ལེགས་བཤད 24 - Tibetan Old Testament 2011

གཏམ་དཔེ་བཅུ་དགུ་པ།

¹ མི་ངན་པ་ལ་ཕྲག་དོག་མ་བྱེད་ཅིག། དེ་ཚོ་དང་མཉམ་དུ་གྲོགས་པོ་བཟོ་ཐབས་མ་བྱེད་ཅིག

² དེ་ཚོས་བསམ་རྒྱུ་ནི་དཀའ་རྙོག་བཟོ་རྒྱུ་གཅིག་པོ་ཡིན་ནོ། དེ་ཚོས་དུས་རྟག་ཏུ་ཁ་ནམ་གདངས་སྐབས་སུ་ཞིག་ལ་གནོད་པ་བྱེད་དོ༎

གཏམ་དཔེ་གཉིས་ཞུ་པ།

³ ཤེས་རབ་དང་བློ་གྲོས་ཀྱི་རྨང་གཞིའི་ཐོག་ཁང་པ་རྩིག་པ་དང་།

⁴ ཡོན་ཏན་ཡོད་པའི་ཁང་མིག་རྣམས་རིན་ཐང་ཆེན་པོ་དང་མཛེས་སྡུག་ཅན་གྱི་དངོས་པོས་རྒྱན་སྤྲོས་བྱས་ཡོད་དོ༎

གཏམ་དཔེ་གཉེར་གཅིག།

⁵ ཤེས་རབ་ཅན་དུ་འགྱུར་བ་ནི་སྟོབས་ཤུགས་ཅན་ལས་ལེགས་པ་དང་། ཡོན་ཏན་ནི་ནུས་ཤུགས་ལས་ཧ་ཅང་གལ་ཆེ་བ་ཡིན་ནོ།

⁶ གང་ལྟར་ཁྱོད་ཀྱིས་དམག་ཞིག་རྒྱབ་པའི་སྔོན་ལ་འཆར་གཞི་ཟབ་ཟབ་གཏིང་དགོས་པ་དང་། ཇི་ཙམ་ཁྱོད་ལ་བསླབ་བྱ་བཟང་པོ་ཐོབ་ཡོད་པས། ཁྱོད་ལ་དེ་ཙམ་རྒྱལ་ཁ་ཐོབ་པའི་རེ་བ་ཡོད༎

གཏམ་དཔེ་གཉེར་གཉིས།

⁷ ཤེས་རབ་ལྡན་པའི་གཏམ་དཔེ་མི་གླེན་པས་རྟོགས་རྒྱུར་ཧ་ཅང་གཏིང་ཟབ་པོ་ཡོད་དོ། གལ་ཆེའི་གནད་དོན་རྣམས་ལ་གྲོས་བསྡུར་བྱེད་སྐབས་ཁོ་ལ་ཤོད་རྒྱུ་གང་ཡང་མེད་དོ༎

གཏམ་དཔེ་གཉེར་གསུམ།

⁸ ཁྱོད་ཀྱི་རྟག་ཏུ་འཆར་གཞི་ངན་པ་གཏིང་ཞིང་ཡོད་ན། ཁྱོད་ནི་དཀའ་སྡུག་བཟོ་མཁན་གྱི་མིང་ཐོབ་པར་འགྱུར་རོ།

⁹ མི་གླེན་པ་སུ་ཞིག་གིས་བསམ་པའི་ལྐོག་བྱུས་རྣམས་ལ་སྡིག་པ་ཡོད་དོ། མི་ཞིག་ལ་གང་ཡང་མེད་ན་ཡང་། གཞན་ལ་ཁྱད་གསོ་གཅིག་པོར་བྱེད་མཁན་ལ་མི་རྣམས་ཀྱིས་སྡང་བར་བྱེད་དོ༎

གཏམ་དཔེ་གཉེར་བཞི།

¹⁰ དཀའ་ངལ་ཀྱི་སྐབས་སུ་ཁྱོད་སྟོབས་ཆུང་བ་ཡིན་ན། ཁྱོད་ངེས་གཏན་སྟོབས་ཆུང་ཡིན་ནོ༎

གཏམ་དཔེ་གཉེར་ལྔ།

¹¹ སུ་ཞིག་ལ་དྲང་བདེན་མིན་པར་སྲོག་ཐོག་གཏོང་གྲབ་ཡོད་ན་དེ་ལ་སྐྱོབ་རྒྱུར་ཐེ་ཚོམ་མ་བྱེད་ཅིག

