གྲངས་ཀ 22 - Tibetan Old Testament 2011

མོ་ཨབ་ཀྱི་རྒྱལ་པོས་བྷ་ལམ་ལ་བོས་པ།

¹ ཨིསི་རཱཨེལ་པ་རྣམས་མདུན་བསྐྱོད་བྱེད་དེ་མོ་ཨབ་ཀྱི་ཤར་ཕྱོགས་ཀྱི་ཐང་དུ་སྒར་ས་བརྒྱབ་ནས་བསྡད་དོ། ཡང་ས་གནས་དེ་ནི་ཡོར་དན་གྱི་ཤར་ཕྱོགས་དང་ཡ་རི་ཀོའི་མདུན་ངོས་སུ་འཁེལ་གྱི་ཡོད་པ་ཡིན་ནོ།

² ཛིབ་པོར་གྱི་བུ། མོ་ཨབ་ཀྱི་རྒྱལ་པོ་བྷ་ལག་གིས་ཨིསི་རཱཨེལ་པ་ཚོའི་གྲངས་འབོར་ག་ཚོད་ཡོད་མེད་དང་། ཨིསི་རཱཨེལ་པ་ཚོས་ཨ་མོར་པ་རྣམས་ལ་གང་བྱས་པའི་སྐོར་ཐོས་ནས།

³ ཁོ་དང་ཁོའི་མི་འབངས་ཚང་མར་ཧ་ཅང་འཇིག་སྣང་ཆེན་པོ་བྱུང་ངོ་།

⁴ དེ་རྗེས་མོ་ཨབ་ཚོས་མིད་ཡན་པ་རྣམས་ཀྱི་འགོ་བྱེད་ཚོ་ལ། གླང་གིས་རྩ་ཁར་རྩ་ཟས་པ་བཞིན་ཨིསི་རཱཨེལ་པ་འདི་ཚོའི་མི་ཚོགས་ཀྱིས་ང་ཚོའི་མཐའ་འཁོར་ལ་ཡོད་པ་ཚང་མ་རྩ་མེད་གཏོང་ཉེན་འདུག་ཅེས་སྨྲས་པ་དང་། རྒྱལ་པོ་བྷ་ལག་གིས།

⁵ བྷི་ཨོར་གྱི་བུ་བྷ་ལམ་ལ་འབོད་པའི་ཕྱིར་བང་ཆེན་རྣམས་བཏང་ངོ་། སྐབས་དེར་བྷ་ལམ་ནི་ཡུབ་རད་གཙང་པོའི་འགྲམ་དུ་ཡོད་པའི་ཡུལ་ཨ་མའོ་ཞེས་པའི་ས་གནས་པེ་ཐོར་ལ་ཡོད་པ་ཡིན་ཏེ། དེ་ཚོས་ཁོའི་རྩར་བྷ་ལག་ནས་བཏང་བའི་གཤམ་གསལ་ལན་དེ་བསྐྱེལ་ལོ། ངས་ཁྱེད་ལ་སྙན་གསན་ཞུ་རྒྱུར། ཨི་ཇིབ་ནས་ཨིསི་རཱཨེལ་མི་རིགས་ཡོངས་རྫོགས་ཤིག་ཕྱིར་ཐོན་བྱས་ཡོད་པས། དེ་ཚོས་ཕྱོགས་ཀུན་ཏུ་ཁྱབ་ནས་འགྲོ་གི་ཡོད་པ་དང། དེ་ཚོས་ང་ཚོའི་ཡུལ་ཡང་དབང་འཛིན་བྱེད་རྒྱུའི་སྡིག་ར་བསྐུལ་གྱི་འདུག

⁶ དེ་ཆོའི་གྲངས་འབོར་ནི་ང་ཚོ་ལས་མང་བ་འདུག་པས། ད་ཁྱེད་ཕེབས་ནས་དེ་ཚོར་ངའི་ཕྱིར་དམོད་པ་ཞིག་གནང་བར་མཛོད། དེ་ལྟར་གནང་བ་ཡིན་ན་ང་ཚོས་དེ་དག་ལས་རྒྱལ་ཞིང་དེ་ཚོ་ཡུལ་ནས་ཕྱིར་སྐྲོད་བྱེད་ཐུབ་མི་ཡོང་ངམ། ཁྱེད་ཀྱིས་གཞན་ལ་བྱིན་རླབས་གནང་དུས་དེ་ཚོར་བྱིན་རླབས་ཐོབ་པ་དང་། དེ་བཞིན་དམོད་པ་བཏང་དུས་དེ་ཚོར་དམོད་པ་འཕོག་གི་ཡོད་པ་དེ་ངས་ཤེས་ཀྱི་ཡོད།

