ལེགས་བཤད 4 - Tibetan Old Testament 2011

ཤེས་རབ་ཀྱི་ཕན་ཐོག།

¹ ངའི་བུ་རྣམས། ཁྱོད་ཚོའི་ཡབ་ཀྱི་ཁྱོད་ཚོ་ལ་སློབ་སྟོན་གནང་བར་ཉོན་ཞིག དེ་ལ་དོ་སྣང་བྱས་པ་ཡིན་ན་ཁྱོད་ཚོ་ལ་བློ་གྲོས་ཐོབ་བར་འགྱུར།

² ངས་ཁྱོད་རྣམས་སློབ་སྟོན་བྱེད་པ་དེ་བཟང་པོ་ཡིན་པས་དེ་ཚོ་ཚང་མ་དྲན་པར་བྱོས་ཤིག

³ ང་ནི་ཕ་མའི་བུ་ཆུང་ཤོས་གཅིག་པུ་དེ་ཡིན་སྐབས།

⁴ ངའི་ཡབ་ཀྱིས་ང་ལ་སློབ་སྟོན་གནང་ནས། ཁོང་གིས་ང་ལ་གསུངས་པ། ངས་ཅི་བཤད་པ་རྣམས་དྲན་པར་གྱིས་ལ་རྩ་བ་ནས་མ་བརྗེད་པར་བྱེད་དགོས་སོ། ངས་ཇི་ལྟར་བཤད་པ་ལྟར་གྱིས་པ་ཡིན་ན་ཁྱོད་འཚོ་བར་འགྱུར་རོ།

⁵ ཤེས་རབ་དང་ནང་དོན་རྟོགས་པའི་ནུས་པ་ལེན་ཞིག ངས་ཇི་ལྟར་བཤད་པ་རྣམས་མ་བརྗེད་པར་དེ་ལ་བརྩི་མེད་མ་བྱེད་ཅིག

⁶ ཁྱོད་ཀྱིས་ཤེས་རབ་མ་སྤོངས་ཤིག། མོས་ཁྱོད་སྐྱོབས་པར་བྱེད་དོ། དེ་ལ་བརྩེ་བ་བྱས་པ་ཡིན་ན་དེས་ཁྱོད་བདེ་བར་འཇོག་པར་བྱེད་དོ།

⁷ ཁྱོད་ཀྱིས་བྱེད་ཐུབ་པ་གལ་ཆེ་ཤོས་དེ་ནི་ཤེས་རབ་བླངས་རྒྱུ་དེ་ཡིན་ནོ། གཞན་ཁྱོད་ཀྱིས་ལེན་ཐུབ་པ་ནང་དོན་རྟོགས་ཐུབ་པའི་ནུས་པ་ལེན་ཞིག

⁸ ཤེས་རབ་ལ་བརྩེ་བ་བྱས་པ་ཡིན་ན། མོས་ཁྱོད་ལ་རླབས་ཆེན་བཟོ་བར་བྱེད་པ་དང་། མོ་ལ་ཁྱོས་ཀྱིས་འཐམས་པ་ཡིན་ན་མོས་ཁྱོད་ལ་གུས་ཞབས་སྟེར་བར་བྱེད་དོ།

⁹ དེ་ནི་ཁྱོད་ཀྱི་གཙུག་རྒྱན་གྱི་གཟི་བརྗེད་དེ་ཡིན་ནོ།

¹⁰ ངའི་བུ་ང་ལ་ཉོན་ཞིག། ངས་ཇི་ལྟར་བཤད་པ་རྣམས་སེམས་ཀྱི་ནང་ནས་ཉན་པ་ཡིན་ན་ཁྱོད་ཚེ་རིང་པོ་འཚོ་བར་འགྱུར།

¹¹ ངས་ཁྱོད་ལ་ཤེས་རབ་དང་འཚོ་བའི་ཆེད་ལམ་བདེན་པ་བསླབ་ཡོད་དོ།

¹² ཁྱོད་ཀྱི་ཤེས་རབ་ལྡན་པའི་ཐོག་ཕྱིན་པ་ཡིན་ན། ཁྱོད་ཀྱི་ལམ་དུ་འགག་བྱ་གང་ཡང་མི་ཡོང་། ཁྱོད་རྒྱུགས་ཀྱང་འགྱེལ་བར་མི་འགྱུར།

