ལེགས་བཤད 25 - Tibetan Old Testament 2011

སོ་ལོ་མོན་གྱི་ལེགས་བཤད་གཞན་རྣམས།

¹ ཡ་ཧུ་དཱའི་རྒྱལ་པོ་ཧེ་ཛི་ཀི་ཡཱའི་རྒྱལ་ཁང་ནས་མི་རྣམས་གིས་བཤུས་པའི་སོ་ལོ་མོན་གྱི་ལེགས་བཤད་གཞན་ཚོ་འདི་རྣམས་ཡིན།

² དཀོན་མཆོག་གི་སྦས་གནང་བར་ང་ཚོས་ཁོང་ལ་གུས་བརྩི་ཞུའོ། རྒྱལ་པོ་རྣམས་ཀྱིས་འགྲེལ་བཤད་ཇི་གནང་བར་ང་ཚོས་ཁོང་ལ་གུས་བརྩི་ཞུའོ།

³ རྒྱལ་པོས་ཐུགས་བསམ་ཇི་བཞེས་བཞིན་ཡོད་པ་ཁྱོད་ཀྱིས་ནམ་ཡང་མི་ཤེས། ཁོང་གི་ཐུགས་བསམ་ནམ་མཁའ་ལས་མཐོ་བ་དང་རྒྱ་མཚོ་ལས་གཏིང་ཟབ་པ་ཡོད་པ་དེ་ང་ཚོའི་བསམ་ཚོས་ལས་འགལ་བ་ཡོད་དོ།

⁴ བཟོ་པས་དངུལ་ལས་ལྷད་འདོན་ནས་མཛེས་སྡུག་ལྡན་པའི་དངོས་པོ་བཟོ་ཐུབ་ཡོང།

⁵ རྒྱལ་པོ་ལ་བསླབ་བྱ་ངན་པ་ཞུས་མཁན་རྣམས་ཁོང་ནས་ཐག་རིང་འཇོག་ལ། ཁོང་གི་གཞུང་དེ་ཁྲིམས་དྲང་པོའི་སྙན་གྲགས་སུ་འགྱུར་རོ།

⁶ ཁྱོད་རྒྱལ་པོའི་དྲུང་དུ་ལངས་བསྡད་དུས། ང་ནི་མི་གལ་ཆེན་ཡིན་དོག་བྱས་ནས་ཁོང་ལ་ཐུགས་མགུ་ཐབས་མ་བྱེད་ཅིག

⁷ མི་གལ་ཆེན་ཞིག་ལ་རང་གི་གནས་དེ་སྤྲོད་རོགས་གནང་ལབ་པ་ལས་ཁྱེད་མཐོ་བའི་གནས་དེ་བཞེས་རོགས་གནང་ཞེས་བརྗོད་པ་དེ་ལེགས་སོ།

⁸ ཁྱོད་ཀྱིས་ཇི་ཞིག་མཐོང་བ་ཙམ་གྱིས་ཁྲིམས་ཁང་དུ་འགྲོ་རྒྱུར་མགྱོགས་པོ་མ་བྱེད་ཅིག དཔང་པོ་གཞན་ཞིག་གིས་ཁྱོད་ནོར་འཁྲུལ་ཡིན་པར་ཁུངས་བསྐྱེལ་བྱས་པ་ཡིན་ན་ཁྱོད་ཅི་བྱེད་ཀྱི་ཡིན་ནམ།

⁹ ཁྱོད་དང་ཁྱོད་ཀྱི་ཁྱིམ་མཚེའི་དབར་བསམ་བློ་མི་མཐུན་པ་ཡོད་ན། ཁྱོད་གཉིས་དབར་དེ་ཞི་བར་གྱིས་ཤིག་ལ། གསང་བ་གང་ཞིག་གཞན་ལ་མ་ཤོད་ཤིག།

¹⁰ དེ་མིན་ཚང་མས་ཁྱོད་ཀྱི་གསང་བ་ཉར་མི་ཐུབ་པར་ཤེས་པ་དང་ངོ་ཚ་དེ་ཁྱོད་ཀྱིས་སུབ་མི་ཐུབ་བོ།

¹¹ བསམ་བློ་ལེགས་པར་བཏང་ནས་བརྗོད་པ་ནི། དངུལ་གྱི་ཐོག་གསེར་གྱི་ཀུ་ཤུ་རྣམས་སྒྲིག་པ་ལྟ་བུ་ཡིན་ནོ།

¹² ཉན་འདོད་ཡོད་མཁན་གྱི་མི་ལ་མི་ཉམས་ཉོང་ལྡན་པ་ཞིག་གིས་ཉེན་བརྡ་བཏང་བ་ནི། གསེར་གྱི་ཨ་ལོང་དང་གསེར་སྤུས་དག་ལས་བཟོས་པའི་རྒྱན་ཆ་ལས་ཧ་ཅང་རིན་ཐང་ཆེའོ།

¹³ བློས་འཁེལ་བའི་བང་ཆེན་ནི་སྟོན་ཐོག་རྔ་བའི་དུས་སུ་ཚ་བའི་དྲོད་ཀྱི་ཆུ་གྲང་མོ་ལྟར་དེ་གཏོང་མཁན་ལ་སོས་བར་འགྱུར་རོ།

