གྲངས་ཀ 31 - Tibetan Old Testament 2011

མིད་ཡན་པ་ཚོའི་ཐོག་ཏུ་རྒྱལ་ཁ།

¹ དེ་ནས་གཙོ་བོ་དཀོན་མཆོག་གིས་མོ་ཤེ་ལ།

² མི་དི་ཡན་པ་ཚོས་ཨིསི་རཱཨེལ་པ་རྣམས་ལ་གང་བྱས་པའི་ཉེས་ལན་དུ་དེ་ཚོར་ཆད་པ་གཏོང་དགོས། ཁྱོད་ཀྱིས་དེ་ལྟར་བྱས་ཟིན་པའི་རྗེས་སུ་རང་ཉིད་འཆི་བར་འགྱུར་ཞེས་གསུངས་པ་དང་།

³ མོ་ཤེས་མི་ཚོགས་ལ། ད་ཁྱོད་ཚོ་མིད་ཡན་པ་རྣམས་ལ་འཐབ་རྒོལ་བྱེད་ཕྱིར་དམག་གི་གྲ་སྒྲིགས་བྱེད་དགོས། དེ་ཚོས་གཙོ་བོ་དཀོན་མཆོག་ལ་གང་ཞུས་པ་དེར་ཉེས་ཆད་གཏོང་དགོས།

⁴ ད་དམག་གི་ཆེད་དུ་ཨིསི་རཱཨེལ་པའི་སྡེ་རིགས་རེ་ནས་སྐྱེས་པ་རྣམས་ ༡,༠༠༠ གཏོང་དགོས་ཅེས་སྨྲས་པ་ཡིན།

⁵ དེར་བརྟེན་སྡེ་རིགས་རེ་རེ་ནས་སྐྱེས་པ་ཆིག་སྟོང་རེ་འདེམས་བསྒྲུགས་ཀྱིས། ཁྱོན་བསྡོམས་མི་ ༡༢,༠༠༠ དམག་གི་ཆེད་དུ་གྲ་སྒྲིགས་བྱུང་ངོ་།

⁶ མོ་ཤེས་དེ་ཚོར་བླ་མ་ཨེ་ལི་ཛར་གྱི་བུ་ཕི་ནེ་ཧསེ་ཀྱི་འགོ་ཁྲིད་འོག་ཏུ་དམག་སར་བཏང་ངོ་། ཕིན་ཧསི་ནི་དམ་པའི་དངོས་ཆས་རྣམས་དང་ཟོན་བརྡ་གཏོང་ཕྱིར་འབུད་པའི་དུང་རྣམས་ཀྱི་དོ་དམ་པར་འཁོད་པའི་བླ་མ་དེ་ཡིན་ནོ།

⁷ གཙོ་བོ་དཀོན་མཆོག་གིས་མོ་ཤེ་ལ་བཀའ་གང་གནང་བ་བཞིན། དེ་ཚོས་མིད་ཡན་པ་རྣམས་ལ་འཐབ་རྒོལ་བྱས་ནས། དེ་ཚོའི་སྐྱེས་པ་ཚང་མ་བསད་དོ།

⁸ དེ་ཚོས་ཨེ་ཝི་དང་། རེ་ཀེམ། ཛུར། ཧུར། རེ་བྷ་བཅས་མིད་ཡན་པའི་རྒྱལ་པོ་ལྔ་བཙས་བསད་དོ། བྷི་ཨོར་གྱི་བུ་བྷ་ལམ་ཡང་བསད་དོ།

⁹ ཨིསི་རཱཨེལ་པ་རྣམས་ཀྱི་མིད་ཡན་པའི་བུད་མེད་དང་བུ་ཕྲུག་དང་། དེ་ཚོའི་ཟོག་སེམས་ཅན་ཚང་མར་བདག་བཟུང་བྱས་པ་དང་། དེ་ཚོའི་རྒྱུ་དངོས་ཚང་མ་བཅོམ་པས་མ་ཟད།

