ལེགས་བཤད 7 - Tibetan Old Testament 2011

¹ ངའི་བུ་ངས་ཇི་ལྟར་བྱེད་དགོས་སྨྲས་པ་རྣམས་མ་རྗེད་པར་དྲན་པར་གྱིས་ཤིག

² ངས་སྨྲས་པ་ལྟར་གྱིས་པ་ཡིན་ན་ཁྱོད་འཚོ་བར་འགྱུར། ཁྱོད་ཀྱིས་མིག་ལ་སྲུང་སྐྱོབ་བྱེད་པ་ལྟར་ངའི་སློབ་སྟོན་ལ་དྭངས་ལེན་བྱ་རྒྱུར་ཟབ་ཟབ་བྱོས་ཤིག

³ ངའི་སློབ་སྟོན་རྣམས་རྒྱུན་དུ་བདག་ཉར་གྱིས་ལ་དེ་ཚོ་སེམས་ནང་བཀོད་ཅིག

⁴ ཤེས་རབ་ཁྱོད་ཀྱི་སྲིང་མོ་ལྟར་ངོས་འཛིན་གྱིས་ལ། ནང་དོན་རྟོགས་པའི་ནུས་པ་ནི་ཁྱོད་ཀྱི་གྲོགས་པོ་ཉེ་ཤོས་ལ་ངོས་འཛིན་གྱིས་ཤིག

⁵ དེ་ཚོས་ཁྱོད་ལ་མི་གཞན་གྱི་ཆུང་མ་དང་བུད་མེད་ཀྱི་བསླུ་འཁྲིད་ཀྱི་གཏམ་ལས་ཐག་རིང་འཇོག་པར་བྱ་ཡོང་༎

བུད་མེད་ཚུལ་མིན།

⁶ ང་ཐེངས་གཅིག་ངའི་ཁང་པའི་སྒེ་ཁུང་ནས་བལྟ་བཞིན་ཡོད་པ་དང་།

⁷ ངས་ཉམས་མྱོང་མེད་པའི་སྐྱེ་པ་ན་གཞོན་མང་པོ་མཐོང་བ་དང་། དེའི་ནང་ནས་སྐྱེ་བོ་གླེན་པ་ཞིག་ལ་དམིགས་བསལ་གྱི་དོ་སྣང་བྱུང་།

⁸ ཁོ་རྒྱ་ལམ་གྱི་ཟུར་ལ་གནས་སྡོད་བྱེད་པའི་བུད་མེད་ཞིག་གི་སྡོད་སའི་ཉེ་འགྲམ་དུ་གོམ་པ་རྒྱབ་ནས་འགྲོ་བཞིན་འདུག་གོ ཁོ་མོའི་ཁང་པའི་ཉེ་འགྲམ་དུ་འགྲོ་བཞིན་ཡོད་སྐབས།

⁹ དེ་དུས་ཕྱི་དྲོ་ས་རུབ་ནས་ནག་ཁུང་གི་སྐབས་ཡིན་ནོ།

¹⁰ དེ་ནས་མོས་ཁོ་ལ་འཕྲད་པ་དང་། མོ་ནི་སྨད་འཚོང་མའི་གྱོན་གོས་ལྟ་བུ་གྱོན་ནས་འཆར་གཞི་བཟོ་བཞིན་ཡོད་དོ།

¹¹ མོ་བློ་ཁོག་ཆེན་པོ་དང་ངོ་ཚ་མེད་མཁན་གྱི་བུད་མེད་རྟག་ཏུ་རྒྱ་ལམ་དུ་འགྲུལ་མཁན་ཞིག་ཡིན་པ་དང་།

¹² ལམ་གྱི་ཟུར་དུ་ལངས་ནས་སྒུག་བསྡད་པའམ། སྐབས་རེ་རྒྱ་ལམ་དང་སྐབས་རེ་ཁྲོམ་རར་སྒུག་པར་བྱེད།

