ལེགས་བཤད 8 - Tibetan Old Testament 2011

ཤེས་རབ་ལ་བསྟོད་བསྔགས།

¹ ཉོན་དང་ཤེས་རབ་ཀྱི་འབོད་བཞིན་འདུག། བློ་གྲོས་ཀྱིས་སྐད་ཅོར་བརྒྱབ་བཞིན་འདུག།

² ལམ་གྱི་ཉེ་འགྲམ་གྱི་རི་རྩེར་དང་། ལམ་འཛོམས་ཁག་ཏུ་མོ་ལངས་ཡོད།

³ གྲོང་ཁྱེར་ནང་དུ་འཛུལ་སྒོ་དང་། རྒྱལ་སྒོའི་ཉེ་འགྲམ་མོས་འདི་ལྟར་སྐད་འབོད་བྱས།

⁴ ཁྱོད་ཚོ་ཚང་མར་ང་ཡིས་འབོད་པ་དང་། ས་གཞིར་ཡོད་པ་ཚང་མར་ང་ཡིས་འབོད།

⁵ ཁྱོད་ཚོ་ན་ཚོད་མ་ལོན་པ་ཡིན་ནམ། ན་ཚོད་ལོན་རྒྱུར་སྦྱོངས་དར་གྱིས། ཁྱོད་རང་གླེན་པ་ཞིག་ཡིན་ནམ། བློ་གྲོས་ཡོང་རྒྱུར་སྦྱོངས་དར་གྱིས།

⁶ ངའི་གཏམ་རྩེ་གྲ་ལ་ཉོན་ཞིག། ངས་སྨྲས་པ་རྣམས་དྲང་པོ་ཡིན།

⁷ ངས་སྨྲས་པ་རྣམས་བདེན་པ་ཡིན། རྫུན་རྣམས་ལ་ངས་སྡང་བར་བྱ།

⁸ ངས་བཤད་པ་རྣམས་བདེན་པ་ཡིན། རྫུན་དང་བསླུ་འཁྲིད་གང་ཡང་མེད།

⁹ ནང་དོན་རྟོགས་པའི་ནུས་པ་ཡོད་པ་ཚོར། དེ་རྣམས་ཚང་མ་གསལ་པོ་ཡིན། ཤེས་ཡོན་མཁྱེན་མི་ཚང་མ་ལ། དེ་རྣམས་ཚང་མ་ཀུན་གསལ་ཡིན།

¹⁰ དངུལ་གྱི་ཚབ་ལ་ངའི་སློབ་སྟོན་འདམས། ལེགས་པའི་གསེར་ལས་ཡོན་ཏན་འདམས།

¹¹ ང་ནི་རང་ཉིད་ཤེས་རབ་ཡིན། ང་ནི་ནོར་བུ་ལས་ལེགས་སོ། ཁྱོད་ཚོས་འདོད་པའི་གང་ཞིག་ང་དང་བསྡུར་མི་ཐུབ།

¹² ང་ནི་རང་ཉིད་ཤེས་རབ་ཡིན། ང་ལ་ནང་དོན་རྟོགས་པའི་ནུས་པ་ཡོད། ང་ལ་ཡོན་ཏན་དང་ནི། ཁྲིམས་དྲང་གཅོད་པའི་ཤེས་བྱ་ཡོད།

¹³ གཙོ་བོ་དཀོན་མཆོག་ལ་གུས་བརྩི་ཞུ་རྒྱུ་ནི། ངན་པར་སྡང་པོ་བྱ་རྒྱུ་ཡིན། ང་ནི་སྤོབས་པ་ཅན་དང་ང་རྒྱལ་དང་། ངན་པའི་ལམ་དང་རྫུན་ལ་སྡང་།

¹⁴ ང་ཡིས་འཆར་གཞི་བཟོ་བ་རྣམས་ལ། དེ་ཚོ་ལག་ལེན་གྱིས་བཞིན་ཡོད། ང་ལ་བློ་གྲོས་ཡོད་པ་དང་། ང་ནི་སྟོབས་ཤུགས་ཆེན་པོ་ཡིན།

¹⁵ རྒྱལ་པོ་ཚོ་ལ་འཛིན་སྐྱོངས་དང་། དབང་བསྒྱུར་མཁན་ཚོར་ཁྲིམས་བཟང་པོ། བཟོ་རྒྱུར་རོགས་རམ་ངས་བྱེད་ཡོད།

¹⁶ ང་ཡི་རོགས་ཀྱིས་འཛིན་སྐྱོང་པ་རྣམས་ཀྱིས། ས་གཞིར་སྲིད་སྐྱོང་བྱེད་བཞིན་ཡོད། ལས་བྱེད་པ་དང་ནི་སྐུ་དྲག་ཚོར་ཡང་དེ་བཞིན་བྱེད།

