གྲངས་ཀ 23 - Tibetan Old Testament 2011

¹ དེ་ནས་བྷ་ལམ་གྱིས་བྷ་ལག་ལ། འདིར་ངའི་དོན་དུ་མཆོད་ཁྲི་བདུན་བཞེངས་ནས་གླང་བདུན་དང་ལུག་ཐུག་བདུན་འཁྲིད་ཡོང་དགོས་ཅེས་ཟེར་བ་དང་།

² བྷ་ལག་གིས་དེ་བཞིན་བྱས་ཏེ། ཁོ་དང་བྷ་ལམ་གྱིས་མཆོད་ཁྲི་རེ་རེའི་ཁར་གླང་རེ་དང་ལུག་ཐུག་རེར་མཆོད་པར་འབུལ་ལོ།

³ ཡང་བྷ་ལམ་གྱིས་བྷ་ལག་ལ། ཁྱེད་རང་སྦྱིན་སྲེག་གི་མཆོད་ཁྲིའི་འགྲམ་དུ་ལངས་ཤིག གཙོ་བོ་དཀོན་མཆོག་ང་དང་ཐུག་འཕྲད་གནང་ཡོང་ངམ་མི་ཡོང་བལྟ་བའི་ཕྱིར་ང་འགྲོ་གི་ཡིན། ཁོང་གིས་ང་ལ་གང་མངོན་པར་མཛད་པ་དེ། ངས་ཁྱོད་ལ་ཤོད་ཀྱི་ཡིན་ཞེས་སྨྲས་ནས། བྷ་ལམ་གཅིག་པོར་རིའི་རྩེ་མོར་ཕྱིན་ནོ།

⁴ དཀོན་མཆོག་གི་ཁོ་དང་འཕྲད་ནས། བྷ་ལམ་གྱིས། ངས་མཆོད་ཁྲི་བདུན་བཞེངས་ནས་དེ་ཚོ་རེ་རེའི་ཁར་གླང་རེ་དང་ལུག་ཐུག་རེར་འབུལ་བར་ཕུལ་ཡོད་ཅེས་ཞུས་པས།

⁵ གཙོ་བོ་དཀོན་མཆོག་གིས་བྷ་ལམ་ལ་ཁོས་གང་སྨྲས་དགོས་པའི་སྐོར་གསུངས་ནས། བྷ་ལག་ལ་གསུང་འཕྲིན་དེ་ཤོད་ཕྱིར་ཁོ་ཕྱིར་ལོག་བཏང་གནང་ངོ་།

⁶ དེ་ནས་ཁོ་ཕྱིར་ལོག་པ་དང་བྷ་ལག་ནི་ད་དུང་མོ་ཨབ་པའི་འགོ་བྱེད་རྣམས་དང་མཉམ་དུ་སྦྱིན་སྲེག་གི་མཆོད་པའི་འགྲམ་དུ་ལངས་ཡོད་དོ།

⁷ བྷ་ལམ་གྱིས་ལུང་བསྟན་བརྒྱབ་པ་འདི་ལྟ་སྟེ། མོ་ཨབ་ཀྱི་རྒྱལ་པོ་བྷ་ལག་གིས། ཤར་གྱི་རི་བརྒྱུད་ཁུལ་ལམ་སི་རི་ཡ་ནས་ང་འཁྲིད་ཡོང་བ་དང་། ཁོས། ཡོང་ནས་ངའི་ཆེད་དུ་གཏམ་སྨྲོས་ཤིག། ཨིསི་རཱཨེལ་སྟེང་དུ་མོད་པ་གཏོང་ཞིག་གསུངས་སོ།

⁸ དཀོན་མཆོག་ཁོང་གིས་དམོད་པ་མ་གནང་པའི། ང་ཡིས་ཇི་ལྟར་དམོད་པ་གཏང་བ་ནུས། ཁོང་གིས། དེ་ཚོ་འཇིག་པར་འགྱུར་བའི་དམོད་ཚིག་གཙོ་བོ་དཀོན་མཆོག་གི་མ་གསུངས་བར་ངས་ནི་དེ་ཚོར་ཇི་ལྟར་དམོད་ནུས་སམ།