¹⁰ དེ་ཚོའི་གྲོང་ཁྱེར་དང་སྒར་ས་ཚང་མ་མེར་སྲེག་བཏང་ནས།

¹¹ དེ་ཚོས་བཅོམ་པའི་དངོས་པོ་དང་། བཙོན་པ་དང་སེམས་ཅན་དང་བཅས་པ།

¹² མོ་ཤེ་དང་། ཨེ་ལི་ཛར་དང་ཨིསི་རཱཨེལ་མི་སྡེ་ཡོངས་ཀྱི་མདུན་དུ་འཁྲིད་ཡོང་ངོ་། སྐབས་དེར་དེ་ཚོ་ཡེ་རི་ཀོ་ནས་ཡོར་དན་གྱི་ཕར་ཕྱོགས་སུ་མོ་ཨབ་ཀྱི་ཐང་དུ་སྒར་ས་བརྒྱབ་ནས་བསྡད་ཡོད་དོ༎

དམག་མི་རྣམས་ཕྱིར་ལོག་བྱེད་པ།

¹³ མོ་ཤེ། ཨེ་ལི་ཛར་དང་མི་སྡེ་ཡོངས་ཀྱི་འགོ་དཔོན་རྣམས་སྒར་ས་ནས་ཕྱིར་ཐོན་ཏེ། དམག་མི་རྣམས་དང་ཐུག་འཕྲད་བྱེད་པར་ཡོང་ངོ་།

¹⁴ དམག་ས་ནས་ཕྱིར་ལོག་བྱས་པའི་བརྒྱ་དཔོན་དང་སྟོང་དཔོན་རྣམས་ལ་མོ་ཤེ་ཁྲོས་ཤིང་།

¹⁵ ཁོས་དེ་ཚོར་འདྲི་རྩད་བྱས་པ། ཁྱོད་ཚོས་བུད་མེད་ཚང་མ་གསོན་པོར་བཞག་པ་དེ་ག་རེ་ཡིན་ནམ།

¹⁶ བྷ་ལམ་གྱི་སློབ་སྟོན་རྗེས་སུ་འབྲངས་མཁན་དང་། པེ་ཨོར་དུ་གཅོ་བོ་དཀོན་མཆོག་ལ་དད་ལོག་ཞུ་བཅུག་མཁན་དེ་དག་བུད་མེད་རང་ཡིན་པ་དེ་དྲན་གསོ་བྱོས་ཤིག དེའི་རྐྱེན་གྱིས་གཙོ་བོ་དཀོན་མཆོག་གི་མི་སྡེའི་ཁྲོད་དུ་ནད་ཡམས་ཞིག་འཕེལ་བ་ཡིན་པས།

¹⁷ ཆགས་པ་བྱས་ཟིན་པའི་བུ་དང་བུད་མེད་ཚང་མ་གསོད་དགོས།

¹⁸ འོན་ཀྱང་བུ་མོ་ན་གཞོན་རྣམས་དང་ད་བར་སྐྱེས་པ་དང་ལུས་འབྲེལ་བྱས་མེད་པའི་བུད་མེད་རྣམས་རང་གི་ཕྱིར་གསོན་པོར་ཞོག་ཅིག

¹⁹ ད་ཁྱོད་ཚོ་སུ་ཞིག་གིས་མི་བསད་པའམ་རོ་ལ་རེགས་འཆང་བྱས་ཡོད་པ་ཡིན་ན། ཉིན་ཞག་བདུན་བར་དུ་སྒར་སའི་ཕྱི་རོལ་དུ་སྡོད་དགོས་པ་དང་། ཉིན་ཞག་གསུམ་པ་དང་བདུན་པའི་ཉིན་མོར་ཁྱོད་ཚོས་རང་ཉིད་དང་རང་གིས་འཛིན་བཟུང་བྱས་པའི་བུད་མེད་རྣམས་གཙང་མ་བྱེད་ཕྱིར་དག་འབྱངས་ཀྱི་ཆོ་ག་བཤམས་དགོས།