¹³ ཁྱོད་ཀྱིས་སྦྱངས་པ་རྣམས་རྟག་ཏུ་དྲན་པར་བྱོས་ཤིག ཁྱོད་ཀྱི་ཡོན་ཏན་དེ་ཁྱོད་ཀྱི་མི་ཚེ་ཡིན་པས། དེ་ལ་སྲུང་སྐྱོབ་ཡག་པོ་གྱིས་ཤིག།

¹⁴ སྐྱེ་བོ་ངན་པ་འགྲོ་སར་མ་འགྲོ་ཞིག། སྐྱེ་བོ་སྤྱོད་ངན་གྱི་དཔེའི་རྗེས་སུ་མ་འཇུག་ཅིག

¹⁵ དེ་ལྟར་མ་བྱས་པར་ངན་པ་ལས་ཐག་རིང་སྡོད་ཅིག དེ་ལ་ཁས་ལེན་མ་བྱས་པར་རང་གི་ལམ་དུ་སོང་ཞིག

¹⁶ མི་ངན་པ་ཚོས་ངན་ལས་མ་བྱས་པར་གཉིད་ཁུག་པར་མི་བྱེད་དོ། དེ་ཚོས་གཞན་ལ་གནོད་འཚེ་ཞིག་མ་བྱས་བར་དུ་གཉིད་མ་ཉལ་བར་བསྡད་དོ།

¹⁷ སྤྱོད་ངན་དང་དྲག་ཟིང་ནི་དེ་ཚོའི་བཟའ་འཐུང་ལྟ་བུ་ཡིན་ནོ།

¹⁸ དྲང་བདེན་གྱི་ལམ་དུ་འགྲོ་རྒྱུ་ནི་ཉི་མ་ཤར་བ་ལྟ་བུ་ཡིན་པ་དང་། ཉིན་དགུང་འོད་མ་སླེབས་བར་དེ་ཇེ་གསལ་ཇེ་གསལ་དུ་འགྲོ་བ་ཡིན།

¹⁹ འོན་ཀྱང་སྤྱོད་ངན་གྱི་ལམ་དེ་མཚན་མོ་ལྟར་མུན་པ་ཡིན་ནོ། དེ་ཚོ་འགྱེལ་ན་ཡང་གང་གི་ཐོག་ཏུ་འགྱེལ་ཡོད་མེད་མི་མཐོང་ངོ་།

²⁰ ངའི་བུ། ངས་ཇི་ལྟར་བཤད་པར་དོ་སྣང་བྱས་ནས་ངའི་བཀའ་ལ་ཉོན་ཞིག

²¹ ཁྱོད་དེ་ལས་ནམ་ཡང་བྲལ་དུ་མ་འཇུག་ཅིག། དེ་ཚོ་དྲན་པ་གྱིས་ལ་སེམས་ཀྱི་ནང་དུ་ཞོག་ཅིག

²² དེ་ཚོ་ཤེས་མཁན་ཚོ་ལ་དེ་ཚོས་མི་ཚེ་དང་འཕྲོད་བསྟེན་བྱིན་པར་བྱེད་དོ།

²³ ཁྱོད་ཀྱིས་ཇི་ལྟར་བསམ་བློ་བཏང་བར་ཟབ་ཟབ་གྱིས་ཤིག་དང་། ཁྱོད་ཀྱི་བསམ་བློས་ཁྱོད་ཀྱི་མི་ཚེའི་བཟོ་དབྱིབས་འདོན་ནོ།

²⁴ བདེན་པ་མ་ཡིན་པ་གང་ཡང་རྩ་བ་ནས་མ་སྨྲས་ཞིག རྫུན་དང་གཡོ་རྒྱུའི་གཏམ་ལས་ལོག་སུ་སྡོད་ཅིག

²⁵ དྲང་པོའི་བློ་སྟོབས་ཀྱི་ངང་ནས་མདུན་དུ་བལྟོས་ཤིག ཁྱོད་ཀྱི་མགོ་ནི་ངོ་ཚེས་མ་སྒུར་ཤིག།

²⁶ ཁྱོད་ཀྱིས་ཇི་ལྟར་བྱ་རྒྱུ་ཡིན་པ་ལ་ཟབ་ཟབ་ཀྱིས་འཆར་གཞི་བཏིང་ཞིག་དང་། ཁྱོད་ཀྱིས་གྱིས་པ་ཚང་མ་ལེགས་པར་འགྱུར།

²⁷ ངན་པ་རྣམས་སྤངས་ནས་མདུན་དུ་ཐེད་ཀར་འགྲུལ་ཞིག གཡས་སམ་གཡོན་དུ་མ་གཡོ་བར། རང་གི་རྐང་པ་ངན་པ་ལས་སྲུངས་ཤིག།