¹² དེ་ནི་ཁྱོད་ཀྱི་ལས་འགན་མ་རེད་ཅེས་བརྗོད་སྲིད་དོ། འོན་ཀྱང་དཀོན་མཆོག་གིས་དེ་མཁྱེན་པ་དང་། ཁྱོད་ཀྱི་ཀུན་སློང་ལ་ཞིབ་དཔྱོད་མཛད་དོ། ཁོང་གིས་ཁྱོད་ལ་གཟིགས་ཞིབ་གནང་བ་དང་། ཁོང་གིས་མཁྱེན་གྱི་ཡོད། ཁོང་གིས་ཁྱོད་ཀྱིས་ཇི་ལྟར་བྱས་པ་ལྟར་གསོལ་རས་གནང་ངོ་༎

གཏམ་དཔེ་གཉེར་དྲུག།

¹³ བུ་ཁྱོད་སྦྲང་རྩི་ཟ་ཞིག་དེ་ནི་ལེགས་པ་ཡོད། ཁྱོད་ཀྱི་ལྕེ་ལ་སྦྲང་ཚང་གི་སྦྲང་རྩི་མངར་མོ་ཡོད་པ་ལྟར།

¹⁴ ཁྱོད་ཀྱི་རྣམ་ཤེས་ལ་ཤེས་རབ་བཟང་པོ་ཡོད་པར་ངེས་གཏན་ཡོད། ཁྱོད་ཀྱིས་ཤེས་རབ་དེ་ལེན་པ་ཡིན་ན་ཁྱོད་ཀྱི་མ་འོངས་པ་འོད་དངས་འཚེར་བར་འགྱུར༎

གཏམ་དཔེ་གཉེར་བདུན།

¹⁵ མི་དྲང་པོ་ལ་ཇག་བཅོམ་མམ་ཡང་ན་དེའི་ཁང་ཁྱིམ་འཕྲོག་བཅོམ་བྱེད་པའི་ལྐོག་བྱུས་གཏིང་མཁན་མི་སྤྱོད་ངན་ལྟ་བུ་མ་བྱེད་ཅིག

¹⁶ མི་དྲང་པོ་དེ་ཐེངས་ཇི་ཙམ་མང་པོ་འགྱེལ་ན་ཡང་ཁོ་རྟག་ཏུ་སླར་ཡང་ལངས་བར་བྱེད་དོ། འོན་ཀྱང་མི་སྤྱོད་ངན་ལ་རྐྱེན་ངན་གྱིས་འཇིགས་པར་བྱེད་དོ༎

གཏམ་དཔེ་གཉེར་བརྒྱད།

¹⁷ ཁྱོད་ཀྱིས་དགྲ་བོ་ལ་རྐྱེན་ངན་འཕྲད་སྐབས་དགའ་པོ་མ་བྱེད་ལ། ཁོ་འགྱེལ་སྐབས་དགའ་སྤྲོ་ཡང་མ་བྱེད་ཅིག

¹⁸ ཁྱོད་ཀྱིས་དགའ་སྤྲོ་བྱེད་བཞིན་ཡོད་ན། གཙོ་བོ་དཀོན་མཆོག་གི་མཁྱེན་པ་དང་། ཁོང་གིས་དེ་ལ་མི་དགའ་བ་དང་། དེ་ནས་ཁོང་གིས་ཁོ་ལ་ཉེས་པ་གཏོང་མི་སྲིད་དོ༎

གཏམ་དཔེ་གཉེར་དགུ།

¹⁹ མི་ངན་པས་ཁྱོད་ལ་སེམས་འཁྲལ་བྱེད་མ་འཇུག་ལ། དེ་ཚོ་ལ་ཕྲག་དོག་ཡང་མ་བྱེད་ཅིག།

²⁰ མི་སྤྱོད་ངན་ཞིག་ལ་མ་འོངས་པར་ལྟ་རྒྱུ་གང་ཡང་མེད་དོ༎

གཏམ་དཔེ་སུམ་ཅུ་པ།

²¹ ངའི་བུ། གཙོ་བོ་དཀོན་མཆོག་ལ་འཇིགས་ཤིགས་དང་རྒྱལ་པོར་གུས་བཀུར་ཞུས་ཤིག དེ་ཚོ་ལ་ངོ་རྒོལ་བྱ་མཁན་ཚོ་དང་མཉམ་དུ་འབྲེལ་བ་གང་ཡང་མ་བྱེད་ཅིག

