གྲངས་ཀ 24 - Tibetan Old Testament 2011

¹ སྐབས་དེའི་བར་དུ་གཙོ་བོ་དཀོན་མཆོག་གིས་ཨིསི་རཱཨེལ་པ་རྣམས་ལ་བྱིན་རླབས་གནང་འདོད་ཡོད་པ་དེ་བྷ་ལམ་གྱི་ཤེས་སོ། དེར་བརྟེན་ཁོས་སྔར་བཞིན་བརྟག་པ་བྱེད་དུ་མ་ཕྱིན་པར། འབྲོག་སྟོང་གི་ཕྱོགས་སུ་བལྟས་པས།

² ཨིསི་རཱཨེལ་པའི་སྡེ་རིགས་སོ་སོ་བགོས་ནས་སྒར་བརྒྱབ་ནས་བསྡད་ཡོད་པ་མཐོང་ངོ་། གཙོ་བོ་དཀོན་མཆོག་གི་ཐུགས་ཉིད་ཀྱིས་ཁོ་ལ་དབང་བསྒྱུར་ནས།

³ ཁོས་འདི་ལྟར་ལུང་བསྟན་བརྒྱབ་བོ། བཀའ་འཕྲིན་འདི་ནི་བྷི་ཨོར་གྱི་བུ་བྷ་ལམ་གྱི་ཡིན་པ་དང་། གཏམ་ཚིག་འདི་ནི་གསལ་པོར་མཐོང་ཐུབ་པའི་མིའི་བཀའ་ཡིན།

⁴ ཁོ་ཡིས་དཀོན་མཆོག་ཁོང་གི་བཀའ་ཐོས་ཐུབ་བོ། ས་རུ་འགྱལ་ནས་ཕུར་ཚུགས་སུ་བལྟ་བཞིན་ཡོད་སྐབས་། དེ་ཡིས་ཀུན་དབང་དཀོན་མཆོག་ནས་ཞལ་གཟིགས་ཤིག་མཐོང་།

⁵ ཨིསི་རཱཨེལ་པ་ཡི་གུར་རྣམས་ཤིན་ཏུ་མཛེས།

⁶ ཁ་ཟུར་ཤིང་གི་གྲལ་རིམ་དང་མཚུངས་ཤིང་། གཙང་པོའི་འགྲམ་གྱི་སྐྱེད་མོའི་ཚལ་དང་འདྲ། གཙོ་བོ་དཀོན་མཆོག་གིས་འཛུགས་གནང་བས། དྲི་ཤིང་ཨ་ག་རུ་དང་མཚུངས། ཆུ་འགྲམ་དུ་ཡོད་པའི་འགྱམ་ཤིང་དང་འདྲའོ།

⁷ དེ་ཚོར་ཆར་ཆུ་འབོལ་པོ་བྱུང་སྟེ། ཆུ་འབེལ་པོ་ཡོད་པའི་ཞིང་ཁར་དེ་ཚོས་ས་བོན་འདེབས། དེ་ཚོའི་རྒྱལ་པོ་ནི་ཨ་གྷག་ལས་མངའ་ཐང་ཆེ་ཞིང་། དེའི་རྒྱལ་སྲིད་ནི་ཐག་རིང་བར་དུ་འཕེལ་བར་འགྱུར།

⁸ དཀོན་མཆོག་གིས་དེ་ཚོ་ཨི་ཇིབ་ནས་བཏོན་ཏེ་འཁྲིད་ཕེབས་པ་ཡིན་པས། ཁོང་གིས་དེ་ཚོའི་ཕྱོགས་གཏོགས་མཛད་དེ་གླང་རྒོད་བཞིན་དུའཐབ་པར་མཛད། དེ་ཚོས་རང་གི་དགྲ་རྣམས་ཁྱུར་མིད་བཏང་། དེ་ཚོའི་རུས་པ་རྣམས་དུམ་བུར་གཅོག་པར་འགྱུར། དེ་ཚོར་རང་གི་མདའ་རྣམས་འཕང་བར་འགྱུར།

⁹ མི་རིགས་དེ་ནི་སེང་གེ་སྟོབས་ཆེན་ཞིག་འདྲ་སྟེ། དེ་ཉལ་བའི་སྐབས་སུ་སུས་ཀྱང་གཉིད་དཀྲོག་མི་ནུས་སོ། ཨིསི་རཱཨེལ་ཡུལ་ལ་བྱིན་རླབས་ཀྱི་ཚིག་བརྗོད་སྨྲ་མཁན་རྣམས་ནི། རང་ཉིད་བྱིན་རླབས་དང་ལྡན་པར་འགྱུར་རྒྱུ་དང་། དེ་བཞིན་དེ་ལ་དམོད་མཁན་རྣམས་ནི། རང་གི་ཐོག་ཏུ་དམོད་པ་ཕོག།

