ལེགས་བཤད 30 - Tibetan Old Testament 2011

ཨ་གྷུར་གྱི་གཏམ་རྣམས།

¹ འདི་དག་ནི་ཡ་ཀཱེའི་བུ་ཨ་གྷུར་གྱི་སྙིང་ཐག་པའི་གཏམ་ཡིན་ནོ། དཀོན་མཆོག་ང་དང་མཉམ་དུ་མེད། དཀོན་མཆོག་ང་དང་མཉམ་དུ་མེད། ང་ནི་སྐྱབས་མེད་ཡིན།

² ང་ནི་མི་ལས་སེམས་ཅན་འདྲ་བ་ཡིན། མི་ལ་དགོས་པའི་བསམ་ཤེས་དེ་ནི་ང་ལ་མེད།

³ ངས་ཤེས་རབ་གང་ཡང་སྦྱངས་མེད་དོ། དཀོན་མཆོག་སྐོར་ལ་ང་ཡིས་ཅི་མི་ཤེས་སོ།

⁴ སུ་ཞིག་མཐོ་རིས་སུ་ཕྱིན་ནས་མར་ཡོང་ཡོད་དམ། རླུང་སྦར་རའི་ནང་དུ་སུས་བསྡུས་ཐུབ། གོས་ཧྲུག་ནང་དུ་སུ་ཡིས་ཆུ་བསྒྲིལ་ཐུབ་བམ། སུ་ཡིས་ས་གཞིའི་མཚམས་ནི་གཏན་འབེབས་གནང་ཐུབ་བམ། ཁོ་ཡི་མིང་ཅི་ཡིན་ནམ། ཁོང་གི་སྲས་ཡི་མིང་ཅི་ཡིན་ནམ། ཁྱོད་ཀྱི་ཤེས་ན་སྨྲོས་ཤིག།

⁵ དཀོན་མཆོག་གིས་ཞལ་བཞེས་གནང་བ་རྣམས་འགྲུབ་པར་མཛད་པ་དང་། ཁོང་ལ་སྲུང་སྐྱོབ་ཞུ་མཁན་ཚང་མའི་ཆེད་དུ་ཁོང་ནི་ཕུབ་ལྟ་བུ་ཡིན།

⁶ ཁྱོད་ཀྱིས་ཁོང་གིས་ནམ་ཡང་བཀའ་མ་གནང་བ་ཞིག་གནང་སོང་ཞེས་གྲགས་པ་ཡིན་ན། ཁོང་གིས་ཁྱོད་ལ་བཀའ་ཀྱོན་གནང་བ་དང་ཁྱོད་རྫུན་ཅན་ཡིན་པ་སྟོན་པར་མཛད་དོ༎

ལེགས་བཤད་གཞན་རྣམས།

⁷ དཀོན་མཆོག། ང་འཆི་བའི་སྔོན་ལ་དོན་གནད་གཉིས་གནང་རོགས་གནང་ཞུ་རྒྱུ་ཡིན།

⁸ ང་རྫུན་བཤད་པ་ལས་ཐག་རིང་དུ་འཇོག་རོགས་གནང་། ང་ཕྱུག་པོ་ཡང་མིན་པ་དབུལ་པོ་ཡང་མིན་པ་ཞིག་བཟོས་རོགས་གནང་། དེར་བརྟེན་ང་ལ་དགོས་ངེས་ཀྱི་ཁ་ཟས་གཅིག་པུ་གནང་རོགས་གནང་།

⁹ ང་ལ་མང་པོ་བྱུང་བ་ཡིན་ན་ང་ཡིས་ཁྱེད་ནི་ང་ལ་མི་དགོས་ཤེས་ཞུ་སྲིད་དོ། ང་དབུལ་པོ་ཡིན་ན་ངས་རྐུ་མ་བརྐུས་ནས་ངའི་དཀོན་མཆོག་ལ་ཞབས་འདྲེན་ཞུ་སྲིད་དོ།

¹⁰ གཡོག་པོ་ཞིག་གི་སྐོར་ལ་ཁོའི་སྦྱིན་བདག་ལ་ནམ་ཡང་སྐྱོན་བརྗོད་མ་བྱེད་ཅིག ཁྱོད་ལ་གཡོག་པོས་དམོད་པར་གྱུར་ལ་དེའི་ཆེད་དུ་དཀའ་ངལ་མྱོང་དགོས་སོ།

¹¹ རང་གི་ཕ་ལ་དམོད་མཁན་དང་རང་གི་མ་ལ་བཀའ་དྲིན་མ་དྲེན་མཁན་གྱི་མི་ཡང་ཡོད་དོ།

¹² དྲི་ངན་བཙོག་པ་ཡིན་བཞིན་དུ་གཙང་མ་ཡིན་བསམ་མཁན་གྱི་མི་ཡང་ཡོད་དོ།

¹³ མི་རང་ཉིད་ནི་ཧ་ཅང་བཟང་པོ་ཡིན་བསམ་མཁན་ཡང་ཡོད།

¹⁴ དབུལ་པོ་དང་ཉམ་ཐག་ཐོག་སྡུག་རྩུབ་ཀྱིས་གོ་སྐབས་ལེན་མཁན་གྱི་སྐྱེ་བོ་ཡང་ཡོད། དེ་འདྲའི་ཐོག་ནས་དེ་ཚོས་རང་གི་འཚོ་བ་བསྐྱེལ་ལོ།

¹⁵ འབུ་པད་པ་ཞིག་ལ་བུ་མོ་གཉིས་ཡོད་པ་དང་། གཉིས་ཀར་ང་ལ་སྤྲོད་རོགས་ཞེས་མིང་བཏགས་ཡོད། ནམ་ཡང་འདོད་པ་མ་འཚིམས་པའི་དངོས་པོ་བཞི་ཡོད།

