ལེགས་བཤད 14 - Tibetan Old Testament 2011

¹ ཤེས་རབ་ཅན་གྱི་བུད་མེད་ཀྱིས་རང་གི་ཁང་ཁྱིམ་བཟོས་ཡོང་། འོན་ཀྱང་བུད་མེད་བླུན་མོས་རང་གི་ལག་པས་མེད་པར་བཟོའོ།

² དྲང་པོས་གཙོ་བོ་དཀོན་མཆོག་ལ་འཇིགས་པ་དང་། དྲང་མིན་གྱིས་ཁོང་ལ་བརྙས་བར་བྱེད་དོ།

³ གླེན་པ་ངར་རྒྱལ་ཅན་གྱིས་གཏམ་མང་པོ་མཛོད་པ་དང་། མི་ཤེས་རབ་ལྡན་པའི་གཏམ་གྱིས་ཁོ་རང་ཉིད་ལ་སྲུང་བར་བྱེད་དོ།

⁴ བ་གླང་མེད་པས་རྨོན་པ་རྒྱབ་པས་འབྲུ་ཁང་སྟོངས་པར་འགྱུར། འོན་ཀྱང་རྨོན་པ་རྒྱབ་པར་བ་གླང་ཡོད་པ་ཡིན་ན་འབྲུས་ཁེངས་པར་འགྱུར།

⁵ བློས་འཁེལ་བའིི་དཔང་པོས་རྟག་ཏུ་བདེན་པ་སྨྲ་བར་བྱེད་དོ། འོན་ཀྱང་བློས་མི་འཁེལ་བས་རྫུན་གཏམ་མ་གཏོགས་མི་ཤོད་དོ།

⁶ ངར་རྒྱལ་ཅན་གྱི་མི་དེ་ནམ་ཡང་ཤེས་རབ་ལྡན་པ་མི་ཡོང་། འོན་ཀྱང་ཤེས་རབ་ལྡན་པས་མིས་ལས་སླ་པོར་སྦྱངས་བར་བྱེད་དོ།

⁷ མི་གླེན་པ་ཚོ་ལས་ཐག་རིང་ཙམ་སྡོད་ཅིག་དང་། དེ་ཚོ་ནས་ཁྱོད་ལ་སློབ་སྟོན་བྱ་རྒྱུ་གང་ཡང་མེད་དོ།

⁸ སྐྱེ་བོ་སྤྱང་པོ་ཚོ་ཤེས་རབ་ལྡན་པ་ཅི་ལྟར་བྱུང་བ་ཡིན་ནམ། གང་ལགས་ཟེར་ན། ཁོས་ཅི་བྱད་དགོས་ཤེས་ཀྱི་ཡོད་པ་དང་། སྐྱེ་བོ་གླེན་པ་ཚོ་ཅི་ལ་ལྐུག་པ་བྱུང་བ་ཡིན་ནམ། གང་ལགས་ཟེར་ན། ཁོས་རང་ཉིད་ཤེས་རབ་ཅན་ཡིན་པ་ཁོ་ནར་བསམ་བློ་གཏོང་བར་བྱེད་དོ།

⁹ སྐྱེ་བོ་གླེན་པ་ཚོས་རང་གི་སྡིག་པ་གྱིས་པར་དོ་སྣང་མི་བྱེད་པ་དང་། སྐྱེ་བོ་བཟང་པོ་ཚོས་རང་སྡིག་པར་བཟོད་གསོལ་བྱེད་པར་འདོད་དོ།

¹⁰ ཁྱོད་ཀྱི་དགའ་བ་དེ་རང་ཉིད་ཀྱི་ཡིན་པ་དང་། རང་གི་དཀའ་སྡུག་དེ་ནི་རང་ཉིད་ཀྱི་ཡིན་ནོ། སུས་ཀྱང་དེ་ཚོར་ཁྱོད་དང་བགོས་མི་ཐུབ་བོ།

¹¹ མི་ངན་པའི་ཁང་པ་འཇིག་པའི་རྗེས་སུ། མི་བཟང་པོའི་ཁང་པ་རྟག་ཏུ་གནས་པར་འགྱུར།

¹² ཁྱོད་ཀྱིས་ལམ་དྲང་བདེན་ཡིན་བསམ་པ་དེ་འཆི་བའི་ལམ་ལ་འཁྲིད་སྲིད་དོ།

¹³ གད་མོ་ཤོར་བས་སེམས་སྐྱོ་བ་སྦས་ཐུབ་པ་དང་། འོན་ཀྱང་དགའ་སྐྱིད་རྫོགས་པ་རྗེས་སུ་རྟག་ཏུ་དེར་སྡུག་བསྔལ་ཡོད་དོ།

