ལེགས་བཤད 21 - Tibetan Old Testament 2011

¹ རྒྱལ་པོའི་ཐུགས་སེམས་དེ་གཙོ་བོ་དཀོན་མཆོག་གི་ཕྱག་ཏུ་ཡོད་པས། ཁོང་གིས་རྒྱུག་ཆུ་ཁ་བསྒྱུར་བ་ལྟར་ལས་སླ་པོར་བསྒྱུར་བ་གནང་ངོ་།

² ཁྱོད་ཀྱིས་གང་གྱིས་པ་ཚང་མ་དྲང་བདེན་ཡིན་བསམ་ན་ཡང་། གཙོ་བོ་དཀོན་མཆོག་གིས་ཁྱོད་ཀྱི་སེམས་ཀྱི་དམིགས་ཡུལ་དེ་ལ་ཞིབ་དཔྱོད་གནང་རྒྱུ་དེ་དྲན་པར་བྱོས་ཤིག

³ དྲང་པོ་དང་བདེན་པ་ཇི་ཡིན་གྱིས་ཤིག་དང་། དེས་གཙོ་བོ་དཀོན་མཆོག་ལ་དམར་མཆོད་འབུལ་བ་ལས་ལྷག་པ་མཉེས་པར་འགྱུར་རོ།

⁴ མི་ངན་པ་རྣམས་ང་རྒྱལ་དང་སྤོབ་པས་དབང་བསྒྱུར་བྱེད་པ་དེ་ནི་སྡིག་ཅན་ཡིན་ནོ།

⁵ འཆར་གཞི་ཟབ་ཟབ་ཀྱི་གཏིང་བ་ཡིན་ན། ཁྱོད་ལ་ཁེ་སང་འབོལ་པོ་ཡོང་བར་འགྱུར། ཁྱོད་ཀྱིས་བྱ་བ་མགྱོགས་པོར་བྱས་པ་ཡིན་ན། ཁྱོད་ལ་ནམ་ཡང་ལྡང་བ་མི་ཡོང་ངོ་།

⁶ དྲང་མིན་གྱི་ཁྱོད་ལ་ཐོབ་པའི་རྒྱུ་ནོར་རྣམས་མགྱོགས་པོར་རླག་པར་འགྱུར་རོ། འོན་ཀྱང་དེ་མ་རྫོགས་པའི་སྔོན་དུ་ཁྱོད་ལ་འཆི་ཁར་འཁྲིད་པར་འགྱུར།

⁷ སྤྱོད་ངན་རྣམས་རང་གི་དྲག་ལས་ཀྱིས་འཇིག་པར་བྱེད་པ་དང་། དེ་ཚོས་དྲང་བདེན་ཇི་ཡིན་པ་ཁས་ལེན་མི་བྱེད་དོ།

⁸ ཉེས་ཅན་གྱི་མི་ལམ་སྐྱོག་ཏུ་འགྲོ་བར་བྱེད་པ་དང་། མི་སྣོང་མེད་དྲ་བདེན་ཇི་ཡིན་བྱེད་པར་འགྱུར་རོ།

⁹ ཆུང་མ་སུན་པོ་མཉམ་དུ་ཁང་པའི་ནང་བསྡད་པ་ལས། ཁང་པའི་རྩེ་ཐོག་ཏུ་བསྡད་པ་ལེགས།

¹⁰ མི་སྤྱོད་ངན་རྣམས་རྟག་ཏུ་ངན་པ་བྱེད་པ་ལ་རྔམ་པར་བྱེད་དོ། དེ་ཚོས་སུ་ལ་ཡང་སྙིང་རྗེ་མི་བྱེད་དོ།

¹¹ སུ་ཞིག་ང་རྒྱལ་ཅན་དུ་འགྱུར་ན་དེ་ལ་རང་གི་ཉེས་ཆད་འབབ་པར་འགྱུར། བསམ་བློ་མི་གཏོང་མཁན་ཞིག་གིས་ཀྱང་བསླབ་བྱ་ལེན་པར་བྱེད་དོ། ཤེས་རབ་ལྡན་པ་ཞིག་གིས་སློབ་སྟོན་གྱིས་པ་ལ་སྦྱོང་བར་བྱེད་དོ།

¹² དྲང་བདེན་གྱི་དཀོན་མཆོག་ཉིད་ཀྱིས་སྤྱོད་ངན་གྱི་ཁྱིམ་དུ་ཇི་བྱུང་བ་མཁྱེན་པ་དང་། ཁོང་གིས་སྤྱོད་ངན་ལ་འཇིག་པར་མཛད་དོ།

¹³ ཁྱོད་ཀྱིས་དབུལ་པོའི་ངུ་འབོད་ལ་མ་ཉན་པ་ཡིན་ན། ཁྱོད་ཀྱི་ངུ་འབོད་ལ་སུས་ཀྱང་མི་ཉན་ནོ།

¹⁴ སུ་ཞིག་གིས་ཁྱོད་ལ་ཁྲོ་བ་ཡིན་ན་གསང་བའི་རྔན་པ་ཞིག་སྤྲད་པས་ཁྲོ་བ་ཞི་བར་འགྱུར་རོ།

¹⁵ དྲང་བདེན་ཐོག་ཐག་ཆོད་གྱིས་སྐབས་སྐྱེ་བོ་བཟང་པོ་རྣམས་དགའ་བར་འགྱུར་རོ། འོན་ཀྱང་སྐྱེ་བོ་ངན་པ་རྣམས་ཡིད་མུག་པར་བྱེད་དོ།

