱང་མངར།

¹¹ དེས་ནི་ཁྱེད་ཀྱི་བྲན་པོ་བདག་ཉིད་ལ། བློ་དང་རིག་པ་ཤེས་རབ་སྦྱིན་པར་མཛད། དེ་དག་བརྩི་སྲུང་ཞུས་པའི་སྒྲུབ་འབྲས་སུ། ང་ལ་བྱ་དགའ་གནང་སྦྱིན་བཟང་པོ་ཐོབ།

¹² སྐྱེ་བོ་སུས་ཀྱང་རང་སྐྱོན་མི་མཐོང་བས། གཙོ་བོ་དཀོན་མཆོག་ཁྱེད་ཀྱིས་བདག་ཉིད་ལ། གསང་བའི་ཉེས་སྐྱོན་རྣམས་ལས་སྐྱོབ་པར་མཛད།

¹³ རང་གིས་ཤེས་བཞིན་བྱས་པའི་སྡིག་པ་ལས། ཁྱེད་ཀྱིས་ང་ལ་སྐྱབས་གནང་བར་མཛོད། ང་ནི་སྡིག་པ་དེ་འདྲའི་མངའ་འོག་ཏུ་ཚུད་མི་བཅུག་རོགས་གནང་། དེ་འདྲ་མཛད་པའི་སྒོ་ནས་བདག་ཉིད་ནི། སྡིག་སྤྱོད་ལས་ངན་དག་ལས་གྲོལ་བར་འགྱུར།

¹⁴ ཀྱེ་གཙོ་བོ་དཀོན་མཆོག་ཁྱེད་ནི་ང་ཡི་སྐྱབས་གནས་དང་། ཐར་ལམ་མགོན་སྐྱབས་མཛད་པོ་ཡིན་པས་ན། ང་ཡི་ཚིག་དང་བསམ་བློ་གཉིས་པོ་ནི། ཁྱེད་ལ་ངོས་ལེན་འོས་པ་ཡིན་པར་ཤོག།