ལེགས་བཤད 16 - Tibetan Old Testament 2011

¹ ང་ཚོས་རང་གི་འཆར་གཞི་བཟོས་ན་ཡང་། མཐའ་མའི་ཐག་གཅོད་དེ་ནི་དཀོན་མཆོག་ཁོང་གི་ཡིན།

² ཁྱོད་ཀྱིས་བསམ་བློར་གང་བྱས་ཚང་མ་དྲང་པོ་ཡིན་བསམ་ཡང་། གཙོ་བོ་དཀོན་མཆོག་ཁོང་གིས་ཁྱོད་ཀྱི་དམིགས་ཡུལ་དེ་ལ་ཞིབ་དཔྱོད་གནང།

³ ཁྱོད་ཀྱི་འཆར་གཞིར་གཙོ་བོ་དཀོན་མཆོག་ལ། བྱིན་རླབས་གནང་བའི་འབོད་བསྐུལ་ཞུས་པས་ན། དེ་ཚོ་སྒྲུབ་རྒྱུར་ཁྱོད་ལ་ལམ་ལྷོང་ཡོང་།

⁴ གཙོ་བོ་དཀོན་མཆོག་ཁོང་གིས་རང་གི་དམིག་ཡུལ་ཆེད་དུ་ཚང་མ་མཛད། ངན་པ་ལ་ཡང་འཇིགས་པའི་ཉིན་གྱི་ཆེད་དུ་འཛོག་གནང་ཡོད།

⁵ གཙོ་བོ་དཀོན་མཆོག་ཁོང་གིས་ང་རྒྱལ་ཅན་ཚོར་སྡང་བར་མཛད། ཁོང་གིས་དེ་ཚོ་ཉེས་ཆད་ལས་ཐར་དུ་མི་འཇུག་གོ།

⁶ ཤ་ཤེན་ཅན་དང་དམ་ཚིག་གཙང་མ་གྱིས་པ་ཡིན་ན། དཀོན་མཆོག་ཁོང་གིས་ཁྱོད་ཀྱི་སྡིག་པར་བཟོད་གསོལ་གནང་། གཙོ་བོ་དཀོན་མཆོག་ཁོང་གི་བཀའ་ལ་ཉོན་ཞིག་དང་། ཁྱོད་ལ་ངན་པ་ལ་སོགས་གང་ཡང་མི་ཡོང་ངོ།

⁷ གཙོ་བོ་དཀོན་མཆོག་ཁོང་ལ་ཐུགས་མཉེས་པར་བྱོས་ཞིག ཁྱོད་ཀྱི་དགྲ་རྣམས་ཁྱོད་ཀྱི་གྲོགས་པོར་འགྱུར།

⁸ དྲང་མིན་གྱིས་ཐོབ་པའི་ཡོང་སྒོ་ཆེན་པོ་ལས། དྲང་པོའི་སྒོ་ནས་བསགས་པའི་ཉུང་ཉུང་དེ་ནི་ལེགས་པ་ཡིན།

⁹ ཁྱོད་རང་ཉིད་ཀྱི་འཆར་གཞི་བཟོས་ན་ཡང་། ཁྱོད་ཀྱི་བྱ་བར་དཀོན་མཆོག་ཁོང་གི་ལམ་སྟོན་མཛད།

¹⁰ རྒྱལ་པོ་དམ་པའི་སྐུ་དབང་ཐོག་ནས་བཀའ་གནང་བ། ཁོང་གི་ཐག་ཆོད་རྣམས་ནི་རྟག་ཏུ་བདེན་པ་ཡིན།

¹¹ གཙོ་བོ་དཀོན་མཆོག་ཁོང་གིས་ལྗིད་ཚད་དྲང་པོ་དང་། ཚོང་ཟོག་ཚང་མ་ཁྲིམས་དྲང་ཐོག་ནས་ཙོང་བ་ཐུགས་དགོངས་ཡོད།

¹² རྒྱལ་པོ་ཚོས་ངན་ལས་ལ་བཟོད་སྲན་བྱེད་མི་ཐུབ། གང་ལགས་ཟེར་ན་ཁྲིམས་དྲང་པོས་གཞུང་དེ་བརྟན་པོར་གནས་ཐུབ་བོ།

¹³ རྒྱལ་པོས་བདེན་པ་ཡིན་པ་ལ་ཉན་འདོད་ཡོད་པ་དང་། བདེན་པ་བརྗོད་མཁན་དེ་ལ་ཁོང་གིས་ཐུགས་རྗེ་གནང།

¹⁴ ཤེས་རབ་ཅན་གྱི་མིས་རྒྱལ་པོ་ལ། དགའ་སྐྱིད་ངང་དུ་འཇོག་ཐབས་བྱེད་པ་དང་། རྒྱལ་པོ་ཁྲོ་བས་སུ་ཞིག་འཆི་སྲིད་དོ།

¹⁵ རྒྱལ་པོའི་ཐུགས་རྗེ་དེ་དཔྱིད་ཀར་ཆར་ཆུ་འཁྱེར་ནས་ཡོང་མཁན་སྤྲིན་ལྟར་ཡིན་ཅིང། དེ་ལ་སྲོག་ཡོད།

¹⁶ གསེར་དང་དངུལ་ཡོད་པ་ལས་ཤེས་རབ་དང་ཡོན་ཏན་ཡོད་པ་ཧ་ཅང་ལེགས་སོ།

¹⁷ བཟང་པོ་ཚོ་ནི་ངན་པ་སྤངས་པའི་ལམ་དུ་འགྲུལ་ལོ། ཁྱོད་གང་དུ་འགྲོ་གི་ཡོད་མེད་ལྟོས་ཤིག། དེས་ཁྱོད་ཀྱི་སྲོག་སྐྱོབ་སྲིད་དོ།

