གྲངས་ཀ 8 - Tibetan Old Testament 2011

མར་མེ་སྒྲིག་པ།

¹ གཙོ་བོ་དཀོན་མཆོག་གིས་མོ་ཤེ་ལ་གསུངས་པ།

² མར་མེ་བདུན་པོ་དེ་སྟེགས་བུའི་སྟེང་དུ་བཞག་སྐབས་མར་མེའི་འོད་དེ་མདུན་ཕྱོགས་སུ་འཕྲོ་བར་བྱེད་དེ་སྒྲིག་དགོས་ཤེས་ཨ་རོན་ལ་སྨྲོས་ཤིག

³ ཨ་རོན་གྱིས་དེ་བཞིན་བྱས་ཏེ་མར་མེ་རྣམས་མདུན་ཕྱོགས་སུ་ལྟ་བར་སྒྲིགས་སོ།

⁴ སྔར་གཙོ་བོ་དཀོན་མཆོག་གིས་མོ་ཤེ་ལ་བསྟན་གནང་མཛད་པའི་དཔེ་བཞིན་མཆོད་བཀོང་དེ་དག་ནི་མགོ་ནས་གཞུག་པར་གསེར་ལྗང་རྡུང་གིས་བཟོས་ཡོད་པ་ཡིན་ནོ༎

ལེ་ཝི་པ་རྣམས་ལ་དག་འབྱངས་དང་རབས་གནས།

⁵ གཙོ་བོ་དཀོན་མཆོག་གིས་མོ་ཤེ་ལ་གསུངས་པ།

⁶ ལེ་ཝི་པ་རྣམས་ལ་ཨིསི་རཱཨེལ་མི་དམངས་བྱིངས་ནས་ལོགས་སུ་དབྱེ་ནས།

⁷ གཤམ་གསལ་ལྟར་དག་འབྱངས་བྱེད་དགོས། དག་འབྱངས་བྱེད་པའི་ཁྲུས་ཆུ་དེ་དེ་ཚོའི་སྟེང་དུ་གཏོར་ཏེ། ལུས་ཀྱི་བ་སྤུ་ཚང་མ་བཞར་ཞིང་། གྱོན་གོས་རྣམས་འཁྲུ་བཅུག་པའི་རྗེས་སུ་དེ་དག་ཆོ་ག་ལྟར་གཙང་བར་འགྱུར་རྒྱུ་ཡིན།

⁸ དེ་རྗེས་དེ་ཚོས་བེའུ་ཕོ་ཞིག་དང་ཁ་སྐྱུར་པོའི་སྣུམ་གྱི་ནང་རྫིས་པའི་གྲོ་ཞིབ་དང་བཅས་འབྲུའི་མཆོད་འབུལ་བྱེད་དགོས་པ་དང། ཁྱོད་ཀྱིས་སྡིག་སེལ་གྱི་མཆོད་པའི་ཕྱིར་དུ་གླང་གཞན་ཞིག་འཁྲིད་ཡོང་དགོས།

⁹ དེ་རྗེས་ཨིསི་རཱཨེལ་གྱི་མི་སྡེ་ཡོངས་རྫོགས་འདུ་འཛོམས་བྱས་ཏེ། ལེ་ཝི་པ་རྣམས་ལ་ང་གནས་པའི་དབུ་གུར་དམ་པའི་མདུན་དུ་ལངས་བཅུག་དགོས།

¹⁰ དེ་ནས་ཨིསི་རཱཨེལ་མི་དམངས་རྣམས་ཀྱིས་ལེ་ཝི་པ་ཚོའི་མགོའི་སྟེང་དུ་ལག་པ་བཞག་ཅིང་།

¹¹ ཨིསི་རཱཨེལ་མི་མང་གི་ཕྱོགས་ནས་དམིགས་བསལ་གྱི་འབུལ་བའི་ཚུལ་དུ་ལེ་ཝི་པ་རྣམས་ཨ་རོན་གྱིས་ང་ལ་འབུལ་བའི་ཆེད་དུ་དེ་ཚོར་རབ་གནས་བྱེད་དགོས། དེ་བས་ན་དེ་ཚོས་ངའི་ཞབས་ཏོག་ཞུ་ཡོང།

