ལེགས་བཤད 5 - Tibetan Old Testament 2011

ལོག་གཡེམ་གྱི་སྐོར་ལ་ཉེན་བརྡ།

¹ ངའི་བུ། ངའི་ཤེས་རབ་ལ་དོ་སྣང་གྱིས་ཤིག་དང་། ངའི་ནང་དོན་རྟོག་པའི་བཀའ་རྣམས་དོ་སྣང་གིས་ཉོན་ཞིག

² དེ་ནས་ཁྱོད་ཀྱིས་སྤྱོད་ལམ་ཇི་ལྟར་ལེགས་པར་བྱ་དགོས་ཤེས་པར་འགྱུར་བ་དང་། ཁྱོད་ཀྱི་གཏམ་གྱི་ཁྱོད་ཡོན་ཏན་ཅན་ཡིན་པ་བསྟན་ནོ།

³ མི་གཞན་གྱི་ཆུང་མའི་མཆུ་ཏོ་ནི་སྦྲང་རྩི་ལྟར་མངར་བར་དང་། མོའི་ཁ་བསྐྱལ་བ་དེ་སྐྱུ་རུའི་སྣུམ་ལྟར་འཇམ་པོ་ཡོད་སྲིད།

⁴ འོན་ཀྱང་ཚང་མ་ཚར་བའི་རྗེས་སུ་མོས་ཁག་ཏིག་དང་ན་ཟུག་མ་གཏོགས་གཞན་གང་ཡང་འཇོག་པར་མི་བྱེད་དོ།

⁵ མོས་ཁྱོད་ལ་མར་འཆི་བའི་གླིང་དུ་འཁྲིད་པ་དང་། མོས་གོམ་པ་སྤོས་པའི་ལམ་ནི་འཆི་བའི་ལམ་ཡིན་ནོ།

⁶ མོས་གསོན་པོའི་ལམ་དུ་མི་སྡོད་པར། འཁྱམས་འགྲོ་བ་དང་ཇི་འདྲ་ཡོང་བཞིན་ཡོད་པ་མོས་མི་ཤེས་སོ།

⁷ ད་ངའི་བུ་ཚོ་ང་ལ་ཉོན་ཞིག། ངས་ཇི་ལྟར་བཤད་པར་རྩ་བ་ནས་མ་རྗེད་པར་གྱིས་ཤིག

⁸ བུད་མེད་དེ་ལས་འགྱངས་རིང་དུ་སྡོད་ཅིག། མོའི་སྒོའི་ཉེ་འགྲམ་དུ་མ་འགྲོ་ཞིག།

⁹ དེ་མིན་ཁྱོད་ལ་ཡོད་པའི་གུས་ཞབས་དེ་གཞན་ལ་ཐོབ་པར་འགྱུར་བ་དང་། སྐྱེ་བོ་སྙིང་རྗེ་མེད་པ་ཚོའི་ལག་ཏུ་ཁྱོད་ན་གཞོན་དུ་སུ་འཆི་བར་འགྱུར་རོ།

¹⁰ མི་ངོ་མི་ཤེས་པ་ཚོས་ཁྱོད་ཀྱི་རྒྱུ་ནོར་འཁྱེར་བ་དང་། ཁྱོད་ཀྱིས་དཀའ་ལས་རྒྱབ་པ་རྣམས་གཞན་ལ་བདག་པར་འགྱུར་རོ།

¹¹ ཁྱོད་འཆི་ཁའི་ཉལ་སར་འཁུན་སྐད་རྒྱབ་བཞིན་བསྡད་པ་དང་། ཁྱོད་ཀྱི་ཤ་དང་ཤ་རྒྱུ་མེད་པར་འགྱུར།

¹² ཁྱོད་ཀྱིས་འདི་ལྟར་སྨྲའོ། ངས་ཅི་ལ་མ་སྦྱངས་པ་ཡིན་ནམ། ང་ཡིས་གཞན་ནས་ནོར་བཅུན་མ་འཇུག་པ་ཡིན་ནམ།

¹³ ངས་ངའི་དགེ་རྒན་ཚོར་ཉན་མེད་པ་དང་། ངས་དེ་ཚོ་ལ་དོ་སྣང་བྱས་མེད་དོ།

¹⁴ དེ་བས་ན་ང་ནི་གློ་བུར་དུ་མང་ཚོགས་ཀྱི་ཁྲོད་དུ་དམའ་འབེབས་སུ་འགྱུར་སོ།

¹⁵ རང་གི་ཆུང་མ་དང་དམ་ཚིག་ཙང་བར་སྡོད་ཅིག མོ་གཅིག་པོར་བརྩེ་བ་གྱིས་ཤིག།

¹⁶ བུད་མེད་གཞན་ནས་སྐྱེད་པའི་ཁྱོད་ཀྱི་ཕྲུ་གུས་ཁྱོད་ལ་ཕན་ཐོག་མི་བྱེད་དོོ།

¹⁷ རང་གི་ཕྲུ་གུ་འཚར་ལོངས་བྱུང་ནས་ཁྱོད་ལ་རོགས་བྱེད་དགོས་སོ། ངོ་མི་ཤེས་པ་ཚོར་མ་ཡིན།

¹⁸ དེ་བས་ན་རང་གི་ཆུང་མ་དང་མཉམ་དུ་དགའ་བདེར་སྡོད་ལ། ཁྱོད་ཀྱིས་ཆང་ས་རྒྱབ་པའི་བུད་མེད་དང་མཉམ་དུ་དགའ་བར་བྱོས་ཤིག

¹⁹ མོ་ནི་ཤ་བ་ལྟ་བུ་མཛེས་པོ་དང་ཉམས་དོད་པོ་ཡོད། མོའི་ཡིད་དུ་འོང་བ་ནས་དགའ་བ་ཐོབ་བར་གྱིས་ལ། མོས་བརྩེ་བས་ཁྱོད་ལ་མཐའ་བསྐོར་དུ་འཇུག།

²⁰ ངའི་བུ། ཁྱོད་ཀྱིས་བུད་མེད་གཞན་ལ་བརྩེ་བ་ཅི་ལ་བྱེད་དགོས་སམ། ཁྱོད་ཀྱིས་སྐྱེ་བོ་གཞན་གྱི་ཆུང་མ་ཡིད་དུ་འོང་བར་ཅི་ལ་འདོད།

²¹ ཁྱོད་ཀྱིས་བྱས་པ་ཚང་མ་གཙོ་བོ་དཀོན་མཆོག་གིས་གཟིགས་པ་དང་། ཁྱོད་གང་དུ་སོང་ཡང་ཁོང་གིས་གཟིགས་བཞིན་ཡོད།

²² སྐྱེ་བོ་ངན་པའི་སྡིག་པ་རྣམས་རྙི་ལྟར་ཡིན་ནོ། ཁོ་རང་ཉིད་ཀྱི་སྡིག་པའི་དྲང་བར་འཚུད་པར་བྱེད་པ་དང་།

²³ ཁོ་འཆི་བར་འགྱུར། གང་ལགས་ཟེར་ན། ཁོ་པར་རང་གི་རང་ལ་དབང་བསྒྱུར་བྱེད་པའི་ནུས་པ་མེད་དོ། ཁོ་པའི་ཤིན་ཏུ་ལྐུག་རྟགས་ཀྱིས་ཁོ་པ་དུར་སར་གཏོང་བར་བྱེད་དོ༎