གྲངས་ཀ 25 - Tibetan Old Testament 2011

པི་ཨོར་དུ་ཨིསི་རཱཨེལ་པ་རྣམས།

¹ དེ་ནས་ཨིསི་རཱཨེལ་པ་རྣམས་ཨ་ཀ་སི་ཡའི་ལུང་གཤོང་དུ་སྒར་ས་བརྒྱབ་ནས་བསྡད་སྐབས། དེ་ཚོའི་སྐྱེས་པ་ཚོས་དེར་ཡོད་པའི་མོ་ཨབ་པའི་བུད་མེད་རྣམས་དང་མཉམ་དུ་ལུས་འབྲེལ་བྱས་ཤིང་།

² བུད་མེད་དེ་ཚོས་ཨིསི་རཱཨེལ་པའི་སྐྱེས་པ་རྣམས་མོ་ཨབ་པའི་ལྷ་རྟེན་དག་ལ་མཆོད་འབུལ་བྱེད་སར་བོས་ཀྱི་ཡོད་པ་དང་། ཨིསི་རཱཨེལ་པ་ཚོས་ཀྱང་དེར་ཁ་ཟས་ཟ་བ་མ་ཟད།

³ པི་ཨོར་གྱི་བྷལ་ལ་མཆོད་འབུལ་བྱས་པའི་རྐྱེན་གྱིས་གཙོ་བོ་དཀོན་མཆོག་དེ་ཚོར་ཐུགས་ཁྲོས་ནས།

⁴ ཁོང་གིས་མོ་ཤེ་ལ། ངའི་བཀའ་ལ་རྩིས་སྲུང་བྱས་ཏེ། ཨིསི་རཱཨེལ་པའི་འགོ་དཔོན་ཚང་མ་འཛིན་བཟུང་བྱས་ཏེ། ཉི་མའི་གུང་ལ་གསོད་ཅིག། དེ་ལྟར་བྱས་པ་ཡིན་ན་ང་དེ་ཚོ་དང་ཁྲོ་བར་མི་འགྱུར་ཞེས་གསུངས་པ་དང་།

⁵ མོ་ཤེས་ལས་བྱེད་པ་རྣམས་ལ། ཁྱོད་ཚོ་རང་གི་མི་བརྒྱུད་ཀྱི་ནང་ནས་པི་ཨོར་གྱི་བྷལ་ལ་མཆོད་མཁན་ཡོད་ཚད་གསོད་དགོས་ཅེས་སྨྲས་སོ།

⁶ དེ་ནས་མོ་ཤེ་དང་ཨིསི་རཱཨེལ་མི་སྡེ་ཡོངས་ཀྱིས་མཐོང་སར། ཨིསི་རཱཨེལ་པ་ཞིག་གིས་མིད་ཡན་གྱི་བུད་མེད་ཞིག་རང་གི་གུར་ནང་དུ་འཁྲིད་ཡོང་ཞིང་། སྐབས་དེར་དེ་ཚོ་ནི་གཙོ་བོ་དཀོན་མཆོག་གི་བཞུགས་གནས་གུར་མཆོག་དམ་པའི་སྒོའི་འགྲམ་དུ་མྱ་ངན་བྱས་བཞིན་བསྡད་ཡོད་དོ།

⁷ ཨེ་ལི་ཛར་གྱི་བུའམ་བླ་མ་ཨ་རོན་གྱི་ཚ་བོ་ཕིན་ཧསི་ཀྱིས་དེ་མཐོང་ནས་མི་ཚོགས་ཀྱི་ཁྲོད་ནས་ལངས་ཏེ་ཕྱིན་པ་དང་། ཁོས་རང་གི་ལག་ཏུ་མདུང་ཞིག་འཁྱེར་ཏེ།

⁸ སྐྱེས་པ་དེ་དང་བུད་མེད་དེའི་རྗེས་སུ་ཕྱིན་ནས། དེ་ཚོའི་གུར་ནང་འཛུལ་ཞིང་དེ་གཉིས་སྡེབས་གཅིག་ལ་མདུང་བཙུག་ནས་བསད་དོ། ཨིསི་རཱཨེལ་པ་རྣམས་འཇིག་པར་བྱེད་བཞིན་པའི་ནད་ཡམ་དྲག་པོ་དེའང་འཇོམས་ཤིང་ཆད་དོ།