¹⁴ ངན་པར་འོས་པའི་འབྲས་བུ་དེ་ཐོབ་པར་འགྱུར། མི་བཟང་པོ་ཚོའི་རང་ལས་ཀྱི་བྱ་དགའ་ཐོབ་པར་འགྱུར།

¹⁵ གླེན་པ་ཞིག་གིས་གང་ཡིན་རུང་ཡིད་ཆེས་པ་དང་། བསམ་ཤེས་ཅན་གྱི་མིས་རང་གི་གོམ་བགྲོད་ལ་བརྟག་དཔྱད་བྱེད་དོ།

¹⁶ མི་ཤེས་རབ་ལྡན་པས་དཀའ་སྡུག་ལས་ལོགས་སུ་སྡོད་རྒྱུར་ཟབ་ཟབ་བྱེད་དོ། འོན་ཀྱང་མི་གླེན་པ་དོ་སྣང་མེད་མཁན་ཡིན་པ་དང་། ཤིན་ཏུ་མགྱོགས་པོ་ལས་འགུལ་བྱེད་དོ།

¹⁷ མི་སྣ་ཐུང་དེ་ཚོས་གླེན་པའི་བྱ་བ་བྱས་པ་དང་། མི་ཤེས་རབ་ལྡན་པ་ལྷིང་འཇགས་ངང་བསྡད་དོ།

¹⁸ མི་རྨོངས་པ་ཚོར་དེ་ཚོའི་གླེན་པའི་ལས་ལ་འོས་པ་ཐོབ་པར་འགྱུར་རོ། འོན་ཀྱང་མི་སྤྱང་པོར་ཡོན་ཏན་གྱི་བྱ་དགའ་བྱིན་པར་བྱེད་དོ།

¹⁹ མི་ངན་པ་དྲང་ལྡན་གྱི་མདུན་དུ་ཕྱག་འབུལ་ཞུ་དགོས་པ་དང་། ཉམ་ཆུང་ངང་དེ་ཚོའི་ཐུགས་རྗེ་ཆེད་དུ་ཞུ་འབོད་བྱ་དགོས་སོ།

²⁰ དབུལ་པོར་རང་གི་ཁྱིམ་མཚེས་དང་བཅས་པ་སུས་ཀྱང་མི་དགའ་བ་དང་། འོན་ཀྱང་ཕྱུག་པོར་གྲོགས་པོ་མང་པོ་ཡོད་དོ།

²¹ ཁྱོད་ལ་དགའ་སྐྱིད་འདོད་ན་དབུལ་པོར་སྙིང་རྗེ་བྱེད་དགོས། སུ་ལ་ཡང་བརྙས་བཅོས་བྱ་རྒྱུ་དེ་ནི་སྡིག་པ་ཡིན་ནོ།

²² ཁྱོད་ཀྱིས་བཟང་པོའི་ཆེད་དུ་ལས་ཀ་བྱས་པ་ཡིན་ན་ཁྱོད་ལ་གཞན་གྱི་ཡིད་ཆེས་དང་གུས་ཞབས་ཐོབ་པར་འགྱུར། ཁྱོད་ཀྱིས་ངན་པའི་ཆེད་དུ་ལས་ཀ་བྱེད་བཞིན་ཡོད་ན་ཁྱོད་ཀྱིས་དེ་ནི་ནོར་འཁྲུལ་བྱེད་བཞིན་ཡོད་དོ།

²³ ལས་ཀ་བྱས་ན་འཚོ་བ་སྐལ་ཐུབ་པ་དང་། ཁྱོད་ཀྱི་སྐད་ཆ་ཤོད་བཞིན་བསྡད་པ་ཡིན་ན་དབུལ་པོར་འགྱུར་རོ།

²⁴ མི་ཤེས་རབ་ཅན་ལ་རྒྱུ་ནོར་གྱི་བྱ་དགའ་ཐོབ་པ་དང་། འོན་ཀྱང་ལྐུག་པ་རྣམས་ནི་རང་གི་གླེན་རྟགས་ཀྱིས་ངོས་ཤེས་པར་འགྱུར་རོ།