⁹ བྲག་རི་མཐོ་པོའི་སྟེང་ནས་ངས་དེ་ཚོ་མཐོང་ཐུབ་པ་དང། རི་བོའི་སྒང་ནས་ངས་དེ་ཚོར་བལྟའང་ཐུབ། དེ་ནི་རང་ཉིད་གཅིག་པུར་སྡོད་པའི་མི་རིགས་ཡིན་པས། མི་རིགས་གཞན་ལས་དེ་ཚོར་བྱིན་རླབས་མང་བ་ཡོད་པ་དེ་ཁོ་ཆོས་ཤེས་ཀྱི་ཡོད་པ་རེད།

¹⁰ ཨིསི་རཱཨེལ་པའི་རིགས་བརྒྱུད་ནི་སའི་རྡུལ་དང་མཚུངས་ཤིང་། དེ་དག་ཁ་གྲངས་མང་བའི་རྐྱེན་གྱིས་གྲངས་རྩིས་བརྒྱབ་མི་ཐུབ་པ་ཡིན་ནོ། ང་ནི་ཁོང་གི་མི་འབངས་བཞིན་དུ་འགྱུར་ཏེ་རང་གི་མི་ཚེ་མཐའ་མར་འཁྱོལ་དུ་བཅུག། ཆོས་དྲང་མི་ལྟར་ང་ནི་ཞི་བདེའི་ངང་དུ་འཆི་རུ་འཇུག་རུ་འཇུག།

¹¹ དེ་ནས་བྷ་ལག་གིས་བྷ་ལམ་ལ། ཁྱོད་ཀྱིས་ང་ལ་འདི་འདྲ་གང་བྱས་པ་ཡིན་ནམ། ངས་ཁྱོད་ལ་རང་གི་དགྲ་བོར་དམོད་པ་གཏོང་ཕྱིར་འདིར་ཁྲིད་ཡོང་བ་ཡིན་མོད། འོན་ཀྱང་ཁྱོད་ཀྱིས་ནི་དེ་ཚོར་བྱིན་རླབས་ཀྱི་ཤིས་བརྗོད་ཤ་སྟག་སྨྲས་སོ་ཞེས་བརྗོད་པ་དང་།

¹² ལན་དུ་བྷ་ལམ་གྱིས། གཙོ་བོ་དཀོན་མཆོག་གིས་ང་ལ་གང་གསུངས་པ་དེ་རང་གཅིག་པུ་ངས་ཤོད་ཐུབ་ཅེས་སྨྲས་སོ༎

བྷ་ལམ་གྱི་ལུང་བསྟན་གཉིས་པ།

¹³ དེ་ནས་བྷ་ལག་གི་བྷ་ལམ་ལ། ང་དང་མཉམ་དུ་ས་གནས་གཞན་ཞིག་ཏུ་འགྲོ། དེར་ཁྱོ་ཀྱིས་ཨིསི་རཱཨེལ་པ་འགའ་ཤས་མཐོང་ཡོང་། ཁྱོད་ཀྱིས་ས་གནས་དེ་ནས་ངའི་ཕྱིར་ཁོ་ཚོར་དམོད་པ་གཏོང་ཞིག་ཅེས་སྨྲས་ནས།

¹⁴ ཁོས་དེ་ལ་ཛོ་ཕིམ་ཞེས་པའི་ཐང་དུ་ཡོད་པའི་རི་བོ་པིསི་གཱའི་རྩེ་མོར་འཁྲིད་དེ། དེར་ཡང་ཁོས་མཆོད་ཁྲི་བདུན་བཞེངས་ཏེ། མཆོད་ཁྲི་རེ་རེའི་སྟེང་དུ་གླང་གཅིག་དང་ལུག་ཐུག་གཅིག་འབུལ་བར་ཕུལ་ལོ།

