གསུང་མགུར 140 - Tibetan Old Testament 2011

སྲུང་སྐྱོབ་གྱི་ཆེད་དུ་སྨོན་ལམ།

¹ ང་ལ་མི་ངན་ལས་སྐྱོབ་ཅིག་ཀྱེ་གཙོ་བོ་དཀོན་མཆོག། དྲག་པོའི་མི་ལས་ང་ལ་བརྟེན་པོ་ཛོགས་རོགས་གནང།

² རྒྱུན་དུ་དེ་ཚོས་བྱུས་ངན་བརྩོམ་ནས་བསྡད་པ་དང་། རྒྱུན་དུ་འཁྲུག་པ་དཀྲུགས་བཞིན་བསྡད།

³ དེ་ཚོའི་ལྕེ་ནི་དུག་སྦྲུལ་བཞིན་ཡིན་པ་དང་། དེ་ཚོས་སྨྲས་པའི་གཏམ་ནི་དུག་སྦྲུལ་གྱི་དུག་བཞིན་དུ་ཡོད།

⁴ ང་ལ་ངན་པའི་སྟོབས་ལས་སྲུང་ཞིག་གཙོ་བོ་དཀོན་མཆོག། ངའི་ཕྱིར་བྱུས་ངན་བརྩོམ་མཁན་དྲག་པོའི་མི་ལས་བརྟེན་པོར་མཛོད།

⁵ ང་རྒྱལ་ཅན་གྱི་མི་ཚོས་ང་ལ་རྙི་བཙུགས་ཡོད། དེ་ཚོས་རང་གི་རྙི་རྣམས་བཀྲམས་ནས་ཡོད། ང་ལ་བཟུང་ཕྱིར་ལམ་གྱི་གཡས་གཡོན་རྙི་རྣམས་བཙུགས་ཡོད།

⁶ ང་ཡིས་གཙོ་བོ་དཀོན་མཆོག་ལ་ཞུས། ཁྱེད་ནི་ང་ཡི་དཀོན་མཆོག་ཡིན་པ་དང་། མགོན་སྐྱོབས་ཕྱིར་དུ་ང་ཡི་ཞུ་བར་གསན་པར་མཛོད་གཙོ་བོ་དཀོན་མཆོག།

⁷ ང་ཡི་སྟོབས་དང་ལྡན་པའི་སྐྱོབ་མཁན་བླ་མེད་གཙོ་བོ་དཀོན་མཆོག། ཁྱེད་ཀྱིས་ང་ལ་དམག་སར་སྲུང་སྐྱོབ་གནང་ཡོད་དོ།

⁸ ངན་པས་ཇི་འདོད་དེ་ཚོར་མ་གནང་རོགས་གནང་གཙོ་བོ་དཀོན་མཆོག། དེ་ཚོའི་བྱུས་ངན་རྣམས་ལམ་ལྷོང་ཡོང་མ་བཅུག།

⁹ ང་ཡི་དགྲ་བོ་རྣམས་ལ་རྒྱལ་དུ་མ་བཅུག་ཅིག། དེ་ཚོས་ང་ལ་བསྐུལ་བའི་འཇིགས་བརྡ་དེ་རྣམས། དེ་ཚོའི་ཐོག་ཏུ་ཕོག་བཅུག་ཅིག།

¹⁰ འབར་བའི་སོལ་བ་རྣམས་དེ་ཚོའི་ཐོག་ཏུ་བབས་པར་ཤོག། དེ་ཚོ་དོང་དུ་དབྱུགས་ནས་མ་ཐོན་ཤོག།

¹¹ གཞན་ལ་རྫུན་གྱི་སྐྱོན་འདོག་མཁན་རྣམས་ལམ་ལྷོང་མ་ཡོང་བར་ཤོག། མི་དྲག་པོར་རྐྱེན་ངན་གྱིིས་རྗེས་ཟིན་ནས་ཚར་གཅོད་ཤོག།

¹² གཙོ་བོ་དཀོན་མཆོག་ཁྱེད་ཀྱིས་དབུལ་པོ་རྣམས་ཀྱི་གནས་ཚུལ་དང་། དགོས་མཁོ་ཅན་གྱི་དབང་ཆ་གི་སྲུང་སྐྱོབས་གནང་བ་དེ་ང་ཡིས་ཤེས།

¹³ དྲང་བདེན་ཚོས་ཁྱེད་ལ་བསྟོད་བསྔགས་འབུལ་བར་འགྱུར། ཁྱེད་ཀྱི་དྲུང་དུ་དེ་ཚོ་གནས་པར་འགྱུར༎