ལེགས་བཤད 2 - Tibetan Old Testament 2011

ཤེས་རབ་ཀྱི་བྱ་དགའ།

¹ ངའི་བུ། ངས་བསླབ་པ་རྣམས་ལ་སྦྱོངས་ཤིག། ངས་བྱེད་དགོས་བརྗོད་པ་རྣམས་རྩ་བ་ནས་མ་བརྗེད་པར་བྱོས་ཤིག

² ཤེས་རབ་ལྡན་པ་ཇི་ཡིན་ལ་ཉོན་ཞིག་དང་། དེ་རྟོགས་ཐབས་བྱོས་ཤིག།

³ ཡོན་ཏན་གྱི་ཆེད་དུ་ཞུ་བསྐུལ་བྱོས་ལ། ནང་རྒྱུས་ཀྱི་ཆེད་དུ་ཡང་ཞུ་འབུལ་བྱོས་ཤིག།

⁴ དེའི་དོན་ལ་དངུལ་དང་སྦས་པའི་གཏེར་འཚོལ་བ་ལྟར་ཧ་ཅང་ནན་ཏན་གྱིས་འཚོལ་ཞིག

⁵ ཁྱོད་ཀྱིས་དེ་ལྟར་བྱས་པ་ཡིན་ན་ཁྱོད་ཀྱིས་གཙོ་བོ་དཀོན་མཆོག་ལ་འཇིགས་དགོས་དོན་ཤེས་པར་འགྱུར་བ་དང་། ཁྱོད་ཀྱིས་དཀོན་མཆོག་གི་སྐོར་ལ་སློབ་སྦྱོང་བྱ་གྱུར་ལམ་ལྷོང་ཡོང་བར་འགྱུར།

⁶ ཤེས་ཤབ་གནང་མཁན་གཙོ་བོ་དཀོན་མཆོག་ཡིན་པ་དང་། ཡོན་ཏན་དང་རྟོགས་པ་ཁོང་ནས་ཐོབ་ཡོང།

⁷ ཁོང་གིས་མི་མཆོད་སེམས་ཅན་དང་དྲང་ལྡན་ལ་རོགས་དང་སྲུང་སྐྱོབ་གནང་ངོ།

⁸ ཁོང་གིས་ཕྱོགས་ཞེན་མི་བྱ་མཁན་ཚོར་སྲུང་སྐྱོབ་གནང་བ་དང་། ཁོང་ལ་མུས་གུས་དང་ལྡན་པ་ཚོ་ལ་སྲུང་བར་མཛད་དོ།

⁹ ཁྱོད་ཀྱིས་ང་ལ་ཉན་པ་ཡིན་ན། བདེན་པ་དང་དྲང་བདེན་དང་ཕྱོགས་རིས་ཇི་ཡིན་ཤེས་པར་འགྱུར། ཁྱོད་ཀྱིས་ཇི་ལྟར་བྱེད་དགོས་པ་ཤེས་པར་འགྱུར།

¹⁰ ཁྱོད་ཤེས་རབ་དང་ལྡན་པར་འགྱུར་བ་དང་། ཁྱོད་ཀྱི་ཡོན་ཏན་གྱི་ཁྱོད་ལ་བདེ་བ་བྱིན་ནོ།

¹¹ ཁྱོད་ཀྱི་ནང་རྒྱུས་དང་དྲེན་དབང་གིས་ཁྱོད་ལ་སྐྱོབ་པར་བྱེད་པ་དང་།

¹² ཁྱོད་ལ་ལས་ངན་བྱེད་པ་ལས་འགོག་པ་དང་། དེ་ཚོས་རྙོག་གླེང་བཟོ་མཁན་ཚོ་ལས་ཐག་རིང་འཇོག་གོ

¹³ མི་དེ་ཚོ་ནི་དྲང་པོའི་མི་ཚེ་སྤོང་ནས་སྡིག་པའི་མུན་ནག་ནང་དུ་སྡོད་དོ།

¹⁴ དེ་ཚོས་ནོར་འཁྲུལ་བྱེད་པར་བདེ་བ་ཐོབ་པ་དང་། བསམ་ཤེས་མེད་པ་ངན་ལས་སྤྱོད་དོ།

¹⁵ དེ་ཚོ་བློ་བཅོལ་མི་ཐུབ་པའི་ལམ་ལོག་ཏུ་འགྲོ་མཁན་ཡིན།

¹⁶ བུད་མེད་ཚུལ་མིན་གྱི་གཏམ་སྙན་པོས་བསླུ་འཁྲིད་བྱ་མཁན་ལས་ཁྱོད་ལ་སྐྱོབ་པར་བྱེད་དོ།

¹⁷ བུ་མེད་དེ་ནི་རང་གི་ཁྱོ་ལ་དམ་ཚིག་མི་སྲུང་མཁན་དང་རང་གི་རྩ་ཆེ་དམ་བཅའ་ལ་བརྗེད་འགྲོ་མཁན་ཡིན།

¹⁸ ཁྱོད་མོའི་ཁྱིམ་དུ་སོང་བ་ཡིན་ན་ཁྱོད་འཆི་བའི་ལམ་དུ་འགྲོ་བ་ཡིན་ནོ། དེར་འགྲོ་བ་དེ་ནི་འཆི་བའི་གླིང་དུ་འགྲོ་བ་ཡིན་ནོ།

¹⁹ མོའི་སར་འགྲོ་མཁན་སུ་ཡང་ཕྱིར་ལོག་པར་མི་བྱེད་དོ། ཁོ་ནི་མི་ཚེའི་ལམ་དུ་ནམ་ཡང་ཕྱིར་ལོག་མི་བྱེད་དོ།

²⁰ དེར་བརྟེན་ཁྱོད་ཀྱིས་མི་བཟང་པོ་དང་དྲང་བདེན་གྱི་མི་ཚེ་བསྐྱེལ་མཁན་གྱི་དཔེའི་རྗེས་སུ་འཇུག་དགོས།

²¹ མི་དྲང་བདེན་དང་མཆོད་སེམས་ཅན་རྣམས་ང་ཚོའི་ཡུལ་འདིར་གནས་པར་བྱེད་དོ།

²² འོན་ཀྱང་དཀོན་མཆོག་གིས་སྤྱོད་ངན་ཚོར་ཡུལ་ནས་ཕྱིར་བཏོན་གནང་བ་དང་། སྡིག་ཅན་ཚོ་ལ་རྩེ་ཤིང་ས་ནས་བཀོག་གནང་བ་ལྟར་བཀོག་པར་མཛད་དོ༎