ལེགས་བཤད 3 - Tibetan Old Testament 2011

ན་གཞོན་ཚོ་ལ་བསླབ་བྱ།

¹ ངའི་བུ། ངའི་བསླབ་བྱ་རྣམས་མ་བརྗེད་ཅིག། ངས་ཇི་ལྟར་བྱ་དགོས་སྨྲས་པ་རྣམས་རྟག་ཏུ་དྲན་པར་བྱོས་ཤིག

² ངའི་སློབ་སྟོན་གྱིས་ཁྱོད་ལ་མི་ཚེ་རིང་པོ་དང་ཕུན་སུམ་ཚོགས་པ་བྱིན་པར་བྱེད་དོ།

³ ཤ་ཞན་དང་དམ་ཚིག་ཅན་ལ་ནམ་ཡང་མ་སྤོངས་ཤིག དེ་ཚོ་རང་གི་སྐེ་ལ་འདོགས་ལ་སྙིང་ལ་བཀོད་ཅིག

⁴ ཁྱོད་ཀྱིས་དེ་ལྟར་བྱས་པ་ཡིན་ན་དཀོན་མཆོག་དང་མི་གཉིས་ཀ་ཁྱོད་ལ་དགའ་བར་འགྱུར་རོ།

⁵ ཁྱོད་ཀྱིས་སེམས་ཀྱི་གཏིང་ནས་གཙོ་བོ་དཀོན་མཆོག་ལ་ཡིད་ཆེས་བྱོས་ཤིག ཁྱོད་རང་གིས་ཤེས་ཀྱི་ཡོད་བསམ་པར་ཡིད་ཆེས་མ་བྱེད་ཅིག

⁶ ཁྱོད་ཀྱིས་བྱས་པ་ཚང་མར་གཙོ་བོ་དཀོན་མཆོག་ཡོད་པ་དྲན་ནས་བྱོས་ཤིག ཁོང་གིས་ཁྱོད་ལ་ལམ་བདེན་པ་སྟོན་པར་མཛད་དོ།

⁷ ཁྱོད་ཀྱིས་རང་ཉིད་ཤེས་རབས་ཅན་ཡིན་ཟེར་མ་བསམ་ཤིག གཙོ་བོ་དཀོན་མཆོག་གིས་བཀའ་ལ་ཉོན་ལ་ནོར་འཁྲུལ་བྱ་རྒྱུར་ཁས་ལེན་མ་བྱེད་ཅིག

⁸ ཁྱོད་ཀྱིས་དེ་ལྟར་བྱས་པ་ཡིན་ན་དེ་ནི་ཁྱོད་ཀྱི་རྨ་གསོ་མཁན་དང་ཟུག་འཇོམ་མཁན་གྱི་སྨན་བཟང་པོ་ལྟ་བུར་འགྱུར་རོ།

⁹ ཁྱོད་ཀྱིས་ས་ནས་ཐོན་པའི་ལེགས་ཤོས་ཚང་མ་ནས་མཆོད་པ་ཕུལ་ནས་གཙོ་བོ་དཀོན་མཆོག་ལ་གུས་བཀུར་ཞུས་ཤིག

¹⁰ དེ་ལྟར་ཁྱོད་ཀྱིས་བྱས་པ་ཡིན་ན། ཁྱོད་ཀྱི་འབྲུ་ཁང་རྣམས་འབྲུས་ཁེངས་པ་དང་། ཁྱོད་ཀྱིས་གསོག་འཇོག་བྱེད་ཐུབ་པ་ལས་ཧ་ཅང་མང་བའི་རྒུན་ཆང་ཡོང་བར་འགྱུར་རོ།

¹¹ ངའི་བུ། གཙོ་བོ་དཀོན་མཆོག་གིས་ཁྱོད་ལ་བཅུན་གནང་སྐབས། ཤིན་ཏུ་དོ་སྣང་ལེགས་པར་བྱས་ནས་ཉེན་བརྡ་ལྟ་བུ་ཡིན་པར་ངོས་འཛིན་གྱིས་ཤིག

¹² ཕས་རང་གི་སྤོབས་པ་བྱེད་པའི་བུ་ལ་བཅུན་པ་ལྟར། གཙོ་བོ་དཀོན་མཆོག་གིས་བརྩེ་བ་ནང་མཁན་ཚོ་ལ་བཅུན་པ་གནང་ངོ་།

¹³ ཤེས་རབ་ལྡན་པར་འགྱུར་མཁན་སྐྱེ་བོ་དང་བློ་གྲོས་ཐོབ་པར་བྱ་མཁན་དེ་དགའ་སྐྱིད་ཅན་ཡིན་ནོ།

¹⁴ དེ་ནི་དངུལ་ལས་ལྷག་པའི་མཁེ་བཟང་དང་དེ་ནི་ཁྱོད་ལ་གསེར་ལས་རིན་ཐང་ཆེ།

¹⁵ ཤེས་རབ་ནི་རིན་ཆེན་ནོར་བུ་ལས་ཧ་ཅང་རིན་ཐང་ཆེ། ཁྱོད་ཀྱིས་འདོད་པའི་ཇི་འདྲ་ཞིག་དང་མཉམ་དུ་བསྡུར་མི་ཐུབ་བོ།

