གསུང་མགུར 137 - Tibetan Old Testament 2011

བཙན་བྱོལ་དུ་ཕྱིན་པའི་ཨིསི་རཱཨེལ་པ་ཚོས་མྱ་ངན།

¹ ང་ཚོ་བྷེ་བྷི་ལོན་གྱི་གཙང་པོ་རྣམས་ཀྱི་འགྲམ་བསྡད། དེ་གར་ང་ཚོས་ཛི་ཡོན་དྲན་ནས་ངུས།

² དེ་གའི་འགྲམ་གྱི་ཤིང་ལྕང་སྡོང་སྟེང། ང་ཚོས་རང་གི་པི་ཝང་བཏགས་པ་ཡིན།

³ ང་ཚོར་བཙོན་དུ་འཁྱེར་མཁན་ཚོས་ང་ཚོར་གླུ་ལེན་བཅུག། ཁོ་ཚོའི་སེམས་དགའ་ཕྱིར་ང་ཚོར་འདི་ལྟར་སྨྲས། ང་ཚོར་ཛི་ཡོན་སྐོར་ལ་གླུ་གཏོང་ཞིག་།

⁴ ཇི་ལྟར་གཞན་གྱི་ཡུལ་དུ་ང་ཚོ་ཡིས། གཙོ་བོ་དཀོན་མཆོག་ཁོང་ལ་གླུ་ལེན་ནམ།

⁵ ང་ཡིས་ཡེ་རུ་ཤ་ལེམ་ཁྱོད་བརྗེད་ན། ང་ཡིས་ནམ་ཡང་པི་ཝང་གཏོང་མི་ཐུབ་པར་ཤོག།

⁶ ང་ཡིས་ཁྱོད་ལ་དྲན་གསོ་མ་བྱས་ན། ཁྱོད་ལ་རང་གི་དགའ་སྤྲོ་ཆེ་ཤོས་དེ་བཞིན་རྩིས་ནས་མ་དྲན་ན། ང་ཡིས་ནམ་ཡང་མགུར་མ་ལེན་མི་ཐུབ་པར་ཤོག།

⁷ ཡེ་རུ་ཤ་ལེམ་དབང་དུ་བསྡུ་བའི་ཉིན། ཨེ་དོམ་པ་ཚོས་གང་བྱེད་པ་དྲན་པར་མཛོད། དེ་ཚོས་མུ་མཐུད་འདི་ལྟར་སྨྲས་པའི་གཏམ་ལ་དྲན་པར་མཛོད། དེ་ལ་མེད་པར་བྱས་ཏེ་སའི་ཁར་དབྱུགས།

⁸ བྷེ་བྷི་ལོན་ཁྱོད་མེད་པར་བཟོ་པར་འགྱུར། ཁྱོད་ཀྱི་ང་ཚོར་ཇི་བྱས་པའི་ཆེད་དུ། ཁྱོད་ལ་དགྲ་ཤ་ལེན་མཁན་མི་ཚོ་དགའོ།

⁹ དེ་ཚོས་ཁྱོད་ཀྱི་ཁྱེའུ་ཆུང་རྣམས་ཀྱང་འཁྱེར། དེ་ནས་དེ་ཚོ་བྲག་ཁར་བརྡབ་པར་འགྱུར༎