གྲངས་ཀ 28 - Tibetan Old Testament 2011

ཉིན་རེར་མཆོད་འབུལ།

^1-2 དཀོན་མཆོག་ཐུགས་མཉེས་པར་བྱེད་པའི་ཆག་ཅན་འབུལ་རྒྱུའི་ཁ་ཟས་ཀྱི་མཆོད་པ་དེ་དག་གཏན་འབེབས་བྱས་པའི་ཞག་དུས་སོ་སོར་དཀོན་མཆོག་ལ་འབུལ་དགོས་ཅེས་ཁྱོད་ཀྱིས་ཨིསི་རཱཨེལ་པ་རྣམས་ལ་སློབ་སྟོན་བཀའ་བསྒོས་བྱེད་དགོས་ཤེས་གཙོ་བོ་དཀོན་མཆོག་གིས་མོ་ཤེ་ལ་བཀའ་གནང་ངོ་།

³ གཙོ་བོ་དཀོན་མཆོག་ལ་འབུལ་དགོས་པའི་ཁ་ཟས་ཀྱི་མཆོད་པ་རྣམས་གཤམ་གསལ་ལྟར་ཡིན། ཉིན་རེའི་སྦྱིན་སྲེག་གི་མཆོད་པར་ལོ་གཅིག་ལོན་པའི་ལུག་གུ་གསོ་སྐྱོན་མེད་གཉིས་དང་།

⁴ ལུག་གུ་དང་པོ་དེ་སྔ་དྲོ་དང་གཉིས་པ་དེ་དགོང་དྲོའི་དུས་སུ་མཆོད་པར་འབུལ་དགོས།

⁵ ལུག་གུ་རེ་དང་མཉམ་དུ་ཁ་སྐྱུ་པོའི་སྣུམ་བཟང་ཤོས་ལི་ཊར་གང་བསྲེས་པའི་གྲོ་ཞིབ་ཀི་ལོ་གང་འབྲུའི་མཆོད་པར་འབུལ་དགོས།

⁶ དེ་ནི་དུས་རྒྱུན་དུ་འབུལ་དགོས་པའི་སྦྱིན་སྲེག་གི་མཆོད་པ་ཡིན་པས། དེ་ནི་མེས་ཡོངས་སུ་བསྲེག་དགོས་པའི་མཆོད་པ་ཡིན། དེ་ནི་ཐོག་མར་རི་བོ་སི་ནཨེའི་སྟེང་དུ་ཁ་ཟས་ཀྱི་མཆོད་པའི་ཚུལ་དུ་ཕུལ་བ་ཡིན་པ་དང་། དེའི་དྲི་བཟང་གིས་གཙོ་བོ་དཀོན་མཆོག་ཐུགས་མཉེས་པར་འགྱུར་ཡོད།

⁷ ལུག་གུ་དང་པོ་དེ་དང་མཉམ་དུ་རྒུན་ཆང་གི་མཆོད་པ་འབུལ་ཕྱིར་མཆོད་ཁྲིའི་ཁར་རྒུན་ཆང་ལི་ཊར་གང་བླུགས་དགོས།

⁸ སྔ་དྲོ་མཆོད་འབུལ་ཇི་བྱས་ལྟར་དགོང་དྲོར་ལུག་གུ་གཉིས་པ་དེའང་རྒུན་ཆང་གི་མཆོད་པ་དང་མཉམ་དུ་འབུལ་དགོས། མཆོད་པ་དེའང་ཁ་ཟས་ཀྱི་མཆོད་འབུལ་ཡིན་པས་དེའི་དྲི་བཟང་གིས་གཙོ་བོ་དཀོན་མཆོག་ཐུགས་མཉེས་པར་འགྱུར༎

ངལ་གསོ་བའི་ཞག་གི་མཆོད་པ།

⁹ ངལ་གསོ་བའི་ཞག་ལ་ལོ་གཅིག་འཁོར་བའི་ལུག་གསོ་སྐྱོན་མེད་པ་གཉིས་འབུལ་དགོས་ཤིང་། ཡང་དེ་དང་མཉམ་དུ་ཁ་སྐྱུ་པོའི་སྣུམ་བསྲེས་པའི་གྲོ་ཞིབ་ཀི་ལོ་དོ་འབྲུའི་མཆོད་པ་དང་རྒུན་ཆང་གི་མཆོད་པའི་ཚུལ་དུ་འབུལ་དགོས།

¹⁰ སྦྱིན་སྲེག་གི་མཆོད་པ་དེ་ནི་ངལ་གསོ་བའི་ཞག་ལ་སོ་སོར་འབུལ་དགོས་པ་དང། འདི་ནི་རྒུན་ཆང་གི་མཆོད་འབུལ་དང་མཉམ་དུ་ཉིན་རེར་འབུལ་དགོས་པའི་མཆོད་པ་མ་རྩིས་པའི་འདི་ནི་མཆོད་པ་འཕར་མ་ཞིག་ཡིན་ནོ༎

