གྲངས་ཀ 27 - Tibetan Old Testament 2011

ཛེ་ལོ་ཕེ་ཧད་ཀྱི་བུ་མོ་རྣམས།

¹ ཡོ་སེབ་ཀྱི་བུ་མ་ནསེ་སཱེ། མ་ནསེ་སཱེའི་བུ་མ་ཀིར་དང་ཁོའི་བུ་གྷིལ་ཨད་ཡིན། གྷི་ལི་ཨད་ཀྱི་བུ་ཧེ་ཕར་དང་ཁོའི་བུ་ཛེ་ལོ་ཕེ་ཧད་ཡིན། ཛེ་ལོ་ཕེ་ཧད་ཀྱི་བུ་མོ་རྣམས་ནི། མཱ་ལཱ། ནོ་ཨ། ཧོག་ལཱ། མིལ་ཀཱ་དང་ཏིར་ཛཱ་བཅས་ཡིན་ནོ།

² བུ་མོ་དེ་ཚོ་ཕྱིན་ནས། མོ་ཤེ་དང་། བླ་མ་ཨེ་ལི་ཛར། དེ་བཞིན་འགོ་དཔོན་རྣམས་དང་ཨིསི་རཱཨེལ་མི་སྡེ་ཡོངས་ཀྱི་མདུན་དུ་གཙོ་བོ་དཀོན་མཆོག་གི་བཞུགས་གནས་གུར་མཆོག་དམ་པའི་སྒོའི་རྩར་ལངས་ནས་སྨྲས་པ།

³ ང་ཚོའི་ཕ་ནི་འབྲོག་སྟོང་དུ་འདས་ཤིང་། ཁོང་ལ་བུ་གཅིག་ཀྱང་མེད་པ་དང་། ཁོང་ནི་གཙོ་བོ་དཀོན་མཆོག་ལ་ངོ་ལོག་ཞུ་མཁན་ཀོ་རཱའི་རྗེས་འབྲངས་པ་ཚོའི་ཁོངས་སུ་མེད་པ་ཡིན། ཁོང་ནི་སོ་སོའི་སྡིག་པའི་རྐྱེན་གྱིས་འདས་གྲོངས་བྱུང་བ་ཡིན་ནོ།

⁴ ཁོང་ལ་བུ་མེད་པ་ཙམ་གྱིས་ཨིསི་རཱཨེལ་ནས་ཁོང་གི་མིང་ཤུལ་མེད་པར་བྱེད་དགོས་སམ། དེ་བས་ན་ང་ཚོའི་ཕའི་གཉེན་མཚན་རྣམས་དང་མཉམ་དུ་ང་ཚོ་ལའང་ནོར་སྐལ་གནང་བར་མཛོད།

⁵ དེ་ནས་མོ་ཤེས་ཁོའི་གནས་ཚུལ་དེ་གཙོ་བོ་དཀོན་མཆོག་གི་དྲུང་དུ་ཞུས་པ་དང་།

⁶ གཙོ་བོ་དཀོན་མཆོག་གིས་ཁོ་ལ།

⁷ ཛེ་ལོ་ཕེ་ཧད་ཀྱི་བུ་མོ་ཚོས་གང་སྨྲས་པ་དེ་བདེན་པ་ཡིན་པས། དེ་ཚོའི་ཕའི་གཉེན་མཚན་རྣམས་དང་མཉམ་དུ་དེ་དག་ལའང་ནོར་སྐལ་སྤྲོད་དགོས་པ་མ་ཟད། ཁོའི་ཐོབ་སྐལ་གང་ཡོད་པ་དེའང་བུ་མོ་ཚོར་སྤྲོད་དགོས་པ་ཡིན་ནོ།

