གསུང་མགུར 13 - Tibetan Old Testament 2011

མགོན་སྐྱབས་ཞུ་བའི་སྨོན་ལམ།

¹ གཙོ་བོ་དཀོན་མཆོག་ཁྱེད་ཀྱིས་ང་ལ་ག་དུས་བར། ཉིད་ཀྱི་ཐུགས་ནས་བསྙེལ་བར་མཛད་གནང་ངམ། ག་དུས་བར་དུ་ང་ལས་གབ་པར་མཛད། དུས་གཏན་གྱི་ཆེད་དུ་ཡིན་ནམ།

² ནམ་བར་ང་ཡིས་སྡུག་བསྔལ་མྱོང་དགོས་སམ། ཉིན་མཚན་མེད་པར་སྡུག་བསྔལ་འཁྱེར་དགོས་སམ། ག་དུས་བར་དུ་ངའི་ཐོག་དགྲ་བོ་རྒྱལ།

³ ཀྱེ་གཙོ་བོ་དཀོན་མཆོག་ང་ཡི་དཀོན་མཆོག་ལགས། ང་ལ་གཟིགས་ནས་བཀའ་ལན་གནང་། ང་ཡི་ནུས་སྟོབས་སླར་གསོ་མཛད་གནང་སྟེ། ང་ལ་ཤི་རུ་འཇུག་པ་མ་གནང་ཞིག།

⁴ ང་ཡི་དགྲ་བོས་ང་ཚོས་ཁོ་ལ་ཕམ་པར་བྱས་ཞེས་སྨྲ་མ་འཇུག་ཅིག། ཉམ་རྒུད་ཕྱིན་པའི་ང་ཡི་གནས་སྟངས་ལ། དེ་ཚོར་སྙིང་ཚིམ་འདེབས་པར་མ་འཇུག་ཅིག།

⁵ ཁྱེད་ཀྱི་རྒྱུན་ལྡན་ཐུགས་བརྩེ་ལ། ང་ནི་བློ་གཏད་ཡིད་ཆེས་བརྟེན་པོ་བྱེད། ཁྱེད་ཀྱིས་ང་ལ་སྐྱབས་མཛད་ངེས་པས། ང་ནི་བློ་སེམས་དགའ་ཞིང་ཡི་རང་ངོ་།

⁶ ཀྱེ་གཙོ་བོ་དཀོན་མཆོག་ང་ནི་ཁྱེད་ལ་བསྟོད་དབྱངས་འབུལ་རྒྱུ་ཡིན། གང་ལགས་ཟེར་ན་ཁྱེད་ཀྱི་ང་ལ་བཟང་པོ་གནང་༎