གསུང་མགུར 15 - Tibetan Old Testament 2011

དཀོན་མཆོག་གི་ཐུགས་འདོད།

¹ གཙོ་བོ་དཀོན་མཆོག་ཉིད་ཀྱི་མཆོད་ཁང་ནང་སུ་བཅར་ཐུབ་བམ། ཉིད་ཀྱི་དམ་པའི་རི་བོ་ཛི་ཡོན་སྒང་། སུས་བསྙེན་བཀུར་བྱེད་ཐུབ་བམ།

² དེ་ཚོ་ནི་ལས་དོན་གང་ཅིར་ཁོང་གི་ཐུགས་དགོངས་བཞིན་སྤྱོད་དེ་གཏན་དུ་ཚུལ་བཞིན་བྱེད་དོ། དེ་ཚོའི་གཏམ་ཚིག་བདེན་ཞིང་དྲང་པོ་དང།

³ དེ་ཚོས་གཞན་ལ་སྨད་ར་མི་མཛོད་ཞིང་། རང་གི་གྲོགས་པོར་ངན་སྤྱོད་མི་བྱེད་ཅིང་། རང་གི་ཁྱིམ་མཚེས་རྣམས་ཀྱི་སྐོར་ལའང་། རྫུན་གྱི་དཀྲོག་གཏམ་སྤེལ་བར་མི་བྱེད་དོ།

⁴ དཀོན་མཆོག་གིས་ནི་སྤངས་པའི་མི་རྣམས་ལ། ཁོས་ཀྱང་སེམས་ནས་སྡང་ཞིང་འཕྱ་སྨད་བྱས། འོན་ཀྱང་ཁོང་གི་བཀའ་ཁྲིམས་སྲུང་མཁན་ལ་ཁོས་ནི་གུས་བཀུར་བྱེད། གནས་ཚུལ་དཀའ་བ་ཇི་ལྟར་བྱུང་ན་ཡང་། རྒྱུན་དུ་རང་གི་དམ་བཅའ་ཡོངས་སུ་སྒྲུབ།

⁵ བུ་ལོན་གཏོང་སྐབས་སྐྱེད་ཁ་མི་ལེན་ཞིང་། ལྐོག་རྔན་ལེན་ཏེ་སྐྱེ་བོ་གནོང་མེད་ལ། རྫུན་གྱི་དཔང་པོ་བྱས་ཏེ་གནོད་མི་སྐྱེལ། དེ་ལྟར་ཚུལ་མཐུན་སྤྱོད་མཁན་མི་རྣམས་ནི་རྒྱུན་དུ་བརྟན་པོར་གནས་ལགས་སོ༎