²⁰ གྱོན་གོས་ཀྱི་རིགས་ཚང་མ་དང་པགས་པ་དང་། ར་སྤུའམ་ཤིང་ལས་བཟོས་པའི་དངོས་རིགས་ཚང་མ་གཙང་བར་བྱེད་ཕྱིར་དག་འབྱངས་བྱེད་དགོས།

²¹ བླ་མ་ཨེ་ལི་ཛར་གྱིས་དམག་ནས་ཕྱིར་ལོག་ཡོང་བའི་སྐྱེས་པ་རྣམས་ལ། གཙོ་བོ་དཀོན་མཆོག་གིས་མོ་ཤེ་ལ་གནང་བའི་བཀའ་ཁྲིམས་རྣམས་གཤམ་གསལ་ལྟར་ཡིན་ནོ།

^22-23 མེས་འཚིགས་མ་ཐུབ་པའི་དངོས་རིགས་གསེར་དང་། དངུལ། ལི། ལྕགས། ལྕགས་ཀྲིན་དང་ཞ་ཉེ་ལ་སོགས་པ་རྣམས་མེའི་ནང་དུ་བླུགས་ནས་དག་འབྱངས་བྱེད་དགོས་པ་དང་། དེ་མིན་དངོས་རིགས་གཞན་རྣམས་ཆུའི་ནང་བླུགས་ནས་དག་འབྱངས་བྱེད་དགོས་སོ།

²⁴ ཉིན་ཞག་བདུན་པར་ཁྱོད་ཚོས་རང་གི་གྱོན་གོས་རྣམས་འཁྲུད་པའི་རྗེས་སུ། ཁྱོ་ཚོ་སྲོལ་བཞིན་དུ་གཙང་བར་འགྱུར་ཏེ་སྒར་སའི་ནང་དུ་འཛུལ་འོས་པར་འགྱུར་བ་ཡོད་ཅེས་སྨྲོས་སོ༎

བཅོམ་ནོར་ཆ་བགོས་བྱེད་པ།

²⁵ གཙོ་བོ་དཀོན་མཆོག་གིས་མོ་ཤེ་ལ།

²⁶ ཁྱོད་དང་ཨེ་ལི་ཛར་དང་མི་མང་གི་འགོ་དཔོན་རྣམས་ཀྱིས་དབང་འཛིན་བྱས་པའི་དངོས་རིགས་ཁག་དང་། བཙོན་པ་དང་སེམས་ཅན་དང་བཅས་པ་ཚང་མ་གྲངས་རྩིས་བརྒྱབ་དགོས་ཤིང་།

²⁷ དངོས་རིགས་དེ་དག་ཁག་གཉིས་སུ་འདྲ་མཉམ་གྱིས་ཆ་བགོས་བརྒྱབ་ནས།

²⁸ བཙོན་པ་ ༥༠༠ ནས་མི་རེ་རེ་ཁྲལ་གྱི་ཚུལ་དུ་གཙོ་བོ་དཀོན་མཆོག་གི་ཆེད་དུ་ལེན་དགོས། རྩིས་གཞི་དེ་དང་མཚུངས་པའི་ཕྱུག་ཟོག་དང་། བོང་བུ། ལུག་དང་ར་རྣམས་ཀྱང་འབུལ་དགོས།

²⁹ གོང་གསལ་འབུལ་བ་རྣམས་ནི་གཙོ་བོ་དཀོན་མཆོག་ལ་དམིགས་བསལ་གྱི་འབུལ་བར་དམིགས་ཏེ་བླ་མ་ཨེ་ལི་ཛར་གྱི་ལག་ཏུ་སྤྲོད་དགོས།