⁷ དེ་ནས་མོ་ཨབ་པ་དང་མིད་ཡན་པའི་འགོ་བྱེད་ཚོས། དམོད་པའི་དོན་དུ་སྤྲོད་དགོས་པའི་དངུལ་དག་འཁྱེར་ཏེ། བྷ་ལམ་ལ་བྷ་ལག་གིས་བསྐུར་བའི་ལེན་དེ་བཤད་པ་དང་།

⁸ བྷ་ལམ་གྱིས་དེ་དག་ལ། དོ་དགོང་ཁྱོད་ཚོ་འདི་གར་ཞག་སྡོད་བྱེད་དགོས། གཙོ་བོ་དཀོན་མཆོག་གིས་ང་ལ་གང་གསུངས་པ་དེ་ངས་ཁྱོད་ཚོར་སང་ཉིན་ལབ་ཀྱི་ཡིན་ཞེས་སྨྲས་སོ། དེར་བརྟེན་མོ་ཨབ་པའི་འགོ་བྱེད་རྣམས་བྷ་ལམ་དང་མཉམ་དུ་བསྡད་དོ།

⁹ གཙོ་བོ་དཀོན་མཆོག་བྷ་ལམ་གྱི་རྩར་ཕེབས་ནས། ཁྱོད་དང་མཉམ་དུ་སྡོད་མཁན་མི་དེ་ཚོ་སུ་ཡིན་ནམ་ཞེས་གསུངས་པས།

¹⁰ བྷ་ལམ་གྱིས། མོ་ཨབ་ཀྱི་རྒྱལ་པོ་བྷ་ལག་གིས་དེ་ཚོ་ངའི་རྩར་བཏང་བ་རེད།

¹¹ ཨི་ཇིབ་ནས་ཐོན་ཡོང་་བའི་མི་རིགས་ཤིག་ཡུལ་ཚང་མར་ཁྱབ་ཡོད་པས། ཁོང་གིས་དེ་ཚོར་དམག་འཐབ་ནས་མཐར་སྐྲོད་བྱེད་ཐུབ་པའི་ཕྱིར་ངས་དེ་ཚོར་དམོད་པ་བརྒྱབ་དགོས་ཅེས་ལེན་བསྐུར་འདུག་ཞུས་པས།

¹² དེ་ནས་གཙོ་བོ་དཀོན་མཆོག་གིས་བྷ་ལམ་ལ། ཁྱོད་མི་འདི་ཚོ་དང་མཉམ་དུ་མ་འགྲོ། ཨིསི་རཱཨེལ་པ་རྣམས་ལ་དམོད་པ་མ་བརྒྱབ་ཅིག གང་ལ་ཟེར་ན། ངས་དེ་ཚོར་བྱིན་གྱིས་བརླབས་ཡོད་ཅེས་གསུངས་སོ།

¹³ སང་ཉིན་སྔ་དྲོ་བྷ་ལམ་བྷ་ལག་གི་བང་ཆེན་རྣམས་ཀྱི་རྩར་ཕྱིན་ཏེ། ད་ཁྱོད་ཚོ་རང་གི་ནང་དུ་ཕྱིར་ལོག་བྱོས་ཤིག གཙོ་བོ་དཀོན་མཆོག་གིས་ང་ལ་ཁྱོ་ཚོ་དང་མཉམ་དུ་འགྲོ་ཆོག་པའི་དགོངས་པ་གནང་མ་བྱུང་ཞེས་སྨྲས་པ་དང་།

¹⁴ དེ་ཚོ་བྷ་ལག་གི་རྩར་ཕྱིར་ལོག་བྱས་ཏེ། བྷ་ལམ་ཡོང་འདོད་མ་བྱས་པའི་གནས་ཚུལ་དེ་ཁོ་ལ་བཤད་དོ།

¹⁵ དེ་ནས་བྷ་ལག་གིས་སྔོན་ལས་མི་གྲངས་མང་བ་དང་འགོ་བྱེད་གལ་ཆེ་བ་རྣམས་བྷ་ལམ་གྱི་རྩར་བཏང་ཞིང་།

