གྲངས་ཀ 30 - Tibetan Old Testament 2011

དམ་བཅའ་སྐོར་གྱི་བཀའ་ཁྲིམས་རྣམས།

¹ མོ་ཤེས་ཨིསི་རཱཨེལ་གྱི་སྡེ་རིགས་སོ་སོའི་འགོ་དཔོན་རྣམས་ལ་གཤམ་གསལ་ལྟར་སློབ་སྟོན་བྱས་སོ།

² མི་ཞིག་གིས་གཙོ་བོ་དཀོན་མཆོག་ལ་འབུལ་བ་ཞིག་འབུལ་རྒྱུའི་དམ་བཅའ་བྱེད་པའམ། ཡང་ན་སྤངས་བྱ་སོགས་བྱེད་རྒྱུའི་མནའ་སྐྱེལ་ཡོད་པ་ཡིན་ན། ཁོས་རང་གི་དམ་བཅའ་དེ་ལས་མི་འགལ་བར། རང་གིས་ཁས་ལེན་བྱེད་པའི་དོན་གནད་ཚང་མ་སྒྲུབ་དགོས་པ་ཡིན་ནོ།

³ རང་གི་ཕའི་ཁྱིམ་དུ་གནས་སྡོད་བྱེད་བཞིན་པའི་བུད་མེད་ན་ཆུང་མ་ཞིག་གིས་གཙོ་བོ་དཀོན་མཆོག་ལ་འབུལ་བ་ཞིག་འབུལ་རྒྱུའི་དམ་བཅའ་བྱེད་པའམ། ཡང་ན་སྤངས་བྱ་སོགས་བྱེད་རྒྱུའི་དམ་བཅའ་བྱས་ཡོད་པ་ཡིན་ན།

⁴ གལ་སྲིད་དེའི་སྐོར་ལ་ཕས་ཐོས་ཏེ་འགག་བྱ་མ་བྱས་བར་དུ་མོས་དམ་བཅའ་གང་བྱས་པ་ཆ་ཚང་སྒྲུབ་དགོས།

⁵ འོན་ཀྱང་མོའི་ཕས་དེའི་སྐོར་ཐོས་ནས་མོ་ལ་དམ་བཅའ་སྒྲུབ་རྒྱུར་འགག་པ་བྱས་པ་ཡིན་ན། མོས་དམ་བཅའ་དེ་སྲུང་མི་དགོས། གཙོ་བོ་དཀོན་མཆོག་གིས་མོ་ལ་བཟོད་གསོལ་གནང་བར་འགྱུར། གང་ལགས་ཟེར་ན། ཕས་མོ་ལ་དེ་ལྟར་བྱེད་མ་བཅུག་པས་ཕྱིར་རོ།

⁶ གལ་ཏེ་བུད་མེད་ཆང་ས་མ་བརྒྱབ་པ་ཞིག་གིས། ཤེས་བཞིན་དུའམ་ཡང་ན་སྣང་མེད་དུ་དམ་བཅའ་བྱས་པའམ། ཡང་ན་སྤངས་བྱ་སོགས་བྱེད་རྒྱུའི་ཁས་ལེན་བྱས་པའི་རྗེས་སུ་མོས་ཆང་ས་བརྒྱབ་ཅིང་།

⁷ མོའི་ཁྱོ་གས་དེའི་སྐོར་ལ་ཐོས་ནས་འགག་བྱ་མ་བྱས་བར་དུ། མོས་རང་གི་དམ་བཅའ་བཞག་པ་རྣམས་ཆ་ཚང་སྒྲུབ་དགོས།

⁸ འོན་ཀྱང་ཁྱོ་དེས་མོའི་དམ་བཅའི་སྐོར་ལ་ཐོས་ནས་དེ་སྒྲུབ་རྒྱུར་མོ་ལ་འགག་བྱ་བྱས་པ་ཡིན་ན། མོས་དེ་སྒྲུབ་མི་དགོས། གཙོ་བོ་དཀོན་མཆོག་གིས་མོ་ལ་བཟོད་གསོལ་གནང་བར་འགྱུར།

