ལེགས་བཤད 12 - Tibetan Old Testament 2011

¹ ཡོན་ཏན་ལ་དགའ་མཁན་དེ་ཚོར་ནོར་འཁྲུལ་སྟོན་པ་དེ་འདོད་དོ། བཅུན་པ་ལ་མི་དགའ་བ་དེ་གླེན་པ་ཡིན་ནོ།

² གཙོ་བོ་དཀོན་མཆོག་ནི་སྐྱེ་བོ་བཟང་པོ་ཚོ་ལ་མཉེས་པ་དང་། འཆར་གཞི་ངན་པ་གཏིང་མཁན་ལ་ཁྲིམས་གཅོད་མཛད་དོ།

³ ངན་སྤྱོད་ལ་སྲུང་སྐྱོབ་མེད་དོ། འོན་ཀྱང་མི་དྲང་ལྡན་ཚོ་ནི་བརྟན་པོར་ལངས་བར་བྱེད་དོ།

⁴ ཆུང་མ་བཟང་པོ་ཞིག་ནི་མོའི་ཁྱོད་གའི་སྤོབས་པ་དང་དགའ་བ་ཡིན་ནོ། འོན་ཀྱང་བུད་མེད་རང་གི་ཁྱོ་ལ་ངོ་ཚ་བཟོ་མཁན་དེ་ཁོའི་རུས་པ་རུལ་བ་ལྟ་བུ་ཡིན་ནོ།

⁵ མི་དྲང་པོ་ཚོས་ཁྱོད་ལ་ཚུལ་བཞིན་དུ་སྐྱོང་བ་དང་། མི་ངན་གྱིས་ཁྱོད་ལ་བསླུ་འཁྲིད་ཁོ་ན་བྱེད་དོ།

⁶ མི་ངན་ཚོས་སྲོག་གཅོད་ཀྱི་གཏམ་སྨྲའོ། འོན་ཀྱང་དྲང་ལྡན་ཚོའི་གཏམ་གྱི་འཇིག་བསྐུལ་དེ་དེ་ཚོ་སྐྱོབ་པར་བྱེད་དོ།

⁷ མི་ངན་ཚོར་ཉམས་རྒུད་ཕོབ་པ་དང་། དེ་ཚོའི་རིགས་རྒྱུད་ལྷག་པར་མི་འགྱུར། འོན་ཀྱང་དྲང་ལྡན་གྱི་ཁྱིམ་ཚང་ཚོ་འཚོ་བར་འགྱུར།

⁸ ཁྱོད་ཤེས་རབ་དང་ལྡན་པ་ཡིན་ན་ཁྱོད་ལ་བསྟོད་པ་ཐོབ་པར་འགྱུར། ཁྱོད་གླེན་པ་ཡིན་ན་མི་མང་གིས་སྨད་པར་འགྱུར།

⁹ མི་ཆེན་པོའི་ཆ་ལུགས་བྱེད་བཞིན་གྲོད་པ་ལྟོགས་པར་བསྡད་པ་ལས། མི་སྐྱུས་མས་རང་གི་འཚོ་བའི་ལས་དོན་བྱས་པ་ནི་ལེགས་པ་ཡིན་ནོ།

¹⁰ མི་བཟང་པོ་ཞིག་གིས་རང་གི་སེམས་ཅན་ཚོ་ལ་བལྟ་རྟོགས་ཡག་པོ་བྱེད་དོ། འོན་ཀྱང་སྤྱོད་ངན་གྱིས་དེ་ཚོ་ལ་སྡུག་རྩུབ་གཏོང་ངོ་།

¹¹ ལས་ཀ་ཧུར་པོ་བྱ་མཁན་གྱི་ཞིང་པ་ཚོ་ལ་ཟ་རྒྱུ་མང་པོ་ཡོད་དོ། འོན་ཀྱང་ཕན་མེད་ཀྱི་འཆར་གཞི་ལ་དུས་ཚོད་ཆུ་ཟོས་གཏོང་མཁན་དེ་ནི་གླེན་པ་ཡིན་ནོ།

¹² མི་ངན་ཚོས་ངན་ལས་བྱ་རྒྱུ་འཚོལ་བཞིན་འགྲོ་བ་དང་། འོན་ཀྱང་དྲང་བདེན་རྣམས་བརྟེན་པོ་ལངས་བར་བྱེད་དོ།

¹³ མི་ངན་ཞིག་རང་གི་གཏམ་གྱིས་རྙིད་ནང་ཚུད་པར་བྱེད་དོ། འོན་ཀྱང་མི་དྲང་པོ་ཞིག་གིས་རང་ཉིད་དཀའ་སྡུག་ལས་གྲོལ་བར་བྱེད་དོ།

¹⁴ ཁྱོད་ཀྱི་རྔན་པ་ནི་ཁྱོད་ཀྱི་ཅི་བཤད་པ་དང་ཅི་བྱས་པར་རག་ལུས་ཡོད་པ་དང་། ཁྱོད་ལ་ག་རེ་འོས་པ་དེ་ཐོབ་པར་འགྱུར།

