ལེགས་བཤད 28 - Tibetan Old Testament 2011

¹ ངན་པར་སུ་ཀྱང་དེད་མཁན་མེད་ཡང་བྲོས་པར་བྱེད། འོན་ཀྱང་དྲང་པོའི་མི་ནི་སེང་གེ་ཞིག་ལྟར་བློ་སྟོབས་དང་ལྡན་ནོ།

² མི་རིགས་ཞིག་གིས་སྡིག་པ་བྱ་སྐབས་དབང་བསྒྱུར་མཁན་གཅིག་གི་རྗེས་ལ་གཅིག་ཡོང་ངོ་། འོན་ཀྱང་མི་རིགས་ཤིག་གི་ནང་ཤེས་རབ་དང་ལྡན་པའི་བསམ་ཤེས་ཡོད་མཁན་འགོ་འཁྲིད་རྣམས་ཡོད་པ་ཡིན་ན། དེ་ནི་སྟོབས་ཤུགས་ཅན་དུ་འགྱུར་བ་དང་བརྟན་པོར་འགྱུར་རོ།

³ དབང་ཆ་ཡོད་མཁན་སུ་ཞིག་གིས་དབུལ་པོར་མནར་གཅོད་གཏོང་བ་ནི། སྟོན་ཐོག་འཇིག་པར་བྱ་བའི་ཆར་པ་དྲག་པོ་ལྟ་བུ་ཡིན་ནོ།

⁴ ཁྱོད་རང་བཀའ་ཁྲིམས་ལ་རྩིས་སྲུང་མ་བྱེད་པ་ཡིན་ན། ངན་པའི་ཕྱོགས་སུ་ཡོད་པ་ཡིན་ནོ། འོན་ཀྱང་ཁྱོད་ཀྱིས་བཀའ་ཁྲིམས་ལ་ཉན་པ་ཡིན་ན་ཁྱོད་དེ་ཚོའི་རྒྱབ་འགལ་དུ་ཡོད་དོ།

⁵ མི་ངན་པ་ཚོས་ཁྲིམས་དྲང་བདེན་ཇི་ཡིན་མི་ཤེས་སོ། འོན་ཀྱང་གཙོ་བོ་དཀོན་མཆོག་ལ་མཆོད་མཁན་ཚོས་དེ་ཚོ་ལེགས་པར་ཤེས་སོ།

⁶ ཕྱུག་པོ་དྲང་མིན་ལས་དབུལ་པོ་དྲང་པོ་ལེགས་པ་ཡིན་ནོ།

⁷ སྐྱེ་བོ་ན་གཞོན་བཀའ་ཁྲིམས་ལ་སྲུང་བརྩི་བྱ་མཁན་དེ་ཤེས་རབ་དང་ལྡན་པ་ཡིན་ནོ། ཕན་མི་ཐོག་པ་ཚོ་དང་མཉམ་དུ་གྲོགས་པོ་བྱ་མཁན་དེ་ནི་རང་གི་ཕ་ལ་དམའ་འབེབས་ཡིན་ནོ།

⁸ ཁྱོད་ཀྱིས་སྐྱེད་ཁ་ལེན་པ་དང་། མིའི་མཁེ་ཕན་བཟུང་ནས་ཕྱུག་པོར་གྱུར་བ་ཡིན་ན། ཁྱོད་ཀྱི་རྒྱུ་ནོར་རྣམས་བྱམས་སྐྱོང་བྱ་མཁན་ཞིག་ལ་ཐོབ་པར་འགྱུར།

⁹ ཁྱོད་ཀྱིས་བཀའ་ཁྲིམས་ལ་བརྩི་བཀུར་མ་ཞུས་པ་ཡིན་ན། ཁྱོད་ཀྱིས་ཞུ་བའི་སྨོན་ལམ་དཀོན་མཆོག་གིས་སྡང་བའི་རྒྱུར་འགྱུར་རོ།