¹⁶ འཆི་བའི་གླིང་དང་། བུ་ཕྲུག་མེད་པའི་བུད་མེད་དང་། ཆར་པ་དགོས་པའི་ས་སྐམ་པོ་དང་། བསད་མི་ཐུབ་པའི་འབར་བཞིན་པའི་མེ་བཅས་སོ།

¹⁷ སུ་ཞིག་རང་གི་ཕ་ལ་འཕྱ་བ་དང་། རང་གི་མ་ལོ་ན་མཐོ་བར་སླེབས་སྐབས་བརྙས་བཅོད་བྱ་མཁན་དེ་ལ་བྱ་རྒོས་ཀྱི་ཟ་བ་དང་ཡང་ན་ནགས་ཀྱི་ཕོ་རོག་གིས་མིག་གཉིས་བཏོན་པར་འོས་སོ།

¹⁸ ངས་རྟོག་པར་དཀའ་བའི་གསང་བའི་དངོས་པོ་བཞི་ཡོད།

¹⁹ ནམ་མཁར་འཕུར་བའི་བྱ་གླག་ཅིག། བྲག་སྟེང་བསྐྱོད་པའི་སྦྲུལ་ཞིག། རྒྱ་མཚོར་ལམ་རྙེད་པའི་གྲུ་གཟིང་། ཁྱོ་དང་སྐྱེ་དམན་ཞིག་བརྩེ་གདུང་བྱེད་པ་བཅས་པ་ཡིན་ནོ།

²⁰ དམ་ཚིག་མི་གཙང་བའི་ཆུང་མའི་འདི་ལྟར་བྱེད་དོ། མོས་ལོག་གཡེམ་བྱས་ནས་ཁྲུས་རྒྱབ་པ་དང་། དེས་ངས་གང་ཡང་ནོར་འཁྲུལ་བྱས་མེད་ཅེས་ཟེར་རོ།

²¹ ས་གཞིས་རང་གི་བཟོད་སྲན་མི་ཐུབ་པའི་དངོས་པོ་བཞི་ཡོད།

²² ཚེ་གཡོག་རྒྱལ་པོར་འགྱུར་བ་དང་། རང་གི་འདོད་པའི་ཟ་རྒྱུ་ཚང་མ་ཡོད་མཁན་གླེན་པ་དང་།

²³ བརྩེ་བ་མ་ཐོབ་པའི་བུད་མེད་ཆང་ས་རྒྱབ་མཁན་དང་། གཡོག་མོ་ཞིག་གིས་རང་གི་སྦྱིན་བདག་གི་ཆུང་མའི་ཚབ་བྱ་མཁན་བཅས་སོ།

²⁴ འཛམ་གླིང་ནང་ཆུང་ཆུང་ཡིན་ཡང་ཤིན་ཏུ་སྤྱང་པོའི་སེམས་ཅན་བཞི་ཡོད།

²⁵ གྲོག་མ་དེ་ཚོ་ནི་ཉམ་ཆུང་ཡིན་ལ་དབྱར་དུས་སུ་རང་གི་ཟས་རྣམས་གསོགས་པར་བྱེད་དོ།

²⁶ འཕྱི་བ་དེ་ཚོ་སྟོབས་ཤུགས་ཅན་མིན་ཀྱང་། བྲག་ཁར་དོང་བྲུས་ནས་སྡོད་མཁན་ཡིན་ནོ།

²⁷ ཆ་ག་འབུ་དེ་ཚོ་ལ་རྒྱལ་པོ་མེད་དོ། འོན་ཀྱང་དེ་ཚོ་ལྷན་ཅིག་ཏུ་འདུས་ནས་གྲོའོ།

²⁸ རྩང་པ་ཁ་རལ་དེ་ཚོ་ཁྱོད་ཀྱིས་རང་གི་ལག་པའི་ནང་བཟུང་ཐུབ་བོ། འོན་ཀྱང་དེ་ཚོ་ཕོ་བྲང་ཚོའི་ནང་དུ་ཡང་རྙེད་པར་འགྱུར་རོ།

²⁹ གོམ་པ་སྤོས་ནས་འགྲོ་སྐབས་བལྟ་བར་ཡིད་འཕྲོག་པར་བྱ་མཁན་བཞི་ཡོད་དོ།

³⁰ སེང་གེ་ནི་སེམས་ཅན་ཚང་མའི་ནང་ནས་སྟོབས་ཤུགས་ཆེ་ཤོས་དང་སུ་ལ་ཡང་མི་འཇིགས་མཁན་ཡིན།

³¹ ར་ཕོ་དང་། ཉམ་དོད་པོར་འགྲོ་མཁན་བྱ་ཕོ་དང་། རང་གི་མི་མང་ཚོའི་མདུན་དུ་རྒྱལ་པོ་བཅས་སོ།

³² གལ་ཏེ་ཁྱོད་ང་རྒྱལ་ཅན་དང་གླེན་པར་འགྱུར་ནས་འཆར་གཞི་ངན་པ་བཏིང་བཞིན་ཡོད་ན། དེ་མཚམས་འཇོག་གྱིས་ལ་བསམ་བློ་གཏོང་ཞིག

³³ ཁྱོད་ཀྱིས་འོ་མ་དཀྲོག་ན་མར་ཐོན་པ་དང་། ཁྱོད་ཀྱིས་སུ་ཞིག་གི་སྣར་ལ་ཞུས་པ་ཡིན་ན་ཁྲག་ཐོན་པ་དང་། ཁྱོད་ཀྱིས་ཁོང་ཁྲོ་སླང་པ་ཡིན་ན་ཁྱོད་དཀའ་ངལ་ནང་ལྷུང་བར་འགྱུར་རོ༎