¹² དེ་ནས་ལེ་ཝི་པ་རྣམས་ཀྱིས་གླང་གཉིས་ཀྱི་མགོའི་སྟེང་དུ་ལག་པ་བཞག་དགོས་ཤིང་། གླང་གཅིག་ནི་སྡིག་སེལ་གྱི་མཆོད་འབུལ་དང་། གཞན་དེ་སྦྱིན་སྲེག་གི་མཆོད་པར་འབུལ་དགོས་པར་ཡིན་ཏེ། གོང་གསལ་མཆོད་འབུལ་དེ་དག་ནི་ལེ་ཝི་པ་རྣམས་ཀྱི་དག་འབྱངས་ཀྱི་ཆོ་ག་སྒྲུབ་པའི་ཆེད་དུ་འབུལ་དགོས་པ་ཡིན་ནོ།

¹³ ལེ་ཝི་རྣམས་ལ་དམིགས་བསལ་གྱི་འབུལ་བའི་ཚུལ་དུ་ང་ལ་རབ་གནས་བྱེད་དགོས་ཤིང་། ཨ་རོན་དང་ཁོའི་བུ་རྣམས་དེ་ཚོའི་འགོ་བྱེད་དུ་བསྐོ་གཞག་བྱེད་དགོས།

¹⁴ དེ་བཞིན་ལེ་ཝི་པ་རྣམས་ཨིསི་རཱ་ཨེལ་པ་བྱིངས་ལས་ལོགས་སུ་དབྱེ་དགོས་པ་ནི་དེ་དག་ངའི་ཁོངས་སུ་གཏོགས་པར་འགྱུར་བས་ཕྱིར་རོ།

¹⁵ ཁྱོད་ཀྱིས་ལེ་ཝི་པ་རྣམས་ལ་དག་འབྱངས་དང་རབ་གནས་བྱས་པའི་རྗེས་སུ་དེ་དག་དབུ་གུར་དམ་པའི་ནང་དུ་ཞབས་ཏོག་ཞུ་འོས་པར་འགྱུར་རྒྱུ་ཡིན་པ་དང་།

¹⁶ ངས་དེ་དག་ལ་ཨིསི་རཱཨེལ་པའི་བུ་སྔོན་སྐྱེས་རྣམས་ཀྱི་ཚབ་ཏུ་བླངས་པ་ཡིན་པས་དེ་དག་ནི་ང་རང་འབའ་ཞིག་གི་ཁོངས་སུ་གཏོགས་དགོས་པ་ཡིན།

¹⁷ སྔར་ངས་ཨི་ཇིབ་པའི་བུ་སྔོན་སྐྱེས་དང་སེམས་ཅན་སྔོན་སྐྱེས་རྣམས་བསད་སྐབས། ཨིསི་རཱཨེལ་པའི་ནང་མི་རེ་རེའི་བུ་སྔོན་སྐྱེས་དང་སེམས་ཅན་སྔོན་སྐྱེས་ཚང་མ་ངས་རང་གི་དོན་དུ་རབ་གནས་བྱས་པ་ཡིན་མོད།

¹⁸ ཨིསི་རཱཨེལ་པའི་བུ་སྔོན་སྐྱེས་ཚང་མའི་ཚབ་ཏུ་ད་ངས་ལེ་ཝི་པ་རྣམས་བླངས་ཤིང་ཡོད།

¹⁹ ཨིསི་རཱཨེལ་མི་མང་གི་ཕྱོགས་ནས་དམིགས་བསལ་གྱི་འབུལ་བའི་ཚུལ་དུ་ཕུལ་བའི་ལེ་ཝི་པ་དེ་དག་ངས་ཨ་རོན་དང་དེའི་བུ་རྣམས་ལ་རྩིས་སྤྲོད་བྱེད་རྒྱུ་དང་། དེ་དག་གིས་ཨིསི་རཱཨེལ་མི་དམངས་ཀྱི་ཕྱིར་དུ་དབུ་གུར་དམ་པའི་ནང་དུ་ཞབས་ཏོག་ཞུ་རྒྱུ་དང་། ས་གནས་དམ་པའི་ཉེ་འགྲམ་དུ་ཡོང་བའི་ཉེས་ཆེད་དུ་ཨིསི་རཱཨེལ་པ་ཚོར་རྐྱེན་ངན་སོགས་ལས་སྐྱབས་པར་འགྱུར།