ཟླ་ཚེས་དང་པོར་འབུལ་དགོས་པའི་མཆོད་པ།

¹¹ ཟླ་རེར་ཚེས་གཅིག་གི་ཉིན་གཙོ་བོ་དཀོན་མཆོག་ལ་སྦྱིན་སྲེག་གི་མཆོད་འབུལ་དུ། གླང་གཞོན་པ་གཉིས་དང་ཕོ་ལུག་གཅིག། ལོ་གཅིག་ལོན་པའི་ཕོ་ལུག་བདུན་འབུལ་དགོས། དེ་ཚོ་ཚང་མ་སྐྱོན་མེད་པ་ཡིན་དགོས།

¹² འབྲུའི་མཆོད་པའི་ཚུལ་དུ་ཁ་སྐྱུ་པོའི་སྣུམ་བསྲེས་པའི་གྲོ་ཞིབ་གཤམ་གསལ་ལྟར་འབུལ་དགོས། གླང་རེ་རེར་གྲོ་ཞིབ་ཀི་ལོ་གསུམ་དང་ཕོ་ལུག་དང་མཉམ་དུ་ཀི་ལོ་དོ།

¹³ ལུག་གུ་རེ་དང་མཉམ་དུ་གྲོ་ཞིབ་ཀི་ལོ་རེ་རེ་བཅས་འབུལ་དགོས། སྦྱིན་སྲེག་འདི་དག་ནི་ཞལ་ཟས་ཀྱི་མཆོད་པ་ཡིན་པ་དང་། དེའི་དྲི་བཟང་གིས་གཙོ་བོ་དཀོན་མཆོག་ཐུགས་མཉེས་པར་འགྱུར།

¹⁴ ཚུལ་དང་མཐུན་པའི་རྒུན་ཆང་གི་མཆོད་པ་དེ་ནི་གླང་རེ་དང་མཉམ་དུ་རྒུན་ཆང་ལི་ཊར་དོ་དང་། ཕོ་ལུག་རེ་དང་མཉམ་དུ་ལི་ཊར་གང་དང་ཕྱེད་ཀ། དེ་བཞིན་ལུག་གུ་རེ་དང་མཉམ་དུ་རྒུན་ཆང་ལི་ཊར་གང་རེ་བཅས་འབུལ་དགོས་པ་ཡིན། ལོ་གང་རིང་ཟླ་རེའི་ཚེས་གཅིག་གི་ཉིན་འབུལ་དགོས་པའི་སྦྱིན་སྲེག་གི་མཆོད་པའི་ཁྲིམས་སྲོལ་ནི་གོང་གསལ་ལྟར་ཡིན་ནོ།

¹⁵ ཡང་ཉིན་རེའི་འབུལ་དགོས་པའི་སྦྱིན་སྲེག་གི་མཆོད་པ་དང་རྒུན་ཆང་གི་མཆོད་པ་དེ་མ་རྩིས་པར། སྡིག་སེལ་གྱི་མཆོད་པའི་ཚུལ་དུ་ར་ཕོ་ཞིག་འཕར་མ་འབུལ་དགོས་པ་ཡིན་ནོ༎

ཐར་གྲོལ་གྱི་དུས་སྟོན།

¹⁶ གཙོ་བོ་དཀོན་མཆོག་ལ་གུས་བཀུར་ཞུ་བའི་ཚུལ་དུ་ཐར་གྲོལ་གྱི་དུས་སྟོན་དེ་ནི་ཟླ་བ་དང་པོའི་ཚེས་བཅུ་བཞི་ཉིན་རྩིས་སྲུང་བྱེད་དགོས།

¹⁷ ཉིན་ཞག་བཅོ་ལྔ་པའི་ཉིན་ཆོས་ཀྱི་དུས་ཆེན་ཞིག་འགོ་ཚུགས་ཏེ། དེ་ནི་ཉིན་ཞག་བདུན་བར་དུ་གནས་དགོས། དུས་ཡུན་དེའི་རིང་ལ་ཆི་མན་མེད་པའི་བག་ལེག་གཅིག་པོ་ཟ་དགོས།

¹⁸ དུས་ཆེན་གྱི་ཞག་དང་པོའི་ཉིན་ཁྱོད་ཚོ་མཆོད་འབུལ་ཞུ་ཕྱིར་འཛོམས་དགོས་སོ། དེ་ཉིན་ཁྱོད་ཚོས་ལས་དོན་གང་ཡང་བྱེད་མི་ཆོག

¹⁹ གཙོ་བོ་དཀོན་མཆོག་ལ་སྦྱིན་སྲེག་གི་མཆོད་པ་ཞིག་ཁ་ཟས་ཀྱི་མཆོད་པའི་ཚུལ་དུ་འབུལ་དགོསསོ། གླང་གཞོན་པ་གཉིས་དང་ཕོ་ལུག་གཅིག་དང། ལོ་གཅིག་ལོན་པའི་ཕོ་ལུག་བདུན་འབུལ་དགོས། དེ་ཚོ་ཚང་མ་སྐྱོན་མེད་པ་ཡིན་དགོས།