⁸ ཨིསི་རཱཨེལ་མི་མང་རྣམས་ལ་འདི་ལྟར་སྨྲོས་ཤིག ད་ཕྱིན་གལ་ཏེ་མི་ཞིག་བུ་མེད་པར་ཤི་བ་ཡིན་ན། དེའི་ནོར་སྐལ་ཆ་ཚང་ཁོའི་བུ་མོས་བདག་དབང་བྱེད་རྒྱུ་དང་།

⁹ གལ་ཏེ་ཁོ་ལ་བུ་མོའང་མེད་པ་ཡིན་ན་ཁོའི་བུ་སྤུན་ལ་ནོར་སྐལ་དེ་ཐོབ་རྒྱུ་དང་།

¹⁰ ཁོ་ལ་བུ་སྤུན་སོགས་མེད་པ་ཡིན་ན། ཕའི་སྤུན་ལ་ནོར་སྐལ་དེ་དག་ཐོབ་པར་འགྱུར།

¹¹ ཁོ་ལ་བུ་སྤུན་ནམ་ཨ་ཁུ་སོགས་མེད་པ་ཡིན་ན། དེའི་གཉེན་མཚན་ཉེ་ཤོས་དེ་ལ་ནོར་སྐལ་ཐོབ་རྒྱུ་དང་། དེས་ས་ཞིང་རྒྱུ་དངོས་དེ་དག་རང་བདག་གི་རྒྱུ་ནོར་ཞིག་ཏུ་རྩིས་དགོས་ཏེ། གཙོ་བོ་དཀོན་མཆོག་ངས་བཀའ་བསྒོས་གང་གནང་བ་བཞིན་ཨིསི་རཱཨེལ་མི་དམངས་རྣམས་ཀྱིས་གོང་གསལ་བཀའ་ཁྲིམས་དེ་རྣམས་ཉེར་མཁོའི་ཁྲིམས་ལུགས་ཀྱི་ཚུལ་དུ་སྲུང་དགོས་པ་ཡིན་ནོ༎

ཡོ་ཤུ་ཨ་ནི་མོ་ཤེའི་ཤུལ་འཛིན་དུ་འདེམས་བསྐོད་བྱུང་བ།

¹² གཙོ་བོ་དཀོན་མཆོག་གིས་མོ་ཤེ་ལ་གསུངས་པ། ཁྱོད་ཨ་བྷ་རིམ་རི་བོ་རྣམས་སུ་སོང་ཞིག། ངས་ཨིསི་རཱཨེལ་པ་རྣམས་ལ་སྤྲོད་ཀྱི་ཡིན་ཟེར་བའི་ཡུལ་དེར་ལྟོས་ཤིག

¹³ ཁྱོད་ཀྱིས་ཡུལ་དེ་མཐོང་བའི་རྗེས་སུ་རང་གི་སྤུན་ཨ་རོན་དང་འདྲ་བ་ཁྱོད་རང་ཡང་ཤི་དགོས།

¹⁴ གང་ལགས་ཟེར་ན། ཛིན་ཞེས་པའི་འབྲོག་སྟོང་དུ་ཁྱོད་གཉིས་ཀྱིས་ངའི་བཀའ་ལ་ངོ་རྒོལ་བྱས་པ་དང་། མི་ཚོགས་ཡོངས་ཀྱིས་མེ་རི་བཱ་རུ་ང་ལ་སྐྱོན་བརྗོད་བྱེད་སྐབས། ཁྱོད་ཀྱིས་དེ་ཚོའི་མདུན་དུ་ངའི་དམ་པའི་མཐུ་སྟོབས་ལ་ངོས་ལེན་མ་བྱས་པར་ཡིན། (མེ་རི་བྷ་ནི་ཛིན་གྱི་འབྲོག་སྟོང་དུ་ཡོད་པའི་ས་གནས་ཀ་དྷེཤིིའི་ཆུ་མིག་ཞིག་གི་མིང་ཡིན་ནོ།)