¹⁵ གླེན་པ་ཚོས་རང་ཉིད་རྟག་ཏུ་བདེན་པ་ཡིན་བསམ་པ་དང་། སྐྱེ་བོ་ཤེས་རབ་ལྡན་པ་ཚོས་བསླབ་བྱར་ཉན་པར་བྱེད་དོ།

¹⁶ གླེན་པ་ཞིག་ཁོང་ཁྲོད་ལངས་པ་ཡིན་ན། ཁོས་དེ་མགྱོགས་པོར་ཤེས་པར་བྱེད་དོ། བསམ་ཤེས་ཡོད་པའི་སྐྱེ་བོ་ཚོས་དམའ་འབེབས་ལ་བརྩི་མེད་བྱེད་དོ།

¹⁷ ཁྱོད་ཀྱིས་བདེན་པ་ཤོད་སྐབས་དྲང་པོ་བྱས་པ་ཡིན་པ་དང་། འོན་ཀྱང་རྫུན་གྱིས་དྲང་པོ་མིན་པར་འཁྲིད་པར་བྱེད་དོ།

¹⁸ བསམ་ཤེས་མེད་པའི་གཏམ་གྱིས་རལ་གྲི་ལྟར་གཏིང་རིང་པོ་རྨས་པར་བྱེད་དོ། འོན་ཀྱང་ཤེས་རབ་ལྡན་པའི་སྨྲས་པའི་གཏམ་གྱིས་གསོ་བར་བྱེད་དོ།

¹⁹ རྫུན་ཤོད་མཁན་ཞིག་ལ་མི་ཚེ་ཐུང་ཐུང་ལས་མེད་པ་དང་། འོན་ཀྱང་བདེན་པ་ཤོད་མཁན་དེ་གཏན་དུ་གནས་པར་འགྱུར།

²⁰ འཆར་གཞི་ངན་པ་གཏིང་གཁན་དེ་ནི་རྐྱེན་ངན་ནང་ཚུད་པ་དང་འདྲའོ། འོན་ཀྱང་བཟང་པོའི་ཆེད་དུ་ལས་བྱེད་མཁན་ཚོ་ལ་དགའ་སྐྱིད་ཐོབ་བོ།

²¹ དྲང་ལྡན་གྱི་སྐྱེ་བོ་ཚོ་ལ་རྐྱེན་ངན་གང་ཡང་མི་ཡོང་། འོན་ཀྱང་སྤྱོད་ངན་ལ་དཀའ་སྡུག་མ་གཏོགས་གང་ཡང་མི་ཡོང་།

²² གཙོ་བོ་དཀོན་མཆོག་ནི་རྫུན་ཤད་མཁན་ལ་སྡང་བར་མཛད་པ་དང་། རང་གི་གཏན་དྲང་པོ་སྨྲ་མཁན་ཚོ་ལ་ཐུགས་དགྱེས་པར་འགྱུར།

²³ བསམ་ཤེས་ཡོད་པའི་སྐྱེ་བོ་ཚོས་རང་གི་ཤེས་པའི་སྐོར་ལ་བསྟོད་པར་མི་བྱེད་དོ། འོན་ཀྱང་སྐྱེ་བོ་གླེན་པ་ཚོས་རང་གི་རྨོངས་པ་ཁྱབ་སྒྲགས་བྱེད་དོ།

²⁴ བརྩོན་འགྲུས་ཀྱིས་ཁྱོད་ལ་འགོ་ཁྲིད་བཟོ་བ་དང་། ལེ་ལོས་ཁྱོད་ལ་ཚེ་གཡོགས་བཟོ་བར་བྱེད་དོ།

²⁵ སེམས་འཁྲལ་གྱིས་ཁྱོད་ཀྱི་དགའ་སྐྱིད་བཅོམ་པར་བྱེད་དོ། འོན་ཀྱང་བྱམས་བརྩེའི་གཏམ་གྱིས་དགའ་སྤྲོ་འཕེལ་ལོ།

²⁶ སྐྱེ་བོ་དྲང་ལྡན་ནི་རང་གི་གྲོགས་པོའི་ལམ་སྟོན་ཡིན། འོན་ཀྱང་སྤྱོད་ངན་གྱིས་ལམ་ལོག་ཏུ་འཁྲིད་དོ།

²⁷ ཁྱོད་ལེ་ལོ་ཅན་ཡིན་ན་ཁྱོད་ཀྱིས་དགོས་པ་དེ་མི་ཐོབ། འོན་ཀྱང་ཁྱོད་རང་ལས་ཀ་ཧུར་པོ་བྱེད་པ་ཡིན་ན་རྒྱུད་དངོས་མང་པོ་ཐོབ་པར་འགྱུར་རོ།

²⁸ དྲང་ལྡན་ནི་སྲོག་གི་ལམ་ཡིན་པ་དང་། སྤྱོད་ངན་ནི་འཆི་བའི་ལམ་ཡིན་ནོ༎