¹⁶ དེ་ཚོ་བྷ་ལམ་གྱི་རྩར་ཕྱིན་ནས་བྷ་ལག་གིས་བཏང་བའི་ལན་དེ་བསྐྱེལ་ལོ། ཡང་ལན་དེ་ནི་འདི་ལྟ་སྟེ། ཁྱེད་ངའི་རྩར་ཡོང་བར་དོན་གནད་གང་གིས་ཀྱང་མ་བཀག་བར་ཤོག།

¹⁷ ངས་ཁྱེད་ལ་བྱ་དགའ་ཆེན་པོ་ཞིག་འབུལ་རྒྱུ་ཡིན་པ་དང་། ཁྱེད་ཀྱི་གང་གསུངས་པ་ཚང་མ་སྒྲུབ་རྒྱུ་ཡིན། དེ་བས་ན་ཁྱེད་ཕེབས་ནས་མི་འདི་ཚོར་དམོད་པ་འདེབས་རོགས་གནང་།

¹⁸ དེའི་ལན་དུ་བྷ་ལམ་གྱིས། བྷ་ལག་གིས་སོ་སོའི་ཕོ་བྲང་ནང་གི་གསེར་དངུལ་ཇི་ཡོད་ང་ལ་སྤྲད་ནའང་གཙོ་བོ་དཀོན་མཆོག་གི་བཀའ་ནི་དོན་ཆུང་ངུ་ཞིག་གི་ཕྱིར་དུ་བཅག་མི་ཐུབ།

¹⁹ འོན་ཀྱང་སྔོན་ལ་ཡོང་མཁན་ཚོ་དང་འདྲ་བར་ཁྱོད་ཚོའང་དོ་དགོང་འདིར་སྡོད་དགོས། དེ་ལྟར་བྱས་པ་ཡིན་ན། གཙོ་བོ་དཀོན་མཆོག་གིས་ང་ལ་བཀའ་གཞན་གནང་རྒྱུ་གང་ཡོད་མེད་དེ་ངས་ཤེས་ཐུབ་པས་ཕྱིར་རོ།

²⁰ མཚན་མོ་དེ་ལ་གཙོ་བོ་དཀོན་མཆོག་བྷ་ལམ་གྱི་རྩར་ཕེབས་ནས། གལ་ཏེ་མི་འདི་ཚོས་ཁྱོད་རང་འཁྲིད་འགྲོ་བའི་ཕྱིར་ཡོང་བ་ཡིན་ན། ཁྱོད་རང་འགྲོ་རྒྱུའི་གྲ་སྒྲིག་བྱོས་ཤིག། འོན་ཀྱང་ངས་ཁྱོད་ལ་གང་ལབ་པ་དེ་འབའ་ཞིག་བྱོས་ཤིག་ཅེས་གསུངས་པ་དང་།

²¹ སང་ཉིན་སྔ་དྲོར་བྷ་ལམ་རང་གི་བོང་བུར་སྒ་བརྒྱབ་ནས་མོ་ཨབ་པའི་འགོ་འཁྲིད་རྣམས་དང་མཉམ་དུ་ཕྱིན་ནོ༎

བྷ་ལམ་དང་ཁོའི་བོང་བུ།

²² བྷ་ལམ་དེ་བཞིན་འགྲོ་གིན་ཡོད་པ་གཟིགས་ནས་གཙོ་བོ་དཀོན་མཆོག་ཐུགས་ཁྲོས་ཤིང་། ཁོ་བོང་བུར་ཞོན་ནས་རང་གི་གཡོག་པོ་གཉིས་དང་མཉམ་དུ་འགྲོ་བཞིན་པའི་སྐབས་སུ་གཙོ་བོ་དཀོན་མཆོག་གིས་ཕོ་ཉ་ཞིག་ཁོའི་མདུན་དུ་ལངས་ནས་འགྲུལ་ལམ་བཀག་པ་དང་།

²³ ཕོ་ཉ་དེས་ལག་ཏུ་རལ་གྲི་འཁྱེར་ནས་ལམ་དཀྱིལ་དུ་ལངས་ནས་བསྡད་ཡོད་པ་བོང་བུས་དེ་མཐོང་བའི་རྗེས་སུ། བོང་བུས་ལམ་དེ་སྤངས་ནས་ཞིང་ཁའི་ཕྱོགས་སུ་ཕྱིན་ནོ། བྷ་ལམ་གྱིས་བོང་བུ་བརྡུང་ནས་ལམ་ཕྱོགས་སུ་ཕྱིར་ལོག་འཁྲིད་ཡོང་ངོ་།

