ལེགས་བཤད 9 - Tibetan Old Testament 2011

ཤེས་རབ་དང་གླེན་རྟགས།

¹ ཤེས་རབ་ཀྱིས་ཉིད་ཀྱི་ཁང་པ་བཟོས་ནས། དེ་ལ་ཀ་བ་བདུན་བཟོས་ཡོད།

² ཁོས་ཐུགས་སྤྲོའི་ཆེད་སེམས་ཅན་ཞིག་བསད་ཅིང་རྒུན་ཆང་དང་སྨན་སྣ་བསྲེས་ནས་རྒྱ་ལྕོག་གི་སྟེང་བཤམས་སོ།

³ ཁོས་རང་གི་གཡོག་མོ་རྣམས་དེ་གྲོང་ཁྱེར་གྱི་ས་མཐོ་ཤོས་ནས་འབོད་པར་བཏང་ངོ་།

⁴ མི་བློ་དམན་པ་རྣམས་ཚུར་ཤོག་ལ། གླེན་པ་རྣམས་ལ་མོས་སྨྲས་པ།

⁵ ངའི་ཁ་ལ་ཟ་བ་དང་བསྲེས་པའི་རྒུན་ཆང་འཐུང་བར་ཤོག་ཅིག

⁶ མི་བློ་དམན་པ་ཚོ་དང་འབྲལ་ལས་སྤངས་ནས་འཚོ་ཞིག ཡོན་ཏན་གྱི་ལམ་དུ་བྲངས་ཤིག།

⁷ ཁྱོད་ཀྱིས་རང་མཐོང་ཅན་གྱི་སྐྱེ་བོར་བཅུན་པ་ཡིན་ན། ཁྱོད་ལ་ཚུར་དམའ་འབེབས་བྱེད་པར་འགྱུར། ཁྱོད་ཀྱིས་སྐྱེ་བོ་ངན་པ་ཞིག་ལ་ཁ་བརྡུང་བཏང་བ་ཡིན་ན། ཁྱོད་རང་རང་ཉིད་རྨས་པར་འགྱུར།

⁸ རང་མཐོང་ཅན་གྱི་མི་ལ་ནམ་ཡང་མ་བཅུན་ཞིག ཁོས་ཁྱོད་ལ་སྡང་བར་བྱེད་དོ། འོན་ཀྱང་ཁྱོད་ཀྱིས་མི་ཤེས་རབ་ལྡན་པ་ཞིག་ལ་བཅུན་པ་ཡིན་ན། དེས་ཁྱོད་ལ་གུས་ཞབས་བྱེད་དོ།

⁹ སྐྱེ་བོ་ཤེས་རབ་ལྡན་པ་ཞིག་ལ་ཁྱོད་ཀྱིས་བཤད་པ་རྣམས་ཀྱིས་ཁོ་ནི་དེ་བས་ཤེས་རབ་ཆེ་བར་འགྱུར། ཁྱོད་ཀྱིས་སྐྱེ་བོ་དྲང་ལྡན་ཞིག་ལ་ཇི་འདྲ་བཤད་པ་དེས་ཁོའི་ཡོན་ཏན་འཕེལ་བར་འགྱུར་རོ།

¹⁰ ཤེས་རབ་ལྡན་པ་ཡོང་བ་བྱ་རྒྱུར་ཐོག་མར་གཙོ་བོ་དཀོན་མཆོག་གུས་ཞབས་བྱེད་དགོས། ཁྱོད་ཀྱིས་དམ་པ་མཆོག་དེ་ངོས་ཤེས་ཀྱི་ཡོད་ན་ཁྱོད་ལ་བློ་གྲོས་ཡོད་དོ།

¹¹ ཤེས་རབ་ཀྱིས་ཁྱོད་ཀྱི་མི་ཚེར་འཕེལ་བར་འགྱུར།

¹² ཁྱོད་ལ་ཤེས་རབ་ཡོད་པ་ཡིན་ན། ཁྱོད་ནི་མཁེ་བཟང་ཐོབ་མཁན་དེ་ཡིན། ཁྱོད་ཀྱིས་དེ་ལ་དང་ལེན་མ་བྱས་པ་ཡིན་ན། ཁྱོད་ནི་སྡུག་བསྔལ་མྱོང་མཁན་དེ་ཡིན་ནོ།

¹³ གླེན་པ་ནི་སྐད་ཆེན་པོ་དང་བློ་དམན་པ་ངོ་ཚ་མེད་པའི་བུད་མེད་ལྟ་བུ་ཡིན།

¹⁴ མོ་ནི་རང་གི་ཁང་པའི་སྒོར་བསྡད་པའམ། ཡང་ན་གྲོང་ཁྱེར་གྱི་ས་གནས་མཐོ་ཤོས་སུ་བསྡད་པ་དང་།

¹⁵ མི་ཡར་མར་འགྲོ་མཁན་རང་གི་ལས་དོན་བྱ་མཁན་ཚོ་ལ་འབོད་པར་བྱེད་དོ།

¹⁶ མི་བློ་དམན་པ་རྣམས་ཚུར་ཤོག་ལ། གླེན་པ་ལ་མོས་སྨྲས་པ།

¹⁷ རྐུས་པའི་ཆུ་མངར་བ་ཡོད། རྐུས་པའི་བག་ལེབ་ཞིམ་པོ་ཡོད།

¹⁸ མོའི་ཁྱིམ་དུ་འགྲོ་མཁན་ཚོ་ཤི་བ་དང། མོའི་ཁྱིམ་དུ་འཛུལ་ཚར་མཁན་རྣམས་ནི་འཆི་བའི་གླིང་དུ་སླེབས་ཚར་བ་མོའི་ལག་ཏུ་ཚུད་པ་རྣམས་ཀྱིས་མི་ཤེས་སོ༎