¹⁸ ང་རྒྱལ་གྱིས་འཇིགས་པའི་ལམ་དུ་འཁྲིད། སྤོབ་པ་ཆེན་པོས་རྒུད་པའི་ལམ་དུ་འཁྲིད།

¹⁹ ང་རྒྱལ་ཅན་དང་མཐུན་ནས་བཅོམ་ནོར་བགོ་ནས་སྐལ་བ་ཐོབ་པ་ལས། ཉམ་ཆུང་བྱས་ནས་དབུལ་པོར་གནས་པ་ལེགས་པ་ཡིན།

²⁰ ཁྱོད་ལ་སློབ་སྟོན་བྱས་པར་དོ་སྣང་བྱས་པ་ཡིན་ན། ཁྱོད་ལ་བྱ་བ་ལམ་འགྲོ་ཡོང་། གཙོ་བོ་དཀོན་མཆོག་ལ་བློ་བཅོལ་ན་ཁྱོད་ལ་དགའ་སྐྱིད་ཐོབ་ཡོང་།

²¹ ཤེས་རབ་ཅན་དང་ལོ་ན་རྒས་པོ་ལ་ཁོ་ཡི་དྲེན་དབང་དེ་ཡིས་ངོ་ཤེས་ཡོང་། ཁོ་ཡི་གཏམ་རྣམས་ཇི་ལྟར་མཛེས་པ་དང་། ཁོ་ནི་ཧ་ཅང་འབོད་བསྐུལ་ཅན་ཡིན་ནོ།

²² ཤེས་རབ་ནི་སྲོག་གུ་ཆུ་མིག་ཡིན་ན་ཡང་། གླེན་པར་སློབ་སྦྱོངས་སྤྲོད་རྒྱུར་ནི་དུས་ཚོད་ཆུད་ཟོས་ཡིན།

²³ རིགས་པ་ལྡན་པ་མི་ཚོས་སྨྲ་བའི་སྔོན་ལ་བསམ་བློ་གཏོང་བ་དང་། དེའི་རྐྱེན་དེ་ཚོས་བརྗོད་པ་རྣམས་ཧ་ཅང་འབོད་བསྐུལ་ཅན་ཡིན་ནོ།

²⁴ བྱམས་བརྩེའི་གཏམ་ནི་སྦྲང་རྩི་ལྟར་སྲོག་གི་ཆེད་དུ་མངར་བ་དང་། ཁྱོད་ཀྱི་འཕྲོད་རྟེན་ཆེད་དུ་ལེགས་པ་ཡིན་ནོ།

²⁵ ཁྱོད་ཀྱིས་བདེན་པ་ཡིན་བསམ་པའི་ལམ་གྱིས་འཆི་བའི་ལམ་དུ་འཁྲིད་སྲིད་དོ།

²⁶ ངལ་རྩོལ་ཅན་གྱི་གྲོད་པས་ཁོ་ལ་ཧུར་པོ་བཟོོ། གང་ལགས་ཟེར་ན། ཁོའི་ལྟོགས་པ་དེ་འཚིམ་པར་བྱ་འདོད་ཡོད་དོ།

²⁷ སྐྱེ་བོ་ངན་པ་ཚོས་གཞན་ལ་གནོད་པ་སྐྱེལ་རྒྱུ་འཚོལ་བཞིན་ཡོད་པ་དང་། དེ་ཚོའི་གཏམ་ལ་ཡང་ངན་པ་ཁོ་ན་ཡོད།

²⁸ མི་ངན་ཚོ་ཡིས་ཆོ་མེད་གཏམ་རྣམས་སྤེལ་བར་བྱེད། དེ་ཚོས་དཀའ་སྡུག་སློང་ཞིང་གྲོགས་པོའི་འབྲེལ་བ་རྣམས་ནི་སྟོར།

²⁹ མི་ངན་ཚོ་ཡིས་རང་གི་གྲོགས་པོོར་བསླུ་འཁྲིད་བྱེད། དེ་ཚོར་རྐྱེན་ངན་ནང་དུ་འཁྲིད་པར་བྱེད།

³⁰ ཁ་ཚེག་ཚེག་བྱ་མཁན་དང་མིག་འཚུམ་རྒྱབ་མཁན་ཚོར་དོག་ཟོན་གྱིས་ཤིག དེ་ཚོ་ལ་ངན་སེམས་ཡོད་དོ།

³¹ ཚེ་རིང་པོ་དེ་དྲང་བདེན་གྱི་བྱ་དགའ་ཡིན། སྐྲ་དཀའ་ནི་ཅོད་པན་གྱི་གཟི་བརྗིད་ཡིན་ནོ།

³² བཟོད་སྲན་བྱ་རྒྱུ་དེ་སྟོབས་ཤུགས་ཅན་ལས་ལེགས་པ་ཡིན། གྲོང་ཁྱེར་ཡོངས་རྫོགས་དབང་བསྒྱུར་བྱེད་པ་ལས་རང་གིས་རང་ལ་དབང་བསྒུར་བྱེད་པ་ལེགས་པ་ཡིན།

³³ དཀོན་མཆོག་གི་དགོངས་པ་ཤེས་ཐབས་སུ་མི་ཡིས་མོ་རྒྱབ་པ་དང་། འོན་ཀྱང་དཀོན་མཆོག་ཉིད་ཀྱིས་དེའི་ལན་ཐག་ཆོད་གནང་ངོ་༎