¹⁶ ཤེས་རབ་ཀྱིས་ཁྱོད་ལ་ཚེ་རིང་པོ་དང་རྒྱུ་ནོར་དང་གུས་བཀུར་བྱིན་པར་བྱེད་དོ།

¹⁷ ཤེས་རབ་ཀྱིས་ཁྱོད་ལ་དགའ་སྐྱིད་དང་། བརྟན་པོའི་ཐོག་མི་ཚེ་བསྐྱེལ་ཐུབ་པ་བྱེད་དོ།

¹⁸ ཤེས་རབ་ལྡན་པ་འགྱུར་མཁན་ཚོ་དགའ་སྐྱིད་ལྡན་ནོ། ཤེས་རབ་ཀྱིས་དེ་ཚོར་མི་ཚེ་བྱིན་ནོ།

¹⁹ གཙོ་བོ་དཀོན་མཆོག་གིས་ཤེས་རབ་ཀྱི་སྒོ་ནས་ས་གཞི་བཀོད་པར་མཛད། ཁོང་གི་མཁྱེན་ཡོན་གྱིས་ནམ་མཁའ་རང་གནས་སུ་འཇོག་གནང་ངོ།

²⁰ ཁོང་གི་ཤེས་རབ་ཀྱིས་གཙང་པོ་ཚོ་རྒྱུགས་བཅུག་པ་དང་། སྤྲིན་པས་ས་གཞིར་ཆར་པ་འབེབས་པར་མཛད་དོ།

²¹ ངའི་བུ། རང་གི་ཤེས་རབ་དང་ནང་དོན་རྟོགས་ཐུབ་པའི་ནུས་པ་བཟུང་ཞིག དེ་ཚོ་ཁྱོད་ལས་ནམ་ཡང་མི་བྲལ་བ་བྱོས་ཤིག།

²² དེ་ཚོས་ཁྱོད་ལ་ཉམས་དགའ་པོ་དང་མི་ཚེ་སྐྱིད་པོ་ཞིག་གནང།

²³ ཁྱོད་རང་ལམ་དུ་སྐྱོན་མེད་བདེ་བར་འགྲོ་ཐུབ་པ་དང་ནམ་ཡང་འགྱེལ་བར་མི་བྱེད་དོ།

²⁴ ཁྱོད་ཉལ་བའི་སྐབས་སུ་མ་འཇིགས་པར་མཚན་གང་གཉིད་སྐྱིད་པོ་ཁུག་པར་འགྱུར།

²⁵ ངན་པའི་ཐོག་ཏུ་རླུང་ཚུབ་ཡོང་བ་ལྟ་བུ་གློ་བུར་དུ་ཡོང་བའི་རྐྱེན་ངན་དེ་ལ་ཁྱོད་ཀྱིས་སེམས་ཁྲལ་བྱེད་མི་དགོས་སོ།

²⁶ གཙོ་བོ་དཀོན་མཆོག་གིས་ཁྱོད་བདེ་བར་འཇོག་པར་མཛད་པ་དང་། ཁོང་གིས་ཁྱོད་རྙིའི་ནང་འཚུད་དུ་འཇུག་པར་མི་མཛད་དོ།

²⁷ ཁྱོད་ཀྱིས་དགོས་ངེས་ཅན་ལ་གང་ཐུབ་ཐུབ་ཡག་པོ་བྱོས་ཤིག

²⁸ ཁྱོད་ཀྱིས་ད་ལྟ་རོགས་པ་བྱ་ཐུབ་ན་གྲོང་པ་ཁྱིམ་མཚེས་ཚོར་སང་ཞོག་བར་དུ་སྒུག་སྡོད་ཅིག་ཅེས་ནམ་ཡང་མ་བརྗོད་ཅིག

²⁹ ཁྱོད་ཀྱིས་གྲོང་པ་ཁྱིམ་མཚེས་ལ་གནོད་པའི་འཆར་གཞི་ནམ་ཡང་མ་བཟོ་ཞིག ཁོ་ཁྱོད་ཀྱི་ཉེ་འགྲམ་དུ་སྡོད་ཅིང་ཁྱོད་ལ་བློས་འགེལ་བྱེད་བཞིན་ཡོད།

³⁰ སུ་ཞིག་གིས་ཁྱོད་ལ་གནོད་འཚེ་བྱས་མེད་ན་དེ་ལ་དོན་མེད་ཀྱི་རྩོད་གླེང་མ་བྱེད་ཅིག

³¹ མི་དྲག་གཙོད་ཅན་ལ་ཕྲག་དོག་དང་དེ་ཚོས་བྱས་པ་ལྟར་བྱ་རྒྱུ་ཐག་གཅོད་མ་བྱེད་ཅིག

³² གང་ལགས་ཟེར་ན། གཙོ་བོ་དཀོན་མཆོག་གིས་ངན་པ་བྱ་མཁན་ཚོར་སྡང་པོ་གནང་ངོ་། འོན་ཀྱང་ཁོང་གིས་སྐྱེ་བོ་དྲང་བདེན་ཚོར་ཐུགས་ཡིད་ཆེས་པ་གནང་ངོ་།

³³ གཙོ་བོ་དཀོན་མཆོག་གིས་སྐྱེ་བོ་སྤྱོད་ངན་ཚོའི་ཁྱིམ་ཚང་ལ་དམོད་པ་གནང་ངོ་། འོན་ཀྱང་དྲང་བདེན་གྱི་ཁྱིམ་ཚང་ལ་བྱིན་རླབས་གནང་ངོ་།

³⁴ ཁོང་གིས་སྐྱེ་བོ་རང་མཐོང་ཅན་ཚོར་བེད་མེད་དོ། འོན་ཀྱང་ཉམ་ཆུང་ཚོར་གཟིགས་པ་གནང་ངོ་།

³⁵ ཤེས་རབ་ལྡན་པའི་མི་ཚོར་གུས་ཞབས་ཀྱི་སྙན་གྲགས་ཐོབ་ཡོང། འོན་ཀྱང་མི་གླེན་པ་ཚོ་ལ་རང་གི་དམའ་འབེབས་ཐོག་མར་བསྣན་པར་བྱའོ༎