²⁰ དེར་བརྟེན་མོ་ཤེ་དང་། ཨ་རོན་དང་ཨིསི་རཱཨེལ་མི་མང་ཚང་མས་གཙོ་བོ་དཀོན་མཆོག་གིས་མོ་ཤེ་ལ་བཀའ་བསྒོས་གནང་བ་བཞིན། ལེ་ཝི་པ་རྣམས་ལ་རབ་གནས་བྱས་སོ།

²¹ ལེ་ཝི་པ་ཚོས་རང་ཉིད་དག་འབྱངས་བྱས་ཏེ་གྱོན་གོས་རྣམས་འཁྲུ་བའི་རྗེས་སུ་ཨ་རོན་གྱིས་དེ་དག་ལ་དམིགས་བསལ་གྱི་འབུལ་བའི་ཚུལ་དུ་གཙོ་བོ་དཀོན་མཆོག་གི་སྤྱན་སྔར་རབ་གནས་བྱས་པ་དང་། ཨ་རོན་གྱིས་དེ་ཚོ་ཆེད་དུ་དག་བྱངས་ཀྱི་ཆོ་ག་ཡང་སྒྲུབ་སོ།

²² ལེ་ཝི་པ་རྣམས་ཀྱི་སྐོར་ལ་གཙོ་བོ་དཀོན་མཆོག་གིས་མོ་ཤེ་ལ་བཀའ་བསྒོས་གང་གནང་བ་བཞིན། ཨིསི་རཱཨེལ་པ་ཚོས་དེ་བཞིན་ཆ་ཚང་སྒྲུབ་པ་ཡིན་ནོ། དེར་བརྟེན་ཨ་རོན་དང་ཁོའི་བུ་རྣམས་ཀྱི་འགོ་འཁྲིད་འོག་ཏུ་ལེ་ཝི་པ་རྣམས་དབུ་གུར་དམ་པའི་ནང་དུ་ཞབས་ཏོག་ཞུ་འོས་པར་འགྱུར་བ་ཡིན་ནོ།

²³ གཙོ་བོ་དཀོན་མཆོག་གིས་མོ་ཤེ་ལ་གསུངས་པ།

²⁴ རང་ལོ་གཉེར་ལྔ་ལོན་སྐབས་སུ་ལེ་ཝི་པ་རེ་རེས་ང་གནས་པའི་དབུ་གུར་དམ་པའི་ནང་དུ་ཞབས་ཏོག་ཞུ་དགོས་ཤིང་།

²⁵ རང་ལོ་ལྔ་བཅུ་ལོན་པ་དང་ཁོས་ཞབས་ཏོག་ཞུ་བའི་ལས་འགན་དེ་ལས་དགོངས་པ་ཞུ་དགོས།

²⁶ དེ་རྗེས་ཁོས་ལེ་ཝི་རོག་པ་རྣམས་ལ་དབུ་གུར་དམ་པའི་ནང་གི་ཞབས་ཏོག་ཞུ་ཆོག་སྐོར་ལ་རོགས་རམ་བྱེད་ཆོག འོན་ཀྱང་ཁོ་རང་གི་ཞབས་ཏོག་གང་ཡང་ཞུ་མི་ཆོག་པ་ཡིན་ནོ། གོང་གསལ་ལྟར་ཁྱོད་ཀྱིས་ལེ་ཝི་པ་རྣམས་ལ་ལས་འགན་ཆ་བགོས་ཀྱི་གོ་སྒྲིགས་བྱེད་དགོས་སོ༎