གསུང་མགུར 139 - Tibetan Old Testament 2011

དཀོན་མཆོག་གི་མཁྱེན་བྱ་ཆ་ཚང་དང་བྱམས་སྐྱོང།

¹ གཙོ་བོ་དཀོན་མཆོག་ཁྱེད་ཀྱིས་ང་ལ་ཚོད་ལྟ་གནང་བ་དང་ཁྱེད་ཀྱིས་ང་ལ་མཁྱེན།

² ང་ཡི་གང་བྱས་ལས་རྣམས་ཁྱེད་ཀྱིས་མཁྱེན། ཁྱེད་ཀྱིས་རྒྱངས་ནས་ང་ཡི་བསམ་ཚུལ་རྣམས་མཁྱེན།

³ ང་ཡི་ལས་བྱས་ཡང་ངལ་གསོ་རྒྱབ་ཡང་ཁྱེད་ཀྱིས་ང་ལ་གཟིགས། ཁྱེད་ཀྱིས་ང་ཡི་བྱ་བ་ཐམས་ཅད་མཁྱེན།

⁴ ང་ཡིས་གཏམ་སྨྲས་པའི་སྔོན། ང་ཡིས་ཇི་སྨྲ་གྲབ་ཡོད་པ་དེ་ཁྱེད་ཀྱིས་མཁྱེན་ཚར་རོ།

⁵ ང་ཡི་རྒྱབ་མདུན་ཕྱོགས་བཞིར་ཁྱེད་རང་བཞུགས། ཁྱེད་ཀྱི་སྟོབས་ཀྱིས་ང་ལ་སྲུང་སྐྱོབ་གནང་།

⁶ ངའི་སྐོར་ཁྱེད་ཀྱི་ཤེས་བྱ་ཧ་ཅང་གཏིང་རིང་ཡོད། དེ་ནི་ང་ཡིས་རྟོགས་པར་ཤིན་ཏུ་དཀའ།

⁷ ཁྱེད་ཀྱི་མདུན་ནས་ང་ནི་བྲོས་ནས་གང་དུ་འགྲོ་ཐུབ་བམ། ཁྱེད་ཀྱི་གཟི་བརྗིད་ནས་ང་ནི་ག་རུ་བྲོས་ཐུབ་བམ།

⁸ ང་ནི་མཐོ་རིར་འགྲོ་ཡང་ཁྱེད་དེར་ཡོད། ང་ནི་འཆི་ཡུལ་དུ་འགྲོ་ཡང་ཁྱེད་དེར་ཡོད།

⁹ ཐག་རིང་ཤར་ཕྱོགས་ཕ་རོལ་དུ་འཕུར་ན་ཡང་། ནུབ་ཕྱོགས་ཐག་རིང་ཤོས་གནས་སུ་བསྡད་ན་ཡང་།

¹⁰ ང་ལ་སྣེ་འཁྲིད་གནང་ཕྱིར་ཁྱེད་དེར་ཡོད། ང་ལ་མགོན་སྐྱབས་བྱེད་ཕྱིར་ཁྱེད་དེར་བཞུགས་ཡོད།

¹¹ ང་ཡིས་མུན་པར་ང་ལ་སྦས་ཟེར་ལབ་ཐུབ་ཡང། ངའི་ཕྱོགས་བཞིར་འོད་ལ་མཚན་མོར་འགྱུར་ཟེར་ན་ཡང།

¹² མུན་པ་ཁྱེད་ཕྱིར་མུན་པ་མི་ཡོང་ངོ་། མཚན་ནི་ཉིན་དང་འདྲ་བ་འོད་ཟེར་འཕྲོ། ཁྱེད་ཕྱིར་མུན་པ་དང་འོད་ཁྱད་མེད་ཡིན།

¹³ ཁྱེད་ཀྱིས་ང་ཡི་ཡན་ལག་ཡོངས་རྫོགས་བཟོས། མ་ཡི་མངལ་ནང་ང་ལ་ཁྱེད་ཀྱིས་མཉམ་དུ་མཐུད་གནང་ངོ།

