གསུང་མགུར 12 - Tibetan Old Testament 2011མགོན་སྐྱབས་ཞུ་བའི་སྨོན་ལམ། 1 གཙོ་བོ་དཀོན་མཆོག་ང་ཚོར་སྐྱབས་གྲོགས་མཛོད། མི་བཟང་པོ་ནི་གཅིག་ཀྱང་ལུས་མེད། སྐྱེ་བོ་དྲང་པོ་རྙེད་པ་ཤིན་ཏུ་དཀའ། 2 དེ་ཚོ་ཚང་མས་ཕན་ཚུན་རྫུན་གཏམ་བཤད། དེ་ཚོས་ཕན་ཚུན་ངོ་དགའ་དཔལ་ལེ་ཡིས། གཅིག་གིས་གཅིག་ལ་མགོ་བསྐོར་བསླུ་འཁྲིད་བྱེད། 3-4 ཀྱེ་གཙོ་བོ་དཀོན་མཆོག་ཁྱེད་ཉིད་ཀྱིས། ངོ་སོ་དཔལ་ལེ་བྱེད་པའི་ལྕེ་རྣམས་བཀག། ང་ཚོར་དགོས་པའི་དངོས་པོ་ཇི་ཡོད་རྣམས། ཁ་ནས་བརྫོད་པ་ཙམ་གྱིས་སྒྲུབ་པར་བྱེད། སེམས་ནས་གང་དྲན་ཁ་ནས་སྨྲ་བར་བྱ། ང་ཚོར་བཀག་འགོག་བྱ་མཁན་སུ་ཡོད་དམ། ཞེས་ཟེར་སྦོར་ཤོབ་བྱེད་པའི་ཁ་རྣམས་བཀག། 5 འོན་ཀྱང་ད་ང་ཡོང་གི་ཡིན་ཞེས་གཙོ་བོ་དཀོན་མཆོག་གི་གསུངས། གང་ལགས་ཟེར་ན་དགོས་མཁོ་ཅན་རྣམས་མནར་གཅོད་ནང་ཚུད་ཡོད། གཉའ་གནོན་མྱོང་མཁན་རྣམས་ཀྱིས་ནད་ཟུག་གི་འཁུན་སྒྲ་འདོན་པས་ན། ད་བར་ཁོ་ཚོས་རེ་འདོད་བྱས་པ་ཡིས་སྲུང་སྐྱོབ་དེ་ནི་ང་ཡིས་སྟེར་བར་བྱ། 6 གཙོ་བོ་དཀོན་མཆོག་ཉིད་ཀྱི་དམ་བཅའ་རྣམས་བློ་གདེང་བྱ་འོས་སོ། དེ་ནི་ལན་གྲངས་བདུན་ཙམ་མེར་སྲེག་བཏང་བའི་རིན་ཆེན་དངུལ་དང་མཆུངས་ཤིང་བཅོས་མིན་ལགས། 7-8 མི་ངན་ས་ཕྱོགས་ཀུན་ལ་ཁྱབ་ནས་ཡོད། ངན་པའི་ལས་ལ་ཚང་མས་བསྔགས་བརྗོད་བྱེད། ཀྱེ་གཙོ་བོ་དཀོན་མཆོག་ཁྱེད་ཀྱིས་ང་ཚོ་ལ། རྒྱུན་དུ་སྲུང་སྐྱོབ་བཙན་པོ་གནང་མཛད་ནས། དེ་འདྲའི་མི་ངན་རྣམས་ལས་སྐྱོབ་པར་མཛོད༎ |
Tibetan Old Testament © Bible Society of Nepal, 2011.
Nepal Bible Society