¹⁰ དེ་ནས་བྷ་ལག་ཁོང་ཁྲོ་ཟ་ཞིང་མུར་རྫོག་བསྡམས་ནས་བྷ་ལམ་ལ། ངས་ཁྱོད་ལ་རང་གི་དགྲ་བོར་དམོད་པ་གཏོང་ཕྱིར་འབོད་པ་ཡིན་མོད། འོན་ཀྱང་དེའི་ཚབ་ལ་ཁྱོད་ཀྱིས་དེ་ཚོར་ད་བར་ལན་ཐེངས་གསུམ་ཙམ་བྱིན་རླབས་སྤྲད་པ་ཡིན་པས།

¹¹ ད་ཁྱོད་རང་ནང་ལ་ལོག་ནའང་ཆོག། ངས་ཁྱོད་ལ་བྱ་དགའ་སྤྲོད་རྒྱུའི་དམ་བཅའ་བྱས་མོད། འོན་ཀྱང་གཙོ་བོ་དཀོན་མཆོག་གིས་ཁྱོད་ལ་བྱ་དགའ་དེ་ཐོབ་པར་བཀག་འདོམ་གནང་ཡོད་ཅེས་སྨྲས་སོ།

¹² དེའི་ལན་དུ་བྷ་ལམ་གྱིས། ཁྱོད་ཀྱིས་ང་ལ་རང་གི་ཕོ་བྲང་གི་གསེར་དངུལ་ཚང་མ་སྤྲད་ནའང་།

¹³ ང་ནི་གཙོ་བོ་དཀོན་མཆོག་གི་བཀའ་ལ་མ་ཉན་པར། རང་གི་འདོད་མོས་བཞིན་ལས་དོན་གང་ཡང་བྱེད་མི་ཐུབ་ཅེས་ངས་ཁྱོད་ཀྱིས་བཏང་བའི་བང་ཆེན་རྣམས་ལ་སྨྲས་པ་ཡིན། གཙོ་བོ་དཀོན་མཆོག་གི་གང་ཤོད་གསུངས་པ་དེ་རང་གཅིག་པུ་ངས་ཤོད་ཀྱི་ཡིན༎

བྷ་ལམ་གྱི་མཐའ་མའི་ལུང་བསྟན།

¹⁴ བྷ་ལམ་གྱིས་བྷ་ལག་ལ། ད་ང་རང་སོ་སོའི་མི་རིགས་ཡོད་སར་ལོག་འགྲོ་གི་ཡོད། འོན་ཀྱང་འགྲོ་བའི་སྔོན་ལ་ཨིསི་རཱཨེལ་གྱི་མི་ཚོས་མ་འོངས་པར། ཁྱོད་ཀྱི་མི་ཚོར་གང་བྱེད་རྒྱུ་ཡིན་པ་དེའི་སྐོར་ལ་ངས་ཁྱོད་ལ་ཟོན་བརྡའི་ཚུལ་དུ་བཤད་ཀྱི་ཡིན་ཞེས་སྨྲས་སོ།

¹⁵ དེ་རྗེས་གཤམ་གསལ་ལྟར་ལུང་བསྟན་བརྒྱབ་པ། བྷི་ཨོར་གྱི་བུ་བྷ་ལམ་གྱི་འཕྲིན་ཡིན་པ་དང་། གསལ་པོར་མཐོང་བའི་མི་ཡི་བཀའ།

¹⁶ དཀོན་མཆོག་གིས་གསུངས་པ་དེ་སུས་ཐོས་ཐུབ་བོ། དེས་ནི་བླ་མེད་དཀོན་མཆོག་ནས་བྱུང་བའི་ཤེས་རབ་དེ་བླངས་པར་ནུས། ངས་མིག་གཉིས་ཕུར་ཚུགས་སུ་བལྟ་བཞིན་ཡོད་སྐབས་ཐུགས་ཉིད་ཀྱི་ནང་ནས། ངས་བླ་མེད་དཀོན་མཆོག་ནས་ཞལ་གཟིགས་ཤིག་མཐོང་གསལ།