¹⁵ དེ་ནས་མོ་ཤེས་སྨོན་ལམ་འདེབས་པ།

¹⁶ ཀྱེ་དཀོན་མཆོག་གཙོ་བོ་དཀོན་མཆོག། ཚེ་སྲོག་ཀུན་གྱི་འབྱུང་གནས། ཁྱེད་ཀྱིས་མི་མང་རྣམས་ལ་རྫི་བོ་མེད་པའི་ལུག་ཁྱུ་བཞིན་དུ་བོར་གནང་མཛད་པར་དེ་ཚོར་འགོ་འཁྲིད་བྱེད་མཁན་ཞིག་གམ།

¹⁷ དམག་དུས་སྐབས་སུ་དེ་ཚོར་བཀའ་བཀོད་བྱེད་ཐུབ་པའི་སྐྱེ་བོ་ཞིག་བསྐོ་གཞག་གནང་བར་མཛོད།

¹⁸ དེ་ནས་གཙོ་བོ་དཀོན་མཆོག་གིས་མོ་ཤེ་ལ། འཇོན་སྟངས་ལྡན་པའི་སྐྱེ་བོ་ནུན་གྱི་བུ་ཡོ་ཤུ་ཨ་དེ་འཁྲིད་ནས། ཁོའི་མགོ་ལ་ལག་པ་བཞག་སྟེ།

¹⁹ བླ་མ་ཨེ་ལི་ཛར་དང་མི་སྡེ་ཡོངས་ཀྱི་མདུན་དུ་སླངས་ནས། ཁོ་ཚོ་ཚང་མའི་མདུན་དུ་ཁྱོད་ཀྱིས་ཁོ་ལ་རང་གི་རྗེས་ཤུལ་འཛིན་མཁན་ཡིན་ཞེས་ཁྱབ་སྒྲགས་བྱེད་དགོས།

²⁰ ཨིསི་རཱཨེལ་མི་སྡེ་ཡོངས་ཀྱིས་ཁོ་ལ་རྩིས་སྲུང་བྱེད་ཕྱིར། ཁྱོད་ཀྱིས་རང་གི་དབང་ཆ་ཕྲན་བུ་ཞིག་ཁོ་ལ་སྤྲོད་དགོས།

²¹ ཁོས་ལས་དོན་གང་ཅིར་བླ་མ་ཨེ་ལི་ཛར་ལ་བློས་གཏན་བྱེད་དགོས་ཤིང་། ཡང་དེ་ཨེ་ལི་ཛར་གྱིས་ཨུ་རིམ་དང་ཐུམ་མིམ་གྱི་སྒོ་ནས་ངའི་བསམ་དོན་དེ་ཤེས་པར་བྱེད་རྒྱུ་ཡིན། དེ་ལྟར་བྱས་པའི་སྒོ་ནས་ཨེ་ལེ་ཨ་ཛར་གྱིས་ཡོ་ཤུ་ཨ་དང་ཨིསི་རཱཨེལ་མི་སྡེ་ཡོངས་ཀྱི་ལས་དོན་ཚང་མར་ལམ་སྟོན་བྱེད་པར་འགྱུར་ཞེས་གསུངས་སོ།

²² དེ་ནས་མོ་ཤེས་གཙོ་བོ་དཀོན་མཆོག་གི་བཀའ་གནང་བ་ལྟར་བྱས་ཏེ། ཁོས་ཡོ་ཤུ་ཨ་ལ་བླ་མ་ཨེ་ལི་ཛར་དང་མི་མང་གི་མདུན་དུ་ལངས་བཅུག་གོ

²³ གཙོ་བོ་དཀོན་མཆོག་གིས་བཀའ་གནང་བ་བཞིན་མོ་ཤེས་རང་གི་ལག་པ་ཡོ་ཤུ་ཨའི་མགོའི་ཁར་བཞག་ནས། ཁོ་ལ་རང་གི་རྗེས་འཛིན་བྱེད་པོར་ཁྱབ་སྒྲགས་བྱས་སོ༎