ལེགས་བཤད 13 - Tibetan Old Testament 2011

¹ བུ་ཤེས་རབ་ཅན་ཞིག་གིས་རང་གི་ཕས་བཅུན་སྐབས་དེ་ལ་དོ་སྣང་བྱེད་དོ། འོན་ཀྱང་ངར་རྒྱལ་ཅན་གྱིས་ནོར་བ་ལ་ནམ་ཡང་ཁས་མི་ལེན་ནོ།

² མི་བཟང་པོས་ཇི་ལྟར་སྨྲས་པར་བྱ་དགའ་ཐོབ་པར་འགྱུར། འོན་ཀྱང་བསླུ་འཁྲིད་ཅན་ཚོ་ནི་དྲག་ལས་བྱེས་པར་ལྟོགས་ནས་བསྡད་དོ།

³ ཁྱོད་ཀྱིས་གང་སྨྲས་པར་ཟབ་ཟབ་གྱིས་ལ་རང་གི་སྲོག་སྐྱོབ་ཅིག གང་བྱུང་སྣང་མེད་སྨྲ་མཁན་གྱིས་རང་ཉིད་འཇིག་པར་བྱེད་དོ།

⁴ སྐྱེ་བོ་ལེ་ལོ་ཅན་ཞིག་གིས་ཇི་ལྟར་འདོད་པར་བྱས་ན་ཡང་། ཁོ་ལ་དེ་ནམ་ཡང་ཐོབ་པར་མི་འགྱུར། ལས་ཀ་ཧུར་པོ་བྱ་མཁན་ཞིག་ལ་ཁོས་འདོད་པ་རྣམས་ཐོབ་པར་འགྱུར།

⁵ སྐྱེ་བོ་དྲང་པོ་ཚོས་རྫུན་ལ་སྡང་བར་བྱེད་དོ། འོན་ཀྱང་སྤྱོད་ངན་གྱི་གཏམ་རྣམས་ངོ་ཚ་དང་ཞབས་འདྲེན་ཡིན་ནོ།

⁶ དྲང་བདེན་གྱིས་ཉེས་མེད་ལ་སྐྱོབ་པར་བྱེད་པ་དང་། ངན་སྤྱོད་གྱིས་སྡིག་ཅན་ཚོ་ལ་ཉམས་རྒུད་གཏོང་ངོ་།

⁷ འགའ་ཤས་ཀྱིས་ཕྱུག་པོ་ཡིན་མདོག་མདོག་བྱས་པ་དང་། འོན་ཀྱང་ཁོ་ལ་གང་ཡང་མེད་དོ། གཞན་ཚོས་དབུལ་པོ་ཡིན་མདོག་མདོག་བྱས་པ་དང་། འོན་ཀྱང་ཁོ་ལ་རྒྱུ་ནོར་ཁྱོན་ཆེ་ཡོད་དོ།

⁸ མི་ཕྱུག་པོ་ཞིག་གིས་རང་གི་སྲོག་སྐྱོབ་པའི་ཆེད་དུ་ནོར་ལ་བེད་སྤྱོད་བྱེད་དགོས། འོན་ཀྱང་སྐྱེ་བོ་དབུལ་པོ་ཞིག་ལ་སུས་ཀྱང་འཇིགས་སྣང་མི་བསྐུལ་ལོ།

⁹ དྲང་བདེན་ནི་ཤིན་ཏུ་འཚེར་བའི་འོད་གསལ་པོ་ལྟར་ཡིན། མི་ངན་ནི་འཆི་གྲབ་ཡོད་པའི་ཞུ་མ་ལྟ་བུ་ཡིན།

¹⁰ ངར་རྒྱལ་ཅན་གྱི་དཀའ་སྡུག་མ་གཏོག་གང་ཡང་མི་བཟོའོ། བསླབ་བྱ་ལེན་པ་ནི་ཤེས་རབ་དང་ལྡན་པ་ཡིན་ནོ།

¹¹ ལས་སླ་པོར་ཐོབ་པའི་ནོར་རྣམས་མགྱོགས་པོར་བརླག་པར་བྱེད་དོ། དཀའ་ལས་རྒྱབ་ནས་བསགས་པའི་ནོར་དེ་ད་དུང་འཕེལ་བར་བྱེད་དོ།

¹² རེ་བ་མེད་པར་འགྲོ་སྐབས་སེམས་ཀྱང་མེད་པར་འགྲོའོ། འོན་ཀྱང་བསམ་དོན་འགྲུབ་པས་ཁྱོད་ལ་དགའ་བ་བཀང་བར་བྱའོ།

¹³ ཁྱོད་ཀྱིས་བསླབ་བྱ་བཟང་པོར་ངོས་ལེན་མ་བྱས་པ་ཡིན་། ཁྱོད་གྱིས་དཀའ་སྡུག་འབོད་བཞིན་ཡོད་དོ། བསླབ་བྱའིི་རྗེས་སུ་འཇུག་ན་ཁྱོད་བདེ་བར་གནས་ཡོང་།

