གསུང་མགུར 14 - Tibetan Old Testament 2011

མིའི་སྤྱོད་ངན།

¹ གླེན་པའི་སེམས་ནང་དཀོན་མཆོག་མེད་ཅེས་བརྗོད། དེ་རྣམས་ཡོངས་སུ་ངན་སྤྱོད་ལོག་པར་བྱས། དེ་ཚོས་ཡ་ང་པོ་ལས་ངན་ཤ་སྟགས་བྱས། ཚུལ་མཐུན་ལས་བྱ་མཁན་སུ་ཡང་མེད།

² མིའི་རིགས་ཤེས་རབས་ཅན་དང་ཁོང་ལ་མཆོད་མཁན་རྣམས། ཨེ་ཡོད་དགོངས་ཏེ་གཙོ་བོ་དཀོན་མཆོག་གིས། མཐོ་རིས་གནས་ནས་རྒྱུན་དུ་གཟིགས་ཤིང་བཞུགས།

³ འོན་ཀྱང་དེ་ཚོ་ཚང་མས་ནོར་འཁྲུལ་བྱས། དེ་ཚོ་ཚང་མ་ངན་པ་གཅིག་པ་ཡིན། ཚུལ་བཞིན་སྤྱོད་མཁན་གཅིག་ཀྱང་མི་འདུག་གོ།

⁴ གཙོ་བོ་དཀོན་མཆོག་གིས་བཀའ་འདྲི་གནང། སྐྱེ་བོ་དེ་ཚོས་ཤེས་ཀྱི་མིན་ནམ། སྤྱོད་ངན་བྱེད་མཁན་དེ་ཚོ་ཚང་མ་གཏི་མུག་ཅན་ཡིན་ནམ། དེ་ཚོས་ང་ཡི་མི་འབངས་འཕྲོག་བཅོམ་གྱིས། རང་ཉིད་འཚོ་བའི་ཐབས་ལམ་དེ་ལས་བྱས། དེ་ཚོས་ནམ་ཡང་སྨོན་ལམ་མི་འདེབས་སོ།

⁵ འོན་ཀྱང་དེ་ཚོ་འཇིགས་ཤིང་སྐྲག་པར་འགྱུར། གང་ལགས་ཟེར་ན་དཀོན་མཆོག་ཁོང་ཉིད་ནི། ཉིད་ཀྱི་བཀའ་ཁྲིམས་སྲུང་མཁན་མཉམ་དང་འགྲོགས།

⁶ ངན་པས་དུལ་སེམས་ཅན་གྱི་འཆར་གཞི་ལ། རྒྱུན་དུ་འཚེ་བ་བར་ཆད་གཏོང་ཐབས་བྱས། འོན་ཀྱང་གཙོ་བོ་དཀོན་མཆོག་ཁོ་ཚོའི་སྐྱབས་གནས་ལགས།

⁷ ཛི་ཡོན་གནས་ནས་ཨིསི་རཱཨེལ་པ་ཡི་ཕྱོགས། རྒྱལ་ཁ་ཡོང་བར་ཤོག་ཅེས་ཁོ་བོ་ཡིས། སེམས་ནས་སྨོན་འདུན་གང་མང་ཞུས་པ་ཡིན། ཨིསི་རཱཨེལ་པ་རྣམས་གཙོ་བོ་དཀོན་མཆོག་གིས། སླར་ཡང་ཕྱུག་པོར་བཟོས་པའི་དུས་སྐབས་སུ། དེ་ཚོར་དགའ་སྣང་ཆེན་པོ་ཇི་ཙམ་བྱུང་༎