¹⁵ དེ་ནས་བྷ་ལམ་གྱིས་བྷ་ལག་ལ། ཁྱོད་འདིར་སྦྱིན་སྲེག་གི་མཆོད་པའི་འགྲམ་དུ་ལངས་ཤིག ང་ནི་གཙོ་བོ་དཀོན་མཆོག་མཇལ་དུ་ཕར་ཙམ་ཞིག་འགྲོ་གི་ཡིན་ཞེས་སྨྲས་སོ།

¹⁶ གཙོ་བོ་དཀོན་མཆོག་གིས་བྷ་ལམ་དང་ཐུག་འཕྲད་གནང་ནས་ཁོ་ལ་བཀའ་གནང་དགོས་པ་དེ་གསུངས་པའི་རྗེས་སུ། བྷ་ལག་ལ་གསུང་འཕྲིན་དེ་ཤོད་ཕྱིར་ཁོ་ཕྱིར་ལོག་བཏང་གནང་ངོ་།

¹⁷ དེ་ནས་ཁོ་ཕྱིར་ལོག་པ་དང་། བྷ་ལག་ནི་སྦྱིན་སྲེག་གི་མཆོད་པའི་འགྲམ་དུ་མོ་ཨབ་པའི་འགོ་བྱེད་རྣམས་དང་མཉམ་དུ་ད་དུང་ལངས་ཡོད་པ་མཐོང་ངོ་། གཙོ་བོ་དཀོན་མཆོག་གིས་བཀའ་གང་གནང་བྱུང་ཞེས་བྷ་ལག་གིས་འདྲིས་པ་དང་།

¹⁸ བྷ་ལམ་གྱིས་གཤམ་གསལ་ལྟར་ལུང་བསྟན་སྨྲས་པ། ཛིབ་པོར་གྱི་བུ་བྷ་ལག་ཤོག་ལ་ངས་གང་སྨྲས་པར་ཉོན་ཞིག

¹⁹ དཀོན་མཆོག་གིས་མི་དང་འདྲ་བར་རྫུན་གཏམ་མི་གསུངས་ཤིང་། ཁོང་ནི་མི་དང་འདྲ་བ་མ་ཡིན་པས། ཉིད་ཀྱི་ཐུགས་སེམས་ནམ་ཡང་བསྒྱུར་བ་གནང་མི་ཡོང་། ཁོང་གིས་དམ་བཅའ་གང་གནང་བ་ཚང་མ་འགྲུབ་པར་མཛད་དོ། ཁོང་གིས་གང་གསུངས་པ་ཐམས་ཅད་དེ་བཞིན་ཆ་ཚང་སྒྲུབ་པར་འགྱུར།

²⁰ ང་ལ་བྱིན་གྱིས་བརླབས་དགོས་བཀའ་ཕེབས་ཟིན་པ་ཡིན་པས། ཁོང་གིས་བྱིན་རླབས་གནང་ཟིན་པ་དེ་ནི་ངས་ནམ་ཡང་ཟློག་པར་བྱེད་མི་ནུས།

²¹ མ་འོངས་པ་ན་ཨིསི་རཱཨེལ་ཐོག་ཏུ་རྐྱེན་ངན་དཀའ་སྡུག་སོགས་གང་ཡང་མི་ཡོང་བ་དེ་ནི་ངས་ད་ལྟ་ནས་མཐོང་ཐུབ་པ་མ་ཟད། གཙོ་བོ་དཀོན་མཆོག་ཁོ་ཚོའི་དཀོན་མཆོག་ནི་དེ་ཚོ་དང་མཉམ་དུ་བཞུགས་ཡོད་ཅིང་། ཁོང་ནི་དེ་ཚོའི་རྒྱལ་པོ་ཡིན་ཞེས་དེ་ཚོས་ཁྱབ་བསྒྲགས་བྱས་བཞིན་འདུག