³⁰ མི་མང་བྱིངས་ཀྱི་ཐོབ་སྐལ་ཁོངས་ནས། བཙོན་པ་ལྔ་བཅུ་རེ་ནས་མི་རེ་དང་། ཡང་རྩིས་གཞི་དེ་དང་མཚུངས་པའི་ཕྱུག་ཟོག་དང་། བོང་བུ། ལུག་དང་ར་རྣམས་ཀྱང་འབུལ་དགོས། གོང་གསལ་འབུལ་བ་རྣམས་ནི་གཙོ་བོ་དཀོན་མཆོག་གི་བཞུགས་གནས་གུར་མཆོག་དམ་པའི་བལྟ་རྟོགས་པ་ལེ་ཝི་པ་རྣམས་ལ་སྤྲོད་དགོས།

³¹ མོ་ཤེ་དང་ཨེ་ལི་ཛར་གྱིས་གཙོ་བོ་དཀོན་མཆོག་གི་བཀའ་གང་གནང་བ་བཞིན་བྱས་སོ།

^32-35 དམག་མི་ཚོས་རང་གི་ཆེད་དུ་བདག་ཉར་བྱས་པའི་རྒྱུ་དངོས་ཁག་མ་རྩིས་པར། ཁོ་ཚོས་འཕྲོག་བཅོམ་བྱས་པ་ནི་གཤམ་གསལ་ལྟར་ཡིན་ནོ། ར་དང་ལུག་གི་ཁ་གྲངས་ནི ༦༧༥,༠༠༠ དང་ཕྱུག་ཟོག་གི་ཁ་གྲངས་ནི་ ༧༢,༠༠༠ བོང་བུ་ ༦༡,༠༠༠ དང་། བུ་མོ་ན་གཞོན་ ༣༢,༠༠༠།

^36-40 དམག་མིའི་ཐོབ་སྐལ་དུ་ར་ལུག་གི་ཁ་གྲངས་ནི་ ༣༣༧,༥༠༠ ཡང་དེའི་ཁོངས་ནས་ ༦༧༥ ནི་གཙོ་བོ་དཀོན་མཆོག་ལ་མཆོད་ཁྲལ་གྱི་ཚུལ་དུ་འབུལ་དགོས། དམག་མི་ཐོབ་སྐལ་དུ་ཕྱུག་ཟོག་གི་ཁ་གྲངས་ ༣༦,༠༠༠། ཡང་དེའི་ཁོངས་ནས་གཙོ་བོ་དཀོན་མཆོག་ལ་མཆོད་ཁྲལ་དུ་འབུལ་རྒྱུའི་ཁ་གྲངས་བདུན་ཅུ་དོན་གཉིས། དམག་མིའི་ཐོབ་སྐལ་དུ་བོང་བུའི་ཁ་གྲངས་ ༣༠,༥༠༠། དེའི་ཁོངས་ནས་གཙོ་བོ་དཀོན་མཆོག་ལ་མཆོད་ཁྲལ་དུ་བོང་བུ་དྲུག་ཅུ་རེ་གཅིག་འབུལ་དགོས། དམག་མིའི་ཐོབ་སྐལ་དུ་བུ་མོ་ན་གཞོན་མའི་ཁ་གྲངས་ནི་ ༡༦,༠༠༠། དེའི་ཁོངས་ནས་གཙོ་བོ་དཀོན་མཆོག་ལ་མཆོད་ཁྲལ་དུ་ གསུམ་བཅུ་སོ་གཉིས་འབུལ་དགོས་པ་ཡིན་ནོ།

⁴¹ གཙོ་བོ་དཀོན་མཆོག་གིས་ཇི་ལྟར་བཀའ་གནང་བ་བཞིན་མོ་ཤེས་གོང་གསལ་མཆོད་ཁྲལ་ཁག་གཙོ་བོ་དཀོན་མཆོག་ལ་དམིགས་བསལ་གྱི་འབུལ་བའི་ཚུལ་དུ་འབུལ་ཕྱིར་ཨེ་ལི་ཛར་ལ་སྤྲད་དོ།