¹⁶ སུ་ཞིག་སེམས་བཟང་པོ་ལས་གཡོལ་འགྲོ་མཁན་དེ་འཆི་བ་སྒུག་བཞིན་ཡོད་དོ།

¹⁷ ལོངས་སྤྱོད་དང་རྒུན་ཆང་དང་ཁ་ཟས་བཟང་པོར་ལང་ཤོར་སོང་བ་དེས་ཁྱོད་ལ་ནམ་ཡང་ཕྱུག་པོར་མི་འགྱུར་རོ།

¹⁸ སྤྱོད་ངན་གྱིས་མི་བཟང་པོ་ལ་སྡུག་བསྔལ་སྐྱེལ་བར་འདོད་པ་དེ་ནི་རང་གི་ཐོག་ཏུ་བབས་པར་འགྱུར།

¹⁹ ཆུང་མ་སུན་པོ་སྐྱོན་བརྗོད་ཅན་ཞིག་དང་མཉམ་དུ་བསྡད་པ་ལས་བྱེ་ཐང་དུ་བསྡད་པ་ལེགས་སོ།

²⁰ ཤེས་རབ་ལྡན་པའི་མི་དེ་རྒྱུ་ནོར་དང་ལོངས་སྤྱོད་ནང་གནས་པར་བྱེད་དོ། འོན་ཀྱང་མི་གླེན་པ་ཚོས་དངུལ་བྱུང་མ་ཐག་ཏུ་མགྱོགས་པོར་བེད་སྤྱོད་བྱེད་དོ།

²¹ སྙིང་རྗེ་དང་དྲང་པོ་བྱས་པ་ཡིན་ན་ཁྱོད་ཚེ་རིང་བར་འགྱུར་རོ། གཞན་ཚོས་ཁྱོད་ལ་གུས་ཞབས་བྱེད་པ་དང་དྲང་པོའི་ཐོག་ངོས་འཛིན་བྱེད་དོ།

²² དམག་སྤྱི་གཅང་པོ་ཞིག་གིས་སྟོབས་ཤུགས་ཅན་གྱི་མིས་སྲུང་བའི་གྲོང་ཁྱེར་ལེན་ཐུབ་པ་དང་། དེ་ཚོས་བློས་བཀལ་བའི་རྩིག་པར་འཇིགས་པར་བྱེད་དོ།

²³ ཁྱོད་དཀའ་ངལ་ལས་ཚུད་འདོད་མེད་ན་ཁྱོད་ཀྱིས་ཇི་སྨྲ་བ་ལ་ཟབ་ཟབ་བྱོས་ཤིག

²⁴ གཏམ་འདོད་ཅན་གྱི་སྐྱེ་བོ་ཞིག་སྟོན་ལ། ངས་ཁྱོད་ལ་ང་རྒྱལ་ཅན་དང་སྤོབས་པ་ཅན་དང་སེམས་ཁུར་མེད་པ་ཅིག་སྟོན་པར་བྱའོ།

²⁵ མི་ལེ་ལོ་ཅན་ལས་ཀ་བྱེད་མི་འདོད་མཁན་དེས་རང་གིས་རང་ལ་གསོད་བཞིན་ཡོད་དོ།

²⁶ ཁོས་ཁོ་རང་གཅིག་པུའི་ཇི་འདོད་པ་བསམ་བློ་གཏོང་བར་བྱེད་དོ། གང་ལྟར་མི་དྲང་བདེན་ཞིག་གིས་སྦྱིན་ནུས་པ་དང་སེར་སྣ་མེད་པར་སྦྱིན་པར་བྱེད་དོ།

²⁷ གཙོ་བོ་དཀོན་མཆོག་ནི་མི་སྤྱོད་ངན་གྱིས་ཁོང་ལ་དམར་མཆོད་འབུལ་བ་དང་། དམིགས་བསལ་གྱི་དེ་ཚོའི་ཀུན་སློང་ངན་པའི་ཐོག་ནས་དེ་ལྟར་བྱས་པར་ཐུགས་ཧ་ཅང་སྡང་ངོ།

²⁸ རྫུན་གྱི་དཔང་པོར་སུ་ཞིག་གིས་ཡིད་ཆེད་མི་བྱེད་དོ། འོན་ཀྱང་སུ་ཞིག་གིས་གནད་དོན་དེར་བསམ་བློ་ཞིབ་པར་བཏང་ནས་སྨྲས་པའི་གཏམ་ལ་ཚང་མས་ངོས་ལེན་བྱེད་དོ།

²⁹ མི་དྲང་བདེན་རང་གིས་རང་ལ་ཡིད་ཆེས་ཡོད་པ་དང་། སྤྱོད་ངན་གྱིས་ཟོག་རྫུ་གང་ཐུབ་ཐུབ་བྱེད་དོ།

³⁰ གཙོ་བོ་དཀོན་མཆོག་གི་ཐོག་ཏུ་འགྲོ་བ་མིའི་ཤེས་རབ་དང་ནང་རྒྱུས་དང་འཆར་གཞི་གང་ཡང་ཕན་མི་ཐོག་གོ

³¹ ཁྱོད་ཀྱིས་དམག་ཆེད་དུ་རྟ་གྲ་སྒྲིགས་བྱེད་ཐུབ་བོ། འོན་ཀྱང་རྒྱལ་ཁ་གནང་མཁན་དེ་གཙོ་བོ་དཀོན་མཆོག་ཡིན་ནོ༎