²² ཁོང་གིས་དེ་ཚོར་ཨི་ཇིབ་ནས་བཏོན་ཏེ་འཁྲིད་ཕེབས་པ་ཡིན་པས། ཁོང་ནི་དེ་ཚོའི་ཕྱོགས་གཏོགས་མཛད་དེ་གླང་རྒོད་བཞིན་དུ་འཐབ་པར་མཛད།

²³ ཨིསི་རཱཨེལ་མི་རིགས་སྟེང་དུ་མཐུ་དང་ངན་སྔགས་སོགས་འཕོག་རྒྱུ་མེད་དོ། མི་ཚོས་ཨིསི་རཱཨེལ་གྱི་སྐོར་ལ་འདི་ལྟར་སྨྲ་བར་འགྱུར། ལྟོས་དང་གཙོ་བོ་དཀོན་མཆོག་གི་མཛད་པ་གང་འདྲ་ཞིག་གནང་བཞག།

²⁴ ཨིསི་རཱཨེལ་མི་རིགས་ནི་སེང་གེ་སྟོབས་ཆེན་ཞིག་དང་འདྲ་ཞིང་། དེས་སེམས་ཅན་བསད་ནས་སྡེར་མོས་དབྲལ་ཏེ་ཤ་ཟ་ཞིང་ཁྲག་མ་འཐུང་བར་དུ་ངལ་གསོ་མི་བྱེད་དོ།

²⁵ དེ་ནས་བྷ་ལག་གིས་བྷ་ལམ་ལ། ཁྱོད་ཀྱིས་ཨིསི་རཱཨེལ་མི་དམངས་ལ་དམོད་པ་མི་བརྒྱབ་མོད། འོན་ཀྱང་དེ་ཚོར་བྱིན་རླབས་སྤྲོད་རྒྱུ་དེ་མཚམས་འཇོག་བྱེད་རོགས་བྱོས་ཤིག་ཞེས་པའི་ལན་དུ།

²⁶ བྷ་ལམ་གྱིས། གཙོ་བོ་དཀོན་མཆོག་གིས་ང་ལ་བཀའ་གང་གནང་བ་དེ་བཞིན་ངས་བྱེད་དགོས་ཅེས་ཁྱོད་ལ་ལབ་མ་བྱུང་ངམ་ཞེས་སྨྲས་སོ༎

བྷ་ལམ་གྱི་ལུང་བསྟན་གསུམ་པ།

²⁷ བྷ་ལག་གིས། ང་དང་མཉམ་དུ་ཤོག་ཅིག། ད་ངས་ཁྱོད་ས་གནས་གཞན་ཞིག་ཏུ་འཁྲིད་ཀྱི་ཡིན། གཅིག་བྱས་ན་གནས་དེ་ནས་དཀོན་མཆོག་གིས་ཁྱོད་ལ་ངའི་དོན་དུ་མི་དེ་ཚོར་དམོད་པ་གཏོང་བཅུག་པར་ཡང་སྲིད་ཅེས་སྨྲས་སོ།

²⁸ དེ་ནས་ཁོས་བྷ་ལམ་ལ་པི་ཨོར་ཞེས་པའི་རི་བོའི་རྩེ་རུ་འཁྲིད་ཅིང་། གནས་དེ་ནས་མི་མེད་འབྲོག་སྟོང་གི་ས་ཁུལ་དེ་ཚོ་མཐོང་གི་ཡོད་དོ།

²⁹ དེ་ནས་བྷ་ལམ་གྱིས་ཁོ་ལ། འདིར་ངའི་དོན་དུ་མཆོད་ཁྲི་བདུན་བཞེངས་ནས། དེར་གླང་བདུན་དང་ལུག་ཐུག་བདུན་རེ་འཁྲིད་ཡོང་དགོས་ཅེས་སྨྲས་པ་དང་།

³⁰ བྷ་ལག་གིས་ཁོས་སྨྲས་པ་བཞིན་དུ་བྱས་ཏེ་མཆོད་ཁྲི་རེར་གླང་རེ་དང་ལུག་ཐུག་རེ་འབུལ་བར་ཕུལ་ལོ༎