¹⁰ ཁྱོད་ཀྱིས་མི་དྲང་པོ་ཞིག་ངན་པ་བྱ་རྒྱུར་བསླུ་འཁྲིད་བྱས་པ་ཡིན་ན། ཁྱོད་རང་རང་ཉིད་ཀྱི་རྙིད་ནང་འཚུར་པར་འགྱུར། སྐྱོན་མེད་ལ་རྔན་པ་ལེགས་པར་བྱིན་པར་བྱེད་དོ།

¹¹ མི་ཕྱུག་པོ་ཚོས་རང་ཉིད་རྟག་ཏུ་ཤེས་རབ་ལྡན་པ་ཡིན་བསམ་པར་བྱེད་དོ། འོན་ཀྱང་མི་ནང་དོན་རྟོགས་ཐུབ་པའི་དབུལ་པོ་དེས་སྤྱོད་ཚུལ་ལེགས་པ་ཤེས་སོ།

¹² མི་བཟང་པོ་ཚོར་དབང་ཆ་ཐོབ་པ་ཡིན་ན་ཚང་མས་དགའ་སྟོན་བྱེད་པ་དང་། འོན་ཀྱང་མི་ངན་པས་དབང་བསྒྱུར་བྱས་པ་ཡིན་ན་མི་རྣམས་གབ་ནས་བསྡད་པར་བྱེད་དོ།

¹³ ཁྱོད་ཀྱིས་རང་གི་སྡིག་པ་རྣམས་ལ་འགེབས་ཐབ་བྱས་པ་ཡིན་ན། ཁྱོད་ཀྱི་མི་ཚེའི་ནང་ནམ་ཡང་ལམ་འགྲོ་མི་ཡོང་། དེ་ཚོ་ངོས་ལེན་གྱིས་ནས་སྤོངས་ཤིག་དང་། དཀོན་མཆོག་གིས་ཁྱོད་ལ་སྙིང་རྗེ་གནང་བར་མཛད་དོ།

¹⁴ རྟག་ཏུ་གཙོ་བོ་དཀོན་མཆོག་གི་བཀའ་ལ་ཉན་པ་ཡིན་ན་ཁྱོད་དགའ་བདེར་འགྱུར། གལ་ཏེ་སེམས་མཁྲེགས་པོ་ཅན་དུ་འགྱུར་བ་ཡིན་ན་ཁྱོད་མེད་པར་འགྱུར།

¹⁵ དབུལ་པོ་རྣམས་ནི་སྤྱོད་ངན་དབང་བསྒྱུར་མཁན་གྱི་དྲུང་དུ་མགོན་སྐྱབས་མེད་པ་ཡིན་ནོ། ཁོ་ནི་ངར་བཞིན་པའི་སེང་གེ་དང་ཕར་རྒོལ་བཞིན་པའི་དོམ་ལྟར་ཉེན་ཁ་ཡོད་དོ།

¹⁶ བསམ་ཤེས་མེད་པའི་དབང་བསྒྱུར་མཁན་ནི་སྡུག་རྩུབ་ཅན་གྱི་དབང་བསྒྱུར་མཁན་ངན་པ་ཞིག་ཡོང་། དྲང་མིན་ལ་སྡང་བར་བྱ་མཁན་དེས་ཡུན་རིང་བར་དབང་བསྒྱུར་བྱེད་དོ།

¹⁷ མི་གསོད་ཀྱི་ཉེས་ཅན་ཡིན་པའི་སྐྱེ་བོ་དེས་རང་གི་དུར་ཁུང་གང་མགྱོགས་བྲུས་བཞིན་ཡོད། ཁོ་ལ་འགོག་ཐབས་མ་བྱེད་ཅིག།