¹⁷ ང་ལ་བརྩེ་མཁན་རྣམས་ལ་ངས་བརྩེས། ང་ལ་འཚོལ་མཁན་རྣམས་ལ་ང་རྙེད་པར་འགྱུར།

¹⁸ ང་ལ་རྒྱུ་ནོར་ཆེ་མཐོང་དང་། འཕེལ་རྒྱས་ལམ་ལྷོང་སྤྲོད་རྒྱུ་ཡོད།

¹⁹ ང་ལས་ཐོབ་པ་གསེར་སྤུས་ལེགས་ལས་ལྷག། སྤུས་ལེགས་དངུལ་ལས་ཀྱང་ལེགས་སོ།

²⁰ ང་ནི་དྲང་བདེན་ལམ་དུ་སྐྱོད། ཁྲིམས་དྲང་རྗེས་སུ་ང་ནི་འཇུག།

²¹ ང་ལ་བརྩེ་བར་རྒྱུ་ནོར་བྱིན། དེ་ཚོའི་ཁྱིམ་ནི་གཏེར་གྱི་བཀང་།

²² ཐོག་མར་གཙོ་བོ་དཀོན་མཆོག་གིས། ང་ལ་བཀོད་པར་མཛད་པ་ཡིན། སྔར་གྱི་མཛད་པ་དང་པོ་རུ།

²³ ཐོག་མར་འཛམ་གླིང་བྱུང་བའི་སྔོན། དང་པོ་ང་ལ་བཟོས་པར་གནང་།

²⁴ ཆུ་དང་ཆུ་མིག་མེད་པའི་སྔོན། ང་ནི་རྒྱ་མཚོའི་སྔོན་དུ་སྐྱེས།

²⁵ རི་ཕྲན་རང་གནས་ཚུགས་པའི་སྔོན། རི་ཡི་སྔོན་དུ་ང་སྐྱེས་སོ།

²⁶ དཀོན་མཆོག་གིས་ནི་འཛམ་གླིང་དང་། ས་ཞིང་དང་ནི་ས་སོགས་མ་བཟོ་སྔོན་ང་སྐྱེས་སོ།

²⁷ ཁོང་གིས་ནམ་མཁའི་གནས་དེ་རུ་ཛུགས་དུས། མཁའི་དབྱིངས་དེ་མཚོའི་ཐོག་བཀྲམ་དུས་ང་དེར་ཡོད།

²⁸ སྤྲིན་རྣམས་ནམ་མཁར་འཇོག་དུས་དང་། མཚོ་ནས་ཆུ་མིག་འདོན་སྐབས་དང་།

²⁹ རྒྱ་མཚོའི་ཆུ་ལ་གསུངས་གནང་བ། མཐོ་བར་འགྲོ་མི་རུང་བ་སོགས། བཀའ་ནི་གནང་སྐབས་ང་ནི་དེར་ཡོད། ཁོང་གིས་འཛམ་གླིང་གི་རྨང་གཞི་ཛུགས་དུས་ང་དེར་ཡོད་དོ།

³⁰ ང་ནི་ཁོང་གི་འགྲམ་དུ་ལག་ཤེས་མཁས་པ་ལྟར། ཉིན་དར་ཁོང་ལ་དགའ་བ་སྤྲད། ཁོང་དྲུང་རྟག་ཏུ་ང་ནི་དགའ་བདེར་གནས།

³¹ འཛམ་གླིང་མཉམ་དུ་དགའ་ཞིག་མགུ། མི་རིགས་བརྒྱུད་ལ་དགའ་ཞིང་གནས།

³² ད་ནི་ན་གཞོན་ནུ་ཚོ་ང་ལ་ཉོན། ང་ཡིས་སྨྲས་པ་ལྟར་གྱིས་ཤིག། དེ་ཡིས་ཁྱོད་ནི་དགའ་སྐྱིད་ལྡན།

³³ སློབ་སྟོན་ཇི་ལྟར་གྱིས་པར་ཉོན། ཤེས་རབ་དང་ནི་ལྡན་འགྱུར་ནས། དེ་ལ་སྣང་མེད་མ་བྱེད་ཅིག།

³⁴ ང་ལ་ཉན་ནས་ཉིན་རེ་བཞིན། ངའི་སྒོར་བསྡད་ཅིང་ངའི་ཁྱིམ་གྱི། འཛུལ་སྒོར་སྒུག་མཁན་མི་དེ་བདེ།

³⁵ ང་ལ་རྙེད་ན་མི་ཚེ་རྙེད། གཙོ་བོ་དཀོན་མཆོག་ཁོ་ལ་དགྱེད་པར་འགྱུར།

³⁶ ང་ལ་མི་རྙེད་མཁན་དེ་རང་ལ་གནོད། ང་ལ་སྡང་མཁན་འཆི་བར་བརྩེ་བའོ༎