ལེགས་བཤད 18 - Tibetan Old Testament 2011

¹ མི་གཞན་དང་མཐུན་ལམ་མེད་མཁན་ཚོ་ནི་རང་རང་སོ་སོའི་མཁེ་ཕན་གཅིག་པུར་བལྟ་བ་བྱེད་དོ། ཚང་མས་དྲང་ལྡན་ཡིན་པ་ཤེས་པ་དེ་ལ་ཁོས་ཁས་ལེན་མི་བྱེད་དོ།

² གླེན་པ་ཞིག་གིས་ཁོས་ཤེས་རྟོགས་ཡོད་མེད་ལ་སྣང་བ་མི་བྱེད་དོ། ཁོས་བྱ་འདོད་ཡོད་པ་དེ་ནི་ཁོ་རང་སྤྱང་པོ་ཇི་འདྲ་ཡོད་པ་དེ་བརྟོན་རྒྱུ་དེ་ཡིན་ནོ།

³ སྡིག་པ་དང་ངོ་ཚ་མཉམ་དུ་འགྲོ་བ་ཡིན། ཁྱོད་ཀྱི་གུས་ཞབས་བརླག་ནས་དེའི་ཚབ་ལ་ཁྱོད་ལ་འཕྱ་རྨས་ཐོབ་བར།

⁴ མི་ཞིག་གི་གཏམ་ནི་ཤེས་རབ་ཀྱི་འབྱུང་ཁུངས་ཡིན་པ་དང་། རྒྱ་མཚོ་ལྟ་བུའི་གཏིང་རིང་པོ་དང་རྒྱུགས་བཞིན་པའི་རྒྱུགས་ཆུ་ལྟ་བུའི་གཙང་མ་ཡོང་སྲིད་དོ།

⁵ ཉེས་ཅན་ལ་ཕྱོགས་ཞེན་བྱེད་པ་དང་སྣོང་མེད་ལ་དྲང་བདེན་ཡོང་རྒྱུར་འགག་པ་བྱ་རྒྱུ་ནི་དྲང་པོ་མ་ཡིན་ནོ།

⁶ གླེན་པ་འགའ་ཞིག་གིས་རྩོད་པ་འགོ་ཚུགས་པ་ཡིན་ན། ཁོས་རང་ལ་ཉེས་བརྡུང་ཡོང་བ་ཚོལ་བ་ཡིན་ནོ།

⁷ གླེན་པ་འགའ་ཞིག་གིས་གཏམ་སྨྲ་སྐབས་ཁོ་རང་ཉིད་ལ་འཇིགས་པར་བྱེད་པ་དང་། ཁོ་རང་ཉིད་གཏམ་གྱིས་རྙིད་ནང་འཚུད་པར་འགྱུར་རོ།

⁸ ལྐོག་གཏམ་ནི་ཧ་ཅང་བྲོ་བ་ཆེ་བ་དང་། དེ་ལ་ཁྱུར་མིག་གཏོང་རྒྱུ་ང་ཚོ་ཇི་ཙམ་དགའ་བ་ཡོད།

⁹ མི་ལེ་ལོ་ཅན་ནི་འཇིག་པར་བྱ་མཁན་ཞིག་ལྟ་བུ་ངན་པ་ཡིན་ནོ།

¹⁰ གཙོ་བོ་དཀོན་མཆོག་ནི་གན་དྷོ་ལ་སྟོབས་ཅན་དང་འདྲ་བ། དྲང་བདེན་རྣམས་དེར་སོང་ན་སྲུང་སྐྱོབ་ཐོབ་བོ།

¹¹ མི་ཕྱུག་པོ་ཚོས་གྲོང་ཁྱེར་མཐའ་འཁོར་གྱི་རྩིག་པ་མཐོ་པོ་དང་བརྟན་པོ་བཞིན་དུ་དེ་ཚོའི་རྒྱུ་ནོར་གྱིས་དེ་ཚོར་སྲུང་སྐྱོབ་བྱེད་ཐུབ་བསམ་མོ།

¹² སུ་ཞིག་ཉམ་ཆུང་ཡིན་ན་གུས་ཞབས་ཐོབ་པ་དང་། ང་རྒྱལ་ཅན་གྱི་མི་རྣམས་ནི་འཇིག་པའི་ལམ་དུ་འགྲོ་བཞིན་ཡོད།