¹⁸ དྲང་པོ་གྱིས་ལ་ཁྱོད་བདེ་བར་འགྱུར། ཁྱོད་དྲང་པོ་མེད་ན་གློ་བུར་དུ་མར་ཟག་པར་འགྱུར།

¹⁹ ལས་ཀ་ཧུར་པོ་བྱ་མཁན་ཞིང་པ་ལ་ཟ་རྒྱུ་འབོལ་པོ་ཡོད་པ་དང་། དུས་ཚོས་ཆུ་ཟོས་སུ་གཏོང་མཁན་གྱི་སྐྱེ་བོ་རྣམས་རྟག་ཏུ་དབུལ་པོར་གནས་པར་འགྱུར་རོ།

²⁰ མི་དྲང་པོ་ཚོ་མི་ཚེ་རིང་པོ་དང་དགའ་སྐྱིད་ངང་སྐྱེལ་བར་བྱེད་དོ། འོན་ཀྱང་ཁྱོད་ཕྱུག་པོ་འགྱུར་རྒྱུ་བྲེལ་བ་ཡོད་ན་ཁྱོད་ལ་ཉེས་ཆད་གཏོང་བར་འགྱུར།

²¹ འཁོན་སེམས་ནི་ནོར་འཁྲུལ་ཡིན་པ་དང་། འོན་ཀྱང་ཁྲིམས་དཔོན་འགའ་ཤས་ཀྱིས་ལྐོག་རྔན་ཆུང་ཆུང་ཡང་ལེན་ནས་ནོར་འཁྲུལ་བྱེད་དོ།

²² མི་རང་འདོད་ཅན་ཚོ་ཕྱུག་པོ་འགྱུར་རྒྱུར་བྲལ་བ་ཆེན་པོ་ཡོད་སྟབས། དེ་ཚོས་དབུལ་འཕོངས་སུ་ནམ་འགྱུར་བ་མི་ཤེས་སོ།

²³ སུ་ཞིག་ལ་བཅུན་པ་ཡིན་ན་རྗེས་སུ་ཁོས་དཔལ་ལས་བཤད་པ་ལས་ལྷག་པའི་དགའ་ངོམ་བྱེད་དོ།

²⁴ སུ་ཞིག་གིས་རང་གི་ཕ་མ་ལས་རྐུས་ནས་ནོར་འཁྲུལ་མིན་བསམ་མཁན་དེ་རྐུན་མ་དཀྱུས་མ་ལས་དྲག་པ་མིན།

²⁵ རང་འདོད་བྱེད་པ་དེ་ནི་དཀའ་རྙོག་གི་རྐྱེན་ཡིན་ནོ། ཁྱོད་ཀྱིས་གཙོ་བོ་དཀོན་མཆོག་ལ་བློ་བཅོལ་བ་ཡིན་ན་ཁྱོད་ཧ་ཅང་ལེགས་པར་འགྱུར་རོ།

²⁶ ཁྱོད་རང་རང་ཉིད་ཀྱི་བསམ་ཚུལ་གྱི་རྗེས་སུ་འཇུག་རྒྱུ་ནི་གླེན་པ་ཡིན། མི་ཤེས་རབ་ཅན་ཚོའི་སློབ་སྟོན་གྱི་རྗེས་སུ་འཇུག་ན་སྲུང་སྐྱོབས་འོག་མཛོག་པར་བྱའོ།

²⁷ དབུལ་པོར་བྱིན་པ་ཡིན་ན་ཁྱོད་ལ་དགོས་མཁོ་ནམ་ཡང་མི་ཡོང་ངོ་། ཁྱོད་ཀྱིས་དབུལ་པོ་ལ་དོ་སྣང་མ་བྱེད་པར་བསྡད་ན་མི་མང་པོས་ཁྱོད་ལ་དམོད་པར་བྱེད་དོ།

²⁸ མི་ངན་པར་དབང་ཆ་ཐོབ་པ་ཡིན་ན། མི་རྣམས་གབ་ནས་བསྡད་ཡོང་། འོན་ཀྱང་དེ་ཚོ་དབང་ཆ་ནས་མར་ཟག་སྐབས་མི་དྲང་ལྡན་ཚོས་སླར་ཡང་སྲིད་དབང་བྱེད་དོ༎