གསུང་མགུར 148 - Tibetan Old Testament 2011

དཀོན་མཆོག་ལ་བསྟོད་པ་ཕུལ་བར་འཇིག་རྟེན་ལ་འབོད་པ།

¹ གཙོ་བོ་དཀོན་མཆོག་ལ་བསྟོད་བསྔོགས་ཤིག། མཐོ་རི་གནས་སུ་སྡོད་མི་དེ་ཚོས་མཐོ་རིས་ནས། གཙོ་བོ་དཀོན་མཆོག་ཁོང་ལ་བསྟོད་ཅིང་བསྔོགས་པར་གྱིས།

² ཁོང་གི་ཕོ་ཉ་ཚང་མ་དང་། ཁོང་གི་མཐོ་རིས་ཀྱི་དམག་དཔུང་ཚང་མས་ཁོང་ལ་བསྟོད་བསྔོགས་ཤིག།

³ ཉི་མ་དང་ནི་ཟླ་བས་ཁོང་ལ་བསྟོད་བསྔོགས་ཤིག། སྐར་མ་བཀྲག་ཅན་རྣམས་ཀྱིས་ཁོང་ལ་བསྟོད་བསྔོགས་ཤིག།

⁴ མཐོ་ཤོས་མཐོ་རིས་རྣམས་དང་ནམ་མཁའི་སྟེང་དུ་ཡོད་པའི་ཆུ་དེ་ཚོས། གཙོ་བོ་དཀོན་མཆོག་ཁོང་ལ་བསྟོད་ཅིང་བསྔོགས་པར་གྱིས།

⁵ དེ་དག་ཡོངས་ལ་ཁོང་གི་མཚན་བསྟོད་བསྔོགས་བཅུག་ཅིག། ཁོང་གི་བཀའ་གནང་བ་དང་དེ་དག་ཡོངས་སུ་བཀོད་དོ།

⁶ ཁོང་གི་བཀའ་ཡིས་རྒྱུན་དུ་དེ་ཚོར་རང་གནས་འཇོག། དེ་ཚོས་བཀའ་ལ་རྩིས་མེད་བྱེད་མི་ཐུབ།

⁷ རྒྱ་མཚོའི་སེམས་ཅན་རྣམས་དང་རྒྱ་མཚོ་ཆེན་པོའི་གཏིང་རིང་རྣམས་དང། ས་གཞི་ནས་གཙོ་བོ་དཀོན་མཆོག་ཁོང་ལ་བསྟོད་ཅིག།

⁸ གློག་དང་སེར་བ་ཁ་བ་དང་སྤྲིན་རྣམས་དང། ཁོང་གི་བཀའ་བཞིན་སྲུང་མཁན་རླུང་ཚུབ་ཁོང་ལ་བསྟོད།

⁹ རི་ཕྲན་རི་བོ་ཤིང་ཏོག་ལྡན་པའི་སྡོང་པོ་དང་། ཤིང་ནགས་ཡོངས་ཀྱིས་ཁོང་ལ་བསྟོད་ཅིང་བསྔོགས་པར་གྱིས།

¹⁰ ཁྱིམ་དང་ནགས་ཀྱི་སེམས་ཅན་རྣམས་དང། ལྟོ་འགྲུལ་ཅན་དང་བྱ་བྱིའུ་རྣམས་ཀྱིས་ཁོང་ལ་བསྟོད་ཅིང་བསྔོགས་པར་གྱིས།

¹¹ རྒྱལ་པོ་དང་འབངས་ཚང་མས་དང་། རྒྱལ་སྲས་དང་གཞན་སྲིད་སྐྱོང་པ་ཚང་མས་ཁོང་ལ་བསྟོད་ཅིང་བསྔོགས་པར་གྱིས།

¹² གཞོན་ནུ་ཕོ་མོ་དང་ན་སོ་རྒས་པོ་དང་། ཕྲུ་གུ་ཆུང་ཆུང་རྣམས་ཀྱིས་ཀྱང་ཁོང་ལ་བསྟོད་བསྔོགས་ཤིག།

¹³ དེ་ཚོ་ཚང་མས་གཙོ་བོ་དཀོན་མཆོག་མཚན་ལ་བསྟོད་བསྔོགས་ཤིག། ཁོང་གི་མཚན་ནི་གཞན་ཀུན་ལས་རླབས་ཆེན་ཡིན་པ་དང་། ཁོང་གི་གཟི་བརྗིད་གནམ་ས་གཉིས་ལས་མཐོ་བ་ཡིན།

¹⁴ རང་གི་ཡུལ་ནི་ཁོང་གིས་སྟོབས་ཆེན་བཟོས་གནང་ཞིང་། དེའི་རྐྱེན་ཁོང་གི་མི་འབངས་ཚང་མས་ཨིསི་རཱཨེལ་གྱི་མི་རྣམས། ཁོང་གིས་གཅེས་པ་ཚོས་ཁོང་ལ་བསྟོད་བསྔོགས་སོ། གཙོ་བོ་དཀོན་མཆོག་ཁོང་ལ་བསྟོད་བསྔོགས་ཤིག།