¹⁴ ཤེས་རབ་ཅན་གྱིི་བསློབ་སྟོན་དེ་སྲོག་གི་ཆུ་མིག་ལྟ་བུ་ཡིན་པ་དང་། ཁྱོད་ཀྱི་སྲོག་ལ་ཉེན་ཁ་ཡོད་སྐབས་དེས་ཁྱོད་ལ་སྲོག་ཐར་བར་བྱ་རྒྱུར་རོགས་བྱེད་དོ།

¹⁵ ཤེས་རབ་ལ་གུས་ཞབས་ཐོབ་པ་དང་། འོན་ཀྱང་བློས་འགེལ་བྱེད་མི་འོས་པ་རྣམས་ནི་འཇིགས་པའི་ལམ་དུ་ཡོད་དོ།

¹⁶ བསམ་ཤེས་ཡོད་པའི་སྐྱེ་བོ་ཚོས་ལས་བྱེད་པའི་སྔོན་དུ་རྟག་ཏུ་བསམ་བློ་གཏོང་བར་བྱའོ། འོན་ཀྱང་སྐྱེ་བོ་གླེན་པ་ཚོས་རང་ཉིད་ཀྱི་རྨོངས་པ་ཁྱབ་སྒྲགས་བྱེད་དོ།

¹⁷ ཡིད་བརྟན་མེད་པའི་བང་ཆེན་གྱིས་དཀའ་སྡུག་བཟོ་བར་བྱེད་པ་དང་། བློས་འགེལ་འོས་པ་ཚོས་ཞི་བདེ་བྱིན་པར་བྱེད་དོ།

¹⁸ མི་སྦྱངས་པར་མི་འདོད་མཁན་ཚོ་ནི་དབུལ་པོ་དང་ཞབས་འདྲེན་དུ་འགྱུར་བཅུན་པར་ཉན་མཁན་ཚོ་ལ་གུས་ཞབས་རྙེད་དོ།

¹⁹ ཁྱོད་ཀྱི་བསམ་དོན་འགྲུབ་པ་དེ་ཧ་ཅང་ལེགས་པོ་ཡིན་ཀྱང་། སྐྱེ་བོ་གླེན་པ་ཚོས་ངན་པ་སྤོངས་རྒྱུར་ངོས་ལེན་མི་བྱེད་དོ།

²⁰ ཁྱོད་ཤོས་རབ་དང་ལྡན་པ་མཉམ་དུ་བསྡད་པ་ཡིན་ན། ཁྱོད་ཀྱང་ཤེས་རབ་དང་ལྡན་པར་འགྱུར་རོ། གླེན་པ་དང་མཉམ་དུ་གྲོགས་པོ་བྱས་པ་ཡིན་ན་ཁྱོད་འཇིགས་པར་འགྱུར་རོ།

²¹ དཀའ་སྡུག་ནི་སྡིག་ཅན་ཚོའི་རྗེས་སུ་གང་སར་རྒྱུགས་པ་དང་། འོན་ཀྱང་སྐྱེ་བོ་དྲང་ལྡན་ཚོར་དངོས་པོ་བཟང་པོའི་གསོལ་རས་ཐོབ་བོ།

²² མི་བཟང་པོ་ཞིག་ལ་རང་གི་ཚ་བོ་ཚ་མོ་འཇོག་པའི་རྒྱུ་ནོར་ཡོད་པ་དང་། འོན་ཀྱང་སྡིག་ཅན་གྱི་རྒྱུ་ནོར་དེ་མི་དྲང་ལྡན་ཚོ་ལ་ཐོབ་པར་འགྱུར་རོ།

²³ བེད་སྤྱོད་མ་བྱས་པའི་ས་ཞིང་ནས་དབུལ་པོའི་ཆེད་དུ་ཁ་ཟས་དཔག་མེད་ཐོབ་པ་དང་། འོན་ཀྱང་མནར་གཅོད་ཅན་གྱི་མི་ཚོས་དེ་ལ་ས་བོན་འདེབས་རྒྱུ་བཤོལ་བར་བྱེད་དོ།

²⁴ ཁྱོད་ཀྱིས་རང་གི་བུ་ལ་སྒྲིག་ལམ་གྱི་མ་བཅུན་པ་ཡིན་ན། ཁྱོད་ཀྱིས་ཁོ་ལ་བརྩེ་བ་མི་བྱེད་དོ། ཁྱོད་ཀྱིས་ཁོ་ལ་བརྩེ་བ་བྱེད་བཞིན་ཡོད་ན་ཁྱོད་ཀྱིས་ཁོ་ལ་བཅུན་པར་བྱེད་དོ།

²⁵ དྲང་བདེན་ལ་ཟ་རྒྱུ་ལྡང་བ་ཡོད་དོ། འོན་ཀྱང་མི་ངན་རྣམས་རྟག་ཏུ་ལྟོགས་པར་འགྱུར་རོ༎