²⁴ དེ་ནས་ཕོ་ཉ་དེ་རྒུན་མཚལ་གཉིས་ཀྱི་བར་ལ་ཞོག་རེ་རེ་ལ་རྡོའི་ར་བ་རྩིག་ཡོད་པའི་ལམ་དོག་པོ་དེར་ལངས་སོ།

²⁵ བོང་བུས་ཕོ་ཉ་དེ་མཐོང་སྐབས། རྩིག་པའི་ཕྱོགས་སུ་ཕྱིན་པ་དང་བྷ་ལམ་གྱི་རྐང་པ་རྩིག་པར་བཙིར་བས། བྷ་ལམ་གྱིས་ཡང་སྐྱར་བུང་བུར་བརྡུངས་སོ།

²⁶ ཕོ་ཉ་དེ་ཡང་སྐྱར་སྔོན་དུ་སོང་ནས་ལམ་ཕྲ་པོ་དོག་ས་ཞིག་ཏུ་ཕན་ཚུན་གཉིས་ནས་སུ་ཞིག་ཀྱང་འགྲོ་མ་ཐུབ་པའི་ས་དོག་པོ་ཞིག་ཏུ་ལངས་སོ།

²⁷ ད་ལན་བོང་བུས་ཕོ་ཉ་དེ་མཐོང་བ་དང་ས་ཁར་བསྡད་པས། བྷ་ལམ་ཁོང་ཁྲོ་འབར་ཞིང་རང་གི་དབྱུག་པ་དེས་བོང་བུར་བརྡུངས་སོ།

²⁸ དེ་ནས་གཙོ་བོ་དཀོན་མཆོག་གིས་བོང་བུ་ལ་སྐད་ཆ་ཤོད་ཐུབ་པའི་ནུས་པ་གནང་བ་དང་། ཁོས་བྷ་ལམ་ལ། ངས་ཁྱེད་ལ་ཅི་བྱས་བྱུང་། ང་ལ་ལན་གསུམ་ཙམ་བརྡུང་དགོས་དོན་གང་ཡིན་ནམ་ཞེས་སྨྲས་པ་དང་།

²⁹ ལན་དུ་བྷ་ལམ་གྱིས། ཁྱོད་ཀྱིས་ང་ལ་གླེན་པ་བཟོས་བྱུང་། གལ་སྲིད་ང་ལ་རལ་གྲི་ཡོད་པ་ཡིན་ན་ངས་ཁྱོད་རང་བསད་པ་ཡོད་ཅེས་སྨྲས་པ་དང་།

³⁰ ལན་དུ་བོང་བུས། ཁྱོད་ཀྱིས་མི་ཚེ་ཧྲིལ་པོར་ཞོན་པའི་བོང་བུ་དེ་ང་མ་ཡིན་ནམ། ཁྱོད་ལ་ངས་འདི་འདྲའི་སྤྱོད་ལམ་དེ་སྔ་བྱས་ཨེ་ཡོད་ཅེས་དྲིས་པའི་ལན་དུ། བྷ་ལམ་གྱིས་དེ་ལྟར་ནམ་ཡང་བྱས་མེད་ཅེས་སྨྲས་སོ།

³¹ དེ་ནས་གཙོ་བོ་དཀོན་མཆོག་གིས་བྷ་ལམ་ལ། ལག་ཏུ་རལ་གྲི་འཁྱེར་ནས་ལངས་ཡོད་པའི་ཕོ་ཉ་དེ་བསྟན་གནང་བ་དང་། བྷ་ལམ་ལུས་ས་ལ་བརྡབ་ནས་ཕྱག་འཚལ་ལོ།

³² ཕོ་ཉས། ཁྱོད་ཀྱིས་རང་གི་བོང་བུར་ཐེངས་གསུམ་ཙམ་བརྡུངས་པ་དེ་ཅི་ཡིན་ནམ། ངས་ཁྱོད་ཀྱིས་ལམ་བཀག་ཕྱིར་ཡོང་པ་ཡིན། གང་ལགས་ཟེར་ན། ཁྱོད་ཀྱིས་ས་ཕྱོགས་འདིར་མ་ཐོན་ན་དགའ་ཡོད།