¹³ ཁྱོད་ཀྱིས་ལན་འདེབས་སྔོན་དུ་ལེགས་པར་ཉོན་ཞིག དེ་ལྟར་མ་བྱས་པ་ཡིན་ན་གླེན་པ་དང་དམའ་འབེབས་བྱེད་པའི་རྒྱུ་ཡིན་ནོ།

¹⁴ ཁྱོད་ན་བའི་སྐབས་སུ་ཁྱོད་ཀྱིས་འཚོ་བར་བྱ་རྒྱུའི་སེམས་ཤུགས་ཀྱིས་ཁྱོད་འཚོ་བར་བྱེད་དོ། འོན་ཀྱང་དེ་མེད་པ་ཡིན་ན་ཁྱོད་ཀྱི་རེ་བ་མཐའ་མ་དེ་བརླག་པར་འགྱུར་རོ།

¹⁵ རིགས་པ་དང་ལྡན་པ་ཚོར་རྟག་ཏུ་སྦྱོངས་རྒྱུ་ལ་འདོད་པ་དང་གྲ་སྒྲིགས་ཡོད་དོ།

¹⁶ ཁྱོད་ཀྱིས་མི་གཙོ་ཆེ་ཞིག་ལ་ཐུག་འཕྲད་བྱ་འདོད་ཡོད་དམ། དེ་ལ་རྔན་པ་ཞིག་འཁྱེར་ཞིག་དང་ཐུག་རྒྱུ་ལས་སླ་པོ་ཡིན་ནོ།

¹⁷ ཐོག་མར་ཁྲིམས་ནང་ཕ་ཕྱོགས་ནས་དྲི་བ་མ་འདྲི་སྔོན་ལ་སྐད་ཆ་ཤོད་མཁན་དེ་རྟག་ཏུ་བདེན་པ་ལྟར་ཡོད་དོ།

¹⁸ མི་སྟོབས་ཤུགས་ཅན་གཉིས་ཁྲིམས་ཁང་ནང་གཅིག་གིས་གཅིག་ལ་ངོ་རྒོལ་བྱེད་བཞིན་ཡོད་ན། རྒྱན་རྒྱབ་ནས་དེ་ཚོའི་རྩོད་རྙོག་སེལ་ཐུབ་བོ།

¹⁹ ཁྱོད་ཀྱི་སྤུན་ལ་རོགས་པ་བྱས་ན་དེས་གྲོང་ཁྱེར་གྱི་རྩིག་པ་བརྟན་པོ་ལྟར་ཁྱོད་ལ་སྲུང་སྐྱོབས་བྱེད་དོ། ཁོ་ལ་འཁྲུགས་རྩོད་བྱས་པ་ཡིན་ན་ཁོས་ཁྱོད་ཀྱི་ཆེད་དུ་སྒོ་རྒྱབ་པར་བྱེད་དོ།

²⁰ ཁྱོད་ཀྱིས་སྨྲས་པ་ཚང་མའི་འབྲས་བུ་ལས་ཁྱོད་འཚོ་ཞིང་གནས་དགོས་སོ།

²¹ ཁྱོད་ཀྱི་ཇི་ལྟར་སྨྲས་པ་དེས་ཁྱོད་ཀྱི་སྲོག་ལ་སྲུང་སྐྱོབ་བྱེད་པ་དང་འཇིག་པ་ཡང་བྱེད་དོ། དེར་བརྟེན་ཁྱོད་ཀྱིས་རང་གི་གཏམ་གྱི་འབྲས་བུ་ལ་ངོས་ལེན་བྱེད་དགོས་སོ།

²² ཆུང་མ་ཐོབ་མཁན་གྱི་དངོས་པོ་བཟང་པོ་ཞིག་རྙེད་པར་འགྱུར། དེས་གཙོ་བོ་དཀོན་མཆོག་ནས་ཐུགས་རྗེ་ཐོབ་པ་ཁོས་ཤེས་པར་འགྱུར།

²³ དབུལ་པོས་སྨྲ་སྐབས་ངག་འཇམ་པོའི་ཐོག་ནས་སླང་བ་དང་། འོན་ཀྱང་ཕྱུག་པོ་ཞིག་གིས་ལན་འདེབས་བྱ་སྐབས་ཁོས་རྩུབ་པོར་སྨྲའོ།

²⁴ མཛའ་གྲོགས་འགའ་ཤས་ཡུན་རིང་མི་གནས་སོ། འོན་ཀྱང་མཛའ་གྲོགས་འགའ་ཤས་རང་གི་སྤུན་ལས་ཀྱང་ཧ་ཅང་ཤ་ཞེན་ཆེ་བ་ཡོད་དོ༎