¹⁴ དངོས་པོའི་ཁས་ལེན་བྱས་ནས་རྩ་བ་ནས་མི་སྤྲོད་མཁན་གྱི་མི་རྣམས་ནི། ཆར་པ་འཁྱེར་མི་ཡོང་མཁན་གྱི་སྤྲིན་དང་རླུང་ལྟ་བུ་ཡིན་ནོ།

¹⁵ བཟོད་སྲན་གྱི་སྒོ་ནས་ཞུ་འབོད་བྱས་པ་ཡིན་ན། སྟོབས་ཤུགས་ཅན་གྱི་འགག་བྱ་ཡང་འཇོམས་པར་བྱེད་པ་དང་། སྲིད་སྐྱོང་པ་ཚོར་བློ་འགུག་ཐུབ་བོ།

¹⁶ ཁྱོད་ལ་དགོས་པ་ལས་ལྷག་པའི་སྦྲང་རྩི་ནམ་ཡང་མ་ཟ་ཞིག མང་པོ་ཟན་ཁྱོད་སྐྱུག་པར་བྱེད་དོ།

¹⁷ ཁྱོད་ཀྱི་ཁྱིམ་མཚེས་སར་ཡང་ཡང་མ་འགྲོ་ཞིག ཁོས་ཁྱོད་ལ་ཡིད་ཐང་ཆད་ནས་ཁྱོད་ལ་མི་དགའ་བར་བྱེད་སྲིད་དོ།

¹⁸ སྐྱོན་བརྗོད་རྫུན་མ་ནི་རལ་གྲི་དང་དབྱུག་པ་དང་མདའ་རྣོ་པོ་ལྟ་བུའི་སྡུག་རྩུབ་ཅན་ཡིན་ནོ།

¹⁹ དཀའ་རྙོག་གི་སྐབས་སུ་བློས་མི་འཁེལ་བའི་མི་ལ་རེ་བཅོལ་བྱ་རྒྱུ་ནི། སོ་བརྟན་པོ་མེད་པས་མུར་མུར་བྱ་བ་དང་། རྐང་པ་ཞ་བོས་གོམ་པ་སྤོས་ཐབས་བྱས་པ་ལྟ་བུ་ཡིན་ནོ།

²⁰ སེམས་སྡུག་ཅན་ལ་གླུ་གཞས་གཏོང་རྒྱུ་ནི་གྲང་མོའི་སྐབས་སུ་གྱོན་གོས་ཕུད་པ་དང་རྨ་ལ་ཚ་འཕུར་བ་ལྟ་བུ་ཡིན་ནོ།

²¹ ཁྱོད་ཀྱིི་དགྲ་བོ་ལྟོགས་བཞིན་ཡོད་ན་ཁོ་ལ་ཁ་ཟས་བྱིན་ཞིག ཁོ་བསྐོམ་བཞིན་ཡོད་ན་ཁོ་ལ་འཐུང་རྒྱུ་བྱིན་ཞིག

²² ཁྱོད་ཀྱིས་ཁོ་ལ་ངོ་ཚས་མེ་འབར་བར་བྱེད་པ་དང་། གཙོ་བོ་དཀོན་མཆོག་གིས་ཁྱོད་ལ་རྔན་པ་གནང་ངོ་།

²³ བྱང་རླུང་གིས་ཆར་པ་ཡོང་བ་ལྟར་ཆོ་མེད་པའི་གཏམ་གྱིས་ཁོང་ཁྲོ་ངེས་གཏན་འཁྱེར་བར་བྱེད་དོ།

²⁴ ཆུང་མ་སུན་པོ་དང་མཉམ་དུ་ཁང་པར་བསྡད་པ་ལས། ཁང་པའི་རྩེ་ཐོག་ཏུ་བསྡད་པ་ལེགས་སོ།

²⁵ མཐའ་མར་ཐག་རིང་ཡུལ་ནས་གཏམ་བཟང་ཐོས་པ་དེ་ཁྱོད་ལ་ཁ་སྐོམ་པའི་སྐབས་སུ་ཆུ་གྲང་མོ་འཐུང་རྒྱུ་རྙེད་པ་ལྟ་བུ་ཡིན་ནོ།

²⁶ ངན་པས་འདོད་ལྟར་བྱས་མཁན་མི་བཟང་པོ་དེ་ནི། ཆུ་མིག་བཙོག་པ་ཡང་ན་དུག་བཏབ་པའི་ཁྲོན་པ་ལྟ་བུ་ཡིན་ནོ།

²⁷ སྦྲང་རྩི་ཧ་ཅང་མང་པོ་ཟ་རྒྱུ་ནི་ཡག་པོ་མ་ཡིན། རང་ལ་བསྟོད་བསྔགས་མང་པོ་ཐོབ་པ་བྱ་རྒྱུ་ནི་དེ་བཞིན་ཡིན་ནོ།

²⁸ ཁྱོད་ཀྱིས་ཁོང་ཁྲོར་བཟོད་སྒོམ་བྱེད་མ་ཐུབ་པ་ཡིན་ན། ཁྱོད་ལྕགས་རིགས་མེད་པའི་གྲོང་ཁྱེར་ལྟ་བུ་སྐྱབས་གྲོགས་མེད་པར་འགྱུར༎