³³ འོན་ཀྱང་ཁྱོད་ཀྱི་བོང་བུས་ང་མཐོང་ནས་ལན་ཐེངས་གསུམ་ཙམ་ལམ་གཞན་ནས་བསྐོར་ཕྱིན་པ་དང་། བོང་བུས་དེ་ལྟར་མ་བྱས་པ་ཡིན་ན་ངས་ཁྱོད་རང་བསད་ནས་བོང་བུ་དེ་ལ་སྐྱབས་པ་ཡོད་ཅེས་སྨྲས་སོ།

³⁴ ལན་དུ་བྷ་ལམ་གྱིས། ངས་སྡིག་པ་བྱས་ཡོད། ཁྱོད་རང་ངའི་ལམ་བཀག་ནས་ལངས་བསྡད་པ་དེ་ངས་ཤེས་མ་བྱུང་། ཁྱོད་ཀྱིས་ང་འགྲོ་རྒྱུ་དེ་ནོར་འཁྲུལ་ཡིན་པ་བསམ་གྱི་ཡོད་ན་ང་ནང་ལ་ལོག་འགྲོ་གི་ཡིན་ཞེས་སྨྲས་པ་དང་།

³⁵ ཕོ་ཉས། ཁྱོད་མི་འདི་ཚོ་དང་མཉམ་དུ་ཕྱིན་ནས། ངས་གང་སྨྲས་པ་དེ་ཤོད་ཅིག་ཅེས་སྨྲས་པས། བྷ་ལམ་དེ་དག་དང་མཉམ་དུ་ཕྱིན་ནོ༎

བྷ་ལག་གིས་བྷ་ལམ་ལ་དགའ་བསུ་ཞུས་པ།

³⁶ དེ་ནས་བྷ་ལག་གིས་བྷ་ལམ་ཡོང་གི་འདུག་ཟེར་བ་ཐོས་སྐབས། ཁོང་ལ་ཐུགས་འཕྲད་བྱེད་ཕྱིར་ཁོ་མོ་ཨབ་པའི་ས་མཚམས་ཨར་ནོན་གཙང་པོའི་འགྲམ་གྱི་གྲོང་ཁྱེར་ཨར་ཞེས་པའི་བར་དུ་ཕྱིན་ནོ།

³⁷ བྷ་ལག་གིས་ཁོ་ལ། ངས་ཐེངས་དང་པོར་ཁྱོད་འབོད་པར་བཏང་དུས་ཅིའི་ཕྱིར་མ་ཡོང་བ་ཡིན་ནམ། ངས་ཁྱོད་ལ་བྱ་དགའ་ལྡང་ངེས་བཞིན་པ་ཞིག་སྤྲོད་ཐུབ་ཀྱི་མ་རེད་ཅེས་བསམ་བྱུང་ངམ་ཞེས་སྨྲས་པ་དང་།

³⁸ ལན་དུ་བྷ་ལམ་གྱིས། ད་ང་བསླེབས་ཡོད། འོན་ཀྱང་ད་ལྟ་ང་ལ་དབང་ཆ་གང་ཡང་མེད། གཙོ་བོ་དཀོན་མཆོག་གིས་གང་གསུངས་པ་དེ་གཅིག་པོ་ངས་ཤོད་ཐུབ་ཅེས་སྨྲས་པ་དང་།

³⁹ དེ་ནས་བྷ་ལམ་བྷ་ལག་དང་མཉམ་དུ་ཀིར་ཡར་ཧུ་ཛོད་གྲོང་ཁྱེར་དུ་ཕྱིན་ཞིང་།

⁴⁰ དེར་བྷ་ལག་གིས་གླང་དང་ལུག་དག་བསད་ནས་ཤ་གང་ཙམ་ཞིག་བྷ་ལམ་དང་དེ་བཞིན་ཁོ་མཉམ་དུ་ཡོང་བའི་འགོ་བྱེད་རྣམས་ལ་སྤྲད་དོ༎

བྷ་ལམ་གྱི་ལུང་བསྟན་དང་པོ།

⁴¹ སང་ཞོག་སྔ་པོར་བྷ་ལག་གིས་བྷ་ལམ་ལ་བྷ་མོཐ་བྷལ་དུ་ཁྲིད་ཅིང་། གནས་དེ་ནས་བྷ་ལམ་གྱིས་ཨིསི་རཱཨེལ་མི་མང་གི་ཆ་ཤས་ཤིག་མཐོང་ཐུབ་ཀྱི་ཡོད་པ་ཡིན་ནོ༎