གསུང་མགུར 136 - Tibetan Old Testament 2011

གཏང་རག་གི་མགུར་མ།

¹ གཙོ་བོ་དཀོན་མཆོག་ལ་ནི་གཏང་རག་འབུལ་བར་གྱིས། གང་ལགས་ཟེར་ན་ཁོང་ནི་བཟང་པོ་ཡིན། ཁོང་གི་བྱམས་པ་རྒྱུན་དུ་གནས།

² ལྷ་ཀུན་གྱི་དཀོན་མཆོག་ལ་གཏང་རག་འབུལ་ཞིག། ཁོང་གི་བྱམས་པ་རྒྱུན་དུ་གནས།

³ གཙོ་བོ་རྣམས་ཀྱི་གཙོ་བོ་ལ་གཏང་རག་འབུལ་ཞིག། ཁོང་གི་བྱམས་པ་རྒྱུན་དུ་གནས།

⁴ ཁོང་ཉིད་གཅིག་པུས་ངོ་མཚར་ཆེ་བའི་ལས་རྣམས་མཛད། ཁོང་གི་བྱམས་པ་རྒྱུན་དུ་གནས།

⁵ ཁོང་གི་ཤེས་རབ་ཀྱི་ནི་མཐོ་རིས་བཀོད་གནང་ངོ་། ཁོང་གི་བྱམས་པ་རྒྱུན་དུ་གནས།

⁶ ཁོང་གིས་རྒྱ་མཚོ་གཏིང་རིང་སྟེང་དུ་ས་གཞི་འཇོག་གནང་ངོ་། ཁོང་གི་བྱམས་པ་རྒྱུན་དུ་གནས།

⁷ ཉི་མ་དང་ནི་ཟླ་བ་ཁོང་གིས་བཟོས་གནང་ངོ་། ཁོང་གི་བྱམས་པ་རྒྱུན་དུ་གནས།

⁸ ཉིན་མོའི་དོན་དུ་ཉི་མ་བཟོས་གནང་ངོ་། ཁོང་གི་བྱམས་པ་རྒྱུན་དུ་གནས།

⁹ མཚན་མོའི་དོན་དུ་ཟླ་བ་དང་ནི་སྐར་མ་བཟོས། ཁོང་གི་བྱམས་པ་རྒྱུན་དུ་གནས།

¹⁰ ཨི་ཇིབ་པ་ཚོའི་སྔོན་སྐྱེས་བུ་རྣམས་ཁོང་གིས་བསད། ཁོང་གི་བྱམས་པ་རྒྱུན་དུ་གནས།

¹¹ ཁོང་གིས་ཨིསི་རཱཨེལ་གྱི་མི་ཚོ་ཨི་ཇིབ་ཡུལ་ནས་བཏོན། ཁོང་གི་བྱམས་པ་རྒྱུན་དུ་གནས།

¹² མཐུ་ལྡན་ཕྱག་དང་སྟོབས་ལྡན་ཕྲག་པས་བཏོན་པ་དང་། ཁོང་གི་བྱམས་པ་རྒྱུན་དུ་གནས།

¹³ ཁོང་གིས་རྒྱ་མཚོ་དམར་པོ་ཁག་གཉིས་མཛད། ཁོང་གི་བྱམས་པ་རྒྱུན་དུ་གནས།

¹⁴ རང་གི་མི་འབངས་དེ་བརྒྱུད་འཁྲིད། ཁོང་གི་བྱམས་པ་རྒྱུན་དུ་གནས།

¹⁵ འོན་ཀྱང་ཨི་ཇིབ་རྒྱལ་པོ་དང་ནི་ཁོང་གི་དམག་མི་ཆུ་ལ་སྐྱུར། ཁོང་གི་བྱམས་པ་རྒྱུན་དུ་གནས།

¹⁶ ཁོང་གིས་རང་གི་མི་འབངས་ལ་འབྲོག་སྟོང་བརྒྱུད་ནས་འཁྲིད། ཁོང་གི་བྱམས་པ་རྒྱུན་དུ་གནས།

¹⁷ སྟོབས་དང་ལྡན་པའི་རྒྱལ་པོ་རྣམས་ལ་ཁོང་གིས་བསད། ཁོང་གི་བྱམས་པ་རྒྱུན་དུ་གནས།

¹⁸ སྙན་གྲགས་ལྡན་པའི་རྒྱལ་པོ་རྣམས་ལ་ཁོང་གིས་བསད། ཁོང་གི་བྱམས་པ་རྒྱུན་དུ་གནས།

¹⁹ ཁོང་གིས་ཨ་མོར་པ་ཚོའི་རྒྱལ་པོ་སི་ཧོན་བསད། ཁོང་གི་བྱམས་པ་རྒྱུན་དུ་གནས།

²⁰ བྷ་ཤན་ཡུལ་གྱི་རྒྱལ་པོ་ཨོག་ཡང་ཁོང་གིས་བསད། ཁོང་གི་བྱམས་པ་རྒྱུན་དུ་གནས།

²¹ ཁོང་གིས་དེ་ཚོའི་ཡུལ་རྣམས་ནི་རང་གི་འབངས་ལ་གནང་། ཁོང་གི་བྱམས་པ་རྒྱུན་དུ་གནས།

²² ཁོང་གི་ཞབས་ཕྱི་ཨིསི་རཱཨེལ་ལ་དེ་རྣམས་གནང་ངོ་། ཁོང་གི་བྱམས་པ་རྒྱུན་དུ་གནས།

²³ ཁོང་གིས་ང་ཚོ་ཕམ་དུས་ང་ཚོར་རྗེད་མ་སོང་། ཁོང་གི་བྱམས་པ་རྒྱུན་དུ་གནས།

²⁴ ཁོང་གིས་ང་ཚོར་ང་ཚོའི་དགྲ་བོ་རྣམས་ལས་ཐར་པ་གནང། ཁོང་གི་བྱམས་པ་རྒྱུན་དུ་གནས།

²⁵ གསོན་པོའི་རིགས་ཚང་མར་ཁོང་གིས་ཁ་ཟས་གནང་། ཁོང་གི་བྱམས་པ་རྒྱུན་དུ་གནས།

²⁶ མཐོ་རིས་ཀྱི་དཀོན་མཆོག་ཁོང་ལ་གཏང་རག་འབུལ། ཁོང་གི་བྱམས་པ་རྒྱུན་དུ་གནས༎