⁹ འོན་ཀྱང་དེ་བར་ནད་ཡམ་དེའི་རྐྱེན་གྱིས་མི་གྲངས་ ༢༤,༠༠༠ ཤི་ཟིན་པ་ཡིན་ནོ།

¹⁰ གཙོ་བོ་དཀོན་མཆོག་གིས་མོ་ཤེ་ལ་གསུངས་པ།

¹¹ ཕིན་ཧསི་ཀྱིས་གང་བྱས་པ་དེའི་རྐྱེན་གྱིས་ད་ནི་ང་ཨིསི་རཱཨེལ་པ་རྣམས་ལ་ཁྲོ་རྒྱུ་མིན་ནོ། ང་མ་གཏོགས་པར་ལྷ་གཞན་ལ་མཆོད་པ་དེ་ཁོས་བཟོད་སྲན་བྱེད་མ་ཐུབ་བོ། དེར་བརྟེན་པས་ངའི་ཁྲོ་བས་དེ་དག་འཇིག་པར་བྱས་མེད།

¹² དེ་བས་ན་ཁྱོད་ཀྱིས་ཁོ་ལ། ངས་ཁོ་དང་མཉམ་དུ་དུས་གཏན་དུ་གནས་པའི་དམ་བཅའ་ཞིག་གཏན་འབེབས་བྱེད་རྒྱུ་ཡིན་ཞེས་སྨྲོས་ཤིག

¹³ ད་ཁོ་དང་ཁོའི་རིགས་བརྒྱུད་ནི་དུས་གཏན་དུ་བླ་མའི་གོ་གནས་སུ་འཁོད་པར་བྱེད་རྒྱུ་ཡིན། གང་ལགས་ཟེར་ན། ང་ལ་འགྲན་ཟླ་བྱེད་མཁན་སུ་ཞིག་ལའང་ཁོས་བཟོད་སྲན་མ་བྱས་པ་ཡིན། དེས་རྐྱེན་གྱིས་མི་རྣམས་ཀྱི་སྡིག་པ་སེལ་བར་བྱས་པ་ཡིན་ནོ།

¹⁴ མིད་ཡན་གྱི་བུད་མེད་དང་མཉམ་དུ་བསད་པའི་སྐྱེས་པ་དེའི་མིང་ནི་ཛིམ་རི་ཡིན་པ་དང་དེ་ནི་ས་ལུའི་བུ་ཡིན་ཅིང་། སིམ་ཨོན་རིགས་བརྒྱུད་ཀྱི་ནང་མིའི་གཙོ་བོ་ཞིག་ཡིན་ནོ།

¹⁵ བུད་མེད་དེའི་མིང་ལ་ཀོཛི་བྷི་ཞེས་པ་དང་། དེའི་ཕའི་མིང་ཛུར་ཞེས་ཟེར་ཞིང་། མིད་ཡན་རིགས་བརྒྱུད་ཀྱི་སྡེ་ཚོགས་ཤིག་གི་གཙོ་བོ་ཡིན་ནོ།

¹⁶ གཙོ་བོ་དཀོན་མཆོག་གིས་མོ་ཤེ་ལ་བཀའ་གནང་བ།

¹⁷ མི་དི་ཡན་པ་རྣམས་ལ་འཐབ་རྒོལ་བྱེད་ནས་དེ་ཚོ་ཚར་གཅོད་ཅིག

¹⁸ གང་ལགས་ཟེར་ན། དེ་ཚོས་པི་ཨོར་དུ་ཁྱོད་ཚོར་གཡོ་ཐབས་བྱེད་རྒྱུའི་བྱུས་ངན་བརྩམས་པས་ཕྱིར་རོ། དེ་ཚོ་ཚར་གཅོད་གཏོང་དགོས་པའི་གནད་དོན་གཞན་དེ་ནི་ནད་ཡམས་བྱུང་བའི་སྐབས་སུ་བསད་པའི་ཀོཛི་བྷི་ཞེས་པའི་བུད་མེད་དེ་ཡིན་ནོ༎