གསུང་མགུར 16 - Tibetan Old Testament 2011

བློ་གདེང་བཅོལ་བའི་སྨོན་ལམ།

¹ ཀྱེ་དཀོན་མཆོག་ང་ལ་སྲུང་སྐྱོབ་གནང་བར་མཛོད། སྲུང་སྐྱོབ་ཞུ་ཕྱིར་ཁྱེད་ལ་བློ་གདེང་བཅོལ།

² ངས་ནི་གཙོ་བོ་དཀོན་མཆོག་ལ། ཁྱེད་ནི་ང་ཡི་གཙོ་བོ་ཡིན། ང་ལ་ཡོད་པའི་དངོས་བཟང་ཇི་ཡོད་རྣམས། ཁྱེད་ནས་འབྱུང་བ་ཡིན་ཞེས་ངོས་ལེན་ཞུ།

³ གཙོ་བོ་དཀོན་མཆོག་གི་དམ་ཚིག་ཅན། སྐྱེ་བོ་རྣམས་ནི་ཇི་ལྟར་བཟང་པོ་ལགས། ང་ནི་དེ་ཚོ་མཉམ་དུ་གནས་འགྲོགས་ཀྱི། གོ་སྐབས་ཐོབ་པར་དགའ་སྣང་ཆེན་པོ་སྐྱེད།

⁴ ལྷ་རྟེན་གཞན་གྱི་རྗེས་སུ་རྒྱུགས་མཁན་ཚོས། རང་ཉིད་ཐོག་ཏུ་དཀའ་ངལ་སྣ་ཚོགས་སྤེལ། ང་ནི་དེ་ཚོས་དམར་མཆོད་འབུལ་བ་ལ། རྒྱབ་སྐྱོར་ངོས་ལེན་ལ་སོགས་མི་བྱེད་ཅིང་། དེ་ཚོའི་ལྷ་རྟེན་སོགས་ལ་མཆོད་མི་འགྱུར།

⁵ གཙོ་བོ་དཀོན་མཆོག་ཁྱེད་ནི་ཁོ་བོ་ཡི། སྐྱབས་གནས་རེ་བཅོལ་ཞུས་ཡུལ་གཅིག་རང་ངོ་། ང་ཡི་དགོས་མཁོ་ཚང་མ་ཁྱེད་ཀྱིས་འགྲུབ། མ་འོངས་དུས་ཀྱི་ང་ཡི་གནས་སྟངས་ཀུན། ཁྱེད་ཀྱི་ཕྱག་ནང་ཡོད་པ་ཡིན།

⁶ ཁྱེད་ཀྱིས་ང་ལ་གནང་བའི་གནང་སྦྱིན་རྣམས། ཤིན་ཏུ་ངོ་མཚར་ཆེ་ལ་བཟང་བས་ན།

⁷ གཙོ་བོ་དཀོན་མཆོག་ལ་བསྟོད་བསྔགས་འབུལ། གང་ལགས་ཟེར་ན་ང་ལ་ཁོང་གིས། ལམ་སྟོན་དབུ་འཁྲིད་བཟང་པོ་གནང་བར་མཛད། མཚན་མོའི་དུས་སུ་ང་ཡི་བློ་སེམས་ཀྱིས། ང་ལ་ཟོན་བརྡའི་བསྐུལ་མ་སྟོན་པར་བྱ།

⁸ གཙོ་བོ་དཀོན་མཆོག་རྒྱུན་དུ་ངའི་འགྲམ་དུ། བཞུགས་ནས་ཡོད་པ་ང་ཡི་འཚོར་སྣང་བྱེད། ཁོང་ནི་ང་ཡི་ཉེ་འགྲམ་བཞུགས་ཡོད་པས། གནས་ཚུལ་གང་གིས་ང་ནི་གཡོ་མི་ཐུབ།

⁹ དེ་བས་ང་ནི་དགའ་ཞིང་བཀའ་དྲིན་བསམ། ང་ནི་སྲུང་སྐྱོབ་བཙན་པོའི་ངང་དུ་གནས།

¹⁰ གང་ལགས་ཟེར་ན་ཁྱེད་ཀྱིས་ང་ལ་ནི། འཆི་བའི་དབང་ལས་སྲུང་སྐྱོབ་མཛད་པ་གནང་། ང་ཡིས་ཁྱེད་ལ་ཞབས་ཕྱི་དམ་ཚིག་གཙང་མར་བྱེད་པ་ཡིན། ཁྱེད་ཀྱིས་ང་ལ་གཤིན་པོའི་ཁམས་སུ་སྤངས་པར་མི་མཛད་དོ།

¹¹ ཉིད་ཀྱིས་ང་ལ་གསོན་པོའི་ལམ་མཆོག་ཏུ། དབུ་འཁྲིད་ལམ་སྟོན་མཛད་པ་གནང་། སྐུ་ཉིད་ང་མཉམ་འགྲོགས་པར་མཛད་པའི་རྐྱེན། ང་ནི་དགའ་བས་ཡོངས་སུ་ཁྱབ་པར་བྱས། མཐའ་ཡས་ཞི་བདེས་ངའི་སེམས་གང་བར་བྱས༎