²² མི་དེ་ལྟ་བུ་ཁྱུག་ཙམ་ལ་འཇིག་པར་བྱེད་སྲིད་དོ། ཁྱོད་ཀྱིས་དཀོན་མཆོག་གམ་རྒྱལ་པོས་རྐྱེན་ངན་གཏོང་ཐུབ་བ་དེ་ཤེས་ཀྱི་ཡོད་དམ༎

ཤེས་རབ་ཅན་གྱི་གཏམ་དཔེ་གཞན་རྣམས།

²³ མི་ཤེས་རབ་ལྡན་པ་ཚོས་འདི་ལྟར་ཡང་གསུངས་ཡོད། ཁྲིམས་དཔོན་ཞིག་གིས་འཁོན་སེམས་བྱ་རྒྱུ་ནོར་འཁྲུལ་ཡིན་ནོ།

²⁴ དེས་མི་ཉེས་ཅན་ཞིག་ལ་ཉེས་མེད་གསལ་སྒྲགས་གྱིས་པ་ཡིན་ན། ཁོ་ལ་ཚང་མས་དམོད་པར་བྱས་པ་དང་སྡང་བར་བྱེད་དོ།

²⁵ ཉེས་ཅན་ལ་ཉེས་ཆད་གཏོང་མཁན་ཁྲིམས་དཔོན་དེ་འཕེལ་རྒྱས་ལམ་འགྲོ་ཡོང་བ་དང་མཚན་སྙན་གྲགས་འཕེལ་བར་འགྱུར་རོ།

²⁶ ལན་དྲང་པོ་དེ་མཛའ་གྲོགས་ངོ་མའི་རྟགས་ཡིན་ནོ།

²⁷ ཁྱོད་ཀྱིས་རང་གི་ཁང་པ་བཟོས་པའི་སྔོན་དུ་འཚར་གཞི་ཡག་པོ་གཏིང་ཞིག ས་གཞི་གྲ་སྒྲིགས་བྱོས་ཤིག།

²⁸ སུ་ཞིག་ལ་གནད་དོན་བཟང་པོ་མེད་བཞིན་དུ་དེའི་ཁ་ཐད་དུ་དཔང་པོ་མ་བྱེད་ཅིག ཁོའི་སྐོར་ལ་འཛུན་གྱི་གཏམ་མ་ཤོད་ཅིག།

²⁹ འདི་ལྟར་མ་སྨྲས་ཤིག། ཁོས་ང་ལ་བྱས་པ་ལྟར་ང་ཡང་ཁོ་ལ་བྱེད་ཀྱི་ཡིན། ངས་ཁོ་ལ་དགྲ་ཤ་ལེན་རྒྱུ་ཡིན།

³⁰ ངས་མི་གླེན་པ་དང་ལེ་ལོ་ཅན་ཞིག་གི་ཞིང་ཁ་དང་རྒུན་ཚལ་བརྒྱུད་ནས་ཕྱིན་པ་ཡིན།

³¹ དེ་ཚོ་ཚེར་མའི་སྡོང་ཆུང་དང་རྩ་ཡར་རིང་པོ་སྐྱེས་ནས་ཁེངས་འདུག དེའི་མཐའ་འཁོར་གྱི་རྡོའི་རྩིག་པ་རྣམས་བཞིགས་ནས་མར་འགྱེལ་འདུག

³² ངས་དེར་བལྟས་ནས་དེའི་སྐོར་བསམ་བློ་བཏང་བ་དང་། དེ་ནས་བསླབ་བྱ་ཞིག་ལེན་པ་ཡིན་ནོ།

³³ ཁྱོད་གཉིད་ཁུག་འདོད་ན་གཉིད་ལོག་ཅིག། ལག་པ་སྡམ་ནས་ངལ་གསོ་ཕྲན་བུ་གསོས་ཤིག

³⁴ འོན་ཀྱང་ཁྱོད་གཉིད་ལོག་པའི་རིང་དབུལ་འཕོང་གིས་ཁྱོད་ལ་གོ་མཚོན་ལྡན་པའི་ཇག་པ་བཞིན་དུ་འཐབ་རྒོ་བྱེད་དོ༎