²⁵ དཔང་པོ་ཞིག་གིས་དྲང་པོ་ཤོད་སྐབས་སྲོག་སྐྱོབ་པར་བྱེད་དོ། འོན་ཀྱང་ཁོས་རྫུན་ཤོད་སྐབས་མི་མང་ལ་བསླུ་བཞིན་ཡོད།

²⁶ གཙོ་བོ་དཀོན་མཆོག་ལ་གུས་ཞབས་ཞུས་པས་མི་ཞིག་དང་། དེའི་ཁྱིམ་ཚང་ལ་བློས་འགེལ་དང་སྲུང་སྐྱོབ་ཐོབ་བོ།

²⁷ ཁྱོད་འཆི་བ་ནས་ཐར་བར་འདོད་དམ། གཙོ་བོ་དཀོན་མཆོག་ལ་གུས་ཞབས་ཞུ་བ་ནི་མི་ཚེའི་ཆུ་མིག་ཡིན་ནོ།

²⁸ རྒྱལ་པོའི་རླབས་ཆེན་ནི་རྒྱལ་པོས་མི་མང་ཇི་ཙམ་ལ་དབང་བསྒྱུར་བྱེད་པར་རག་ལུས་ཡོད་པ་དང་། དེ་ཚོ་མེད་ན་ཁོང་ནི་གང་ཡང་མིན།

²⁹ ཁྱོད་ལྷིང་འཇག་ངང་གནས་པ་ཡིན་ན་ཤེས་རབ་དང་ལྡན་པ་ཡིན་ནོ། འོན་ཀྱང་སྣ་ཐུང་དང་རླུང་ལངས་པོ་ཡོད་པ་ཡིན་ན། ཁྱོད་ནི་གླེན་པ་ཅི་ཙམ་ཡིན་པ་བཏོན་བཞིན་ཡོད་དོ།

³⁰ སེམས་ཀྱི་ཞི་བདེས་གཟུགས་པོ་བདེ་བར་བཟོ་བ་དང་། འོན་ཀྱང་ཕྲག་དོག་གིས་རུས་པ་རུལ་བར་བྱེད་དོ།

³¹ ཁྱོད་ཀྱིས་དབུལ་པོར་མནར་གཅོད་བཏང་བ་ཡིན་ན། ཁྱོད་ཀྱིས་དེ་ཚོ་བཟོ་མཁན་དཀོན་མཆོག་ལ་དམའ་འབེབས་བྱེད་བཞིན་ཡོད་དོ། འོན་ཀྱང་དབུལ་པོར་སྙིང་རྗེ་བྱས་པ་ནི་མཆོད་པའི་བྱ་ཞིག་ཡིན་ནོ།

³² མི་ངན་རང་ཉིད་ཀྱི་བྱ་བ་ངན་པས་རང་ཉིད་རྒུད་པར་བྱེད་དོ། འོན་ཀྱང་མི་བཟང་པོ་རྣམས་དེ་ཚོའི་དྲང་བདེན་གྱི་མཐུས་སྐྱོབ་པར་བྱེད་དོ།

³³ མི་རིགས་པ་ཅན་རྣམས་གིས་བསམ་བློ་ཚང་མར་ཤེས་རབ་ལྡན་པ་ཡོད། འོན་ཀྱང་གླེན་པ་ཞིག་གིས་ཤེས་རབ་ཀྱི་སྐོར་ལ་གང་ཡང་མི་ཤེས་སོ།

³⁴ དྲང་བདེན་གྱིས་རྒྱལ་ཁབ་རླབས་ཆེན་བཟོ་བ་དང་། སྡིག་པ་ནི་རྒྱལ་ཁབ་ཇི་འདྲ་ཞིག་གི་ཀྱང་ཞབས་འདྲེན་ཡིན་ནོ།

³⁵ རྒྱལ་པོ་རྣམས་རང་གི་འབྱོན་སྟངས་ཅན་གྱི་ལས་བྱེད་པ་ཚོ་ལ་མཉེས་པར་འགྱུར་བ་དང་། འོན་ཀྱང་འབྱོན་སྟངས་མེད་མཁན་ཚོ་ལ་ཉེས་ཆད་གཏོང་བར་བྱའོ༎