⁹ ཡུགས་མོ་ཞིག་གམ་ཡང་ན་བཟའ་ཟླ་ཁ་ཕྲལ་དུ་ཕྱིན་པའི་བུད་མེད་ཅིག་གིས་དམ་བཅའ་བྱས་པའམ། ཡང་ན་སྤང་བྱ་སོགས་བྱེད་རྒྱུའི་ཁས་ལེན་གང་བྱས་པ་ཚང་མ་སྒྲུབ་དགོས་པ་ཡིན་ནོ།

¹⁰ གལ་ཏེ་ཆང་ས་བརྒྱབ་ཟིན་པའི་བུད་མེད་ཞིག་གིས་དོན་གནད་གང་ཞིག་གི་སྐོར་དམ་བཅའ་བྱས་པའམ། ཡང་ན་སྤངས་བྱ་སོགས་བྱེད་རྒྱུའི་ཁས་ལེན་བྱས་ཡོད་པ་ཡིན་ཏེ།

¹¹ མོའི་བཟའ་ཟླས་དེའི་སྐོར་ཐོས་ནས་འགག་བྱ་སོགས་མ་བྱས་ན། མོས་དམ་བཅའ་སྲུང་རྒྱུའི་ཁས་ལེན་བྱས་པ་ཆ་ཚང་སྒྲུབ་དགོས་པ་ཡིན་ནོ།

¹² འོན་ཀྱང་ཁྱོས་དེ་ཐོས་ནས་དམ་བཅའ་དེ་དག་སྒྲུབ་རྒྱུའི་འགག་བྱ་བྱས་པ་ཡིན་ན། མོས་དམ་བཅའ་དེ་དག་སྒྲུབ་མི་དགོས་པར། གཙོ་བོ་དཀོན་མཆོག་གིས་མོ་ལ་བཟོད་གསོལ་གནང་བར་འགྱུར། གང་ལགས་ཟེར་ན། རང་གི་ཁྱོས་མོ་ལ་དམ་བཅའ་དེ་སྒྲུབ་རྒྱུར་འགག་པ་བྱེད་པས་ཕྱིར་རོ།

¹³ མོས་ཁས་ལེན་བྱས་པའི་དམ་བཅའ་རྣམས་ལ་ངོས་ལེན་དང་རྩིས་མེད་གཏོང་རྒྱུའི་དབང་ཆ་དེ་མོའི་ཁྱོ་ལ་ཡོད་པ་ཡིན་མོད།

¹⁴ འོན་ཀྱང་ཁོས་དེས་དམ་བཅའི་སྐོར་ལ་ཤེས་རྟོགས་བྱུང་བའི་ཉིན་མོ་དེ་རང་ལ་འགག་བྱ་སོགས་མ་བྱས་པ་ཡིན་ན། ཁོས་དམ་བཅའ་དེ་ལ་ངོས་ལེན་བྱས་པར་རྩིས་དགོས།

¹⁵ འོན་ཀྱང་དུས་གང་ཙམ་གྱི་རྗེས་སུ་ཁོས་དམ་བཅའ་དེ་ལ་ཁས་ལེན་མ་བྱས་པ་ཡིན་ན། དམ་བཅའ་སྒྲུབ་མ་ཐུབ་པའི་ཉེས་ཆད་དེ་ཁོའི་ཐོག་ཏུ་ཕོག་པར་འགྱུར།

¹⁶ རང་གི་ཕའི་ནང་དུ་གནས་སྡོད་བྱེད་པའི་བུ་མོ་ཆང་ས་མ་བརྒྱབ་པའམ། ཡང་ན་ཆང་ས་བརྒྱབ་ཟིན་པའི་བུད་མེད་རྣམས་ཀྱིས་སྲུང་དགོས་པའི་དམ་བཅའི་སྐོར་ལ་གཙོ་བོ་དཀོན་མཆོག་གིས་མོ་ཤེ་ལ་གནང་བའི་བཀའ་ཁྲིམས་ནི་གོང་གསལ་ལྟར་ཡིན་ནོ༎