¹³ མོས་སྐྱེ་པ་ན་གཞོན་ལ་འཐམས་ནས་ཁ་བསྐྱལ་བ་དང་། ཁོའི་མིག་ལ་ཐད་ཀར་བལྟས་ནས་སྨྲས་པ།

¹⁴ ངས་དེ་རིང་མཆོད་པ་ཕུལ་བའི་དམར་མཆོད་ཀྱི་ཤ་ང་དང་མཉམ་དུ་ཡོད།

¹⁵ དེར་བརྟེན་ངས་ཁྱོད་ལ་འཚོལ་བཞིན་ཡོང་བ་ཡིན། ངས་ཁོད་འཚོལ་འདོད་ཡོད་པ་དང་ཁྱོད་ནི་འདིར་འདུག་གོ

¹⁶ ངས་མལ་ཁྲི་ལ་ཨི་ཇིབ་ཡུལ་གྱི་ཀ་ཅིའི་མཚོན་ཁྲ་ཅན་གྱི་རས་ཀྱིས་ཁེབས་གཡོགས་ཡོད་དོ།

¹⁷ ངས་དེ་ལ་གུ་གུལ་དང་ཨ་ག་རུ་དང་ཤིང་མངར་བཅས་དྲི་ཞིམ་གྱིས་གཏོར་ནས་ཡོད།

¹⁸ ད་ཤོག་དང་ང་གཉིས་མཚན་གང་བརྩེ་བ་བྱེད་དོ། ང་གཉིས་གཅིག་གི་གཅིག་ལ་ཐམ་ནས་དགའ་བདེར་སྤྱོད་དོ།

¹⁹ ངའི་ཁྱོ་ཁྱིམ་དུ་མེད། ཁོ་ཐག་རིང་དུ་ཕྱོགས་ཐོན་བྱས་སོང་།

²⁰ ཁོས་དངུལ་མང་པོ་འཁྱེར་སོང་བས། གཟའ་འཁོར་གཉིས་ཙམ་ལོག་མི་ཡོང་ཞེས་སྨྲས་སོ།

²¹ དེར་བརྟེན་མོའི་ཡིད་འཕྲོག་གི་ནུས་པས་ཁོ་ལ་བསླུ་འཁྲིད་བྱས་པ་དང་། མོའི་གཏམ་སྙན་པོར་ཁོ་མགོ་འཁོར་རོ།

²² གློ་བུར་དུ་ཁོ་གླང་གོག་གསོད་སར་འགྲོ་བ་ལྟར་དང་། ཤ་བ་རྙི་ལ་བང་འགྲོས་རྒྱབ་བ་ལྟར་དང་།

²³ ཁོའི་སྙིང་ལ་མདའ་ཟུག་པ་ལྟར་མོ་དང་མཉམ་དུ་ཕྱིན་ནོ། ཁོ་བྱིའུ་དྲ་བའི་ནང་འགྲོ་བ་ལྟ་བུ་ཡོད་པ་དང་། ཁོའི་སྲོག་ལ་ཉེན་ཁ་ཡོད་པ་མ་ཤེས་སོ།

²⁴ དེ་བས་ན་ངའི་བུ་ཚོ་ང་ལ་ཉོན་ཞིག། ངས་བཤད་པར་དོ་སྣང་གྱིས་ཤིག།

²⁵ བུད་མེད་དེ་ལྟ་བུ་ལ་ཁྱོད་ཀྱིས་སེམས་ཤོར་དུ་མ་བཅུག་ཅིག མོའི་རྗེས་སུ་འཁྱམས་ནས་མ་འགྲོ་ཞིག

²⁶ མོས་མི་མང་པོ་འཕྲོག་བརླག་བཏང་ཡོད་པ་དང་། མི་གྲངས་མེད་འཆི་རྐྱེན་འགྱུར་ཡོད་པ་དང་།

²⁷ ཁྱོད་མོའི་ཁྱིམ་དུ་སོང་བ་ཡིན་ན་ཁྱོད་འཆི་བའི་གླིང་གི་ལམ་དུ་ཡོད། དེ་ནི་འཆི་བའི་མགྱོགས་ལམ་ཡིན་ནོ༎