¹⁴ ང་ཡིས་ཁྱེད་ལ་གཏང་རག་འབུལ་གང་ལགས་ཟེར་ན་ང་ཚོས་ཁྱེད་ལ་འཇིགས་དགོས་སོ། ཁྱེད་ཀྱི་མཛད་འཕྲིན་རྣམས་ངོ་མཚར་ཆེ། དེ་ནི་ང་ཡིས་ཆ་ཚང་ཤེས་ཀྱི་ཡོད།

¹⁵ ང་ཡི་རུ་པ་རྣམས་ནི་བཟོས་པའི་སྐབས། ང་ཡི་ཨ་མའི་མངལ་ནང་འདི་རྣམས་གཟབ་གཟབ་ཀྱིས་མཐུད། དེ་རུ་ང་ནི་གསང་བའི་ནང་དུ་འཚར། ང་ནི་དེ་རུ་ཡོད་པ་ཁྱེད་ཀྱིས་མཁྱེན་གྱི་ཡོད།

¹⁶ ང་ནི་མ་སྐྱེས་སྔོན་དུ་ཁྱེད་ཀྱིས་ང་ལ་གཟིགས། ང་ཡི་ཚེ་ཚད་ཞག་རྣམས་མགོ་བཙུག་སྔོན། དེ་རྣམས་ཡོངས་སུ་ཁྱེད་ཀྱི་དེབ་ནང་བྲིས་ནས་ཡོད།

¹⁷ ཀྱེ་དཀོན་མཆོག་ཁྱེད་ཀྱི་དགོངས་པ་རྣམས་ཇི་ལྟར་རིན་ཐང་ཆེ། ཐུགས་དགོངས་དེ་ཚོ་ནི་ཇི་ལྟར་མང་།

¹⁸ ང་ཡིས་དེ་ཚོའི་གྲངས་རྩིས་ལེན་པ་ན། དེ་ཚོའི་གྲངས་ནི་བྱེ་མ་ལས་ཀྱང་མང་། ང་ནི་གཉིད་ལས་སད་དུས་ཁྱེད་ང་མཉམ་ཡོད།

¹⁹ ཀྱེ་དཀོན་མཆོག་མི་ངན་ཚོར་ཁྱེད་ཀྱི་ཕྱག་གིས་ཚར་དུ་གཅོད་པར་ང་ཡིས་འདོད། དྲག་པོའི་མི་ཚོ་ང་ལས་ཐག་རིང་བསྡད་པར་ང་ཡིས་འདོད།

²⁰ དེ་ཚོས་ཁྱེད་ཀྱི་སྐོར་ལ་གཏམ་ངན་ལབ། ཁྱེད་ཀྱི་མཚན་ལ་རྒོལ་ཕྱིར་གཏམ་གནོད་ཅན་ཤོད།

²¹ ཀྱེ་གཙོ་བོ་དཀོན་མཆོག་ཁྱེད་ལ་སྡང་མཁན་དེ་ཚོར་ངས་ཡང་གང་འདྲ་སྡང་། ཁྱེད་ལ་རྒོལ་མིར་ངས་ཀྱང་གང་འདྲ་སྨད་བཞིན་ཡོད།

²² ང་ཡིས་དེ་ཚོར་ཧ་ཅང་སྡང་གི་ཡོད། ང་ནི་དེ་ཚོར་རང་གི་དགྲ་བོ་བསམ།

²³ ཁྱེད་ཀྱིས་ང་ལ་བརྟག་དཔྱད་མཛོད་ཀྱེ་དཀོན་མཆོག། ང་ཡི་སེམས་ཤེས་པར་མཛོད། ང་ལ་ཚོད་བལྟ་མཛད་ནས་ང་ཡི་བསམ་བློ་རྣམས་ཤེས་པར་མཛོད།

²⁴ ངའི་ནང་ངན་པ་གང་ཞིག་ཡོད་ན་འཚོལ་དུ་གསོལ། ང་ལ་གཏན་གྱི་ལམ་ནང་འཁྲིད་པར་མཛོད༎