²⁰ ཁ་སྐྱུ་པོའི་སྣུམ་བསྲེས་པའི་གྲོ་ཞིབ་དེ་དག་ཚུལ་མཐུན་བཞིན་དུ་འབྲུའི་མཆོད་པར་གཤམ་གསལ་ལྟར་འབུལ་དགོས། གླང་རེ་རེར་གྲོ་ཞིབ་ཀི་ལོ་གསུམ་དང་ཕོ་ལུག་དང་མཉམ་དུ་ཀི་ལོ་དོ།

²¹ ལུ་གུ་རེ་དང་མཉམ་དུ་ཀི་ལོ་གང་རེ་བཅས་འབུལ་དགོས།

²² སྡིག་སེལ་གྱི་མཆོད་པར་ར་ཕོ་གཅིག་ཡང་འབུལ་ནས། མི་དམངས་ཀྱི་ཆེད་དུ་དག་འབྱངས་ཀྱི་ཆོ་ག་དེ་བཤམ་དགོས།

²³ གོང་གསལ་མཆོད་འབུལ་དེ་དག་ནི། སྔ་དྲོ་ཆག་ཅན་འབུལ་དགོས་པའི་སྦྱིན་སྲེག་གི་མཆོད་པ་དེ་མ་རྩིས་པར་མཆོད་པ་འཕར་མ་ཞིག་འབུལ་དགོས་པ་ཡིན་ནོ།

²⁴ ཉིན་ཞག་བདུན་པར་གཙོ་བོ་དཀོན་མཆོག་ལ་ཁ་ཟས་ཀྱི་མཆོད་པ་དེ་འབུལ་དགོས། མཆོད་པ་དེའི་དྲི་ཞིམ་གྱིས་ཁོང་ཐུགས་མཉེས་པར་འགྱུར། དེ་ནི་ཉིན་རེར་འབུལ་དགོས་པའི་སྦྱིན་སྲེག་གི་མཆོད་པ་དང་རྒུན་ཆང་གི་མཆོད་པ་མ་རྩིས་པར་མཆོད་པ་འཕར་མ་ཞིག་ཡིན་ནོ།

²⁵ ཉིན་ཞག་བདུན་པར་བསྙེན་བཀུར་གྱི་ཆེད་དུ་འཛོམས་པ་ལས་དེ་ཉིན་ལས་དོན་གང་ཡང་བྱེད་མི་ཆོག་པ་ཡིན་ནོ༎

སྙེ་མ་རྔ་བའི་དུས་ཆེན་གྱི་མཆོད་པ།

²⁶ སྙེ་མ་རྔ་བའི་དུས་ཆེན་གྱི་ཉིན་ཞག་དང་པོར། གཙོ་བོ་དཀོན་མཆོག་ལ་འབྲུ་ཕུད་འབུལ་དུས། ཁྱོད་ཚོ་མཆོད་འབུལ་གྱི་ཆེད་དུ་འཛོམས་དགོས་པས། དེ་ཉིན་ལས་དོན་གང་ཡང་བྱེད་མི་ཆོག

²⁷ གཙོ་བོ་དཀོན་མཆོག་དྲི་ཞིམ་གྱིས་མཉེས་པའི་ཕྱིར་སྦྱིན་སྲེག་གི་མཆོད་པ་ཞིག་འབུལ་དགོས། གླང་གཞོན་པ་གཉིས་དང་ཕོ་ལུག་གཅིག་དང། ལོ་གཅིག་ལོན་པའི་ཕོ་ལུག་བདུན་འབུལ་དགོས། དེ་ཚོ་ཚང་མ་སྐྱོན་མེད་པ་ཡིན་དགོས།

²⁸ ཁ་སྐྱུར་པོའི་སྣུམ་བསྲེས་པའི་གྲོ་ཞིབ་དེ་དག་ཚུལ་མཐུན་བཞིན་དུ་འབྲུའི་མཆོད་པར་གཤམ་གསལ་ལྟར་འབུལ་དགོས། གླང་རེ་རེར་གྲོ་ཞིབ་ཀི་ལོ་གསུམ་དང་ཕོ་ལུག་དང་མཉམ་དུ་ཀི་ལོ་དོ།

²⁹ ལུག་གུ་རེ་དང་མཉམ་དུ་ཀི་ལོ་གང་རེ་བཅས་འབུལ་དགོས།

³⁰ སྡིག་སེལ་གྱི་མཆོད་པར་ར་ཕོ་གཅིག་ཡང་འབུལ་ནས། མི་མང་གི་ཆེད་དུ་དག་འབྱངས་ཀྱི་ཆོ་ག་དེ་བཤམ་དགོས།

³¹ གོང་གསལ་མཆོད་པ་དང་རྒུན་ཆང་གི་མཆོད་པ་རྣམས་ནི་ཉིན་རེར་འབུལ་དགོས་པའི་སྦྱིན་སྲེག་གི་མཆོད་པ་དང་འབྲུའི་མཆོད་པ་རྣམས་མ་རྩིས་པར། མཆོད་པ་འཕར་མ་ཞིག་འབུལ་དགོས་པ་ཡིན་ནོ༎