^42-46 མི་ཚོགས་ཀྱི་ཐོབ་སྐལ་ནི་དམག་མི་རྣམས་ཀྱི་ཐོབ་སྐལ་དང་མཚུངས་ཤིང་། ར་ལུག་གི་ཁ་གྲངས་ནི་ ༣༣༧,༥༠༠ ཕྱུག་ཟོག་གི་ཁ་གྲངས་ ༣༦,༠༠༠ བོང་བུའི་ཁ་གྲངས་ ༣༠,༥༠༠ བུ་མོ་ན་གཞོན་མའི་ཁ་གྲངས་ ༡༦,༠༠༠ བཅས་ཡོད་པ་ཡིན་ཏེ།

⁴⁷ གཙོ་བོ་དཀོན་མཆོག་གིས་བཀའ་གནང་བ་བཞིན་མོ་ཤེས་བཙོན་པ་དང་སེམས་ཅན་ལྔ་བཅུ་རེ་ནས་རེ་རེ་བླངས་ཏེ་གཙོ་བོ་དཀོན་མཆོག་གི་གུར་མཆོག་དམ་པའི་བལྟ་རྟགས་པ་ལེ་ཝི་པ་རྣམས་ལ་སྤྲད་དོ།

⁴⁸ དེ་ནས་དམག་དཔོན་རྣམས་མོ་ཤེའི་རྩར་ཕྱིན་ནས།

⁴⁹ སྙན་གསན་ཞུས་པ། ཀྱེ་སྐུ་ཞབས་ལགས། ང་ཚོས་རང་གི་མངའ་འོག་གི་དམག་མི་རེ་རེ་བཞིན་དུ་གྲངས་རྩིས་བརྒྱབ་པ་ཡིན་པས། དེ་ཚོ་གཅིག་ཀྱང་རླག་སྟོར་ཕྱིན་མིན་འདུག

⁵⁰ དེ་བས་ན་ང་ཚོ་རེ་རེས་བླངས་པའི་གསེར་རྒྱན་དཔུང་གདུབ་དང་། ལག་གདུབ་དང་། ཚིགས་ཀོག། ཨ་ལོང་དང་རྐེ་རྒྱན་རྣམས་འདིར་འཁྱེར་ཡོད། དེ་ནི་ང་ཚོས་གཙོ་བོ་དཀོན་མཆོག་ལ་རང་རང་སོ་སོའི་སྲོག་གི་བླུ་རིན་དུ་འབུལ་རྒྱུ་ཡིན། གང་ལགས་ཟེར་ན། ཁོང་གིས་ང་ཚོ་ལ་སྐྱབས་གནང་མཛད་རྒྱུ་ཡིན་པས་ཕྱིར་རོ།

⁵¹ མོ་ཤེ་དང་ཨེ་ལི་ཛར་གྱིས་གསེར་གྱི་རྒྱན་ཆ་རྣམས་རྩིས་བླངས་ཤིང་།

⁵² དམག་དཔོན་ཚོས་ཕུལ་བའི་རྒྱན་ཆའི་ལྗིད་ཚད་ཀི་ལོ་ག་རཱམ་ཉིས་བརྒྱ་ཙམ་ཡོད་པ་ཡིན་ནོ།

⁵³ དམག་དཔོན་མ་ཡིན་པ་ཚོས་རང་གི་བཅོམ་པའི་རྒྱུ་ནོར་རྣམས་རང་ཉིད་དང་མཉམ་དུ་བདག་ཉར་བྱས་ཏེ་བཞག་གོ

⁵⁴ གཙོ་བོ་དཀོན་མཆོག་གིས་ཨིསི་རཱཨེལ་པ་རྣམས་ལ་སྲུང་སྐྱོབ་མཛད་པའི་ཕྱིར་དུ། མོ་ཤེ་དང་ཨེ་ལི་ཛར་གྱིས་གསེར་ཆས་རྣམས་གུར་མཆོག་དམ་པའི་ནང་དུ་བསྐྱེལ་ལོ༎