¹⁷ ངས་མ་འོངས་པའི་ཕྱོགས་སུ་བལྟ་བཞིན་ཡོད་སྐབས། ཨིསི་རཱཨེལ་གྱི་མི་རིགས་རྣམས་མཐོང་ཞིང་། མི་རིགས་དེའི་ཁྲོད་ནས་བཀྲག་མདངས་ཆེ་བའི་སྐར་མ་ཞིག་དང་མཚུངས་པའི་རྒྱལ་པོ་ཞིག་ཡོང་རྒྱུ་དང་། དེ་ནི་ཨིསི་རཱཨེལ་ཡུལ་ནས་སྐར་མ་དུ་བ་མཇུག་རིང་བཞིན་དུ་ཤར་ཏེ། དེས་མོ་ཨབ་པའི་འགོ་དཔོན་རྣམས་ལ་ཉེར་བརྡུངས་བྱས་ཏེ། སེད་ཀྱི་མི་རྣམས་འཕམ་པར་བྱ།

¹⁸ ཁོས་ཨེ་དྷོམ་དུ་ཡོད་པའི་དགྲ་བོ་རྣམས་འཕམ་པར་བྱེད་ཅིང་། དེ་ཚོའི་ཡུལ་དེའང་རང་གི་རྒྱུ་ནོར་གྱི་ཁོངས་སུ་གཏོགས་པར་བྱེད་རྒྱུ་ཡིན་པས། ཨིསི་རཱཨེལ་ལ་མུ་མཐུད་ཀྱིས་རྒྱལ་ཁ་ཐོབ་པར་འགྱུར།

¹⁹ ཨིསི་རཱཨེལ་གྱི་དེ་དག་རྐང་བརྫིས་བཏང་ནས། གསོན་པོར་ལུས་པ་རྣམས་ཀྱང་ཡོངས་སུ་ཚར་བཅད་གཏོང་བར་འགྱུར།

²⁰ དེ་རྗེས་བྷ་ལམ་གྱིས་ཞལ་གཟིགས་ནང་དུ་ཨ་མ་ལེག་པ་རྣམས་མཐོང་ནས་གཤམ་གསལ་ལྟར་ལུང་བསྟན་བཤད་པ། ཨ་མ་ལེག་ནི་མི་རིགས་ཀུན་ལས་སྟོབས་ཆེ་ཤོས་ཤིག་ཏུ་འགྱུར་མོད། འོན་ཀྱང་མཐའ་མར་དེ་ནི་དུས་རྒྱུན་གྱི་ཆེད་དུ་འཇིག་པར་འགྱུར།

²¹ ཁོས་ཞལ་གཟིགས་ནང་དུ་ཀེ་ནི་པ་རྣམས་མཐོང་ནས་གཤམ་གསལ་ལྟར་ལུང་བསྟན་བརྒྱབ་པ། ད་ལྟ་ཁྱོད་གནས་སྡོད་བྱེད་བཞིན་པའི་གནས་དེ་ནི། བྲག་རི་མཐོ་པོའི་ཁར་ཆགས་པའི་བྱིའུའི་ཚང་དང་འདྲ་བ་བཙན་པོ་ཡོད་པ་རེད།

²² ཨ་སུར་པ་ཚོས་ཁྱོད་ཚོ་ཀེ་ནི་པ་ཚོར་འཛིན་བཟུང་བྱས་ཏེ་འཁྲིད་སྐབས། ཁྱོད་ཚོ་འཇིག་པར་འགྱུར།

²³ སྐབས་དེར་བྷ་ལམ་གྱིས་ལུང་བསྟན་བརྒྱབ་པ་འདི་ལྟ་སྟེ། བྱང་ཕྱོགས་ཁུལ་དུ་འཛོམས་པའི་མི་དེ་ཚོ་སུ་ཡིན་ནམ།

²⁴ བཙན་འཛུལ་བ་རྣམས་ས་ཡི་པེརེསེ་ནས་མཚོ་ཐོག་བརྒྱུད་ནས་ཡོང་བར་འགྱུར། ཨ་ཤུར་དང་ཨེ་བྷེར་གཉིས་དབང་དུ་བསྡུ་མོད། འོན་ཀྱང་དེ་ཚོ་རང་ཉིད་ནི་དུས་རྒྱུན་གྱི་ཆེད་དུ་འཇིག་པར་འགྱུར།

²⁵ དེ་རྗེས་བྷ་ལམ་གྲ་སྒྲིགས་བྱས་ཏེ་རང་གི་ཁང་པར་ལོག་གོ བྷ་ལག་ཀྱང་རང་གནས་སུ་ལོག་ཕྱིན་ནོ༎